Scripture Library

Garuda Purana · Chapter 2.42

2.42.1

iti śrīgāruḍe mahāpurāṇe uttarakhaṇḍe dvitīyāṃśe dharmakāṇḍe pretakalpe śrīkṛṣṇagaruḍasaṃvāde vṛṣotsarganirūpaṇaṃ nāmai kacatvāriṃśattamo 'dhyāyaḥ
śrīgaruḍamahāpurāṇam- 42
śrīviṣṇuruvāca /
yathā dhenusahasreṣu vatso vindati mātaram /
tathā pūrvakṛtaṃ karma kartāramanugacchati

2.42.2

ādityo varuṇo viṣṇurbrahmā somo hutāśanaḥ /
śūlapāṇiśca bhagavānabhinandati bhūmidam

2.42.3

nāsti bhamisamaṃ dānaṃ nāsti bhamisamo nidhiḥ /
nāsti satyasamo dharmo nānṛtātpātakaṃ param

2.42.4

agnerapatyaṃ prathamaṃ suvarṇaṃ bhūrvaiṣṇavī sūryasutāśca gāvaḥ /
lokatrayaṃ tena bhavetpradattaṃ yaḥ kāñcanaṃ gāṃ ca mahīṃ ca dadyāt

2.42.5

trīṇyāhuratidānāni gāvaḥ pṛthvī sarasvatī /
narakāduddharantyete japapūjanahomataḥ

2.42.6

kṛtvā bahūni pāpāni raudrāṇi vipulāni ca /
api gocarmamātreṇa bhūmidānena śudhyati

2.42.7

harantamapi lobhena nirudhyainaṃ nivārayet /
sa yāti narake ghore yastaṃ na parirakṣati

2.42.8

akartavyaṃ na kartavyaṃ prāṇaiḥ kaṇṭhagatairapi /
kartavyameva kartavyamiti dharmavido viduḥ

2.42.9

ākārapravartane pāpaṃ gosahasravadhaiḥsamam /
vṛtticchede tathā vṛtteḥ karaṇaṃ lakṣadhenukam

2.42.10

varamekāpyapahṛtā na tu dattaṃ gavāṃ śatam /
ekāṃ hṛtvā śataṃ dattvā na tena samatā bhavet

2.42.11

svayameva tu yo dattvā svayameva prabādhate /
sa pāpī narakaṃ yāti yāvadābhūtasaṃplavam

2.42.12

na cāśvamedhena tathā vidhivaddakṣiṇāvatā /
avṛttikarśite dīne brāhmaṇe gakṣite yathā

2.42.13

na tadbhavati vedeṣu yajñe subahudakṣiṇe /
yatpuṇyaṃ durbale traste brāhmaṇe parirakṣite

2.42.14

brahmasvaiścasupuṣṭāni vāhanāni balāni ca /
yuddhakāle viśīryante saikatāḥ setavo yathā

2.42.15

svadattāṃ paradattāṃ vā yo harecca vasundharām /
ṣaṣṭivarṣasahasrāṇi viṣṭhāyāṃ jāyate kṛmiḥ

2.42.16

brahmasvaṃ praṇayādbhuktaṃ dahatyāsaptamaṃ kulam /
tadeva cauryarūpeṇa dahatyācandratārakam

2.42.17

lohacūrṇāśmacūrṇāni kadācijjarayetpumān /
brahmasvantriṣu lokeṣu kaḥ pumāñjarayiṣyati

2.42.18

devadravyavināśena brahmasvaharaṇena ca /
kulānyakulatāṃ yānti brāhmaṇātikrameṇa ca

2.42.19

brāhmaṇāti kramo nāsti vipre vidyāvivarjite /
jvalantamagnimutsṛjya na hi bhasmani hūyate

2.42.20

saṃkrāntau yāni dānāni havyakavyāni yāni ca /
saptakalpakṣayaṃ yāvaddadātyarkaḥ punaḥ punaḥ

2.42.21

pratigrahādhyāpanayājaneṣu pratigrahaṃ sveṣṭatamaṃ vadanti /
pratigrahācchrudhyati jāpyahomaṃ na yājanaṃ karma punanti vedāḥ

2.42.22

sadā jāpī sadā homī parapākavivarjitaḥ /
ratnapūrṇāmapi mahīṃ pratigṛhṇanna lipyate

Original text: Garuḍapurāṇa · Edition: Bombay : Venkatesvara Steam Press (or a reprint thereof) · Data entry members of the Sansknet Project · GRETIL (Göttingen) · CC BY-NC-SA 4.0