ગરુડ પુરાણ · અધ્યાય 2.42

ઇતિ શ્રીગારુડે મહાપુરાણે ઉત્તરખણ્ડે દ્વિતીયાંશે ધર્મકાણ્ડે પ્રેતકલ્પે શ્રીકૃષ્ણગરુડસંવાદે વૃષોત્સર્ગનિરૂપણં નામૈ કચત્વારિંશત્તમો ઽધ્યાયઃ
શ્રીગરુડમહાપુરાણમ્- 42
શ્રીવિષ્ણુરુવાચ ।
યથા ધેનુસહસ્રેષુ વત્સો વિન્દતિ માતરમ્ ।
તથા પૂર્વકૃતં કર્મ કર્તારમનુગચ્છતિ

આદિત્યો વરુણો વિષ્ણુર્બ્રહ્મા સોમો હુતાશનઃ ।
શૂલપાણિશ્ચ ભગવાનભિનન્દતિ ભૂમિદમ્

નાસ્તિ ભમિસમં દાનં નાસ્તિ ભમિસમો નિધિઃ ।
નાસ્તિ સત્યસમો ધર્મો નાનૃતાત્પાતકં પરમ્

અગ્નેરપત્યં પ્રથમં સુવર્ણં ભૂર્વૈષ્ણવી સૂર્યસુતાશ્ચ ગાવઃ ।
લોકત્રયં તેન ભવેત્પ્રદત્તં યઃ કાઞ્ચનં ગાં ચ મહીં ચ દદ્યાત્

ત્રીણ્યાહુરતિદાનાનિ ગાવઃ પૃથ્વી સરસ્વતી ।
નરકાદુદ્ધરન્ત્યેતે જપપૂજનહોમતઃ

કૃત્વા બહૂનિ પાપાનિ રૌદ્રાણિ વિપુલાનિ ચ ।
અપિ ગોચર્મમાત્રેણ ભૂમિદાનેન શુધ્યતિ

હરન્તમપિ લોભેન નિરુધ્યૈનં નિવારયેત્ ।
સ યાતિ નરકે ઘોરે યસ્તં ન પરિરક્ષતિ

અકર્તવ્યં ન કર્તવ્યં પ્રાણૈઃ કણ્ઠગતૈરપિ ।
કર્તવ્યમેવ કર્તવ્યમિતિ ધર્મવિદો વિદુઃ

આકારપ્રવર્તને પાપં ગોસહસ્રવધૈઃસમમ્ ।
વૃત્તિચ્છેદે તથા વૃત્તેઃ કરણં લક્ષધેનુકમ્

વરમેકાપ્યપહૃતા ન તુ દત્તં ગવાં શતમ્ ।
એકાં હૃત્વા શતં દત્ત્વા ન તેન સમતા ભવેત્

સ્વયમેવ તુ યો દત્ત્વા સ્વયમેવ પ્રબાધતે ।
સ પાપી નરકં યાતિ યાવદાભૂતસંપ્લવમ્

ન ચાશ્વમેધેન તથા વિધિવદ્દક્ષિણાવતા ।
અવૃત્તિકર્શિતે દીને બ્રાહ્મણે ગક્ષિતે યથા

ન તદ્ભવતિ વેદેષુ યજ્ઞે સુબહુદક્ષિણે ।
યત્પુણ્યં દુર્બલે ત્રસ્તે બ્રાહ્મણે પરિરક્ષિતે

બ્રહ્મસ્વૈશ્ચસુપુષ્ટાનિ વાહનાનિ બલાનિ ચ ।
યુદ્ધકાલે વિશીર્યન્તે સૈકતાઃ સેતવો યથા

સ્વદત્તાં પરદત્તાં વા યો હરેચ્ચ વસુન્ધરામ્ ।
ષષ્ટિવર્ષસહસ્રાણિ વિષ્ઠાયાં જાયતે કૃમિઃ

બ્રહ્મસ્વં પ્રણયાદ્ભુક્તં દહત્યાસપ્તમં કુલમ્ ।
તદેવ ચૌર્યરૂપેણ દહત્યાચન્દ્રતારકમ્

લોહચૂર્ણાશ્મચૂર્ણાનિ કદાચિજ્જરયેત્પુમાન્ ।
બ્રહ્મસ્વન્ત્રિષુ લોકેષુ કઃ પુમાઞ્જરયિષ્યતિ

દેવદ્રવ્યવિનાશેન બ્રહ્મસ્વહરણેન ચ ।
કુલાન્યકુલતાં યાન્તિ બ્રાહ્મણાતિક્રમેણ ચ

બ્રાહ્મણાતિ ક્રમો નાસ્તિ વિપ્રે વિદ્યાવિવર્જિતે ।
જ્વલન્તમગ્નિમુત્સૃજ્ય ન હિ ભસ્મનિ હૂયતે

સંક્રાન્તૌ યાનિ દાનાનિ હવ્યકવ્યાનિ યાનિ ચ ।
સપ્તકલ્પક્ષયં યાવદ્દદાત્યર્કઃ પુનઃ પુનઃ

પ્રતિગ્રહાધ્યાપનયાજનેષુ પ્રતિગ્રહં સ્વેષ્ટતમં વદન્તિ ।
પ્રતિગ્રહાચ્છ્રુધ્યતિ જાપ્યહોમં ન યાજનં કર્મ પુનન્તિ વેદાઃ

સદા જાપી સદા હોમી પરપાકવિવર્જિતઃ ।
રત્નપૂર્ણામપિ મહીં પ્રતિગૃહ્ણન્ન લિપ્યતે