Garuda Purana · Chapter 2.28

iti śrīgāruḍe mahāpurāṇe uttarakhaṇḍe dvitīyāṃśe dharmakāṇḍe pretakalpe śrīkṛṣṇagaruḍasaṃvāde babhruvāhanapretasaṃvāde pretatvahetutannivṛttyupāyanirūpaṇaṃ nāma saptaviṃśo 'dhyāyaḥ
śrīgaruḍamahāpurāṇam- 28
garuḍa uvāca /
sarvepāmanukampārthaṃ brūhi me madhusūdana /
pretatvānmucyate yena dānena sukṛtena vā

śṛkṛṣṇa uvāca /
śṛṇu dānaṃ pravakṣyāmi sarvāśu bhavināśanam /
santaptahāṭakamayaṃ ghaṭakaṃ vidhāya brahmeśakeśavayutaṃ saha lokapālaiḥ /
kṣīrājyapūrṇaviviraṃ praṇipatya bhaktyā viprāya dehi tava dānaśataiḥ kimanyaiḥ

garuḍa uvāca /
kimetkathitaṃ deva vistareṇa vadasva me /
āmuṣmikīṃ krīyāṃ deva utkrāntisamayādanu

saṃsāre sādhu me nātha brūhi kṛtyaṃ janārdana /
yathā kāryā naraiḥ samyak kriyā caivaurdhvadaihikī

kathaṃ pretā mahākāyā raudrarūpā bhayānakāḥ /
kambhavanti suraśreṣṭha karmabhiḥ kaiḥ śubhāśubhaiḥ

piśācāḥ sambhavantīha kasyedaṃ karmaṇaḥ phalam /
tanme kathaya deveśa ahamicchāmi veditum

bhūmyāṃ prakṣipyate kasmātpañcaratnaṃ kuto mukhe /
adhastācca tilā darbhāḥ pādau yāmyāṃ vyavasthitāḥ

kimarthaṃ maṇḍalaṃ bhūmau gomayenopalipyate /
kimarthaṃ smaryate viṣṇuḥ viṣṇusūktañca paṭhyate

kimarthaṃ putraputrāśca tasya tiṣṭhanti cāgrataḥ /
kimarthaṃ dīpadānañca kimarthaṃ viṣṇupūjanam

kimarthamāturo dānaṃ dadāti dvijapuṅgave /
bandhūnmitrāṇyamitrāṃśca kṣamāpayati tatkatham

tilā lohaṃ hiraṇyaṃ ca kārpāsaṃ lavaṇaṃ tathā /
saptadhānyaṃ kṣitirgāvo dīyate kena he tunā

kathaṃ ca mriyate janturmṛtasya ca kuto gatiḥ /
ativāhaśarīraṃ ca kathaṃ viśramate tadā

śaṃva skandhe vahetputro vahnidātā ca pautrakaḥ /
kimarthaṃ deva deveśa ājyenābhyañjanaṃ kutaḥ

yamasūktaṃ kimarthaṃ ca udīcīṃ diśamāharet /
pānīyamekavastreṇa sūryabimbanirīkṣaṇam

yavasarṣapadūrvāścapāṣāṇe nimbacarvaṇam /
vastraṃ naraśca nārī ca vidadhyādadharottaram

annādyaṃ gṛhamāgatya bhoktavyaṃ gotribhiḥ saha /
navakāni ca piṇḍāni kimarthaṃ vitaretsutaḥ

kimarthaṃ catvare dugdhaṃ pātre pakve ca mṛnmaye /
kāṣṭhatrayaṃ guṇe baddhvā kṛtvā rātrau catuṣpathe

niśāyāṃ dīyate dīpo yāvadabdaṃ dinedine /
dāhodakaṃ kimarthaṃ ca saṃvādaḥ svajanaiḥ saha

bhagavannativāhasya navapiṇḍaistu kiṃ bhavet /
kathaṃ devapitṛbhyaśca vāhasyāvāhanaṃ katham /
idaṃ ca kriyate deva kasmātpiṇḍaṃ pradāpayet

kiṃ tatpradīyate tasya piṇḍadānādanantaram /
asthisañcayanaṃ caiva śayyādānaṃ kimarthakam

dvitīye 'hni kutaḥ snānaṃ caturthe sāgnike dvije /
daśame kiṃ malasnānaṃ kāryaṃ sarvajanaiḥ saha

kasmāttailodvartanaṃ ca skandhavāhān gṛhaṃ nayet /
taiḥ samudvartanaṃ cāpi dadyuḥ sthalajalāśraye

deśame 'hani yaḥ piṇḍastaṃ dadyādāmiṣeṇa tu /
piṇḍaṃ caikādaśe kasmād vṛṣotsargaḥ kathaṃ bhavet

śrāddhāni ṣoḍaśaitāni abdaṃ yāvatkuto vada /
annādicodakenaiva ṣaṣṭyadhikaśatatrayam

dinedine ca dātavyaṃ ghaṭānnaṃ pretatṛptaye /
prāpte kāle ca mriyate anityo mānavaḥ prabho

chidraṃ tu naiva paśyāmi kuto jīvaḥ sa nirgataḥ /
kuto gacchanti bhūtāni pṛthivyāpo manastathā

tejo vadasva me nātha vāyurākāśameva ca /
vāyavaścaiva pañcaite kathaṃ gacchanti cāptaye

lobhamohādayaḥ pañca śarīre caiva taskarāḥ /
tṛṣṇā kāmo 'pyahaṅkāraḥ kuto yānti janārdana

puṇyaṃ vāpyatha vāpuṇyaṃ yatkiñcitsukṛtaṃ tathā /
naṣṭe dehe kuto yānti dānāni vividhāni ca

sapiṇḍanaṃ kimarthaṃ ca pūrṇe saṃvatsare 'pi vā /
pretasya melanaṃ sārdhaṃ kaiḥ samaṃ tatra ko vidhiḥ

ye dagdhā ye tvadagdhāśca patitā ye narābhuvi /
yāni cānyāni bhūtāni teṣāmante bhavecca kim

pāpino ye durācārā mudgalatvaṃ ca ye gatāḥ /
ātmaghātī brahmahā ca steyī viśvāsaghātakaḥ

kapilāṃ yaḥ pibecchūdro yaḥ paṭhedvaidikākṣaram /
dhārayedvā brahmasūtraṃ kā gatistasya mādhava

viprasya brāhmaṇī bhāryā saṃgṛhī tā yadā bhavet /
tasmātpāpācca bhīto 'haṃ tanme vada jagatpate /
sarvametanmayā pṛṣṭo vada lokahitāya vai