Garuda Purana · Chapter 2.23

iti śrīgāruḍe mahāpurāṇe uttarakhaṇḍe dvitīyāṃśe dharmakāṇḍe pretakalpe bhīṣma yudhiṣṭhirasaṃvāde pretatvotpattitanmuktipeñcapretopākhyāna nirūpaṇaṃ nāma dvāviṃśo 'dhyāyaḥ
śrīgaruḍamahāpurāṇam- 23
garuḍa uvāca /
kiṅkiṃ kurvanti vai pretāḥ piśācatvevyavasthitāḥ /
vadanti vā kadācitkiṃ tadvadasva sureśvara

śrībhagavānuvāca /
teṣāṃ svarūpaṃ vakṣyāmi cihnaṃ svapnaṃ yathātatham /
kṣutpipāsārditāste vai praviśeyuḥ svaveśmani

pratiṣṭhā vāyudeheṣu śayānāṃstu svavaṃśajān /
tatra yacchanti liṅgāni darśayanti khageśvara

svaputrasvakalatrāṇi svabandhuntatra gacchati /
hayo gajo vṛṣo martyodṛśyate vikṛtānanaḥ

śayānaṃ viparītaṃ tu ātmānaṃ ca viparyayam /
utthitaḥ paśyati yastu tadvindyātpretanirmitam

svapne narau hi nigaḍairbadhyate bahudhā yadi /
annaṃ ca yācate svapne kuveṣaḥ pūrvajo mṛtaḥ

svapne yo bhujyamānasya gṛhītvānnaṃ palāyate /
ātmanastu paro vāpi tṛṣārtastu jalaṃ pibet

vṛṣabhārohaṇaṃ svapne vṛṣabhaiḥ saha gacchati /
utpatya gaganaṃ yāti tīrthe yāti kṣudhāturaḥ

svavācā vadate yastu govṛṣadvijāvājiṣu /
liṅge gaje tathā deve bhūte prete niśācare

svapnamadhye tu pakṣīndra pretaliṅgānyanekadhā /
svakalatraṃ svabandhuṃ vā svasutaṃ svapatiṃ vibhum /
vidyamānaṃ mṛtaṃ paśyetpretadoṣeṇa niścitam

yācate yaḥ paraṃ svapne kṣuttṛḍbhyāṃ ca pariplutaḥ /
tīrthe gatvā dahetpiṇḍānpretadauṣairna saṃśayaḥ

nirgacchedvā gṛhādvāpi svapne putrastathā paśuḥ /
pitā bhrātā kalatraṃ ca pretadoṣaistu paśyati

cihnānyetāni pakṣīndra prāyaścittaṃ nivedayet /
kṛtvā snānaṃ gṛhe tīrthe śrīvṛkṣe tarpaṇaṃ jalaiḥ

kṛṣṇadhānyāni pūjāṃ ca pradadyādvedapārage /
homaṃ kuryādyathāśakti sampūrṇaṃ vācayetsudhīḥ

etaddhi śraddhayā yastu pretaliṅganidarśanam /
paṭhate śṛṇute vāpi pretacihnaṃ vinaśyati