ગરુડ પુરાણ · અધ્યાય 1.227

ઇતિ શ્રીગારુડે મહાપુરાણે પૂર્વખણ્ડે પ્રથમાંશાખ્યે આચારકાણ્ડેષ્ટાઙ્ગયોગકથનં નામ ષડ્વિંશત્યધિકદ્વિશતતમો ઽધ્યાયઃ
શ્રીગરુડમહાપુરાણમ્- 227
સૂત ઉવાચ ।
વિષ્ણુભક્તિં પ્રવક્ષ્યામિ યયા સર્વમવાપ્યતે ।
યથા ભક્ત્યા હરિસ્તુષ્યેત્તથા નાન્યેન કેનચિત્

મહતઃ શ્રેયસો મૂલં પ્રસવઃ પુણ્યસન્તતેઃ ।
જીવિતસ્ય ફલં સ્વાદુ નિયતં સ્મરણં હરેઃ

તસ્માત્સેવા બુધૈઃ પ્રોક્તા ભક્તિસાધનભૂયસી ।
તે ભક્તા લોકનાથસ્ય નામકર્માદિકીર્તને

મુઞ્ચન્ત્યશ્રૂણિ સંહર્ષાદ્યે પ્રહૃષ્ટનૂરુહાઃ ।
જગદ્ધાતુર્મહેશસ્ય દિવ્યાજ્ઞાચરણા વયમ્

ઇહ નિત્યક્રિયાઃ કુર્યુઃ સ્નિગ્ધા યે વૈષ્ણવાસ્તુ તે ।
બ્રહ્માક્ષરં ન શૃણ્વન્વૈ તયા ભગવતેરિતમ્

પ્રણામપૂર્વકં ભક્ત્યા યો વદેદ્વૈષ્ણવો હિ સઃ ।
તદ્ભક્તજનવાત્સલ્યં પૂજનં ચાનુમોદનમ્

તત્કથાશ્રવણે પ્રીતિરશ્રુનેત્રાઙ્ગવિક્રિયાઃ ।
યેન સર્વાત્મના વિષ્ણૌ ભક્ત્યા ભાવો નિવેશિતઃ

વિપ્રેભ્યશ્ચ કૃતાત્મત્વાન્મહાભાગવતો હિ સઃ ।
વિશ્વોપકરણં નિત્યં તદર્થં સઙ્ગવર્જનમ્ ।
સ્વયમભ્યર્ચનઞ્ચૈવ યો વિષ્ણુઞ્ચોપજીવતિ

ભક્તિરષ્ટવિધા હ્યેષા યસ્મિન્મ્લેચ્છો ઽપિ વર્તતે ।
સ વિપ્રેન્દ્રો મુનિઃ શ્રીમાન્સ યાતિ પરમાં ગતિમ્

તસ્મૈ દેયં તતો ગ્રાહ્યં સ ચ પૂજ્યો યથા હરિઃ ।
સ્મૃતઃ સંભાષિતો વાપિ પૂજિતો વા દ્વિજોત્તમઃ ।
પુનાતિ ભગવદ્ભક્તશ્ચણ્ડાલો ઽપિ યદૃચ્છયા

દયાં કુરુ પ્રપન્નાય તવાસ્મીતિ ચ યો વદેત્ ।
અભયં સર્વભૂતેભ્યો દદ્યાદેતદ્ વ્રતં હરેઃ

મન્ત્રજાપિસહસ્રેભ્યઃ સર્વવેદાન્તપારગઃ ।
સર્વવેદાન્તવિત્કોટ્યાં વિષ્ણુભક્તો વિશિષ્યતે

એકાન્તિનઃ સ્વવપુષા ગચ્છન્તિ પરમં પદમ્ ।
એકાન્તેન સમો વિષ્ણુસ્તસ્માદેષાં પરાયણઃ

યસ્માદેકાન્તિનઃ પ્રોક્તાસ્તદ્ભાગવતચેતસઃ ।
પ્રિયાણામપિ સર્વેષાં દેવદેવસ્ય સુપ્રિયઃ

આપત્સ્વપિ સદા ભસ્ય ભક્તિરવ્યભિચારિણા ।
યા પ્રીતિરધિકા વિષ્ણોર્વિષયેષ્વનપાયિની

વિષ્ણું સંસ્મરતઃ સા મે હૃદયાન્નોપસર્પતિ ।
દૃઢભક્તો ઽપિ વેદાદિસર્વશાસ્ત્રાર્થપારગઃ

યો ન સર્વેશ્વરે ભક્તસ્તં વિદ્યાત્પુરુષાધમમ્ ।
નાધીતવેદશાસ્ત્રો ઽપિ ન કૃતો ઽધ્વરસમ્ભવઃ ।
યો ભક્તિં વહતે વિષ્ણૌ તેન સર્વં કૃતં ભવેત્

યજ્વાનઃ ક્રતુમુખ્યાનાં વેદાનાં પારગા અપિ ।
ન તાં યાન્તિ ગતિં ભક્તા યાં યાન્તિ મુનિસત્તમાઃ

યઃ કશ્ચિદ્વૈષ્ણવો લોકે મિથ્યાચારો ઽપ્યનાશ્રમી ।
પુનાતિ સકલાંલ્લોકાન્સહસ્રાંશુરિવોદિતઃ

યે નૃશંસા દુરાત્માનઃ પાપાચરરતાસ્તથા ।
તે ઽપિ યાન્તિ પરં સ્થાનં નારાયણપરાયણાઃ

દૃઢા જનાર્દને ભક્તિર્યદૈવાવ્યભિચારિણી ।
તદા કિયત્સ્વર્ગસુખં સૈવ નિર્વાણહેતુકા

ભ્રામ્યતાં તત્ર સંસારે નરાણાં કુર્મદુર્ગમે ।
હસ્તાવલમ્બને હ્યેકં યેન તુષ્યેજ્જનાર્દનઃ ।
ન શૃણોતિ ગુણાન્દિવ્યાન્દેવદેવસ્ય ચક્રિણઃ ।
સ મરો બધિરો જ્ઞેયઃ સર્વધર્મબહિષ્કૃતઃ

નામ્નિ સંકીર્તિતે વિષ્ણોર્યસ્ય પુંસો ન જાયતે ।
શરીરં પુલકોદ્ભાસિ તદ્ભવેત્કુણપોપમમ્

યસ્મિન્ભક્તિર્દ્વિજશ્રેષ્ઠ મુક્તિરપ્યચિરાદ્ભવેત્ ।
નિવિષ્ટમનસાં પુંસાં સર્વથા વૃજિનક્ષયઃ

સ્વપુરુષમભિવીક્ષ્ય પાશહસ્તં વદતિ યમઃ કિલ તસ્ય કર્ણમૂલે ।
પરિહર મધુસૂદનપ્રાપન્નન્પ્રભુરહમન્યનૃણાં ન વૈષ્ણવાનામ્

અપિ ચેત્સુદુરાચારો ભજતે મામનન્યભાક્ ।
સાધુરેવ સ મન્તવ્યઃ સમ્યગવ્યવસિતો હિ સઃ

ક્ષિપ્રં ભવતિ ધર્માત્મા શશ્વચ્છાન્તિં સ ગચ્છતિ ।
વિપ્રેન્દ્ર પ્રતિજાનીહિ વિષ્ણુભક્તો ન નશ્યતિ

ધર્માર્થકામઃ કિં તસ્ય મુક્તિસ્તસ્ય કરે સ્થિતા ।
સમસ્તજગતાં મૂલં યસ્ય ભક્તિઃ સ્થિરા હરૌ

દૈવી હ્યેષા ગુણમયી હરેર્માયા દુરત્યયા ।
તમેવ યે પ્રપદ્યન્તે માયામેતાં તરન્તિ તે

કિં યજ્ઞારાધને પુંસા શિષ્યતે હરિમેધસામ્ ।
ભક્ત્યૈવારાધ્યતે વિષ્ણુર્નાન્યત્તત્રોપકારકમ્

ન દાનૈર્વિવિધૈર્દત્તૈઃ પુષ્પૈર્નૈવાનુલેપનૈઃ ।
તોષમેતિ મહાત્માસૌ યથા ભક્ત્યા જનાર્દનઃ

સંસારવિષવૃક્ષસ્ય દ્વે ફલે હ્યમૃતોપમે ।
કદાચિત્કેશવે ભક્તિસ્તદ્ભક્તૈર્વા સમાગમઃ

પત્રેષુ પુષ્પેષુ ફલેષુ તોયેષ્વકષ્ટલભ્યેષુ સદૈવ સત્સુ ।
ભક્ત્યૈકલભ્યે પુરુષે પુરાણે મુક્ત્યૈકલાભે ક્રિયતે પ્રયત્નઃ

આસ્ફોટયન્તિ પિતરઃ પ્રનૃત્યન્તિ પિતામાહઃ ।
વૈષ્ણવોસ્મત્કુલે જાતઃ સ નઃ સન્તારયિષ્યતિ

અજ્ઞાનિનઃ સુખરે સમધિક્ષિપન્તો યત્પાપિનો ઽપિ શિશુપાલસુયોધનાદ્યાઃ ।
મુક્તિં ગતાઃ સ્મરણમાત્રવિધૂતપાપાઃ કઃ સંશયઃ પરમભક્તિમતાં જનાનામ્

શરમં તં પ્રપન્ના યે ધ્યાનયોગવિવર્જિતાઃ ।
તે ઽપિ મૃત્યુમતિક્રમ્ય યાન્તિ તદ્વૈષ્ણવં પદમ્

ભવોદ્ભવક્લેશશતૈર્હતસ્તથા પરિભ્રમન્નિન્દ્રિયરન્ધ્રકૈર્હયૈઃ ।
નિયમ્યતાં માધવ ! મે મનોહયસ્ત્વદઙ્ઘ્રિશઙ્કૌ દૃઢભક્તિબન્ધને

વિષ્ણુરેવ પરં બ્રહ્મ ત્રિભેદમિહ પઠ્યતે ।
વેદસિદ્ધાન્તમાર્ગેષુ તન્ન જાનન્તિ મોહિતાઃ