Garuda Purana · Chapter 1.226

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe karmavipākādikathanaṃ nāma pañcaviṃśatyadhikadviśatatamo 'dhyāyaḥ
śrīgaruḍamahāpurāṇam- 226
sūta uvāca vakṣye sāṅgaṃ mahāyogaṃ bhuktimuktikaraṃ param /
sarvapāpapraśamanaṃ bhaktyānupaṭhitaṃ śṛṇu

mameti mūlaṃ duḥ khasya na mameti nivartanam /
dattātreyo hyalarkāya imamāha mahāmatiḥ

ahamityaṅkurotpanno mameti skandhavānmahān /
gṛhakṣetrāṇi śākhāśca yatra dārābhipallavaḥ

dhanadhānye mahāpatre pāpamūlo 'tidurgamaḥ /
vidhivatsukhaśāntyarthaṃ jāto 'jñānamahātaruḥ

chinno vidyākuṭhāreṇa te gatā layamīśvare /
prāpya brahmarasaṃ pītaṃ nīrajaskamakaṇṭakam

prāpnuvanti parāḥ prājñāḥ sukhanirvṛtimeva ca /
mūrtendriyalayaṃ nūnaṃ na tvaṃ rājan na cāpyaham

na tanmātrādikaṃ vācā naivāntaḥ karaṇaṃ tathā /
kaṃ vā paśyasi rājendra pradhānamidamāvayoḥ

mṛtaḥ pare 'hni kṣetrajñaḥ saṃjāto 'yaṃ guṇātmakaḥ /
ekatve 'pi pṛthagbhāvastathā kṣetrātmano nṛpa

jñānapūrvaviyogo 'sau jñāne naṣṭe ca yoginaḥ /
sā muktirbrahmaṇā caikya manaikyaṃ prākṛtairguṇaiḥ

tadgṛhaṃ yatra vasati tadbhojyaṃ yena jīvati /
yanmuktaye tadevoktaṃ jñānājñāne na cānyathā

upabhogena puṇyānā mapuṇyānāñca pārthiva /
kartavyānāñca nityānāṃ kṣayantvakaraṇāttathā

ahiṃsā satyamasteyaṃ brahmacaryāparigrahau /
yamāḥ pañcātha niyamāḥ śaucaṃ dvividhamīritam

santoṣastapasā śāntirvāsudevārcanaṃ damaḥ /
āsana padmakādyuktaṃ prāṇāyāmo marujjayaḥ

pratyekaṃ trividhaḥ so 'pi pūrakumbhakarecakaiḥ /
laghuryo daśamātrastu dviguṇaḥ sa tu madhyamaḥ

triguṇābhistu mātrābhiruttamaḥ sa udāhṛtaḥ /
japadhyānayutau garbho viparītastvarbhakaḥ

prathame najayetsvapnaṃ madhyamena ca vepathum /
vipākaṃ hi tṛtīyena jātāndoṣāstvanukramāt

āsanasthantuyuñjīta kṛtvā ca praṇavaṃ hṛdī /
pārṣṇibhyāṃ liṅgavṛṣaṇau sparśannakāgramānasaḥ

rajasā tamaso vṛttiṃ sattvena rajasastathā /
nirudhya niścalo bhūtvā sthito yuñjīta yogavit

indriyāṇīndriyārthebhyaḥ prāṇādīnamna eva ca /
nigṛhya samavāyena pratyāhāra mupakramet

prāṇāyāmā daśāṣṭau ca dhāraṇā sā vidhīyate /
dve dhāraṇe smṛto yogo yogibhistattvadarśibhiḥ

prāṅnāḍyāṃ hṛdaye cātra tṛtīyā ca tathorasi /
kaṇṭhe mukhe nā sikāgre netre bhrūmadhyamūrdhasu

kiñcittasmātparasmiṃśca dhāraṇā daśadhā smṛtā /
daśaitā dhāraṇāḥ prāpya prāpnotyakṣararūpatām

yathāgniragnau saṃkṣiptastathātmā paramātmani /
brahmarūpaṃ mahāpuṇyamomityekākṣaraṃ japet

akāraśca tathokāro makāraścākṣaratrayam /
etāstistrastato mātrāḥ sattvarājasatāmasāḥ

nirguṇā yogigamyādyārdhamātrā parā sthitā /
gāndhārīti ca vijñeyā gāndhārasvarasaṃśrayā /
ityetadakṣaraṃ brahma paramoṅkārasaṃjñitam

ahaṃ brahma paraṃ jyotiḥ sthūladehavivarjitam /
ahaṃ brahma paraṃ jyotirjarāmaraṇavarjitam

ahaṃ brahma paraṃ jyotiḥ pṛthivyā malavarjitam /
ahaṃ brahma paraṃ jyotirvāyvākāśavivarjitam

ahaṃ brahma paraṃ jyotiḥ sūkṣmadehavivarjitam /
ahaṃ brahmaparaṃ jyotiḥ sthānāsthānavivarjitam

ahaṃ brahma paraṃ jyotirgandhamātravivarjitam /
ahaṃ brahma paraṃ jyotiḥ śrotratvakparivarjitam

ahaṃ brahma paraṃ jyotirjihvāghrāṇavivarjitam /
ahaṃ brahma paraṃ jyotiḥ prāṇāpānavivarjitam

ahaṃ brahma paraṃ jyotirvyānodānavivarjitam /
ahaṃ brahma paraṃ jyotirajñānaparivarjitam

ahaṃ brahma paraṃ jyotisturīyaṃ paramaṃ padam /
dehendriyamanobuddhiprāṇāhaṅkāravarjitam

nityaśuddhabuddhaṃmuktamahāmānandamadvayam /
ahaṃ brahma paraṃ jyotirjñānarūpo vimuktaye

sūta uvāca /
ityaṣṭāṅgo mayā yoga uktaḥ śaunaka muktidaḥ /
nityanaimittikaṃ gatvā layaṃ prākṛtabandhanāḥ

utpadyante hi saṃsāre naikaṃ yātvā parātmanām /
vimucyate vimuktaśca jñānādajñānamohitaḥ

tato naṃ mriyate duḥ khī na rogī na ca vandhavān /
na pāpairyujyate yogī narake na vipacyate

garbhavāse sa no duḥ khī sa syānnārāyaṇo 'vyayaḥ /
bhaktyā tvananyayā labhyo bhagavānbhuktimuktidaḥ

dhyānena pūjayā japyaiḥ samyak stotrairyatavrataiḥ /
yajñairdānaiścittaśuddhistayā jñānañca labhyate

praṇavādikamantraiśca japyairmuktiṃ gatā dvijāḥ /
indro 'pi paramaṃ sthānaṃ gandharvāpsaraso varāḥ

prāptā devāśca devatvaṃ munitvaṃ munayo gatāḥ /
gandharvatvañca gandharvā rājatvañca nṛpādayaḥ