Garuda Purana · Chapter 1.225

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe naimittikapralayonāma caturviṃśatyadhikadviśatatamo 'dhyāyaḥ
śrīgaruḍamahāpurāṇam- 225
sūta uvāca /
ādhyātmikāditāpāṃstrīñjñātva saṃsrācakravit /
utpannajñānavairāgyaḥ prāpnotyātyantikaṃ layam

saṃsāracakraṃ vakṣye 'hamādābutkrāntikālataḥ /
yadvinā puruṣārtho na līnaḥ syātparamātmani

ūrdhvavāsī narastyaktvā dehamanyatprapadyate /
nīyatedvādaśāhena yamasya yamapūruṣaiḥ

tatra yadvāndhavāstoyaṃ prayacchanti tilaiḥ saha /
yacca piṇḍaṃ prayacchanti yamaloke tadaśnute

gataśca narakaṃ pāpātsvargaṃ yāti svapuṇyataḥ /
pāpakṛdyāti narakaṃ puṇyakṛdyāti vai divam

svargācca narakāttyaktaḥ strīṇāṃ garbhe bhavatyapi /
nābhibhūtañca tasyaiva yāti bījadvayaṃ hi tat

kalalaṃ budbrudamayaṃ tataḥ śoṇitameva ca /
peśyāḥ palasamo 'ṇḍaḥ syādaṅkuraṃ tata ucyate

upāṅgānyaṅgulīnetranāsāsyaśravaṇāni ca /
āvahaṃ yāti cāṅgebhyastatparantu nakhādikam

tvaco romāṇi jāyante keśāścaiva tataḥ param /
naraścādhomukhaḥ sthitvā daśame ca saḥ jāyate

tatastu vaiṣṇavī māyā vṛṇotyatyantamohinī /
bālatvaṃ tvatha kaumāraṃ yauvanaṃ vṛddhatāmapi

tataśca maraṇaṃ tattaddharmāmāpnoti mānavaḥ /
evaṃ saṃsāracakre 'smin bhrāmyate ghaṭīyantravat

narakātpratimuktastu pāpayoniṣu jāyate /
patitātpratigṛhyātha adhoyoniṃ vrajedbudhaḥ

narakātpratimuktastu kṛmirbhavati yācakaḥ /
upādhyāyavyalīkaṃ tu kṛtvā śvā bhavati dvija

tajjāyāṃ manasā vāñchaṃstaddravyaṃ vāpyasaṃśayam /
gardabhojāyate janturmitrasyaivāpamānakṛt

pitarau pīḍayitvā tu kacchapatvañca jāyate /
bhurtuḥ piṇḍamupāśvasto vañjayitvā tameva yaḥ

so 'pi mohasamāpanno jāyate vānaro mṛtaḥ /
nyāsāpahartā narakādvimukto jāyate kṛmiḥ

asūyakaśca narakānmukto bhavati rākṣasaḥ /
viśvāsahartā ca naro mīnayonau prajāyate

yavadhānyāni saṃhṛtya jāyate mūṣako mṛtaḥ /
paradārābhimarśāttu vṛko ghoro 'bhijāyate

bhrātṛbhāryāprasaṃgena kokilo jāyate naraḥ /
gurvādibhāryāgamanācchūkaro jāyate naraḥ

yajñadānavivāhānāṃ vighnakartā bhavetkṛmiḥ /
devatāpitṛviprāṇāmadattvā yo 'nnamaśnute

pramukto narakādvāpi vāyasaḥ sanprajāyate /
jyeṣṭhabhrātrapamānācca krauñcayonau prajāyate

śūdrastu brāhmaṇīṃ gatvā kṛmiyonau prajāyate /
tasyāmapatyamutpādya kāṣṭhāntaḥ kaṭīko bhavet

kṛtaghnaḥ kṛmikaḥ kīṭaḥ pataṅgo vṛścikastathā /
aśastraṃ puruṣaṃ hartā naraḥ sañjāyate kharaḥ

kṛmiḥ strīvadhakartā ca bālahantā ca jāyate /
bhojanañcorayitvā tu makṣikā jāyate naraḥ

hṛtvājyañcaiva mārjārastilahṛccaiva mūṣakaḥ /
ghṛtaṃ hṛtvā ca nakulaḥ kāko madbhuramāmiṣam

madhu hṛtvā naro daṃśa-pūpaṃ hṛtvā pipīlikaḥ /
apo hṛtvā tu pāpātmā vāyasaḥ samprajāyate

hṛte kāṣṭhe ca hārītaḥ kapoto vā prajāyate /
hṛtvā tu kāñcanaṃ bhāṇḍaṃ kṛmiyonau prajāyate

kārpāsike hṛte krauñco vahrihartā bakastathā /
mayūro varṇakaṃ hṛtvā śākapatrañca jāyate

jīvañjīvakatāṃ yāti raktavastvapahṛnnaraḥ /
chuchundariḥ śubhāngandhāñchaśaṃ hṛtvā śaśo bhavet

ṣaṇḍāḥ kalāpaharaṇe kāṣṭhahṛttṛṇakīṭakaḥ /
puṣpaṃ hṛtvā daridrastu paṅguryācakahṛnnaraḥ

śākahartā ca hārītastoyahartā ca cātakaḥ /
gṛhahṛnnarakāngatvā rauravādīnsudāruṇān

tṛṇagulmalatāvallītvagghārī tarutāṃ vrajet /
eṣa eva kramo dṛṣṭo gosuvarṇādihāriṇām

vidyāpahārī mūkaḥ syādgatvā ca narakānbahan /
asamiddhe hute cāgnau mandāgniḥ khalu jāyate

paranindā kṛtaghnatvaṃ parasīmābhighātanam /
naiṣṭhuryaṃ nirghṛṇatvañca paradāropasevanam

parasvaharaṇāśaucaṃ devatānāṃ ca kutsanam /
nikṛtya bandhanaṃ nṝṇāṃ kārpaṇyañca nṛṇāṃ vadhaḥ /
upalakṣaṇādvijānīyānmuktānāṃ narakādanu

dayā bhūteṣu saṃvādaḥ paralokaṃ prati kriyā /
satyaṃ hitārthamuktiśca vedaprāmāṇyadarśanam

gurudevarṣisiddharṣisevanaṃ sādhusaṃyamaḥ /
satkriyāṣvasanaṃ maitrī svargasya lakṣaṇaṃ viduḥ /
aṣṭāṅgayogavijñānātprāpnotyātyantikaṃ phalam