Garuda Purana · Chapter 1.223

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe prāyaścitakathanaṃ nāma dvāviṃśatyadhikadviśatatamo 'dhyāyaḥ
śrīgaruḍamahāpurāṇam- 223
brahmovāca munibhiścaritā dharmā bhaktyā vyāsa mayoditāḥ /
yairviṣṇustuṣyate caiva sūryādiparicāraṇāt

tarpaṇena ca homena sandhyāyā vandanena ca /
prāpyate bhagavān viṣṇurdharmakāmārthamokṣadaḥ

dharmo hi bhagavānviṣṇuḥ pūjī viṣṇostu tarpaṇam /
homaḥ sandhyā tathā dhyānaṃ dhāraṇā sakalaṃ hariḥ

sūca uvāca /
pralayaṃ jagato vakṣye tatsarvaṃ śṛṇu śaunaka /
caturyugasahasrantu kalpaikābjadinaṃ smṛtam

kṛtatretādvāparādiyugāvasthā nibodhame /
kṛte dharmaścatuṣpācca satyaṃ dānaṃ tapo dayā

dharmapātā hariśceti santuṣṭā jñānino narāḥ /
caturvaṃṣarsahasrāṇi narā jīvanti vai tadā

kṛtānte kṣattriyairviprā viṭśūdrāśca jitā dvijaiḥ /
śūraścātibalo viṣṇū rakṣāṃsi ca jaghāna ha

tretāyuge tripāddharmaḥ satyadānadayātmakaḥ /
narā yajñaparāstasmiṃstathā kṣatrodbhavaṃ jagat

rakto harirnaraiḥ pūjyo narā daśaśatāyuṣaḥ /
tatra viṣṇurbhomarathaḥ kṣatriyā rākṣasānahan

dvipādavigro dharmaḥ pītāñcācyute gate /
catuḥ śatāyuṣo lokā dvijakṣatrodbhavāḥ prajāḥ

tatra dṛṣṭvālpabuddhīṃśca viṣṇurvyāsasvarūpadhṛk /
tadekantu yajurvedaṃ? caturdhā vyabhajatpunaḥ

śiṣyānadhyāpayāmāsa samastāṃstānnibodha me /
ṛgvedamatha pailant sāmavedañca jaiminim

atharvāṇaṃ sumantuntu yajurvedaṃ mahāmunim /
vaiśampāyanamaṅgantu purāṇaṃ sūtameva ca /
aṣṭādaśapurāṇāni yair vedyo harireva hi

sargaśca pratisargaśca vaṃśo manvantarāṇi ca /
vaṃśānucaritaccaiva purāṇaṃ pañcalakṣaṇam

brāhmaṃ pādmaṃ vaiṣṇavañca śaivaṃ bhāgavatantathā /
bhaviṣyannāradīyañcaskāndaṃ liṅgaṃ varāhakam

mārkaṇḍeyaṃ tathāgneyaṃ brahmavaivartameva ca /
kaurmaṃ mātsyaṃ gāruḍañca vāyavīyamanantaram /
aṣṭādaśasamuddiṣṭaṃ brahmāṇḍamiti saṃjñitam

anyānyupapurāṇāni munibhiḥ kathitāni tu /
ādyaṃ sanatkumāroktaṃ nārasiṃhamathāparam

tṛtīyaṃ skāndamuddiṣṭaṃ kumāreṇa tu bhāṣitam /
caturthaṃ śivadharmākhyaṃ syānnandīśvarabhāṣitam

durvāsasoktamāścaryaṃ nāradoktamataḥ param /
kāpilaṃ vāmanañcaiva tathaivośanaseritam

brahmāṇḍaṃ vāruṇañcātha kālikāhvayameva ca /
māheśvaraṃ tathā sāmbamevaṃ sarvārthasañcayam /
parāśaroktamaparaṃ mārīcaṃ bhārgavāhvayam

purāṇaṃ dharmaśāstrañca vedāstvaṅgāni yanmune /
nyāyaḥ śaunaka mīmāṃsā āyurvedārthaśāstrakam /
gāndharvaśca dhanurvedo vidyā hyaṣṭādaśasmṛtāḥ

dvāparāntena ca harirgurubhāramapāharat /
ekapādasthite dharme kṛṣṇatvañcācyute gate

janāstadā durācārā bhaviṣyanti ca nirdayāḥ /
sattvaṃ rajastama iti dṛśyante puruṣe guṇāḥ /
kālasañcoditāste 'pi parivartanta ātmani

prabhūtañca yadā sattvaṃ mano burdhondriyāṇi ca /
tadā kṛtayugaṃ vidyājjñāne tapasi yadratiḥ

yadā karmasu kāmyeṣu śaktiryaśasi dehinām /
tadā tretā rajobhūtiriti jānīhiśaunaka

yadā lobhastvasantoṣo māno dambhaśca matsaraḥ /
karmaṇāñcāpi kāmyānāṃ dvāparaṃ tadrajastamaḥ

yadā sadānṛtaṃ nandrā nidrā hiṃsādisādhanam /
śokamohau bhayaṃ dainyaṃ sa kalistamasi smṛtaḥ

yasmiñjanāḥ kāminaḥ syuḥ śaśvatkaṭukabhāṣiṇaḥ /
dasyūtkṛṣṭā janapadāvedāḥ pāṣaṇḍadūṣitāḥ

rājānaśca prajābhikṣāḥ śiśrodaraparājitāḥ /
avratā vaṭacavo 'śaucā bhikṣavaśca kuṭumbinaḥ

tapasvinogrāmavāsāḥ nyāsino hyarthalolupāḥ /
hrasvakāyā mahāhārāścaurāste sādhavaḥ smṛtāḥ

tyakṣyanti bhṛtyāśca patiṃ tāpasastyakṣyati vratam /
śūdrāḥ pratigrahiṣyanti vaiśyā vrataparāyaṇaḥ

udvignāḥ santi ca janāḥ piśācasadṛśāḥ prajāḥ /
anyāyabhojanenāgnidevatātithipūjanam

kariṣyenti kalau prāpte na ca pitryodakakriyām /
strīparāśca janāḥ sarve śūdraprāyāśca śaunaka

bahuprajālpabhāgyāśca bhaviṣyanti kalau striyaḥ /
śiraḥ kaṇḍūyanaparā ājñāṃ bhetsyanti bhartsitāḥ

viṣṇuṃ na pūjayiṣyanti pāṣaṇḍopahatā janāḥ /
kalerdeṣanidherviprā asti hyeko mahāguṇaḥ

kīrtanādeva kṛṣṇasya mahābandhaṃ parityajet /
kṛte yadyyāyato viṣṇuṃ tretāyāṃ japataḥ phalam

dvāpare paricaryāyāṃ kalau taddharikīrtanāt /
tasmāddhyeyo harirnityaṃ geyaḥ pūjyaśca śaunaka