Garuda Purana · Chapter 1.221

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe śrāddhānuṣṭhānaṃ nāmaviṃśādhikadviśatatamo 'dhyāyaḥ
śrīgaruḍamahāpurāṇam- 221
brahāmovāca /
dharmasāramahaṃ vakṣye saṃkṣepācchuṇu śaṅkara /
bhuktimuktipradaṃ sūkṣmaṃ sarvapāpavināśanam

śrutaṃ dharmaṃ balaṃ dhairyaṃ sukhamutsāhameva ca /
śoko harati vai nṝṇāṃ tasmācchokaṃ parityajet

karmadārāḥ karmalokāḥ karmasambandhibāndhavāḥ /
karmāṇi prerayantīha puruṣaṃ sukhaduḥ khayoḥ

dāname paro dharmo dānātsarvamavāpyate /
dānāḥtsvargaśca rājyañca dadyāddanaṃ tato naraḥ

ekato dānamevāhuḥ samagravaradakṣiṇam /
ekato bhayabhītasya prāṇinaḥ prāṇarakṣaṇam

tapasā brahmacaryeṇa yajñaiḥ snānena vā punaḥ /
dharmasya nāśakā ye ca te vai nirayagāminaḥ

ye ca homajapasnānadevatārcanatatparāḥ /
satyakṣamādayāyuktāste narāḥ svargagāminaḥ

na dātā sukhaduḥ khānāṃ na ca hartāsti kaścana /
bhuñjate svakṛtānyeva duḥ khāni ca sukhāni ca

dharmārthaṃ jīvitaṃ yeṣāṃ durgāṇyatitaranti te /
santuṣṭaḥ ko na śaknoti phalamūlaiśca vartitum

sarva eva hi saukhyena saṅkaṭānyavagāhate /
idameva hi lobhasya kāryaṃ syā datiduṣkaram

lobhātkrodhaḥ prabhavati lobhāddrohaḥ pravartate /
lobhānmohaśca māyā ca māno matsara eva ca

rāgadveṣānṛtakrodhalomamohamadojjhitaḥ /
yaḥ sa śāntaḥ paraṃ lokaṃ yāti pāpavivarjitaḥ

devatā munayo nāgā gandharvā guhyakā hara /
dhārmikaṃ pūjayantīha na dhanāḍhyaṃ na kāminam

anantabalavīryeṇa prajñayā pauruṣeṇa vā /
alabhyaṃ labhate martyastatra kā parivedanā

sarvasattvadayālutvaṃ sarvendriyavinigrahaḥ /
sarvatrānityabuddhitvaṃ śreyaḥ paramidaṃ smṛtam

paśyannivāgrato mṛtyuṃ yo dharmaṃ nācarennaraḥ /
ajāgalastanasyeva tasya janma nirarthakam

bhrūṇahā brahmahā goghnaḥ pitṛhā gurutalpagaḥ /
bhūmiṃ sarvaguṇopetāṃ dattvā pāpaiḥ pramucyate

na godānātparaṃ dānaṃ kiñcidastīti me matiḥ /
yā gaurnyāyārjitā dattā kṛtsnaṃ tārayate kulam

nānnadānātparaṃ dānaṃ kiñcidasti vṛṣadhvaja ! /
annena dhāryate sarvaṃ carācaramidaṃ jagat

kanyādānaṃ vṛṣotsargastīrthasevā śrutaṃ tathā /
hastyaśvarathadānāni maṇiratnavasundharāḥ

annadānasya sarvāṇi kalāṃ nārhanti ṣoḍaśīm /
annātprāṇā balaṃ tejaścānnādvīryaṃ dhṛtiḥ smṛtiḥ

kūpavāpītaḍāgādīnārāmāṃścaiva kārayet /
trisaptakulamuddhṛtya viṣṇuloke mahīyate

sādhūnāṃ darśanaṃ puṇyaṃ tīrthādapi viśiṣyate /
kālena tīrthaṃ phalati sadyaḥ sādhusamāgamaḥ

satyaṃ damastapaḥ śaucaṃ santoṣaśca kṣamārjavam /
jñānaṃ śamo dayā dānameṣa dharmaḥ sanātanaḥ