Garuda Purana · Chapter 1.209

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe chandaḥ śāstre āryāvṛttādichandolakṣaṇanirūpaṇaṃ nāmāṣṭottaradviśatatamo 'dhyāyaḥ
śrīgaruḍamahāpurāṇam- 209
sūta uvāca /
śrīrukthā gena sā jñeyā utyukthā strī gurudvayam /
mo nārī ro mṛgī madhyā magau kanyā pratiṣṭhayā

bho gau paṅktiḥ suprātiṣṭhā tanumadhyā tayau smṛtā /
nayābhyāṃ bālalalitā gāyatrīcchanda eva hi

masagairmadalekhā syāduṣṇikchandaḥ smṛtaṃ budhaiḥ /
bhau gau citrapadā khyātā vidyunmālā mamau gagau

māṇavakaṃ bhāttalagā mnau gau haṃsarutaṃ smṛtam /
samānikā rajagalā jaralā gaḥ pramāṇikā /
ābhyāmanyadvitānaṃ syādanuṣṭupchanda īritam

ranasaiḥ syāddhalamukhī nau maḥ śiśubhṛtā bhavet /
bṛhatīchanda ityuktaṃ smau jagau sa virājitam

paṇavaṃ syānmanayagairmayūrasāriṇī bhavet /
rajābhyāñca ragābhyāñca rukmavatī bhamau sagau

mattā mabhasagairyuktā narajā go manoramā /
paṅkticchandaḥ samākhyātaṃ jasatā gāvupasthitam

tau jo gāvindravajrā syājjatajgā gupapūrvikā

upajātayo 'nyādyantāḥ sumukhī najajā lagau /
bhabhabhā gau dodhakaṃ syācchālinī matatā gagau

abdhilokaiśca vicchedo vātorṃmo mamatā gagau /
śrīrbhatau nanagāḥ proktā pañcabhiḥ ṣaḍūbhireva ca

maganā no go bhramaravilāsitamudāhṛtam /
rathoddhatār nau ralagāḥ svāgatā ranabhā gagau

vṛttā nanau sagau gaḥ syānnau ralau gaḥ samadrikā /
rajarā lgau śyenikā syājjasatā gau śikhaṇḍitam /
triṣṭupchandaḥ samākhyātaṃ piṅgalena mahātmanā

ranau bhasau candravartma vaṃśasthaṃ syājjatau jarau /
tato jarāvindravaṃśā vedasaistoṭakaṃ smṛtam /
nbhau bhrau drutavilambitaṃ puṭaśca syānnanau mayau

vasuvedaiśca viratirmuditavadanā tviyam /
nanararaiḥ samākhyātā nayanā yastathā bhavet

sā tu kusumavicitrā jaloddhatagatī rasaiḥ /
jasau jasau ca pādeṣu catūraiḥ stragviṇī matā

bhujaṅgaprayātaṃ vṛttaṃ catubhiryaiḥ prakīrtitam /
prayaṃvadā nabhajraiśca maṇimālā tayau tayau

guhavaktraiśca sannidrā lalitā syāttabhau jarau /
pramitākṣarā sajasasairujjvalā tu nanau bharau

mamau yayau vaiśvadevī pañcāśvaiśca yatirbhavet /
mabhau samau jaladharamālābdhyantyairyatibhavet

nau tatau gaḥ kṣamāvṛttaṃ turagaiśca rasairyatiḥ /
praharṣiṇī manau jrau gā vahnibhirdaśabhiryatiḥ

jabhau sajau go rucirā caturbhiśca grahairyatiḥ /
mattamayūraṃ matayāḥ sagau devagrahairyatiḥ

mañjubhāṣiṇī sajsā jgau sunandinī sajasā magau /
nanau tatau candrikā gaḥ saptabhiśca rasairyatiḥ

asambādhā matanasā gagau bāṇagrahairyatiḥ /
nanarāḥ so ladhuguruḥ svaraiḥ proktāparājitā

nanau bhanau praharaṇakalikeyaṃ lagau tathā /
vasantatilakā siṃhonnatā tabhjā jagau guruḥ

bhajau sanau gagāvinduvadanātha sukeśaram /
naranā ralagāḥ pāde śarkarī pratipāditā

caturdaśalaghuḥ syācca śreṣṭhā śaśikalā sagā /
rasagrahayatiḥ sraksrā vasuśailayatistathā

syānmaṇiguṇanikaro mālinī nanamā yayau /
vasusvarayatiḥ syācca najau bhajrāḥ prabhadrakam

elā sayau nanau yaḥsyāccitralekhāsvarāṣṭakaiḥ /
marau mayau yaśca bhavedukteyamati śarkarī

svarātkhaṃ vṛṣabhagajajṛmbhitaṃ bhrananā nagau /
najabhajarā vāṇinī gaḥ piṅgalenāṣṭirīritā

rasarudraiḥ śikhariṇī yamau nasabhalā guruḥ /
vasugrayatiḥ pṛthvī jasau jasayalā guruḥ

daśasvarairvaṃśapatrapatitaṃ bhraunnabhā lagau /
ṣaḍvedāśvaiśca hariṇī nasamā rasalā guruḥ

mandākrāntabdhiṣaḍnagairmabhanāstatagā guruḥ /
nardaṭakaṃ najabhajā jalau go yatireva ca

saptartvabdhiḥ kokilakamatyaṣṭiḥ syācca pūrvavat /
bhūtartvaśvaiḥ kusumitalatā mtau nyau yayau dhṛtiḥ

rasartvaśvairyamau nsau rau meghavisphūrjitā ragau /
śārdūlavikrīḍitaṃ maḥ sūryaśvaiḥ sajsatāstagau

chando hyatidhṛtiḥ proktamata ūrdhvaṃ kṛtirbhavet /
saptāśvartuḥ suvadanā bhrau manau yabhalā guruḥ

vṛttaṃ rajau rajau pāde rajau go laḥ kṛtirbhavet /
trisaptakaiḥ snagdharā syātprakṛtirmnabhanaistriyaiḥ

digarkairbhadrakaṃ bhrau nrau naranā go yathākṛtiḥ /
najau bhaśvāśvalalitaṃ jabhau jabhalagā bhavet

mattākrīḍañcāṣṭabāṇadaśakairmau tanau nanau /
nalau guruśca vikṛtiśchinnā saṃkṛtirucyate

pañcāśvārkairbhatau tanvī nasabhā bhanayā gaṇāḥ /
krauñcapadā bāṇaśaravasuśailairbhamau sabhau

nau nau go 'tikṛtiḥ proktā cchando hyutkṛtirucyate /
vasvīśāśvairmamatanaiḥ syādbhujaṅgavijṛmbhitam

nanarasairlagayuktaiśca apavāhākhyakaṃ yatiḥ /
guhaiḥ ṣaḍbhī rasairbāṇairmonāḥ ṣaṭsagagā gaṇāḥ

caṇḍavṛttiprapāto 'sau daṇḍako nau tato 'garaḥ /
raphevṛddhāntakādasya vyālajīmūtakādayaḥ