Garuda Purana · Chapter 1.208

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe chandaḥ śāstrechandaḥsaṃjñāparibhāṣānirūpaṇaṃ nāma saptottaradviśatatamo 'dhyāyaḥ
śrīgaruḍamahāpurāṇam- 208
sūta uvāca /
āryālakṣma tvaṣṭa gaṇāḥ sadā jo viṣame na hi /
ṣaṣṭhe jo nlau vāpi bhavet padaṃ ṣaṣṭhe dvitīyalāt

āditaḥ saptame hrasvā dvitīyārdhe śare tataḥ /
trigaṇāṅghriśca pathyā syādvipulā vahnilaṅghanāt

gmadhye dvituryau jau capalā mukhapūrvādicāpalā /
dvitīyārdhe sajaghanā āryājāteśca lakṣaṇam

āryā prathamārdhalakṣma gītiḥ syācceddaladvaye /
upagītirdvitīyārdhādudgītirvyatyayādbhavet

āryāgītiścāntagururgotijāteśca lakṣaṇam /
ṣaṭ kalā viṣame cetsyuḥ same 'ṣṭau na nirantarāḥ /
samā parāśritā na syādvaitālīye ralau guruḥ

anter yau pūrvavadidamaupacchandasikaṃ matam

bhādgau syādāpātalikā jñeyātho dakṣiṇāntikā /
parāśrito dvitīyo laḥ pādeṣu nikhileṣvapi

udīcyavṛttirasame prācyavṛttistu yugmake /
sapañcamaścaturthāṃśe yugapattau pravṛttakam

udīcyādyaṅghrisaṃyogādyugmapādaikapādikā /
cāruhāsinyayugmāṅghrau vaitālīyasya saṃgrahaḥ

vaktraṃ nādyānnasau syātāṃ caturthādyagaṇo bhavet /
pathyāvaktraṃ jena same viparītādiranyathā

usame naśca capalā vipulā laghusaptamā /
nikhile vā saitavasya mrau ntau cābdhestatpūrvakau

ṣoḍaśalo 'caladhṛtirmātrāsamakamucyate

navamalastathā go 'ntyaḥ jo nlauvāthāmbudheryathā /
viślokaḥ syāttaccatuṣkadviguṇādvānavāsikā

bāṇāṣṭanavakeṣu syāllaścitrā ṣoḍaśātmikā /
samamātrāsamādiṣṭaṃ padākulakamīritam

vṛttamātrā vinā varṇairlā varṇā gurubhirvinā /
guruvo lairdale nityaṃ pramāṇamiti niścitam

aṣṭāviṃśātilā gantā prathamārdhe dvitīyake /
triṃśadasyāṃ śikhā gantā khañjātadvyatyayādbhavet

ṣoḍaśānaṅgakrīḍā gā dvātriṃśaccarame ca lāḥ /
saptaviṃśātilā gantā dalayo rucirā dvayoḥ

mātrāvṛttāni coktāni varṇavṛttāni vacmi vai