Garuda Purana · Chapter 1.192

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe ekanavatyadhikaśatatamo 'dhyāyaḥ
śrīgaruḍamahāpurāṇam- 192
hariruvāca /
citrakasyāṣṭabhāgāśca śūraṇasya ca ṣoḍaśa /
śuṇṭhyā bhāgāśca catvāro maricānāṃ dvayaṃ tathā

tritayaṃ pippalīmūlaṃ viḍaṅgānāṃ catuṣṭayam /
aṣṭau muśalikābhāgāstriphalāyāścatuṣṭayam /
dviguṇena guḍenaiṣāṃ modakāniha kārayet

tadbhakṣaṇamajīrṇaṃ hi pāṇḍurogañja kāmalam /
atīsārāṃśca mandāgniṃ plīhāñcaiva nivārayet

bilvāgnimanthaḥ śyonākapāṭalāpāribhadrakam /
prasāraṇyaśvagandhā ca bṛhatī kaṇṭakārikā

balā cātibalā rāsnā śvadaṃṣṭrā ca punarnavā /
eraṇḍaḥ śārivā parṇo guḍūcī kapikacchukā

eṣāṃ daśapalānbhāgānkvāthayetsalile 'male /
tena pādāvaśeṣeṇa tailapātre vipācayet

ājaṃ vā yadi gavyaṃ kṣīraṃ dattvā caturguṇam /
śatāvarīṃ saindhavañca tailatulyaṃ pradāpayet

dravyāṇiyāni peṣyāṇi tāni vakṣyāmi tacchṛṇu /
śatapuṣpā devadārurbalā parṇo vacāguru

kuṣṭhaṃ māṃsī saindhavañca palamekaṃ punarnavā /
pāne nasye tathābhyaṅge tailametatpradāpayet

hṛcchūlaṃ pārśvaśūlañca gaṇḍamālāñca nāśayet /
apasmāraṃ vātaraktaṃ vapuṣmāṃśca pumānbhavet

garbhamaśvatarī vindyātkiṃ punarmānuṣī hara /
aśvānāṃ vātabhagnānāṃ kuñjarāṇāṃ nṛṇāṃ tathā /
tailametatprayoktavyaṃ sarvavātavikāriṇām

hiṅgutumburuśuṇṭhībhiḥ siddhaṃ tailantu sārṣapam /
etaddhi puraṇaṃ śreṣṭhaṃ karṇaśūlāpahaṃ param

śuṣkamūlakaśuṇṭhīnāṃ kṣāro hiṅgulanāgaram /
takraṃ caturguṇaṃ dadyāttailametadvipācayet

bādhiryaṃ karṇaśūlañca pūyastrāvañca karṇayoḥ /
krimayaśca vinaśyanti tailasyāsya prapūraṇāt

śuṣkamūlakaśuṇṭhīnāṃ kṣāro hiṅgulanāgaram /
śatapuṣpā vacā kuṣṭhaṃ dāruśigrurasāñjanam

sauvarcalaṃ yavakṣāraṃ sāmudraṃ saindhavaṃ tathā /
granthikaṃ viḍamustaṃ ca madhu śuktaṃ caturguṇam

mātuluṅgarasaścaiva kadalīrasa eva ca /
tailamebhirvipaktavyaṃ karṇaśūlāpahaṃ param

bādhiryaṃ karṇanādaśca pūyastrāvaśca dāruṇam /
pūraṇādasya tailasya krimayaḥ karṇayorhara

sadyo vināśamāyānti śaśāṅkakṛtaśekhara /
kṣāratailamidaṃ śreṣṭhaṃ mukhadantamalāpaham

candanaṃ kuṅkumaṃ māṃsī karpūraṃ jātipatrikā /
jātīkaṅkolapūgānāṃ lavaṅgasya phalāni ca

agurūṇi ca kastūrī kuṣṭhaṃ tagarapādikā /
gorocanā priyaṅguśca balā caiva tathā nakhī

saralaṃ saptaparṇaṃ ca lākṣā cāmalakī tathā /
tathā tu padmakaṃ caiva hyetaistailaṃ prasādhayet

prasvedamaladurgandhakaṇḍū kuṣṭhaharaṃ param /
gacchati strīśataṃ rudra bandhyāpi labhate sutam

yavānī citrakaṃ dhānyaṃ tryūṣaṇaṃ jīrakaṃ tathā /
sauvarcalaṃ viḍagañca pippalīmūlarājikam

ebhiḥ pacedraghṛtaprasthaṃ jalaprasthāṣṭasaṃyutam /
tathār'śogulmaśvayathuṃ hanti vahniṃ karoti vai

maricaṃ trivṛtaṃ kuṣṭhaṃ haritālaṃ manaḥ śilā /
devadāru haridre dve kuṣṭhaṃ māṃsī ca candanam

viśālā karavīrañca arkakṣīraṃ śakṛdrasaḥ /
eṣāñca kārṣiko bhāgo viṣasyārdhapalaṃ bhavett

prasthaṃ saṭukatailasya gomūtre 'ṣṭaguṇe pacet /
mṛtpātre lohapātre vā śanairmṛdvagninā pacet

pāmā vicarcikā caiva dadrurvisphocakānica /
abhyaṅgena praṇaśyanti komalatvañca jāyate

prabhūtānyapi śvitrāṇi tailenānena mardayet /
cirotthitamapi śvitraṃ vinaṣṭaṃ tatkṣaṇādbhavet

paṭolapatraṃ kaṭukā mañjiṣṭhā śārivā niśā /
jātīśamīnimbapatraṃ madhukaṃ kvathitaṃ ghṛtam

ebhirlepātsayurarujo vraṇā vistrāviṇaḥ śiva /
śaṅkhapuṣpī vacā somo brāhmī brahmasuvarcalāḥ

abhayā ca guḍūcī ca āṭarūṣakavākucī /
etairakṣasamairbhāgairghṛtaprasthaṃ vipācayet

kaṇṭakāryā rasaprasthaṃ kṣīraprasthasamanvitam /
etadbrāhmīghṛtaṃ nāma smṛtimedhākaraṃ param

agnimantho vacā vāsā pippalī madhu saindhavam /
saptarātraprayogeṇa kinnarairiva gīyate

apāmārgaḥ guḍūcī ca vacā kuṣṭhaṃ śatāvarī /
śaṅkhapuṣpābhayā sājyaṃ viḍaṅgaṃ bhakṣitaṃ samam /
tribhirdinairnaraṃ kuryādgranthāṣṭaśatadhāriṇam

adbhirvā payasājyena māsamekantu sevitā /
vacā karyānnaraṃ prājñaṃ śrutidhāraṇasaṃyutam

candrasūryagrahe pītaṃ palamekaṃ payo 'nvitam /
vacāyāstatkṣaṇaṃ kuryānmahāprajñāyutaṃ naram

bhūnimbanimbatriphalāparpaṭaiśca śṛtaṃ jalam /
paṭolīmustakābhyāñca vāsakena ca nāśayet

visphoṭakāni raktañca nātra kāryā vicāraṇā /
katakasya phalaṃ śaṅkhaṃ saindhavaṃ tryūṣaṇaṃ vacā

phenī rasāñjanaṃ kṣaudraṃ viḍaṅgāni manaḥ śilā /
eṣāṃ vartirhanti kācaṃ timiraṃ paṭalaṃ tathā

prasthadvayaṃ māṣakasya kvāthaśca droṇamambhasām /
caturbhāgāvaśeṣeṇa tailaprasthaṃ vipācayet

kāñjikasyāḍhakaṃ dattvā piṣṭānyetāni dāpayet /
punarnavā gokṣurakaṃ saindhavaṃ tryūṣaṇaṃ vacā

lavaṇaṃ suradāruśca mañjiṣṭhā kaṇṭakārikā /
nasyātpānāddharatyeva karṇaśūlaṃ sudāruṇam

bādhiryaṃ sarvarogāṃśca hyabhyaṅgācca maheśvara /
paladvayaṃ saindhavañca śuṇṭhī citrakapañcakam

sauvīrapañcaprasthaṃ ca tailaprasthaṃ pacettataḥ /
asṛgdarasvaraplīhāsarvavātavikāranut

udumbaraṃ vaṭaṃ plakṣaṃ jambūdvayamathārjunam /
pippalī ca kadambañca palāśaṃ lodhratindukam

madhūkamāmrasarjañca badaraṃ padmakeśaram /
śirīṣabījaṅkatakametatkvāthena sādhitam /
tailaṃ hanti vraṇāṃllepāccirakālabhavānapi