Garuda Purana · Chapter 1.193

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe dvinavatyadhika śatatamo 'dhyāyaḥ
śrīgaruḍamahāpurāṇam- 193
hariruvāca /
palāṇḍujīrake kuṣṭhamaśvagandhājamodakam /
vacā trikaṭukañcaiva lavaṇaṃ cūrṇamuttamam

brāhmīrasairbhāvitañca sarpirmadhusamanvitam /
saptāhaṃ bhakṣitaṃ kuryānnirmalāñca matiṃ parām

siddhārthakaṃ vacā hiṅgu karañjaṃ devadāru ca /
mañjiṣṭhā triphalā viśvaṃ śirīṣo rajanīdvayam

priyaṅgunimbatrikraṭu gomūtreṇaiva gharṣitam /
nasayamālepanañcaiva tathā codvartanaṃ hitam

apasmāraviṣonmādaśoṣālakṣmījvarāpaham /
bhūtebhyaścabhayaṃ hanti rājadvāreṣu yojanāt

nimbaṃ kuṣṭhaṃ haridre dve śigru sarṣapajaṃ tathā /
devadāru paṭolañca dhānyaṃ takreṇa gharṣitam

dehaṃ tailākta gātraṃ vai nayedudvartanena ca /
pāmāḥ kuṣṭhāni naśyeyuḥ kaṇḍūṃ hanti ca niścitam

sāmudraṃ saindhavaṃ kṣāro rājikā lavaṇaṃ viḍam /
kaṭuloharajaścaivaṃ trivṛtsūraṇakaṃ samam /
dadhigomūtrapayasā mandapāvakapācitam

balāgnivardhakaṃ cūrṇaṃ pibeduṣṇena vāriṇā /
jīrṇe 'jīrṇe tu bhuñjati māṃsyādighṛtamuttamam

nābhiśūlaṃ mūtraśūlaṃ gulmaplīhabhavañca yat /
sarvaśūlaharaṃ cūrṇaṃ jaṭharānaladīpanam /
pariṇāmasamutthasya śūlasya ca hitaṃ param

abhayāmalakaṃ drākṣā pippalī kaṇṭakārikā /
śṛṅgī punarnavā śuṇṭhī jagdhā kāsaṃ nihanti vai

abhayāmalakaṃ drākṣā pāṭhā caiva vibhītakam /
śarkarāyā samaṃ caiva jagdhaṃ jvaraharaṃ bhavet

triphalā badaraṃ drākṣā pippalī ca virekakṛt /
harītakī soṣṇānīralavaṇañca virekakṛt

kūrmamatsyāśvamahiṣagośṛgālāśca vānarāḥ /
viḍālabarhikākāśca varāholūkakukkuṭāḥ

haṃsa eṣāñca viṇmūtraṃ māṃsaṃ vā roma śoṇitam /
dhūpaṃ dadyājjvarārtebhya unmattebhyaśca śāntaye

etānyauṣadhajātāni kathitāni umāpate /
nighnanti tāśca rogāṃśca vṛkṣamindrāśaniryathā

auṣadhaṃbhagavānviṣṇuḥ saṃsmṛto roganudbhavet /
dhyāto 'rcitaḥ stuto vāpi nātra kāryā vicāraṇā