Garuda Purana · Chapter 1.191

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe navatyadhikaśatatamo 'dhyāyaḥ
śrīgaruḍamahāpurāṇam- 191
hariruvāca /
punarnavāyā mūlañca śvetaṃ puṣye samāhṛtam /
vāri pītaṃ tasya pārśva bhavaneṣu na pannagāḥ

tārkṣyamūrtiṃ vahedyo vai bhallūkadantanirmitām /
sa pannagairna dṛśyeta yāvajjīvaṃ vṛṣadhvaja

pibecchalmalimūlaṃ yaḥ puṣyarkṣe rudra vāriṇā /
tasminnapāstadaśanā nāgāḥ syurnātra saṃśayaḥ

puṣye lajjālukāmūle hastabaddhe tu pannagān /
gṛhṇīyāllepato vāpi nātra kāryā vicāraṇā

puṣyeśvetārkamūlantu pītaṃ śītena vāriṇā /
naśyetu daṃśakaviṣaṃ karavīrādijaṃ viṣam

mahākālasya vai mūlaṃ piṣṭaṃ tatkāñjikena vai /
voḍrāṇāṃ ḍuṇḍubhānāṃ ca tallopo harate viṣam

taṇḍulīyakamūlaṃ ca piṣṭaṃ taṇḍulavāriṇā /
ghṛtena saha pītantu haretsarvāviṣāṇi ca

nīlīlajjālukāmūlaṃ piṣṭaṃ taṇḍulavāriṇā /
pītaṃ taddaṃśakaviṣaṃ naśyedekena vobhayoḥ

kūṣmāṇḍakasya svarasaḥ saguḍaḥ sahaśarkaraḥ /
pītaḥ sadugdho hanyācca daṃśakasyaviṣaṃ ca vai

tathā kodravamūlasya mohasya hara eva ca /
yaṣṭīmadhusamāyuktā tathā pītā ca śarkarā

sadugdhā ca trirātreṇa mūṣakānāṃ viṣaṃ haret /
culukatrayapānācca vāriṇaḥ śītalasya vai

tāmbūladagdhamukhasya lālāstrāvo vinaśyati /
ghṛtaṃ saśarkaraṃ ṣītvā madyapānamado na vai

kṛṣṇāṅkolasya mūlena pītaṃ sukvathitaṃ jalam /
tato naśyadgaraviṣaṃ trirātreṇa maheśvara

uṣṇaṃ gavyaghṛtaṃ caiva saindhavena samanvitam /
nāśayettanmahādeva vedanāṃ vṛścikodbhavām

kusubhaṃ kaṅkumañcaiva haritālaṃ manaḥ śilā /
karañjaṃ piṣitaṃ caiva hyarkamūlaṃ ca śaṅkara

viṣaṃnṛṇāṃ vinaśyettu eteṣāṃ bhakṣaṇācchiva /
dīpatailapradānācca daṃśairākīṭajaiḥ śiva /
kharjūrakaviṣaṃ naśyettadā vai nātra saṃśayaḥ

daṃśasthānaṃ vṛścikasya śuṇṭhī tagarasaṃyutā /
naśyenmadhumakṣikāyā eteṣāṃ lepato viṣam

śatapuṣpā saindhavañca sājyaṃ vā tena lepayet /
śirīṣasya tu bījaṃvai siddha kṣīreṇa gharṣitam

tallepena mahādeva naśyetkukkurajaṃ viṣam /
jvalitāgnirvāriseko tathā dardurajaṃ viṣam

dhattūrakarasonmiśraṃ kṣīrādyaguḍapānataḥ /
śūnāṃ viṣaṃ vinaśyettu śaśāṅkāṅkitaśekhara

vaṭanimbaśamīnāñca valkalaiḥ kvathitaṃ jalam /
tatsekānmukhadantānāṃ naśyedvai viṣavedanā

lepanāddevadārośca gairikasya ca lepanāt /
nāgeśvaro daridre dve tathā mañjiṣṭhakā hara /
ebhirlepādvinaśyettu lūtāviṣamumāpate

karañjasya tu bījāni varuṇacchadameva ca /
tilāśca sarṣapā hanyurviṣaṃ vai nātra saṃśayaḥ

ghṛtaṃ kumārīpatraṃ vai dattaṃ salavaṇaṃ hara /
turaṅgamaśarīrāṇāṃ kaṇḍūrnaśyeddaśāhataḥ