Garuda Purana · Chapter 1.190

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe ekonanavatyadhikaśatatamo 'dhyāyaḥ
śrīgaruḍamahāpurāṇam- 190
hariruvāca /
aparājitāyā mūlañca gomūtreṇa samanvitam /
pītañcāśu haratyeva gaṇḍamālāṃ na saṃśayaḥ

athendravāruṇīmūlaṃ vidhinā pītamīśvara /
jiṅgiṇyairaṇḍakaṃ rudra śūkaśimbyā samanvitam /
śītodakañca tatryastaṃ bāhugrīvāvyathāṃ haret

māhiṣaṃ navanītañca aśvagandhā ca pippalī /
vacā kuṣṭhadvayaṃ lepo liṅgasrotastanārtihṛt

kuṣṭhanāgabalācūrṇaṃ navanītasamanvitam /
tallepo yuvatīnāñca kuryādvṛttojakau śubhau

indravāruṇikāmūlaṃ yasya nāmnā sudūrataḥ /
niḥ kṣipyate samutpāṭya tasya plīhā vinaśyati

punarnavāyāḥ śuklāyā mūlaṃ taṇḍulavāriṇā /
pītaṃ vidradhinutsyācca nātra kāryā vicāraṇā

kadalīdalakṣārantu pānīyena prasādhitam /
tasyādanādvinaśyanti udaravyādhayo 'khilāḥ

kadalyā mūlamādāya guḍājyena samanvitam /
agninā sādhitaṃ jagdhamudarasthakrimīnharet

nityaṃ nimbadalānāñca cūrṇamāmalakasya ca /
pratyūṣe bhakṣayeccaiva tasya kuṣṭhaṃ vinaśyati

harītakīviḍaṅgañca haridrā sitasarṣapāḥ /
somarājasya mūlāni karañjasya ca raundhavam /
gomūtrapiṣṭānyetāni kuṣṭharogaharāṇi vai

ekaśca triphalābhāgastathā bhāgadvayaṃ śivā /
somarājasya bījānāṃ jagdhaṃ pathyena dadrunut

amlatakraṃ sagomūtraṃ kvathitaṃ lavaṇānvitam /
kāṃsyaghṛṣṭaṃ kharaṃ lepātkuṣṭhadadruvināśanam

haridrā haritālaśca dūrvāgomūtrasaindhavam /
ayaṃ lepo hanti dadruṃ pāmānaṃ ca garaṃ tathā

soma rājasya bījāni navanītayutāni ca /
madhunāsvāditāni syuḥ śuklakuṣṭhaharāṇi vai /
takrānnapānato rudra nātra kāryā vicāraṇā

śvetāparā jitāmūlaṃ vartitaṃ cāsya vāriṇā /
tallepo rudra māsena śuklakuṣṭhavināśanaḥ

māhiṣaṃ navanītañca sindūraṃ samarīcakam /
pāmā vilepanānnaśyeddur nāmā vṛṣabhadhvaja

viśuṣkagāmbhārīmūlaṃ pakvaṃ kṣīreṇa saṃyutam /
bhakṣitaṃ śuklapittasya vināśakaramīśvara

mūlakasya tu bījāni hyapā mārgarasena vai /
piṣṭāni tena lepena sidhmakaṃ rudra naśyati

kadalīkṣārasaṃyuktaharidrā sidhmakāpahā /
rambhāpāmārgayoḥ kṣāra eraṇḍena vimiśritaḥ /
tadabhyaṅgānmahādeva ! sadyaḥ sidhma vinaśyati

kūṣmāṇḍanālakṣāraśca sagomūtraśca tattvataḥ /
jalapiṣṭā haridrā ca siddhā mandānalenahi

māhiṣeṇa purīṣeṇa veṣṭitā vṛṣabhadhvaja /
asyā udvartanaṃ kuryādaṅgasauṣṭhavamīśvara

tilasarṣapasaṃyuktaṃ haridrādvayakuṣṭhakam /
tenodvartitadehaḥ syāddurgandhaḥ surabhiḥ pumān

manoharaścānudinaṃ dūrvāṇāṃ kākajaṅghāyā /
arjunasya tu puṣpāṇi jambūpatrayutāni ca /
salodhrāṇi ca tallepo dehadurgandhatāṃ haret

yuktaṃ lodhrabhavairnoraiścūrṇantu kanakasya ca /
tenodvartitadehasya na syādgrīṣmaprabādhikā

dugdhenoṣasi sekaśca gharmadoṣaśca naśyati /
kākajaṅghodvartanantu hyaṅgarāgakaraṃ bhavet

madhuyaṣṭī śarkarā ca vāsakasya raso madhu /
etatpītaṃ raktapittakāmalāpāṇḍuroganut

raktapittaṃ haretpīto vāsakasya raso madhu /
prātaḥ kāle toyapānātpīnasaṃ dāruṇaṃ haret

bibhītakasya vai cūrṇaṃ pippalyāḥ saindhavasya ca /
pītaṃ sakāñjikaṃ hanti svarabhedaṃ maheśvara

cūrṇamāmalakaṃ sevyaṃ pītaṃ gavyapayo 'nvitam /
manaḥ śilā balāmūlaṃ kolapaṇa ca gugguluḥ

jātipatraṃ kolapatraṃ tathā caiva manaḥ śilā /
ebhiścaiva kṛtā vartirbadaryagnau maheśvara /
dhūmapānaṃ kāsaharaṃ nātra kāryā vicāraṇā

triphalāpippalīcūrṇaṃ bhakṣitaṃ madhunāyutam /
bhojanādau hi samadhu pipāsājva(tva)ritaṃ haret

bilvamūlañca samadhuguḍūcīkvathitaṃ jalam /
pītaṃ harecca trivadhaṃ chardiṃ naivātrasaṃśayaḥ /
pītā dūrvā chardinutsyātpiṣṭātaṇḍulavāriṇā