Garuda Purana · Chapter 1.189

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe vraṇāci dṛmāṣṭāśītyadhikaśatatamo 'dhyāyaḥ
śrīgaruḍamahāpurāṇam- 189
hariruvāca /
śvetāparājitāpuṣparasenākṣṇośca pūraṇe /
paṭalaṃ nāśamāyāti nātra kāryā vicāraṇā

mūlaṃ gokṣurakasyaiva carvitvā nīlalohita /
dantakīṭavyathā naśyetsurāsuravimardan

nārī puṣpādine pītvā gokṣīreṇopavāsataḥ /
śvetārkasya tu vai mūlaṃ tasyāstadgulmaśūlanut

śvetārkapuṣpaṃ vidhinā gṛhītaṃ pūrvamantritam /
ṛtuśuddhā ca lalanā kaṭau baddhvā prasūyate

hastabaddhaṃ palāśasya apāmārgasya vā hara /
mūlaṃ sarvajvaraharaṃ bhūtapretādinudbhavet

pītaṃ vṛścikamūlañca prātaḥ paryuṣitāmbunā /
sārdhaṃ vināśayeddāhajvarañca parameśvara

śikhāyāñcaiva tadbaddhaṃ bhavedaikāhikāhinut /
pītaṃ paryuṣitādbhiśca bhavetsarvaviṣāpahṛt

yasya lajjālukāmūlaṃ dīyate ca svaretasā /
sārdhaṃ sa vairaṃ saṃyāti pumānstrī vā na saṃśayaḥ

piṣṭvā gavyaghṛtenaiva pāṭhāmūlaṃ pibettu yaḥ /
sarvaṃ viṣaṃ vinaśyecca nātra kāryā vicāraṇā

mūlaṃ paryuṣitodena śirīṣasya yathā tathā /
raktacitrakamūlasya rasasya bharaṇāddhara /
karṇayoḥ kāmalāvyādhināśaḥ syānnātra saṃśayaḥ

śvetakokilākṣamūlaṃ chāgīkṣīreṇa saṃyutam /
trisaptāhena vai pītaṃ kṣayarogaṃ kṣayaṃ nayet

nārikelasya vai puṣpaṃ chāgakṣīreṇa saṃyutam /
pibecca trividhastasya raktavāto vinaśyati

kuryātsudarśanāmūlaṃ mālyena susamāhṛtam /
kaṇṭhabaddha tryāhikādigrahabhūtavināśanam

puṣpaṃ dhavalaguñjāyā gṛhītaṃ mūlameva ca /
mukhe tu nihitaṃ rudra harennānāviṣaṃ bahu

haste baddhaṃ kāṇḍayuktaṃ kaṇṭhe baddhaṃ grahādihṛt /
kṛṣṇāyāntu caturdaśyāṃ kaṭibaddhaṃ samāhṛtam /
siṃhādiśvāpadādbhītiṃ harecca nīlalohita

viṣṇukrāntāmūlamīśa karṇabaddhantu dhārayet /
paṭṭasūtreṇa bhūteśa makarādibhayaṃ na vai