ગરુડ પુરાણ · અધ્યાય 1.190

ઇતિ શ્રીગારુડે મહાપુરાણે પૂર્વખણ્ડે પ્રથમાંશાખ્યે આચારકાણ્ડે એકોનનવત્યધિકશતતમો ઽધ્યાયઃ
શ્રીગરુડમહાપુરાણમ્- 190
હરિરુવાચ ।
અપરાજિતાયા મૂલઞ્ચ ગોમૂત્રેણ સમન્વિતમ્ ।
પીતઞ્ચાશુ હરત્યેવ ગણ્ડમાલાં ન સંશયઃ

અથેન્દ્રવારુણીમૂલં વિધિના પીતમીશ્વર ।
જિઙ્ગિણ્યૈરણ્ડકં રુદ્ર શૂકશિમ્બ્યા સમન્વિતમ્ ।
શીતોદકઞ્ચ તત્ર્યસ્તં બાહુગ્રીવાવ્યથાં હરેત્

માહિષં નવનીતઞ્ચ અશ્વગન્ધા ચ પિપ્પલી ।
વચા કુષ્ઠદ્વયં લેપો લિઙ્ગસ્રોતસ્તનાર્તિહૃત્

કુષ્ઠનાગબલાચૂર્ણં નવનીતસમન્વિતમ્ ।
તલ્લેપો યુવતીનાઞ્ચ કુર્યાદ્વૃત્તોજકૌ શુભૌ

ઇન્દ્રવારુણિકામૂલં યસ્ય નામ્ના સુદૂરતઃ ।
નિઃ ક્ષિપ્યતે સમુત્પાટ્ય તસ્ય પ્લીહા વિનશ્યતિ

પુનર્નવાયાઃ શુક્લાયા મૂલં તણ્ડુલવારિણા ।
પીતં વિદ્રધિનુત્સ્યાચ્ચ નાત્ર કાર્યા વિચારણા

કદલીદલક્ષારન્તુ પાનીયેન પ્રસાધિતમ્ ।
તસ્યાદનાદ્વિનશ્યન્તિ ઉદરવ્યાધયો ઽખિલાઃ

કદલ્યા મૂલમાદાય ગુડાજ્યેન સમન્વિતમ્ ।
અગ્નિના સાધિતં જગ્ધમુદરસ્થક્રિમીન્હરેત્

નિત્યં નિમ્બદલાનાઞ્ચ ચૂર્ણમામલકસ્ય ચ ।
પ્રત્યૂષે ભક્ષયેચ્ચૈવ તસ્ય કુષ્ઠં વિનશ્યતિ

હરીતકીવિડઙ્ગઞ્ચ હરિદ્રા સિતસર્ષપાઃ ।
સોમરાજસ્ય મૂલાનિ કરઞ્જસ્ય ચ રૌન્ધવમ્ ।
ગોમૂત્રપિષ્ટાન્યેતાનિ કુષ્ઠરોગહરાણિ વૈ

એકશ્ચ ત્રિફલાભાગસ્તથા ભાગદ્વયં શિવા ।
સોમરાજસ્ય બીજાનાં જગ્ધં પથ્યેન દદ્રુનુત્

અમ્લતક્રં સગોમૂત્રં ક્વથિતં લવણાન્વિતમ્ ।
કાંસ્યઘૃષ્ટં ખરં લેપાત્કુષ્ઠદદ્રુવિનાશનમ્

હરિદ્રા હરિતાલશ્ચ દૂર્વાગોમૂત્રસૈન્ધવમ્ ।
અયં લેપો હન્તિ દદ્રું પામાનં ચ ગરં તથા

સોમ રાજસ્ય બીજાનિ નવનીતયુતાનિ ચ ।
મધુનાસ્વાદિતાનિ સ્યુઃ શુક્લકુષ્ઠહરાણિ વૈ ।
તક્રાન્નપાનતો રુદ્ર નાત્ર કાર્યા વિચારણા

શ્વેતાપરા જિતામૂલં વર્તિતં ચાસ્ય વારિણા ।
તલ્લેપો રુદ્ર માસેન શુક્લકુષ્ઠવિનાશનઃ

માહિષં નવનીતઞ્ચ સિન્દૂરં સમરીચકમ્ ।
પામા વિલેપનાન્નશ્યેદ્દુર્ નામા વૃષભધ્વજ

વિશુષ્કગામ્ભારીમૂલં પક્વં ક્ષીરેણ સંયુતમ્ ।
ભક્ષિતં શુક્લપિત્તસ્ય વિનાશકરમીશ્વર

મૂલકસ્ય તુ બીજાનિ હ્યપા માર્ગરસેન વૈ ।
પિષ્ટાનિ તેન લેપેન સિધ્મકં રુદ્ર નશ્યતિ

કદલીક્ષારસંયુક્તહરિદ્રા સિધ્મકાપહા ।
રમ્ભાપામાર્ગયોઃ ક્ષાર એરણ્ડેન વિમિશ્રિતઃ ।
તદભ્યઙ્ગાન્મહાદેવ ! સદ્યઃ સિધ્મ વિનશ્યતિ

કૂષ્માણ્ડનાલક્ષારશ્ચ સગોમૂત્રશ્ચ તત્ત્વતઃ ।
જલપિષ્ટા હરિદ્રા ચ સિદ્ધા મન્દાનલેનહિ

માહિષેણ પુરીષેણ વેષ્ટિતા વૃષભધ્વજ ।
અસ્યા ઉદ્વર્તનં કુર્યાદઙ્ગસૌષ્ઠવમીશ્વર

તિલસર્ષપસંયુક્તં હરિદ્રાદ્વયકુષ્ઠકમ્ ।
તેનોદ્વર્તિતદેહઃ સ્યાદ્દુર્ગન્ધઃ સુરભિઃ પુમાન્

મનોહરશ્ચાનુદિનં દૂર્વાણાં કાકજઙ્ઘાયા ।
અર્જુનસ્ય તુ પુષ્પાણિ જમ્બૂપત્રયુતાનિ ચ ।
સલોધ્રાણિ ચ તલ્લેપો દેહદુર્ગન્ધતાં હરેત્

યુક્તં લોધ્રભવૈર્નોરૈશ્ચૂર્ણન્તુ કનકસ્ય ચ ।
તેનોદ્વર્તિતદેહસ્ય ન સ્યાદ્ગ્રીષ્મપ્રબાધિકા

દુગ્ધેનોષસિ સેકશ્ચ ઘર્મદોષશ્ચ નશ્યતિ ।
કાકજઙ્ઘોદ્વર્તનન્તુ હ્યઙ્ગરાગકરં ભવેત્

મધુયષ્ટી શર્કરા ચ વાસકસ્ય રસો મધુ ।
એતત્પીતં રક્તપિત્તકામલાપાણ્ડુરોગનુત્

રક્તપિત્તં હરેત્પીતો વાસકસ્ય રસો મધુ ।
પ્રાતઃ કાલે તોયપાનાત્પીનસં દારુણં હરેત્

બિભીતકસ્ય વૈ ચૂર્ણં પિપ્પલ્યાઃ સૈન્ધવસ્ય ચ ।
પીતં સકાઞ્જિકં હન્તિ સ્વરભેદં મહેશ્વર

ચૂર્ણમામલકં સેવ્યં પીતં ગવ્યપયો ઽન્વિતમ્ ।
મનઃ શિલા બલામૂલં કોલપણ ચ ગુગ્ગુલુઃ

જાતિપત્રં કોલપત્રં તથા ચૈવ મનઃ શિલા ।
એભિશ્ચૈવ કૃતા વર્તિર્બદર્યગ્નૌ મહેશ્વર ।
ધૂમપાનં કાસહરં નાત્ર કાર્યા વિચારણા

ત્રિફલાપિપ્પલીચૂર્ણં ભક્ષિતં મધુનાયુતમ્ ।
ભોજનાદૌ હિ સમધુ પિપાસાજ્વ(ત્વ)રિતં હરેત્

બિલ્વમૂલઞ્ચ સમધુગુડૂચીક્વથિતં જલમ્ ।
પીતં હરેચ્ચ ત્રિવધં છર્દિં નૈવાત્રસંશયઃ ।
પીતા દૂર્વા છર્દિનુત્સ્યાત્પિષ્ટાતણ્ડુલવારિણા