Garuda Purana · Chapter 1.124

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe bhīṣmapañcakādivrataṃ nāma trayoviṃśatyuttaraśatatamo 'dhyāyaḥ
śrīgaruḍamahāpurāṇam- 124
brahmovāca /
śivarātrivrataṃ vakṣye kathāṃ vai sarvakāmadām /
yathā ca gaurī bhūteśaṃ pṛcchati sma paraṃ vratam

īśvarauvāca /
māghaphālgunayormadhye kṛṣṇā yā tu caturdaśī /
tasyāṃ jāgaraṇādrudraḥ pūjito bhuktimuktidaḥ

kāmayukto haraḥ pūjyo dvādaśyāmi keśavaḥ /
upoṣitaiḥ pūjitaḥ sannarakāttarayattathā

niṣādaścarbude rājā pāpī sundarasenakaḥ /
sa kukruraiḥ samāyukto mṛgānhantuṃ vanaṃ gataḥ

mṛgādi kamasaṃprāpya kṣutpipāsārdito girau /
rātrau taḍāgatīreṣu nikuñje jāgradāsthitaḥ

tatrāsti liṅgaṃ svaṃ rakṣañcharīraṃ cākṣipattataḥ /
parṇāni cāpatanmūrdhni liṅgasyaiva na jānataḥ

tena dhūlinirodhāya kṣiptaṃ nīraṃ ca liṅgake /
śaraḥ pramādenaikastu pracyutaḥ karapallavāt

jānubhyāmavanīṃ gatvā liṅgaṃ spṭaṣṭvā gṛhītavān /
evaṃ snānaṃ sparśanaṃ ca pūjanaṃ jāgaro 'bhavat

prātargṛhāgato bhāryādattānnaṃ bhuktavānsa ca /
kāle mṛto yamabhaṭaiḥ pāśairbaddhvā tu nīyate

tadā mama gaṇairyuddhe jitvā muktīkṛtaḥ sa ca /
kukkureṇa sahaivābhūdgaṇo matpārśvago 'malaḥ

evamajñānataḥ puṇyañjñānātpuṇyamathākṣayam /
trayodaśyāṃ śivaṃ pūjya kuryātta niyamaṃ vratī

prātardeva ! caturdaśyāṃ jāgariṣyāmyahaṃ niśi /
pūjāṃ dānaṃ tapo homaṃ kariṣyāmyātmaśaktitaḥ

caturdaśyāṃ nirāhāro bhūtvā śambho pare 'hani /
bhokṣye 'haṃ bhuktimuktyarthaṃ śaraṇaṃ me bhaveśvara

pañcagavyāmṛtaiḥ snāpya tatkāle guruṃ śritaḥ /
oṃ namo namaḥ śivāya gandhādyaḥ pūjayeddharam

tilataṇḍulavrīhīṃśca juhuyātsaghṛtaṃ carum /
hutvā pūrṇāhutiṃ dattvā śṛṇuyādgītasatkathām

ardharātre triyāme ca caturthe ca punayarjat /
mūlamantraṃ tathā japtvā prabhāte tu kṣamāpayet

avighnena vrataṃ deva ! tvatprasadānmayārcitam /
kṣamasva jagatāṃ nātha ! trailokyādhipate hara !

yanmayādya kṛtaṃ puṇyaṃ yadrudrasya niveditam /
tvatprasādānmayā deva ! vratamadya samāpitam

prasanno bhava me śrīman gṛhaṃ prati ca gamyatām /
tvadālokanamātreṇa pavitro 'smi na saṃśayaḥ

bhojayeddhyānaniṣṭhāṃśca vastracchatrādikaṃ dadet /
devādideva bhūteśa lokānugrahakāraka

yanmayā śraddhayā dattaṃ prīyatāṃ tena me prabhuḥ /
iti kṣamāpya ca vratī kuryādvādaśavārṣikam

kīrtiśrīputrarājyādi prāpya śaivaṃ puraṃ vrajet /
dvādaśeṣvapi māseṣu prakuryādiha jāgaram

vratī dvādaśa saṃbhojya dīpadaḥ svargamāpnuyāt