Garuda Purana · Chapter 1.119
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe 'khaṇḍadvādaśīvratakathanaṃnāmāṣṭādaśottara śatatamo 'dhyāyaḥ
śrīgaruḍamahāpurāṇam- 119
brahmovāca /
agastyārghyavrataṃ vakṣye bhuktimuktipradāyakam /
aprāpte bhāskare kanyāṃ sati bhāge tribhirdinaiḥ
arghyaṃ dadyādagastyāya mūrtiṃ saṃpūjya vai mune ! /
kāśapuṣpamayīṃ kumbhe pradoṣe kṛtajāgaraḥ
dadhyakṣatādyaiḥ saṃpūjya upoṣya phalapuṣpakaiḥ /
pañcavarṇasamāyuktaṃ hemaraupyasamanvitam
saptadhānyayutaṃ pātraṃ dadhicandanacarcitam /
agastyaḥ khanamāneti mantreṇārghyaṃ pridāpayet
khāsapuṣpapratīkāśa agnimārutasambhava ! /
mitrāvāruṇayoḥ puttro kumbhayone namo 'stu te
śūdrastryādiranenaiva tyajeddhānyaṃ phalaṃ rasam /
dadyāddvijātaye kumbhaṃ sahiraṇyaṃ sadakṣiṇam /
bhojayecca dvijānsapta varṣaṃ kṛtvā tu sarvabhāk
Original text: Garuḍapurāṇa · Edition: Bombay : Venkatesvara Steam Press (or a reprint thereof) · Data entry members of the Sansknet Project · GRETIL (Göttingen) · CC BY-NC-SA 4.0