Garga Samhita · Chapter 8

brahmaṇaḥ kṛṣṇasvarūpadarśanam -
śrīnārada uvāca -
adṛṣṭvā vatsakānetya vatsapān puline hariḥ /
ubhau vicinvan vipine mene karma vidheḥ kṛtam

tato gavāṃ gopikānāṃ mudaṃ kartuṃ sa līlayā /
sarvaṃ tu viśvakṛccakre hyātmānamubhayāyitam

yāvad‌vatsapavatsānāṃ vapuḥ pāṇipadādikān /
yāvadyaṣṭiviṣāṇādīn yāvacchīlaguṇādikān

yāvad bhūṣaṇavastrādīn tāvacchrīhariṇā svataḥ /
sarvaṃ viṣṇumayaṃ viśvamiti vākyaṃ pradarśitam

ātmavatsānātmagopaiścārayan krīḍayā hariḥ /
prāviśannandanagaramastaṃgirigate ravau

tattad‌goṣṭhe pṛthaṅnītvā tattad‌vatsān praveśya ca /
kṛṣṇo'bhavattattadātmā tattad‌gehaṃ praviṣṭamān

śrutvā vaṃśīravaṃ gopyaḥ sambhramācchīghramutthitāḥ /
payāṃsi pāyayāmāsuḥ lālayitvā sutān pṛthak

svān svān vatsān tathā gāvo rambhamāṇānnirīkṣya ca /
lihantyo jihvayāṅgāni payāṃsi ca hyapāyayan

abhavanmātaraḥ sarvā gopyo gāvo hareraho /
atisnehañca vavṛdhe pūrvato hi caturguṇam

svaputrā lālayitvā tu majjanonmardanādibhiḥ /
paścād‌gopyaśca kṛṣṇasya darśanaṃ kartumāyayuḥ

anekānāṃ tu bālānāmud‌vāhāḥ kṛṣṇarūpiṇām /
babhūvustā vraje vadhvo ratāḥ kṛṣṇe tu koṭiśaḥ

vatsapālamiṣeṇāpi svātmānaṃ hyātmanā hareḥ /
pālito vatsaraścaiko babhūva vrajamaṇḍale

sarāmaścaikadā vatsān cāraṇyaṃ cārayan yayau /
hāyanāpūraṇīṣvatra pañcapāsu ca rātriṣu

tatrāpi dūrāccarataśca gāvo
vatsānupavrajya gireśca śṛṅ‌gāt /
lihanti cāṅ‌gāni vilokayantyo
hyapāyayaṃstā amṛtāni sadyaḥ

govardhanādadho vatsān pītadugdhān vilokya ca /
snehāvṛttāḥ sthitā gāśca gopālā dadṛśurnṛpa

tataḥ krodhena mahatā parvatādavatīrya ca /
tāḍanārthe svaputrāṇāmājagmuḥ kṛcchrato drutam

yadā''gatā samīpe tu putrāṇāṃ gopanāyakāḥ /
svānsvān sutān tadonnīya hyaṅke kṛtvā milanti vai

yathā yuvāno vṛddhāśca snehādaśrupariplutāḥ /
svānsvān pautrān gṛhītvā tu hyupaviṣṭā milanti hi

evaṃ premaparān sarvān dṛṣṭvā saṅkarṣaṇo balaḥ /
bahuprakāraṃ sandehaṃ kṛtvā manasi so'bravīt

aho kiṃ vatsarātprāpto na jñāto'pi vraje mayā /
atisnehastu sarveṣāṃ vardhate ca dine dine

meyaṃ māyā samāyātā devagaṃdharvarakṣasām /
nānyā me mohinī māyā vinā kṛṣṇasya sāmpratam

evaṃ vicārya rāmastu locane sve nyamīlayat /
bhūtaṃ bhavyaṃ bhaviṣyacca divyākṣābhyāṃ dadarśa ha

sarvān vatsāṃstathā gopān vaṃśīvetravibhūṣitān /
barhipakṣadharān śyāmān bhṛgvaṅ‌ghri kṛtakautukān

jālakānāṃ maṇīnāñca guñjānāṃ sragbhireva ca /
padmānāṃ kumudānāñca hyeṣāṃ sragbhirvibhūṣitān

uṣṇīṣairmukuṭairdivyaiḥ kuṇḍalairalakairvṛtān /
ānandavarṣān kurvāṇān śaratpadmadṛśairapi

koṭikandarpalāvaṇyān nāsāmauktikaśobhitān /
śikhābhūṣaṇasaṃyuktān pāṇibhūṣaṇabhūṣitān

dvibhujān pītavastraiśca kāñcīkaṭakanūpuraiḥ /
prabhātaravikoṭīnāṃ śobhābhiḥ śobhitān śubhān

uttare girirājasya yamunāyāśca dakṣiṇe /
ācaṣṭa vṛndakāraṇye sarvān kṛṣṇaṃ halāyudhaḥ

jñātvā kṛṣṇakṛtaṃ karma tathā vidhikṛtaṃ balaḥ /
punarvatsān vatsapām̐śca paśyan kṛṣṇamuvāca ha

brahmānanto dharma indraḥ śivaśca
sevante taṃ bhaktiyuktāḥ sadaite /
svātmārāmaḥ pūrṇakāmaḥ pareśaḥ
sraṣṭuṃ śaktaḥ koṭiśo'ṇḍāni yaḥ khe

śrīnārada uvāca -
evaṃ bruvati śrīrāme tāvat tatrāgato vidhiḥ /
dadarśa kṛṣṇaṃ rāmañca vatsakairvatsapaiḥ samam

aho kṛṣṇena cānītā yatra sarve dhṛtā mayā /
iti bruvan yayau sthāne tatra sarvān dadarśa saḥ

dṛṣṭvā prasuptān sarvāṃstu sa āgatya vraje punaḥ /
vatsapālairhariṃ vīkṣya manasi prāha vismitaḥ

aho vicitraṃ te sarve kutra sthānātsamāgatāḥ /
krīḍanto pūrvavaccātra sākaṃ kṛṣṇena krīḍanaiḥ

mattruṭirvatsaraścaiko vyatīto'bhūnmahītale /
sarve prasannatāṃ prāptā na jñātaḥ kenacitkvacit

evaṃ saṃmohayan brahmā mohanaṃ viśvamohanam /
svamāyayāndhakāreṇa svagātraṃ naiva dṛṣṭavān

vatsapālāpaharaṇātkimabhūjjagataḥ pateḥ /
aho khadyotavadvedhā śrīkṛṣṇaravisammukhe

evaṃ vimuhyati sati jaḍībhūte ca brahmaṇi /
svamāyāṃ kṛpayā''kṛṣya kṛṣṇaḥ svaṃ darśanaṃ dadau

evaṃ tatra sakṛd‌brahmā govatsān gopadārakān /
sarvānācaṣṭa śrīkṛṣṇaṃ bhaktyā vijñānalocanaiḥ

dadarśātha vidhistatra bahirantaḥ śarīrataḥ /
svātmanā sahitaṃ rājan sarvaṃ viṣṇumayaṃ jagat

evaṃ vilokya brahmā tu jaḍo bhūtvā sthiro'bhavat /
vṛndāvad‌vṛndakāraṇye pradṛśyeta yathā tathā

svātmano mahimāṃ draṣṭuṃ hyanīśe'pi ca brahmaṇi /
cacchāda sapadi jñātvā māyājavanikāṃ hariḥ

tataḥ pralabdhanayanaḥ sraṣṭā supta ivotthitaḥ /
unmīlya nayane kṛcchrāddadarśedaṃ sahātmanā

samāhitastatra bhūtvā sadyo'paśyaddiśo daśa /
śrīmad‌vṛndāvanaṃ ramyaṃ vāsantīlatikānvitam

śārdūlabālakairyatra krīḍanti mṛgabālakāḥ /
śyenaiḥ kapotā nakulaiḥ sarpā vairavivarjitāḥ

tataśca vṛṃdakāraṇye sapāṇikavalaṃ vidhiḥ /
vatsān sakhīn vicinvantamekaṃ kṛṣṇaṃ dadarśa saḥ

dṛṣṭvā gopālaveṣeṇa guptaṃ golokavallabham /
jñātvā sākṣāt hariṃ brahmā bhīto'bhūtsvakṛtena ca

taṃ prasādayituṃ rājan jvalantaṃ sarvato diśam /
lajjayāvāṅ‌mukho bhūtvā hyavatīrya svavāhanāt

śanairupasasāreśaṃ prasīdeti vadan naman /
sravad‌varṣāśrudattārghaḥ sa papātātha daṇḍavat

utthāpyāśvāsya taṃ kṛṣṇaḥ priyaḥ priya iva spṛśan /
surān subhuvi dūrasthānāluloka sudhā''rdradṛk

tato jayajayetyuccaiḥ stuvatāṃ namatāṃ samam /
taddayādṛṣṭadṛṣṭānāṃ sānandaḥ sambhramo'bhavat

dṛṣṭvā hariṃ tatra samāsthito vidhi-
rnanāma taṃ bhaktimanāḥ kṛtāñjaliḥ /
stutiṃ cakārāśu sa daṇḍavalluṭhan
prahṛṣṭaromā bhuvi gad‍gadākṣaraḥ

iti śrīgargasaṃhitāyāṃ vṛndāvanakhaṇḍe
brahmaṇaḥ śrīkṛṣṇadarśanavarṇanaṃ nāma aṣṭamo'dhyāyaḥ