Garga Samhita · Chapter 8.1

balabhadrakhaṇḍaḥ - prathamo'dhyāyaḥ
baladevasya avatārakāraṇam -
bahulāśva uvāca -
śrutaṃ tava mukhādbrahman maṃgalaṃ paramād‌bhutam //
sudhākhaṃḍātparaṃ miṣṭaṃ khaṇḍaṃ viśvajitaṃ param

paripūrṇatamasyāpi śrīkṛṣṇasya mahātmanaḥ //
ṣoḍaśastrīsahasrāṇāṃ putrā daśadaśābhavan

teṣāṃ putrāśca pautrāśca babhūvuḥ koṭiśo mune //
rajāṃsi bhūmergaṇayenna kaviśceddhareḥ kulam

revatyāṃ baladevasya rāmasyāpi mahātmanaḥ //
putrodayaḥ kathaṃ nu syādetanme brūhi tatvataḥ

śrīnārada uvāca -
bāḍhamuktaṃ bhagavataḥ saṃkarṣaṇasyācyutāgrajasya balabhadrasya
rāmasya kāmapālasya kathāṃ sarvathā tavāgre kathayiṣyāmi

atha kadācitprāḍ‌vipāko nāma munīṃdro
yogīndro duryodhanagururgajāhvayaṃ nāma puramājagāma

suyodhanena saṃpūjitaḥ paramādareṇa
sopacāreṇa mahārhasiṃhāsane sthito'bhūt

taṃ pradakṣiṇīkṛtya praṇipatya kṛtāṃjaliḥ puraḥ sthito
manaḥsandehaṃ smṛtvā dhārtarāṣṭra iti hovāca

saṃkarṣaṇaḥ sākṣādbalabhadraḥ kiṃ kāraṇātkasmāllokātkena
prārthito bhūlokānājagāma yenedaṃ puraṃ tiryagbhūtamabhavattasya
mama gurorgadāśikṣākarasyāho tatraprabhāvaṃ nitarāṃ vadatāt

prāḍ‌vipāka uvāca -
yuvarāja kurūdvaha yaduvarasya prabhāvaṃ śṛṇu
yacchravaṇe pāpahāniḥ paraṃ bhūyāt

asmindvāparāṃte nṛpavyājadaityānīkakoṭibhi-
rbhūribhārākrāntā bhurgaurbhūtvā svayaṃbhuvaṃ śaraṇaṃ jagāma

tadupacārī suraśreṣṭhaḥ sarvasuragaṇaiḥ samṛḍo vaikuṇṭhanāthaṃ
puraskṛtya śrīvāmanavāmapādāṃguṣṭhanakhanirbhinnordhvāṃḍa-
kaṭāhavivaramārgeṇa barhirnigatya koṭiśoṃḍanicayaṃ
brahmadrave saṃprekṣan virajātīraṃ prāptavān

athāgre'saṃkhyakoṭimārtaṃḍajyotiṣāṃ maṇḍalamavekṣya
dhātā natvā dhyātvā tatrānaṃtaṃ sahasravadanaṃ
saṃkarṣaṇaṃ guṇalakṣaṇalakṣitaṃ devaiḥ saha dadarśa

tad‌bhogakuṇḍalībhūtotsaṃgevṛndāraṇyakāliṃdīgovardhanādri-
kuñjanikuñjalatātarupuñjagopālagopīgokulasaṃkulaṃ
lalitaṃ golokaṃ sarvalokanamaskṛtaṃ sametya tatra nijakuṃje
nijājñāṃ nītvāṃtaḥprāpya sākṣātparipūrṇatamaṃ svayaṃ
śrīkṛṣṇacaṃdramasaṃkhyabrahmāṃḍapatiṃ śrīrādhāpatiṃ śyāmalacchaviṃ
pītāṃbaravanamālāvaṃśīdharaṃ kvaṇatkanakanūpurakiṃkiṇī-
kaṭakāṃgadahārasphuratkaustubhāṃgulīyakaiḥ sarvataḥ
parisphuratkoṭibālamārtaṃḍamaṇḍalaṃ kirīṭakuṇḍalamaṇḍita-
gaṃḍasthalamalakālibhirvibhrājamānamukhāraviṃdaṃ namaskṛtya
vidhiḥ sarvaiḥ sarvaṃ bhūbhāravṛttāṃtaṃ kathayāṃbabhūva

teṣāṃ vijñaptiṃ vijñāya bhūmibhāraharaṇārthaṃ bhagavānsvajanān
sarvadevān yathātathamājñāṃ datvānantaṃ sahasravadanamiti hovāca

aṃga purā tvamapi vasudevasya devakyāṃ bhūtvā rohiṇyudarādāvirbhava
paścād‍devakyāḥ putratāmahaṃ prāpsyāmi

iti śrīgargasaṃhitāyāṃ balabhadrakhaṇḍe duryodhanaprāḍ‌vipākasaṃvāde
baladevāvatārakāraṇaṃ nāma prathamo'dhyāyaḥ

hariḥ ॐ tatsat śrīkṛṣṇārpaṇamastu //
vargaḥgarga saṃhitā