Garga Samhita · Chapter 7.47

śakrasakhāsahitaṃ pradyumnasya yuddham
śrīnārada uvāca -
pradyumno'tha mahāvīro nādayan jayadundubhim //
yadubhiḥ sainikaiḥ sārddhaṃ madhudhārātaṭaṃ yayau

suvarṇādritaṭībhūte vane vaiśravase śubhe //
suvarṇavarṇahaṃsāḍhye kāṃcanīlatikāvṛte

hemāvatīṣu droṇīṣu devadurgāsu maithila //
dānavānāmagamyāsu gaṃgāvetravatīṣu ca

dānavebhyaḥ prabhītānāṃ kvacitsvargātpalāyinām //
aṣṭānāṃ lokapālānāṃ nidhayo yatra saṃti hi

tatra śakrasakho deva ādhipatyābhirakṣakaḥ //
śrutvā''gataṃ ca pradyumnaṃ yuddhaṃ kartuṃ mano dadhe

pradyumnapreṣitaḥ sākṣāduddhavo buddhisattamaḥ //
papraccha dṛṣṭamārgaiśca janaistasya puraṃ yayau

natvā devaṃ śakrasakhaṃ sabhāyāmuddhavaḥ prabhuḥ //
pradyumnakathitaṃ prāha vistarānmaṃtriṇāṃ varaḥ

uddhava uvāca -
ugraseno yādaveṃdro dvārakeśo nṛpeśvaraḥ //
jaṃbūdvīpanṛpān jitvā rājasūyaṃ kariṣyati

tena praṇodito jetuṃ rukmiṇīnaṃdano balī //
jitvā sa bhāratādīni khaṃḍāni svasya tejasā

adyaivelāvṛtaṃ prāpto jetuṃ kārṣṇirmahābalaḥ //
tasmai yaccha baliṃ śīghraṃ kulakauśalahetave //
na cedyuddhaṃ hi bhavatā rājansarvavidāṃ vara

śakrasakha uvāca -
śṛṇu dūta sadā devaiḥ pūjito'haṃ naraiḥ kimu //
siddho'haṃ vai mahāvīro nāgalakṣasamo bale

aṣṭānāṃ lokapālānāmādhipatyābhirakṣakaḥ //
kubera iva kośāḍhyaḥ puraṃdara ivod‌bhaṭaḥ

ugrasenena dātavyaṃ mahyaṃ copāyanaṃ param //
purā tasmai na dāsyāmi yadurājāya bhūbhṛte

uddhava uvāca -
yathā tiraskṛtiṃ prāptaḥ kubero yadutejasā //
yathā śṛṅgāratilakaścaitradeśādhipo balī

śubhāṃgo harivarṣeśa uttareśo guṇākaraḥ //
yathā daityasakho rājā laṃkeśo rākṣaseśvaraḥ /१५//
saṃvatsaraḥ ketumālaḥ śakunyādyā mahāsurāḥ //
tathābhūtastvaṃ hi rājan baliṃ tasmai pradāsyasi

śrīnārada uvāca -
ityuddhavavacaḥ śrutvā kruddhaḥ śakrasakho balī //
uddhavaṃ pratyuvācātha śṛṇu bhāgavatottama

yāvad‌baliṃ pradasyāmi tāvattvaṃ saṃsthito bhava //
anyathā te gatirnāsti satyaṃ satyaṃ mahāmate

uddhava uvāca -
vayaṃ tu maṃtripravarāḥ pūrṇajñānapradā varāḥ //
macchikṣaṇaṃ na manyaṃte teṣāṃ no maṃgalaṃ bhavet

śrīnārada uvāca -
evaṃ sa dṛṣṭarodhena rodhayāmāsa coddhavam //
uddhavaṃ nāgataṃ rājan yadūnāmanuśocatām

dināni katicittatra vyatīyustamapaśyatām //
manmukhāttadupākarṇya pradyumno bhagavānhariḥ

jetuṃ śakrasakhaṃ prāgāttripuraṃ tryambako yathā //
yadubhirbhrātṛbhiḥ sārddhaṃ sa sainyaparivāritaḥ

suvarṇādriguhādvārātsaṃprāpto makaradhvajaḥ //
vīrakodaṇḍaṭaṃkārairdundubhidhvanimiśritaiḥ

aśvaheṣairhastinādairvineduśca diśo daśa //
sainyapādarajobhiśca yuyudhe yādavaiḥ saha

babhūva tumulaṃ yuddhaṃ chāditaṃ vyomamaṃḍalam //
vīkṣya sarve merudevā bhayaṃ prāpurnṛpeśvara

atha śakrasakhaḥ kruddho rathārūḍho mahābalaḥ //
akṣauhiṇībhirdaśabhiryuyudhe yādavaiḥ saha

babhūva tumulaṃ yuddhaṃ devānāṃ yadubhiḥ saha //
prākṛtapralaye rājannudadhīnāṃ dhvaniryathā

śastrāṃdhakāre saṃjāte sāraṇo rohiṇīsutaḥ //
baladevānujo vīro daṃśito gajasaṃsthitaḥ

sarveṣāmagrataḥ prāpto dhanuṣṭaṃkārayanmuhuḥ //
tad‌balaṃ pothayāmāsa bāṇaiḥ kodaṃḍanirgataiḥ

śrīsāraṇasya bāṇaughaiḥ kecidvīrā dvidhākṛtāḥ //
tiryagbhūtā rathā yuddhe nipetuḥ pādapā iva

gajānāṃ bhinnakuṃbhānāṃ mauktikānyapataṃstadā /
bāṇāndhakāre saṃjāte rātrau tārāgaṇā iva

saṃchidyamānairaśvaiśca vīrairnāgai raṇāṃgaṇam //
babhau bhūtagaṇairyuktaṃ yathā''krīḍamumāpateḥ

sāraṇasya balaṃ dṛṣṭvā sarve devāḥ palāyitāḥ //
saṃchinnabhinnakodaṃḍā abhitaḥ śīrṇakaṃcukāḥ

palāyamānaṃ svabalaṃ dṛṣṭvā śakrasakho balī //
dhanuṣṭaṃkārayanprāpto jagarja ghanavad‌balāt

arjunaṃ daśabhirbāṇairviṃśatyā bhānumeva ca //
sāṃbaṃ bāṇaśatairyuddhe'niruddhaṃ ca śataiḥ śaraiḥ

dviśataiśca gadaṃ vīraṃ sahasraiḥ sāraṇaṃ tathā //
tatāḍa samare vīro dhanvī śakrasakho balī

tad‌bāṇaiḥ sarathā vīrā babhramurghaṭikādvayam //
cakravatkuṃbhakārasya tadad‌bhūtamivābhavat

hayāśca paṃcatāṃ prāptāḥ ślathad‍baṃdhā rathā bhramāt //
rathinaḥ khinnamanasaḥ sūta mūrcchāṃ gatā mṛdhe

sa cānyaṃ rathamāruhya dhanuṣṭaṃkārayanbalāt //
dhanuḥ śakrasakhasyāpi ciccheda daśabhīḥ śaraiḥ

dvābhyāṃ sūtaṃ śatairaśvānsahasraistad‌rathaṃ śaraiḥ //
cūrṇayāmāsa rājendra sāṃbo jāṃbavatīsutaḥ

sa cchinnadhanvā viratho hatāśvo hatasārathiḥ //
nāgeṃdraṃ mattamāruhya śūlaṃ jagrāha roṣataḥ

vivyādha sāṃbaṃ śūlena hṛdi śakrasakho balī //
tena ghātena sāṃbo'pi kiṃcidvyākulamānasaḥ

yojane pādavikṣepaṃ kajjalādrisamaprabham //
caturyojanamuccāṃgaṃ yojanārddharadadvayam

mahaccītkāraṃ kurvaṃtaṃ triśūṇḍādaṃḍamaṃḍalaiḥ //
śrṛṃkhale pātayaṃtaṃ taṃ caturyojanavistṛtaiḥ

gajān vīrānmardayaṃtaṃ rathānaśvānitastataḥ //
daṃtaiḥ pādairghātayaṃtaṃ kālāṃtakayamopamam

āgataṃ vīkṣya nāgeṃdraṃ śatruṇā noditaṃ param //
vicaraṃtaṃ mṛdhād‌bhītā yadusenā vidudruvuḥ

gado gadāṃ samādāya baladevānujo balī //
jaghāna tad‌gajaṃ kuṃbhe gadayā vajrakalpayā

tadghātabhinnakuṃbho hi gajo yuddhe papāta ha //
chinnapakṣo yathā śailastadad‍bhutamivābhavat

atha śakrasakho yāvad‌gadāṃ jagrāha roṣataḥ //
tāvattatāḍa gadayā gadaḥ śakrasakhaṃ hṛdi

tena ghātena sagajo patito mūrchito'bhavat //
punarutthāya sa gadaṃ bhujābhyāṃ jagṛhe mṛdhe

gadaśakrasakhau yuddhe yuyudhāte parasparam //
raṃge mallāviva vanye vanyau tau vāraṇāviva /५१//
bhujābhyāṃ taṃ samutthāpya baladevānujo balī //
cikṣepa tatpure vīraṃ balāttaṃ śatayojanam

tadā jayajayārāvo yadusainye babhūva ha //
jayadundubhayo neduḥ praśaśaṃsurmuhurjanāḥ

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
śakrasakhayuddhaṃ nāma saptacatvāriṃśo'dhyāyaḥ