Garga Samhita · Chapter 7.48

pradyumnasya dvārakāpratyāvartanam
śrīnārada uvāca -
svapure patito mūrcchāṃ gataḥ śakrasakho bhṛśam //
uttasthau ca kṣaṇaṃ tatra kiṃcid‍vyākulamānasaḥ

atha kārṣṇiṃ paraṃ brahma jñātvā śakrasakhastvaran //
svasakāśād‌balaṃ nītvā yadūnāṃ ca balaṃ yayau

airāvatakulebhāśca triśuṃḍā daṃḍadaṃtinaḥ //
caturdaṃtā śvetavarṇāḥ sahasrāṇi madacyutaḥ

hemādriprabhavā nāgā yojanadvayavigrahāḥ //
koṭiśaḥ parvatākārā unmattā diggajā iva

divyāsyā divyagatayaḥ koṭiśaḥ koṭiśo nṛpa //
śatārbudā rathā divyāḥ śātakauṃbhamayāḥ parāḥ

ayutāni vimānānāṃ yojanadvayaśālinām //
niyutaṃ kāmadhenūnāṃ pārijātasahasrakam

karidantakhacitstaṃbha-hemarat‍nakhacitpadāḥ //
muktāstaḍāgasaṃvṛddhā guṇayaṃtrasphuratprabhāḥ

mallikāmakarandārdrāḥ śirīṣakusumākulāḥ //
payaḥphenanibhāḥ śayyāḥ koṭiśaḥ sopabarhaṇāḥ

vitānāni vicitrāṇi bhittivastrāṇi koṭiśaḥ //
āsanāni mṛdusparśa-citravarṇāni sarvaśaḥ

dīrghāṇi copabarhāṇi viśvakarmakṛtāni ca //
muktāstabakahemādyaiḥ khacitāni sahasraśaḥ

sahasraśo javanikāḥ śibikāścaiva koṭiśaḥ //
chatrāṇāṃ cāmarāṇāṃ ca divyasiṃhāsanaiḥ saha

vyajanānāṃ tathā koṭī rājyaśrībhūṣaṇāni ca //
pīyūṣāṇāṃ droṇakoṭiḥ sudharmā ca sabhā tathā

evaṃ ca sarvatobhadrapadmānīti sahasrakam //
hīrakāṇāṃ ca haritāṃ muktānāṃ ca tathaiva hi

gomedānāṃ koṭibhārā nīlakānāṃ tathaiva ca //
adityacaṃdrakāṃtīnāṃ vaidūryāṇāṃ sahasraśaḥ

syamantakamaṇīnāṃ ca koṭibhārāḥ samāgatāḥ //
tathā vai padmarāgāṇāṃ bhārā viddhyarbudaṃ nṛpa

jāṃbūnadasuvarṇānāṃ hāṭakānāṃ tathaiva ca //
suvarṇādrisuvarṇānāṃ koṭibhāraśca koṭiśaḥ

rājyaṃ navavidhīnsarvāndevānāṃ maithileśvara //
aṣṭānāṃ lokapālānāmādhipatyādhirakṣakaḥ

nītvoddhavaṃ śakrasakho dattvaivaṃ balimad‌bhutam //
kauśalyahetave kārṣṇiṃ praṇanāma kṛtāṃjaliḥ

tasmai tuṣṭaḥ śaṃbarāriḥ pradadau rat‍namālikām //
saṃsthāpya rājye taṃ rājanneṣā hi prakṛtiḥ satām

itthaṃ śakrasakhaṃ jitvā pradyumnāya baliṃ dadau //
śibirāṇāṃ samūho'bhūdaruṇodānadīmanu

mahādhanakhacid‌bhiśca vitānaiḥ śatayojanam //
patatpatākairdivyābhairbhūnyastavijayadhvajaiḥ

vireje śibiravyūho laharībhiḥ payodadhiḥ //
ākāśādāgataṃ tatra gajārūḍhaṃ purandaram

sasainyaṃ sahasā rājanduṃdubhidhvanisaṃyutam //
saṃvīkṣya vegato vīrā jagṛhuḥ śastrasaṃhatim

punarindraṃ ca taṃ jñātvā babhūvurharṣitā nṛpāḥ //
śrīpradyumnaṃ sabhāmadhye kathayanmaghavā tadā

śṛṇu rājanmahābāho tvaṃ parāvaravittamaḥ //
līlāvatī nāma purī śubhā hemādrisānuṣu

vidyādhareśaḥ sukṛtī tatra rājyaṃ karoti hi //
tatkanyā suṃdarīnāmā śatacandranibhā śubhā

āgatā devatāḥ sarvāstasyā rājansvayaṃvare //
lokapālāstathā sarve saṃprāptā divyavigrahāḥ

yaṃ dṛṣṭvā mūrcchitāhaṃ syāṃ sa me bhartā bhaviṣyati //
giretyevaṃ prajalpaṃtī suṃdaraṃ varamicchatī

tatrāpi gaccha sahasā bhrātṛbhiḥ saha kautuke //
svayaṃvaraṃ paśya varaṃ devalokaiśca maṇḍitam

śrīnārada uvāca -
tacchrutvā bhagavānkārṣṇi-ryādavairbhrātṛbhiḥ saha //
purandareṇa sahasā purīṃ līlāvatīṃ yayau

viśālājirasaṃyukte khacid‌rat‍namanohare //
candanāgurukastūrīkuṃkumadravacarcite

muktāyuktaistoraṇaiśca vitānaiḥ sumahādhanaiḥ //
jāṃbūnadāsanaiḥ sākṣādiṃdraloka ivāpare

tasminsvayaṃvare tasthau pradyumno divya āsane //
giriśaśṛṅge yathā siṃhaḥ sarveṣāṃ paśyatāṃ nṛpa

vrajeśā munayastatra devā rudragaṇāstathā //
maruto ravayaścaiva vasavo hyagnayo'śvinau

yamo'tha varuṇaḥ somo dhanadaḥ śakra eva hi //
siddhā vidyādharāścaiva gaṃdharvaḥ kinnarāstathā

anye samāgatāḥ sarve rat‍nābharaṇabhūṣitāḥ //
jahurvaivāhikīmāśāṃ pradyumnaṃ vīkṣya maithila

sā suṃdarī tatra surat‍namālayā
ratiṃ ca raṃbhāṃ kṣipatīva nirgatā //
vāṇī ramāṃ rupavatīṃ pulomajāṃ
viḍaṃbayantīva babhau varāṃganā

yāṃ vīkṣya sarveṣu sadaḥsu sarvato
mohaṃ prayāteṣu tathaiva maithila //
śrīḥ sarvalokasya ca paśyato varaṃ
vicinvatī sā capaleva cāṃbudam

divyāṃbaraṃ padmadalāyatekṣaṇaṃ
pradyumnavīraṃ naralokasundaram //
sametya mūrcchāṃ samavāpa sundarī
vidyādharī sā punarāpa saṃjñām

samutthitā sātvataharṣavihvalā
tasthau sumālāṃ vinidhāya tad‌gale //
vidyādhareśaḥ sukṛtī ca sundarīṃ
sutāṃ dadau maithila śaṃbarāraye

nadatsu tūryyeṣu tadaiva nirjarā
na sehire vīkṣya vivāhamaṃgalam //
taṃ sarvataḥ saṃrurudhuḥ svayaṃvaraṃ
pracaṇḍameghā iva bhāskaraṃ param

krodhāvṛtāṃstānamarāndhanurdharān
madoddhatān vīkṣya hareḥ svayaṃvaram //
śrīkṛṣṇadattaṃ saśaraṃ dhanuḥ svayaṃ
varaṃ gṛhītvā yadubhirjagarja ha

taccāpamuktairviśikhaiḥ sphuratprabhai-
śchinnāyudhā maithila śīrṇakañcukāḥ //
vidudruvuste ca diśo daśāmarā
nīhārameghā iva sūryaraśmibhiḥ

pradyumno bhagavānsākṣāditthaṃ jitvā svayaṃvaram //
vijityelāvṛtaṃ khaṃḍaṃ bhārataṃ gaṃtumudyataḥ

bhātṛbhiryadubhiḥ sainyaiḥ sarvamaṃtrijanaiḥ saha //
āyayau bhārataṃ khaṃḍaṃ nādayan jayadundubhīn

paśyandeśānanekāṃśca jaṃbūdvīpajayo balī //
ānartāndvārakāndeśān prāpto'bhūtsa hareḥ sutaḥ

pradyumnapreṣitaḥ sākṣāduddhavo buddhisattamaḥ //
praṇanāmograsenaṃ taṃ sabhāyāṃ śrīhariṃ balī

varṣe varṣe'pi yajjātaṃ jaṃbudvipajayaṃ tathā //
tatsarvaṃ hi yathāyogyaṃ kathayāmāsa coddhavaḥ

śrīkṛṣṇabaladevābhyāṃ sarvairvṛddhajanaiḥ saha //
pradyumnaṃ taṃ samānetumugraseno vinirgataḥ

gītavāditraghoṣeṇa brahmaghoṣeṇa bhūyasā //
muktāvarṣairlājapuṣpaiḥ pāṭhārāvaiḥ sumaṃgalaiḥ

vāraṇendraṃ puraskṛtya sauvarṇaiḥ kalaśairnṛpa //
gaṃdharvairvāramukhyābhiḥ śaṃkhadundubhiveṇubhiḥ

gaṃdhākṣatairhemapātraiḥ puṣpadhūpairyavāṃkuraiḥ //
ugrasenaḥ śaṃbarāreḥ saṃmukhaṃ cājagāma ha

khaḍgaṃ nītvograsenasya puro dhṛtvā kṛtāṃjaliḥ //
nanāma kārṣṇiryadubhirbhrātṛbhiḥ saha maithila

śrīkṛṣṇaṃ sabalaṃ natvā sarvān vṛddhānpraṇamya ca //
gargācāryaṃ nanāmāśu pradyumno mīnaketanaḥ

saṃślāghyābhyarcya vidhivad‍brāhmaṇairvedasūktibhiḥ //
āropya vāraṇe kārṣṇimugrasenaḥ purīṃ yayau

maṃgalaṃ dvārakāyāṃ ca sarvatrābhūd‍gṛhe gṛhe //
itthaṃ nṛpa te kathitaṃ kiṃ bhūyaḥ śrotumicchasi

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
pradyumnadvārakāgamanaṃ nāmāṣṭacatvāriṃśo'dhyāyaḥ