Garga Samhita · Chapter 7.46

balarāmakṛtaṃ vasantamālatīpurīkarṣaṇam
atha kṛṣṇe bhagavati purīṃ dvārāvatīṃ gate //
pradyumnaḥ sainikaiḥ sārddhaṃ nadaṃ kāmadughaṃ yayau

śatayojanavistīrṇā gaṃdharvāṇāṃ manoharā //
vasaṃtamālati nāmnā hemarat‍namayī purī

lavaṃgalatikājālai-relākāśmīradeśakaiḥ //
jātīphalādijāvitrī-śrīkhaṃḍapārijātakaiḥ

mattālināditā bhṛṃgaiḥ śabditā citrapakṣibhiḥ //
gaṃdharvai rājitā bhavyairnāgairbhogavatī yathā

pataṃgo nāma tatraiva gaṃdharveśo mahābalaḥ //
karoti rājyaṃ sukṛtī śakravad‌balapauruṣam

śrutvā pradyumnamāyātaṃ digjayārthaṃ vinirgatam //
gaṃdharvairud‌bhaṭairyukto yuddhaṃ kartuṃ mano dadhe

rathāśvagajavīraiśca gaṃdharvairdaśakoṭibhiḥ //
pataṃga āgato yoddhuṃ pradyumnasyāpi saṃmukhe

gaṃdharvairyadubhiḥ sārddhaṃ ghoraṃ yuddhaṃ babhūva ha //
bhallairgadābhiḥ parighairmud‌garaistomararṣṭibhiḥ

bāṇāṃdhakāre saṃjāte pataṃgo'tiratho balī //
dhanuṣṭaṃkārayan prāpto jagarja ghanavad‌balī

gado gadāṃ samādāya baladevānujo balī //
tad‌balaṃ pothayāmāsa vajreṇeṃdro yathā girin

gadasya gadayā kecid‌gaṃdharvāḥ patitā raṇe //
rathāścūrṇīkṛtāḥ sarve mātaṃgā bhinnamastakāḥ

aśvārūḍhāḥ ke'pi vīrāḥ patitā raṇamūrddhani //
adhomukhā ūrdhvamukhā gaṃdharvāśchinnabāhavaḥ

kṣaṇamātreṇa tatsainye rudhirāṇāṃ nadī hyabhūt //
pramathā haramālārthaṃ śirāṃsi jagṛhurmṛdhe

siṃhārūḍhā bhadrakālī ḍākinī śatasaṃvṛtā //
kapālenāpi rudhiraṃ pibaṃti dṛśyate mṛdhe

evaṃ yuddhe gadakṛte gandharvāṇāṃ palāyatām //
gaṃdharveśastadā prāpto hastilakṣabalānvitaḥ

gadaṃ tatāḍa gadayā pataṃgo hṛdi maithila //
gado'pi taṃ svagadayā pataṃgaṃ hṛdi caujasā

tayośca gadayā yuddhaṃ babhūva ghaṭikādvayam //
visphuliṃgān kṣaraṃtyau dve gade cūrṇībabhūvatuḥ

lakṣabhāramayīṃ gurvīṃ gadāmādāya satvaram //
gadaṃ tatāḍa śirasi pataṃgo raṇadurmadaḥ

gadāprahāreṇa gadaḥ kṣaṇaṃ mūrchāmavāpa ha //
evaṃ kṛte ghoramṛdhe pataṃgena mahātmanā

tadaiva dvārakāpuryyāstejaḥ saṃghaṭṭamāgatam //
dadṛśuryādavāḥ sarve koṭimārtaṃḍasannibham

tasmiṃstejasi gaurāṃgo baladevo mahābalaḥ //
āvirbabhūva sahasā bhagavān bhaktavatsalaḥ

gaṃdharvāṇāṃ balaṃ sarvaṃ samākṛṣya halena vai //
tatāḍa musalaṃ kruddho balo nīlāṃbaro balī

rathān gajāṃsturaṃgāṃśca vīrāḥ śastrabhṛtāṃ varāḥ //
nipeturyugapatsarve cūrṇitāścopalā iva

pataṃgo virathastasmād‌bhītabhītaḥ purīṃ yayau //
punaryoddhuṃ yādavaiśca senāvyūhaṃ cakāra ha

śatayojanavistīrṇāṃ gaṃdharvāṇāṃ mahāpurīm //
vasaṃtamālatīṃ sarvāmudvidārya halena vai

vicakarṣa balaḥ kruddho nade kāmadughe nṛpa //
hāhākārastadaivāsīnnagaryāṃ patittairgṛhe

tiryakpotamivāghūrṇāṃ nagarī vīkṣya satvaram //
pataṃgaḥ sarvagaṃdharvairhaṣitaḥ sankṛtāṃjaliḥ

khaciddhemasuvarṇānāṃ muktātoraṇaśālinām //
daśayojanavistīrṇīkṛtānāṃ viśvakarmaṇā

kāmagānāṃ patākābhiryutānāṃ kuṃbhakoṭibhiḥ //
sahasrārkaprakāśānāṃ vimānānāṃ dvilakṣakam

caturlakṣaṃ gavāṃ caiva turaṃgāṇāṃ daśārbudam //
elālavaṃgakāśmīrajātīphalaphalaiḥ saha

sudhāphalānāṃ divyānāṃ koṭiśo bhājanāni ca //
nītvā baliṃ samādāya datvā natvā pradharṣitaḥ

kṛtāñjaliḥ prāha balaṃ balabhadraprasādavit //
pataṃga uvāca -
rāma rāma mahāvīrya na jāne tava vikramam //
yasyaikamūrdhni tilakaṃ dṛśyate bhūmimaṃḍalam

devādhideva bhagavan kāmapāla namo'stu te //
namo'naṃtāya śeṣāya sākṣād‌rāmāya te namaḥ

jayajayācyuta deva parātpara
svayamanaṃtadigaṃtagataśrute //
suramunīṃdraphaṇīṃdravarāya te
musaline balinai haline namaḥ

śrīnārada uvāca -
evaṃ stutaḥ pataṃgena balabhadro mahābalaḥ //
prasannacetā gaṃdharvaṃ mā bhaiṣṭetyabhayaṃ dadau

sthāpayitvā bale kārṣṇiṃ praṇataṃ yādaveśvaraḥ //
yādavaiḥ prastutaḥ śīghraṃ purīṃ dvārāvatīṃ yayau

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
vasaṃtamālatīkarṣaṇaṃ nāma ṣaṭ‍catvāriṃśo'dhyāyaḥ