Garga Samhita · Chapter 7.39

śakuniyuddhe kṛṣṇāgamanam
śrīnārada uvāca -
śakuniḥ punarutthāya svabalaṃ vīkṣya pothitam //
jagrāha sa mahārāja lakṣabhārasamaṃ dhanuḥ

nidhāya bāṇaṃ niśitaṃ kodaṇḍe caṇḍavikrame //
kārṣṇiṃ prāha raṇe rājañchakunirdaityarāḍbalī

śakuniruvāca -
karma pradhānaṃ jagatītale maha-
tkarmaiva sākṣād‌gururīśvaraḥ prabhuḥ //
uccāvacatvaṃ bhavatīha karmaṇā
tenaiva rājan vijayaḥ parājayaḥ

gavāṃ sahasreṣu yathā hi vatsakaḥ
svamātaraṃ viṃdati paśyatāṃ satām //
tathā hi yenāpi kṛtaṃ śubhāśubhaṃ
nareṣu tiṣṭhatsu tameva gacchati

tato vijeṣyāmi dṛḍhena karmaṇā
ripuṃ bhavantaṃ śapathaḥ kṛto mayā //
sadyaḥ kuru tvaṃ pratikārameva ta-
dyenāpi na syād‌bhuvi te parājayaḥ

śrīpradyumna uvāca -
karma pradhānaṃ yadi manyase bhavān
kālaṃ vinā tarhi phalaṃ na vidyate //
kṛte ca pāke yadi vighnatā kvacit
sadā baliṣṭhaṃ samayaṃ viduḥ pare

pākaprakāre sati pākasādhanaṃ
kadāpi kartāramṛte na jāyate //
vadanti kartāramataḥ paraṃ pare
na karma kālaṃ śṛṇu daityapuṃgava

yogaṃ viduḥ ke'pi yadā hyayogataḥ
kathaṃ bhavetkau kila pākasādhanam //
sarvaṃ hi vā yogamṛte vṛthā bhave-
tkāle tathā karmaṇī kartari sthite

yogaṃ tathā karmaṇi kartari sthite
kāle vidhiḥ sāṃkhyamṛte vṛthā bhavet //
pākaprakārādyavicārakṛdyadā
na tarhi pākasya yathā prasādhanam

yogakarmavidhikārakasaṃkhyai-
rbrahmapūruṣamṛte na hi kiṃcit //
taṃ namāmi paripūrṇatamāṃśaṃ
yena viśvamakhilaṃ viditaṃ khe

śakuniruvāca -
he pradyumna mahābāho tvaṃ sākṣājjñānaśevadhiḥ //
tava darśanamātreṇa naro yāti kṛtārthatām

ye tvasaṃgaṃ samāsādya vārtāṃ kurvanti nityaśaḥ //
teṣāṃ tu mahimānaṃ hi vaktuṃ nālaṃ caturmukhaḥ

śrīnārada uvāca -
ityuktvā śakunirdaityo māyāvī daityarāḍbalī //
śikṣitaṃ mayadaityena rauravāstraṃ samādadhe

mahoragā daṃdaśūkā vṛścikāśca viṣotkaṭāḥ //
koṭiśo garuḍā bāṇānnīlakaṃṭhāḥ kalāpinaḥ

tairdarśitaṃ balaṃ sarvaṃ phūtkārairmattatāṃ gatam //
vīkṣya kārṣṇīrmahābuddhirgaruḍāstraṃ samādadhe

koṭiśo garuḍā bāṇānnīlakaṃṭhāḥ kalāpinaḥ //
anye ca pakṣiṇo bhīmā nirgatāstasya paśyataḥ

agrasannuragānyuddhe dandaśūkānsavṛścikān //
tīkṣṇatuṇḍā bṛhatpakṣāḥ kṣaṇātte'dṛśyatāṃ gatāḥ

daityo'pi rākṣasīṃ māyāṃ gāṃdharvī gauhyakīṃ punaḥ //
paiśācīṃ saṃdadhe rājañchakuniryuddhadurmadaḥ

tad‌bāṇanirgatā bhūtāstathā pretāśca koṭiśaḥ //
aṃgārānmumucuste vai karālāḥ kṛṣṇarūpiṇaḥ

jñātvātha tāmasīṃ māyāṃ paiśācīṃ mīnaketanaḥ //
sattvāstraṃ saṃdadhe bāṇe yuddhakāṃkṣī hareḥ sutaḥ

tasmādvinirgatā rājan koṭiśo viṣṇupārṣadāḥ //
jaghnuḥ piśācīṃ tāṃ māyāṃ pannagīṃ garuḍo yathā

māyāṃ daityo'pi māyāvī gauhyakīṃ saṃdadhe punaḥ //
saṃbhūtāḥ koṭiśo meghā garjato bhīmarūpiṇaḥ

viṣṭhāṃ mūtraṃ ca rudhiraṃ medomajjāsthivarṣiṇaḥ //
jñātvātha gauhyakīṃ māyāṃ pradyumno bhagavānhariḥ

tannāśārthaṃ mahārāja kolāstraṃ saṃdadhe tviṣau //
tad‌gaṇādyajñavārāho nirgato ghargharasvanaḥ

saṭā vidhūya vegena daṃṣṭrayā tīkṣṇayā ghanān //
vidārayan‍raṇe reje veṇūnmattagajo yathā

daityo'tha māyāṃ gāṃdharvīṃ cakāra raṇamaṇḍale //
yuddhaṃ na dṛśyate tadvaddhemasaudhāni koṭiśaḥ

vastrālaṃkārayuktāni babhūvuḥ paśyatāṃ satām //
vidyādharyaśca gandharvā gāyanto nṛtyatatparāḥ

mṛdaṅgatālavāditrairmohanai rāgamiśritaiḥ //
hāvabhāvakaṭākṣaiśca toṣayaṃtyo janānnṛpa

mohinyaḥ sundarī rāmāḥ śyāmāḥ kamalalocanāḥ //
tāsāṃ lāvaṇyarāgābhyāṃ mohaṃ yāteṣu vṛṣṇiṣu

gāṃdharvīṃ mohinīṃ māyāṃ jñātvā kārṣṇirmahābalaḥ //
saṃdadhe tatprahārārthe jñānāstraṃ raṇamaṇḍale

jñānodaye tadā jāte mohanāśo nṛpeśvara //
nāśaṃ gatāyāṃ māyāyāṃ śakuniḥ krodhamūrcchitaḥ

rākṣasīṃ saṃdadhe māyāṃ māyāvī daityapuṃgavaḥ //
sapakṣaiḥ parvatai rājan kṣaṇāttacchāditaṃ nabhaḥ

mahāṃdhakāro'bhūtpṛthvyāṃ parārddhaṃ ca ghanairiva //
dagdhavṛkṣaśilāsthīni kabaṃdharudhirāṇi ca

gadāparighanistriṃśamusalādīni sarvataḥ //
aṃbarād‌babhramuḥ śailā meghā iva videharāṭ

rakṣogaṇāḥ śūlahastāśchindhi bhiṃdhīti vādinaḥ //
yātudhānāśca śataśo bhakṣayanto dvipānhayān

siṃhavyāghravarāhāśca dṛśyaṃte raṇamaṇḍale //
mardayanto nakhairnāgāṃścarvayaṃto vapūṃṣi vai

palāyamānaṃ svabalaṃ dṛṣṭvā kārṣṇīrmahābalaḥ //
jetuṃ tāṃ rākṣasīṃ māyāṃ nṛsiṃhāstraṃ samādadhe

āvirbhūto hariḥ sākṣānnṛsiṃho raudrarūpadhṛk //
sphuratsaṭo lalajjihvo nakhalāṃgūlabhūṣitaḥ

calad‌bālo bhīṣaṇāsyo huṅkāreṇātibhīṣaṇaḥ //
siṃhanādaṃ ca kurvan vai saṃsthito raṇamaṇḍale

nanāda tena brahmāṃḍaṃ saptalokairbilaiḥ saha //
vicelurdiggajāstārā rājad‌bhūkhaṃḍamaṇḍalam

gṛhītvā hyaṃbare śailānsavṛkṣānnakharaḥ kharaiḥ //
pātayāmāsa bhūpṛṣṭhe daityānāṃ ca prapaśyatām

rakṣogaṇānsaṃgṛhītvā pāṭayāmāsa vegataḥ //
yātudhānagaṇānpad‌bhyāṃ sa mamarda harirmṛdhe

siṃhānvyāghrānvarāhāṃśca saṃvidārya nakhaiḥ kharaiḥ //
cikṣepa gagane viṣṇustatraivāṃtardadhe punaḥ

nāśaṃ gatāyāṃ māyāyāṃ rākṣasyāṃ rukmiṇīsutaḥ //
śaṃkhaṃ daghmau vijayadaṃ maulendraṃ ca raṇāṃgaṇe

abhūjjayajayārāvo dundubhidhvanimiśritaḥ //
pradyumnasyopari surāḥ puṣpavarṣaṃ pracakrire

svamāyāyāṃ nirgatāyāṃ śakunirdaityapuṃgavaḥ //
sarathaḥ sainikaiḥ sārddhaṃ tatraivāṃtarhito'bhavat

māyāṃ cakāra daiteyīṃ mayadaityapradarśitām //
hastiśuṇḍāsamāṃ dhārāṃ varṣato'titaḍitsvanāḥ

sāṃvarttakagaṇā meghā ājagmuḥ paśyatāṃ satām //
kṣaṇātsarve samudrāste caṇḍavātena vepitāḥ

kṣubhitā urmisaṅgharṣāvartaiḥ plāvitabhūrujāḥ //
bhūmaṇḍalaṃ sapadi tatplāvitaṃ cātmabhiḥ samam

dṛṣṭvātha yādavāḥ sarve prāpustatra bhayaṃ bahu //
vadanto rāmakṛṣṇeti vismṛtasvaparākramāḥ

kṣaṇamātreṇa rājeṃdra tūṣṇīṃbhūtāḥ parājitāḥ //
tadā kārṣṇirmahābāhuḥ kodaṇḍe caṇḍavikrame //
bāṇaṃ nidhāya sahasā śrīkṛṣṇāstraṃ samādadhe

navārkakoṭidyutimanmahanmaho
vīraṃ jayanmaithila vai diśo daśa //
samāgataṃ tatra kuśasthalīpuraḥ
svayaṃ paraṃ svārthamivātmavāṃchitam

tasminpare tejasi nūtanāṃbuda-
cchaviṃ suvarṇāṃbujareṇuvāsasam //
bhṛṃgāvalīkūjitakuntalāvaliṃ
srajaṃ dadhānaṃ navavaijayantīm

śrīvatsarat‍nottamacāruvakṣasamaṃ
caturbhujaṃ padmaviśālavīkṣaṇam //
sphuratkirīṭaṃ varahāranūpuraṃ
lasannavārkadyutihemakuṇḍalam

vilokya devaṃ yadavo'tiharṣitāḥ
paraṃ praṇemuḥ kṛtahastasaṃpuṭāḥ //
pracakrire maithila puṣpavarṣiṇo-
'marā jayārāvamatīva sarvataḥ

sa daityaśakuneḥ sajjaṃ kodaṃḍaṃ prācchinadruṣā //
śārṅ‌gamuktena tacchārṅ‌gī bāṇenaikena līlayā

sa chinnadhanvā śakunistyaktvā yuddhaṃ pradharṣitaḥ //
hetisaṃhatimānetuṃ yayau candrāvatīṃ purīm

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
śrīkṛṣṇāgamanaṃ nāmaikonacatvāriṃśo'dhyāyaḥ