Garga Samhita · Chapter 7.20

kaurava-yādavayuddham
śrīnārada uvāca -
tadaiva kauravāḥ sarve nirgatā dīptamanyavaḥ //
svaiḥ svairbalaiḥ samāyuktā yoddhuṃ pradyumnasaṃmukhe

vijayadhvajasaṃyuktā rat‍nakaṃbalamaṇḍitāḥ //
gajāḥ ṣaṣṭisahasrāṇi niryayuḥ svarṇaśṛṃkhalāḥ

pralayābdhimahāvartasaṃgharṣadhvanikāriṇām //
gajāḥ ṣaṣṭisahasrāṇi duṃdubhīnāṃ vinirgatāḥ

gajā gāvo bṛhad‌bhallā lohakaṃcukamaṃḍitāḥ //
śirasraṅ‌‍maulisaṃyuktā dvilakṣāṇi viniryayuḥ

hemakaṃkaṇakeyūrakirīṭavarakuṃḍalāḥ //
gajasthāśca dvilakṣāṇi niryayuḥ svarṇakaṃcukāḥ

pītakaṃcukasaṃyuktāstiryaguṣṇīṣaśālinaḥ //
gajasthāśca dvilakṣāṇi saṃgrāme labdhakīrtayaḥ

raktāṃbaradharāḥ kecid‌raktabhūṣaṇabhūṣitāḥ //
raktakaṃbalasaṃyuktairgajairuccairvinirgatāḥ

kṛṣṇāṃbaradharā nāgairharid‌vastrasamāvṛtāḥ //
kecicchuklāṃbarāḥ kecinniryayuḥ pāṭalāṃbarāḥ

rathaiśca devadhiṣṇyābhairmṛgeṃdradhvajaśobhitaiḥ //
patatpatākairatyuccairniryayuḥ koṭiśo nṛpāḥ

āṃgairbāṃgaiḥ saiṃdhavaiśca caṃcalaisturagairnṛpāḥ //
manojavaiḥ svarṇabhūṣairniryayuḥ śastrasaṃvṛtāḥ

samaṃtānniryayurvīrā lohakaṃcukaṇḍītāḥ //
vidyādharasamā rājansaṃkulā yuddhaśālinaḥ

jaguryaśaḥ kauravāṇāṃ sūtamāgadhavandinaḥ //
bherīmṛdaṃgaiḥ paṭahairānakairyuddhaniḥsvanaiḥ

mṛgendradhvajasaṃyuktaiḥ śuklavāhaniyojitaiḥ //
vyajanairvajradaṇḍaiśca cāmarāṃdolarājitaiḥ

caturyojanamātreṇa caṃdramaṇḍalacāruṇā //
chatreṇa maṇḍite rājabhirdattena manohare

duryodhano babhau sainye mahati syaṃdane sthitaḥ //
tathā'nye dhārtarāṣṭrāśca syandane syandane sthitāḥ

caturyojanamātraiśca chatrairmuktāvilaṃbibhiḥ //
surathenātibhīṣmeṇa kṛpeṇa guruṇā saha

bāhlīkakarṇaśalyaiśca somadattena dhīmatā //
aśvatthāmnā ca dhaumyena lakṣmaṇena dhanuṣmatā

śakuninā ca vīreṇa tathā duḥśāsanena ca //
saṃjayena tathā sākṣād‍bhūriṇā yajñaketunā

suyodhano nṛpo reje yathā śakro marud‌gaṇaiḥ //
indraprasthātpāṃḍuputraiḥ preṣitaṃ pṛtanādvayam

tadaiva cāgataṃ rājan kauravāṇāṃ sahāyakṛt //
akṣauhiṇībhiḥ ṣoḍaśabhiḥ kurūṇāṃ calatāṃ tadā

cacāla bhūrdiśo nedū rajovyāptaṃ nabho'bhavat //
tārakeva babhau sūryo gajāśvarathareṇūbhiḥ

aṃdhakāro'bhavad‍bhūmau devāḥ sarve'pi śaṃkitāḥ //
yatra tatra gajānāṃ ca nodanābhiśca bhūruhāḥ

nipetusturagairvīraiḥ kṣaṇaṃ bhūkhaṇḍamaṇḍalam //
senā kurūṇāṃ vṛṣṇīnāṃ yuyudhuśca parasparam

tīkṣṇaiḥ śastrairyathā sapta samudrāstaralairlaye //
hayā hayairibhāścebhai rathino rathibhiḥ saha

śyenaiḥ śyenā iva kravye pattayaḥ pattibhirmṛdhe //
mahāmātyairmahāmātyāḥ sūtāḥ sūtairnṛpairnṛpāḥ

yuyudhuḥ krodhasaṃyuktāḥ siṃhaiḥ siṃhā ivaujasā //
khaḍgaiḥ kuṃtaiḥ śaktibhiśca bhallaiḥ paṭṭiśamud‌garaiḥ

gadābhirmusalaiścakraistomarairbhiṃdipālakaiḥ //
śataghnībhirbhuśuṇḍībhiḥ kuṭhāraiśca sphuratprabhaiḥ

cicchidurbāṇapaṭalaiḥ śirāṃsi krodhamūrcchitāḥ //
bāṇāṃdhakāre saṃjāte pradyumno dhanvināṃ varaḥ

duryodhanena yuyudhe dhanuṣṭaṃkārayanmuhuḥ //
aniruddhaśca bhīṣmeṇa dīptimāṃśca kṛpeṇa vai

bhānurdroṇena sāṃbāstu bāhlīkena nṛpeśvaraḥ //
madhuḥ karṇena cāyudhyad‍bṛhad‌bhānuḥ śalena vai

citrabhānurhareḥ putraḥ somadattena dhīmatā //
aśvatthāmnā vṛkaścaivāruṇo dhaumyena maithila

puṣkaro lakṣmaṇenāśu duryodhanasutena vai //
vedabāhuḥ kṛṣṇasutaḥ śakunena mahāmṛdhe

duḥśāsanena samare śrutadevo hareḥ sutaḥ //
tathā hi yuyudhe yuddhe saṃjayena sunaṃdanaḥ

vidureṇa gadaḥ sākṣātkṛtavarmā ca bhūriṇā //
akrūro yuyudhe rājannāhave yajñaketunā

evaṃ parasparaṃ yuddhaṃ babhūva tumulaṃ mahat //
kārṣṇirvilokayāmāsa duryodhanabalaṃ mahat

bāṇasaṃdhena vārāho daṃṣṭrayā ca yathārṇavam //
bāṇasaṃbhinnakumbhānāṃ kariṇāṃ prapataṃti khāt

muktāphalāni rejuḥ kau rātrau tārāgaṇā iva //
bāṇaiḥ saṃpātayāmāsū rathinaḥ sārathīn rathān

mahāmṛdhe maithileṃdra vegairvāto yathā tarūn //
duryodhanastadā prāpto dhanuṣṭaṃkārayanmuhuḥ

pradyumnaṃ tāḍayāmāsa sāyakairdaśabhirmṛdhe //
tānpraciccheda bhagavān pradyumno yādaveśvaraḥ

duryodhanaḥ punastasya kavace sāyakān daśa //
nicakhāna svarṇapuṃkhān bhitvā varma tanau gatāḥ

sahasrairbāṇapaṭalaiḥ sahasrāśvāñjaghāna ha //
ciccheda bāṇaśatakaiḥ kodaṇḍaṃ saguṇaṃ param

śaṃbarārermahāvīro dhṛtarāṣṭrasuto balī //
pradyumnastaṃ rathaṃ tyaktvāthānyamāruhya satvaram

kṛṣṇadattaṃ dhanurnītvā sajjaṃ kṛtvā vidhānataḥ //
ekaṃ bāṇaṃ samādhāya karṇāṃtaṃ tañcakarṣa ha

bhujadaṇḍasya vegena tad‌rathe nicakarṣa ha //
gṛhītvā tad‌rathaṃ bāṇo bhrāmayitvā ghaṭīdvayam

ākāśātpātayāmāsa kamaṇḍalumivārbhakaḥ /
patanena rathaḥ sadyaścūrṇībhūto babhūva ha

sasūtāśca hayāḥ sarve pañcatāṃ prāpuragrataḥ //
anyaṃ rathaṃ samāsthāya dhārtarāṣṭro mahābalaḥ

pradyumnaṃ tāḍayāmāsa daśabhiḥ sāyakaimṛdhe //
taistāḍito hareḥ putro mālāhata iva dvipaḥ

kṛṣṇadatte ca kodaṇde tathaikaṃ bāṇamādadhe //
bāṇastaṃ sarathaṃ nītvā yāvatprāgānmahāṃbare

tāvad‌bāṇo dvitīyo'pi taṃ gṛhītvā yayau tvaram //
tāvattṛtīyaḥ saṃprāpto nītvā taṃ maṃdirājire

dhṛtarāṣṭrasamīpe ca sarathaṃ sāśvasārathim //
ākāśātpātayāmāsa padmakośamivānilaḥ

bāṇastaṃ pātayitvā tu raṇe kārṣṇiṃ samāyayau

patanena viśīrṇo'bhūdaṃgāra iva tad‌rathaḥ //
suyodhano mūrcchito'bhūdudvaman rudhiraṃ mukhāt

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
kauravayuddhavarṇanaṃ nāma viṃśo'dhyāyaḥ