Garga Samhita · Chapter 7.19

kauravopākhyānam
śrīnārada uvāca -
atha kārṣṇirmahābāhurdhvajinībhiḥ samanvitaḥ //
nādayanduṃdubhīndīrghāndīrghavegaḥ kurūn yayau

viṃśatiryojanānāṃ ca maryādīkṛtatad‌bale //
tasthau tacchibirāṇāṃ ca vistāro daśayojanam

paṃcayojanamāśritya tad‌bale rājapaddhatiḥ //
dhanāḍhyānāṃ ca vaiśyānāmāpaṇāni sahasraśaḥ

tathā rat‍naparīkṣāṇāṃ vastravyāpārakāriṇām //
kācakarā vāyakāśca raṃgakārāḥ kulālakāḥ

kuṃdakārāstūlakārāḥ paṭakārāstathaiva ca //
ṭaṃkakārāścitrakārāḥ patrakārāśca nāpitāḥ

paṭṭakārā retikārāḥ parṇakārāśca śilpinaḥ //
lākṣākārā mālinaśca rajakāstailinastathā

tāṃbūlaśodhinastatra citrapāṣāṇakarmakāḥ //
annabharjakarāstatra kācabhedina eva hi

muktādīnāṃ ca rat‍nānāṃ sūkṣmāṇāṃ rat‍navedhinaḥ //
ete kārujanāḥ sarve dṛśyaṃte rājapaddhatau

kvacid‌bhānumatīrlīlā aiṃdrajālavidhāyakāḥ //
kvacinnaṭāśca nṛtyaṃte yuddhaṃ bhallūkayoḥ kvacit

kvacittu vānarī līlā ḍamarūvādyasaṃyutāḥ //
gāyaṃti kutracidrājansūtamāgadhavandinaḥ

vārāṃganāśca nṛtyaṃti bhūṣairdvādaśabhiryutāḥ //
divyaiḥ ṣoḍaśaśṛṅgārairharaṃtyapsarasāṃ manaḥ

bandhūnāmapi senānāṃ mahāṃtakā gajāhvaye //
cālanaṃ saṃbhramopetaṃ vihvalaiśca janairabhūt

vidudruvurjanāḥ sarve gṛheṣvāpātitārgalāḥ //
kolāhalo mahānāsīd‌gehe gehe jane jane

vīryyaśauryyabalopetāḥ kauravāścakravartinaḥ //
āsamudrāḥ kṣitīśeṃdrā jātāste'pyatiśaṃkitāḥ

pradyumnapreṣitaḥ sākṣāduddhavo buddhisattamaḥ //
kauraveṃdrapuraṃ prāpto dhṛtarāṣṭraṃ dadarśa ha

madacyutāmāsya nṛpasya daṃtināṃ
kastūrikākuṃkumagaṃḍaśālinām //
siṃdūraśuṃḍāspadakarṇatāḍitaiḥ
ṣaḍaṅ‌ghribhirmaṇḍitamaṃdirājiram

yaṃ bhīṣmakarṇaguruśalyakṛpaiśca bhūri-
bāhlīkadhaumyaśakunaiḥ saha saṃjayena //
duḥśāsanena vidureṇa ca lakṣmaṇena
duryodhanena ca kṛpīsutasomadattaiḥ

śrīyajñaketusahitaiḥ sahitaṃ nṛpendraṃ
līlātapatrasitacāmarahemapīṭhaiḥ //
saṃsevitaṃ parisametya gajāhvayeśaṃ
natvoddhavaḥ praṇata āha kṛtāṃjalistam

uddhava uvāca -
pradyumnena prakathitaṃ śṛṇu rājeṃdrasattama //
ugrasenaḥ kṣitīśeṃdro yādaveṃdro mahābalaḥ

vijitya nṛpatīnsarvān rājasūyaṃ kariṣyati //
preṣitastena senābhiḥ pradyumno rukmiṇīsutaḥ

jetuṃ mahod‌bhaṭān vīrāñjaṃbudvīpasthitānnṛpān //
caidyaśālvajarāsaṃdhadaṃtavaktrādibhūpatīn

vijitya cāgataḥ kārṣṇistasmai yaccha baliṃ bahu //
upāyanaṃ ca dātavyaṃ baṃdhūnāmaikyakāmyayā

mābhūtkurūṇāṃ vṛṣṇīnāṃ kalirnoced‌bhaviṣyati //
tenoditaṃ me kathitaṃ tatkṣamasva nṛpeśvara //
dūtasya hīnadoṣasya tvayoktaṃ yadvadāmi tat

śrīnārada uvāca -
tacchrutvā kauravāḥ sarve rājansaṃjātamanyavaḥ //
vīryyaśauryyamadonnaddhā ucuḥ prasphuritādharāḥ

kauravā ūcuḥ
duratyayā kālagatiraho citramidaṃ jagat //
siṃhopari pradhāvaṃti śṛgālā durbalā vane

asmatsakāśātsaṃbaṃdhā asmaddattanṛpāsanāḥ //
dātṝṇāṃ pratikūlāstu dātṝṇāṃ phaṇīno yathā

vṛṣṇayo bhīravaḥ sarve yudhi viklavacetasaḥ //
tathaiva śāsanaṃ kartuṃ pravṛttā hi gatahriyaḥ

ugraseno'lpavīryaśca jaṃbūdvīpasthitānnṛpān //
vijityāho baliṃ nītvā rājasūyaṃ kariṣyati

yatra bhīṣmaśca karṇaśca droṇo duryodhanādayaḥ //
tatra tvaṃ preṣito maṃtrī pradyumnena kubuddhinā

tasmādyāta purīmadhye yūyaṃ vai jīvanecchayā //
na cedyāsyatha vaḥ sarvānnayāmo yamasādanam

śrīnārada uvāca -
itthaṃ śrīkṛṣṇavimukhaiḥ kauravaiḥ paribhāṣitam //
śrutvoddhavaḥ śambarārimetya sarvamuvāca ha

kauravoktaṃ vacaḥ śrutvā pradyumno dhanvināṃ varaḥ //
pratiśārṅ‌gaṃ saṃgṛhītvā roṣātprasphuritādharaḥ

pradyumna uvāca -
kauravānghātayiṣyāmi baṃdhūnapi madoddhatān //
bāṇaistīkṣṇairyathā yogī niyamairdehajā rujaḥ

yadūnāṃ sainyacakreṣu baliṃ yo na pradāsyati //
kauravebhyo'pi sa pumān piturmāturna caurasaḥ

śrīnārada uvāca -
tadaiva yādavāḥ sarve bhojavṛṣṇyaṃdhakādayaḥ //
gajāhvayaṃ yayuḥ sainyai rājansaṃjātamanyavaḥ

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
kauravopākhyānaṃ nāmaikonaviṃśo'dhyāyaḥ