Garga Samhita · Chapter 7.2

pradyumnavijayābhiṣekam
bahulāśva uvāca -
kathaṃ cakāra vidhivad‌rājasūyādhvaraṃ nṛpa //
śrīkṛṣṇena sahāyena vadaitannitarāṃ mune

śrīnārada uvāca -
ugrasenaḥ sudharmāyāṃ kṛṣṇaṃ saṃpūjya caikadā //
natvā prāha prasannātmā kṛtāṃjalipuṭaḥ śanaiḥ

ugrasena uvāca -
bhagavānnāradamukhācchrutaṃ yasya mahatphalam //
taṃ yajñaṃ rājasūyākhyaṃ kariṣyāmi tavājñayā

tvatpādasevayā pūrve manorathamahārṇave //
terurjagattṛṇīkṛtya nirbhayāḥ puruṣottama

śrībhagavānuvāca -
samyagvyavasitaṃ rājanbhavatā yādaveśvara //
yajñena te jagatkīrtistrilokyāṃ saṃbhaviṣyati

āhūya yādavānsākṣātsabhāṃ kṛtvatha sarvataḥ //
tāṃbūlabīṭikāṃ dhṛtvā pratijñāṃ kāraya prabho

mamāṃśā yādavāḥ sarve lokadvayajigīṣavaḥ //
jitvārīnāgamiṣyaṃti hariṣyaṃti baliṃ diśām

śrīnārada uvāca -
athāṃdhakādīnāhūya śakrasiṃhāsane sthitaḥ //
sudharmāyāṃ prāha nṛpo dhṛtvā tāṃbūlabīṭikām

ugrasena uvāca -
yo jayetsamare sarvāñjaṃbūdvīpasthitānnṛpān //
manasvī śakrakodaṇḍī so'tti tāṃbūlabīṭikām

śrīnārada uvāca -
nṛpeṣu tūṣṇīṃ pragateṣu satsu
śrīrukmiṇīnaṃdana eva cāgāt //
jagrāha tāmbūlacayaṃ mahātmā
natvā nṛpaṃ maithila śaṃbarāriḥ

pradmumna uvāca -
vijitya samare sarvāñjaṃbūdvīpasthitānnṛpān //
gṛhītvā ca baliṃ tebhya āgamiṣyāmyahaṃ balāt

agamyāgamanaṃ babhrorbrāhmaṇasya gurostathā //
hatyā bhrūṇasya me bhūyānna kuryāṃ karma cedidam

śrīnārada uvāca -
śrutvā vacaḥ śaṃbarāreḥ sādhu sādhviti yūthapāḥ //
ūcusteṣāṃ paśyatāṃ ca taṃ jagrāha yadūttamaḥ

gargādyadukulācāryānmuhūrtaṃ bodhya yat‍nataḥ //
tatsnānaṃ kārayāmāsa munibhirvedasūktibhiḥ

ugraseno'tha tilakaṃ pradyumnasya cakāra ha //
baliṃ datvā namaścakruḥ sarve yādavayūthapāḥ

ugraseno dadau khaḍgaṃ pradyumnāya mahātmane //
kavacaṃ pradadau sākṣād‌baladevo mahābalaḥ

svatūṇābhyāṃ viniṣkṛṣya tūṇāvakṣayasāyakau //
dhanuśca śārṅ‌gadhanuṣaḥ samutpādya dadau hariḥ

kirīṭakuṃḍale divye pītaṃ vāso manoharam //
chatraṃ ca cāmare sākṣācchūro vṛddho dadau punaḥ

śatacandraṃ dadau tasmai vasudevo mahāmanāḥ //
uddhavaḥ pradadau sākṣānmālāṃ kiṃjalkinīṃ śubhām

akrūro dakṣiṇāvartaṃ śaṃkhaṃ vijayadaṃ dadau //
śrīkṛṣṇakavacaṃ yaṃtraṃ gargācāryo dadau muniḥ

tadaiva hyāgataḥ śakro lokapālaiḥ sakautukaḥ //
ājagmaturbrahmaśivau devarṣigaṇasaṃvṛtau

pradyumnāya dadau śūlī triśūlaṃ jvalanaprabham //
brahmā dadau mahārāja padmarāgaṃ śiromaṇim

pāśī pāśaṃ śaktidharaḥ śaktiṃ śatruvimardinīm //
vāyuśca vyajane divye yamo daṃḍaṃ dadau punaḥ

ravirgadāṃ mahāgurvīṃ kubero rat‍namālikām //
candrakāṃtamaṇiṃ candraḥ parighaṃ ca tanūnapāt

kṣitiśca pāduke prādāddive yogamaye pare //
pradyumnāya dadau kuṃtaṃ bhadrakālī tarasvinī

hemāḍhyamuccaśikharaṃ sahasrahayasaṃyutam //
viśvakarmakṛtaṃ sākṣād‍brahmāṃḍāṃtarbahirgatam

sahasracakrasaṃyuktaṃ manovegaṃ ghanasvanam //
maṃjīrakiṃkiṇījālaṃ ghaṃṭāṭaṃkārabhūṣaṇam

rathaṃ dadau mahādivyaṃ sahasradhvajaśobhitam //
jaitraṃ rat‍namayaṃ śukraḥ pradyumnāya mahātmane

śaṃkhaduṃdubhayo nedustālavīṇādayastadā //
mṛdaṃgaveṇūsannādairjayadhvanisamākulaiḥ

vedaghoṣairlājapuṣpairmuktāvarṣasamanvitaiḥ //
pradyumnasyopari surāḥ puṣpavarṣaṃ pracakrire

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
pradyumnavijayābhiṣeko nāma dvitīyo'dhyāyaḥ