Garga Samhita · Chapter 7.3

digvijaye yādavasainyābhiyānam
śrīnārada uvāca -
atha natvā hariṃ kārṣṇirugrasenaṃ balaṃ gurum //
nītvājñāṃ rathamāruhya kuśasthalyā viniryayau

tathā tamanugāḥ sarve yādavā uddhavādayaḥ //
bhojavṛṣṇyaṃdhakamadhu-śūrasenadaśārhakāḥ

tathā svabhrātaraḥ sarve gadādyāḥ kṛṣṇanoditāḥ //
saputrā sabalāḥ sarve sāṃbādyāśca mahārathāḥ

kirīṭinaḥ kuṃḍalino lohakaṃcukamaṃḍitāḥ //
caturaṃgabalopetāḥ koṭiśaste viniryayuḥ

kalāpihaṃsagaruḍa-mīnatāladhvajai rathaiḥ //
sūryamaṃḍalasaṃkāśaiścaṃcalāśvaniyojitaiḥ

hemakuṃbhaiḥ saśikharairmuktātoraṇarājitaiḥ //
viḍaṃbayad‌bhirnitarāṃ vāyuvegamataḥ param

cāmarāṃdolitairdivyairvīramaṃḍalamaṃḍitaiḥ //
sauvarṇairdevadhiṣṇābhai rejurvīrā manoharāḥ

madacyutāścitramukhā hemajālasamanvitāḥ //
mahod‌bhaṭā gajā uccaraṇad‍ghaṇṭāruṇāṃbarāḥ

girīndraśikharā bhadrā dvipeṃdrān digvibhāvitān //
viḍaṃbayanto dṛśyaṃte rājasainye dvipā nṛpa

kecid‌bhadrāstu kathitāḥ kecid‌bhadramṛgāḥ pare //
viṃdhyācalabhavāḥ kecitkecitkāśmīrasaṃbhavāḥ

malayaprabhavāḥ keciddhimādriprabhavāḥ pare //
mauraṃgaprabhavāḥ kecitkailāsavanasaṃbhavāḥ

airāvatakulebhāśca caturdaṃtā kalāpinaḥ //
triśuṃḍā garuḍābhāśca gacchaṃti bhuvi cāṃbare

dhvajayuktāḥ koṭigajāḥ koṭiduṃdubhisaṃyutāḥ //
koṭisainyā mahāmātyai rat‍namaṃḍalamaṃḍitāḥ

garjayaṃto ghanaśyāmā nīḍoduṃbararājitāḥ //
itastato virejuste bale'bdhau makarā iva

karairgulmānsamutpāṭya kṣepayaṃto'rkamaṃḍalam //
kaṃpayaṃto bhuvaṃ pādairmadairārdrīkṛtācalāḥ

durgādrigaṃḍaśailādīnpātayaṃtaḥ śiraḥsthaleḥ //
khaṃḍayaṃtaśca śatrūṇāṃ balametādṛśā gajāḥ

turaṃgā nirgatā rājan kecinmātsyāḥ kaliṃgajāḥ //
auśīnarāḥ kauśalāśca vaidarbhāḥ kurujāṃgalāḥ

kāṃbojajāḥ sṛṃjayajāḥ kaikayāḥ kuṃtisaṃbhavāḥ //
dāradāḥ keralā āṃgā bāṃgā vikaṭasaṃbhavāḥ

kauṃkaṇāḥ koṭakāḥ kecitkarṇāṭā gaurjarā hayāḥ //
sauvīrāḥ saiṃdhavāḥ kecitpāṃcālā arbudāḥ pare

kācchāśca kecidānartā gāṃdhārā mālavādayaḥ //
mahārāṣṭrabhavāḥ kecittailaṃgā jalasaṃbhavāḥ

paripūrṇatamasyāpi śrīkṛṣṇasya mahātmanaḥ //
vājiśālāsu varttaṃte te'pi sarve vinirgatāḥ

śvetadvīpāśca vaikuṃṭhāttathā'jitapadā nṛpa //
ramāvaikuṃṭhalokācca prāptā ye te'pi nirgatāḥ ///२२//
hemahārasamāyuktā muktāmālāmanoharāḥ //
śikhāmaṇimahāraśmisevitāḥ suparicchadāḥ

cāmarairmaṃḍitāḥ pucchamukhapādasphuratprabhāḥ //
yādavānāṃ mahāsainye dṛśyante cedṛśā hayāḥ

vāyuvegā manovegā na spṛśaṃtaḥ padairbhuvam //
apakvasūtreṣvatigā bud‍budeṣvapi maithila

vrajaṃtaḥ pāradamanu jāleṣūrṇābhaveṣu ca //
dṛśyaṃte'pi nirādhārā sphārā vāriṣu maithila

gaṃḍaśailanadīdurgagartaprāsādasaṃcayān //
vilaṃghayaṃtaḥ satataṃ caṃcalāste turaṃgamāḥ

māyūrīṃ taittarīṃ krauñcīṃ haṃsī ye khāṃjanīṃ gatim //
kurvaṃto bhuvi nṛtyaṃto maithilendra itastataḥ

kecitsapakṣā divyāṃgāḥ śyāmakarṇā manoharāḥ //
pītapucchāścaṃdravarṇā vājiśālāvinirgatāḥ

uccaiḥśravaḥkule jātāḥ sūryavājibhavāḥ pare //
āśvinīsutavidyāḍhyā varuṇena prayojitāḥ

kecinmaṃdārabhāḥ keciccitravarṇā manoharāḥ //
āśvinīpuṣpasaṃkāśāḥ svarṇābhā haritaprabhāḥ

padmarāgaprabhāḥ kecitsarvalakṣaṇalakṣitāḥ ///
koṭiśaḥ koṭiśo rājannanye'pi nirgatā hayāḥ

dhanurbhṛto bhaṭāḥ sainye saṃgrāme labdhakīrtayaḥ //
śaktitriśūlāsigadāvarmapāśadharāḥ pare

varṣaṃtaḥ śastradhārābhiḥ pralayābdhisamā nṛpa //
diggajā iva dṛśyaṃte mardayanto hyarīnmṛdhe

evaṃ vinirgataṃ rājan yadūnāṃ vipulaṃ balam //
dṛṣṭvā surāsurāḥ sarve visismuḥ paramād‌bhutam

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
yādavasainyagamanaṃ nāma tṛtīyo'dhyāyaḥ