ગર્ગસંહિતા · અધ્યાય 7.2

પ્રદ્યુમ્નવિજયાભિષેકમ્
બહુલાશ્વ ઉવાચ -
કથં ચકાર વિધિવદ્‌રાજસૂયાધ્વરં નૃપ ॥
શ્રીકૃષ્ણેન સહાયેન વદૈતન્નિતરાં મુને

શ્રીનારદ ઉવાચ -
ઉગ્રસેનઃ સુધર્માયાં કૃષ્ણં સંપૂજ્ય ચૈકદા ॥
નત્વા પ્રાહ પ્રસન્નાત્મા કૃતાંજલિપુટઃ શનૈઃ

ઉગ્રસેન ઉવાચ -
ભગવાન્નારદમુખાચ્છ્રુતં યસ્ય મહત્ફલમ્ ॥
તં યજ્ઞં રાજસૂયાખ્યં કરિષ્યામિ તવાજ્ઞયા

ત્વત્પાદસેવયા પૂર્વે મનોરથમહાર્ણવે ॥
તેરુર્જગત્તૃણીકૃત્ય નિર્ભયાઃ પુરુષોત્તમ

શ્રીભગવાનુવાચ -
સમ્યગ્વ્યવસિતં રાજન્ભવતા યાદવેશ્વર ॥
યજ્ઞેન તે જગત્કીર્તિસ્ત્રિલોક્યાં સંભવિષ્યતિ

આહૂય યાદવાન્સાક્ષાત્સભાં કૃત્વથ સર્વતઃ ॥
તાંબૂલબીટિકાં ધૃત્વા પ્રતિજ્ઞાં કારય પ્રભો

મમાંશા યાદવાઃ સર્વે લોકદ્વયજિગીષવઃ ॥
જિત્વારીનાગમિષ્યંતિ હરિષ્યંતિ બલિં દિશામ્

શ્રીનારદ ઉવાચ -
અથાંધકાદીનાહૂય શક્રસિંહાસને સ્થિતઃ ॥
સુધર્માયાં પ્રાહ નૃપો ધૃત્વા તાંબૂલબીટિકામ્

ઉગ્રસેન ઉવાચ -
યો જયેત્સમરે સર્વાઞ્જંબૂદ્વીપસ્થિતાન્નૃપાન્ ॥
મનસ્વી શક્રકોદણ્ડી સોઽત્તિ તાંબૂલબીટિકામ્

શ્રીનારદ ઉવાચ -
નૃપેષુ તૂષ્ણીં પ્રગતેષુ સત્સુ
શ્રીરુક્મિણીનંદન એવ ચાગાત્ ॥
જગ્રાહ તામ્બૂલચયં મહાત્મા
નત્વા નૃપં મૈથિલ શંબરારિઃ

પ્રદ્મુમ્ન ઉવાચ -
વિજિત્ય સમરે સર્વાઞ્જંબૂદ્વીપસ્થિતાન્નૃપાન્ ॥
ગૃહીત્વા ચ બલિં તેભ્ય આગમિષ્યામ્યહં બલાત્

અગમ્યાગમનં બભ્રોર્બ્રાહ્મણસ્ય ગુરોસ્તથા ॥
હત્યા ભ્રૂણસ્ય મે ભૂયાન્ન કુર્યાં કર્મ ચેદિદમ્

શ્રીનારદ ઉવાચ -
શ્રુત્વા વચઃ શંબરારેઃ સાધુ સાધ્વિતિ યૂથપાઃ ॥
ઊચુસ્તેષાં પશ્યતાં ચ તં જગ્રાહ યદૂત્તમઃ

ગર્ગાદ્યદુકુલાચાર્યાન્મુહૂર્તં બોધ્ય યત્‍નતઃ ॥
તત્સ્નાનં કારયામાસ મુનિભિર્વેદસૂક્તિભિઃ

ઉગ્રસેનોઽથ તિલકં પ્રદ્યુમ્નસ્ય ચકાર હ ॥
બલિં દત્વા નમશ્ચક્રુઃ સર્વે યાદવયૂથપાઃ

ઉગ્રસેનો દદૌ ખડ્ગં પ્રદ્યુમ્નાય મહાત્મને ॥
કવચં પ્રદદૌ સાક્ષાદ્‌બલદેવો મહાબલઃ

સ્વતૂણાભ્યાં વિનિષ્કૃષ્ય તૂણાવક્ષયસાયકૌ ॥
ધનુશ્ચ શાર્ઙ્‌ગધનુષઃ સમુત્પાદ્ય દદૌ હરિઃ

કિરીટકુંડલે દિવ્યે પીતં વાસો મનોહરમ્ ॥
છત્રં ચ ચામરે સાક્ષાચ્છૂરો વૃદ્ધો દદૌ પુનઃ

શતચન્દ્રં દદૌ તસ્મૈ વસુદેવો મહામનાઃ ॥
ઉદ્ધવઃ પ્રદદૌ સાક્ષાન્માલાં કિંજલ્કિનીં શુભામ્

અક્રૂરો દક્ષિણાવર્તં શંખં વિજયદં દદૌ ॥
શ્રીકૃષ્ણકવચં યંત્રં ગર્ગાચાર્યો દદૌ મુનિઃ

તદૈવ હ્યાગતઃ શક્રો લોકપાલૈઃ સકૌતુકઃ ॥
આજગ્મતુર્બ્રહ્મશિવૌ દેવર્ષિગણસંવૃતૌ

પ્રદ્યુમ્નાય દદૌ શૂલી ત્રિશૂલં જ્વલનપ્રભમ્ ॥
બ્રહ્મા દદૌ મહારાજ પદ્મરાગં શિરોમણિમ્

પાશી પાશં શક્તિધરઃ શક્તિં શત્રુવિમર્દિનીમ્ ॥
વાયુશ્ચ વ્યજને દિવ્યે યમો દંડં દદૌ પુનઃ

રવિર્ગદાં મહાગુર્વીં કુબેરો રત્‍નમાલિકામ્ ॥
ચન્દ્રકાંતમણિં ચન્દ્રઃ પરિઘં ચ તનૂનપાત્

ક્ષિતિશ્ચ પાદુકે પ્રાદાદ્દિવે યોગમયે પરે ॥
પ્રદ્યુમ્નાય દદૌ કુંતં ભદ્રકાલી તરસ્વિની

હેમાઢ્યમુચ્ચશિખરં સહસ્રહયસંયુતમ્ ॥
વિશ્વકર્મકૃતં સાક્ષાદ્‍બ્રહ્માંડાંતર્બહિર્ગતમ્

સહસ્રચક્રસંયુક્તં મનોવેગં ઘનસ્વનમ્ ॥
મંજીરકિંકિણીજાલં ઘંટાટંકારભૂષણમ્

રથં દદૌ મહાદિવ્યં સહસ્રધ્વજશોભિતમ્ ॥
જૈત્રં રત્‍નમયં શુક્રઃ પ્રદ્યુમ્નાય મહાત્મને

શંખદુંદુભયો નેદુસ્તાલવીણાદયસ્તદા ॥
મૃદંગવેણૂસન્નાદૈર્જયધ્વનિસમાકુલૈઃ

વેદઘોષૈર્લાજપુષ્પૈર્મુક્તાવર્ષસમન્વિતૈઃ ॥
પ્રદ્યુમ્નસ્યોપરિ સુરાઃ પુષ્પવર્ષં પ્રચક્રિરે

ઇતિ શ્રીગર્ગસંહિતાયાં શ્રીવિશ્વજિત્ખણ્ડે શ્રીનારદબહુલાશ્વસંવાદે
પ્રદ્યુમ્નવિજયાભિષેકો નામ દ્વિતીયોઽધ્યાયઃ