Garga Samhita · Chapter 7.17

māgadhavijayam
śrīnārada uvāca -
athāto māgadhañjetuṃ pradyumno mīnaketanaḥ //
girivrajaṃ jagāmāśu svasainyaiḥ parivāritaḥ

śrutvā''gataṃ hareḥ putraṃ digjayārthaṃ viśeṣataḥ //
jarāsaṃdho māgadheṃdro mahākopaṃ cakāra ha

jarāsaṃdha uvāca -
tucchā ye yādavāḥ sarve yudhi viklavacetasaḥ //
te'dya vai jagatīṃ jetuṃ nirgatā gatabuddhayaḥ

mathurāṃ svapurīṃ tyaktvā mad‌bhayānmādhavo'pihi //
samudraṃ śaraṇaṃ prāgātpitā cāsya durātmanaḥ

pravarṣaṇe rāmakṛṣṇau mayā bhasmīkṛtau balāt //
chalād‍dudruvatustau dvau dvārakāyāṃ samāśritau

baddhvā tau cānayiṣyāmi sograsenau kuśasthalīm //
ayādavīṃ kariṣyāmi pṛthvīṃ sāgaramekhalām

śrīnārada uvāca -
ityuktvā nirgato rājā girivrajapurād‌bahiḥ //
akṣauhiṇībhirviṃśatyā tisṛbhiḥ saṃyuto balī

gomūtracayasiṃdūrakastūrīpatrabhṛnmukhe //
sravanmadaiścaturdaṃtairairāvatakulod‌bhavaiḥ

śuṇḍādaṇḍasya phūtkāraiḥ kṣepayad‌bhistarūnbahūn //
babhau gajairmāgadheṃdro meghairiṃdra iva prabhuḥ

rathaiśca devadhiṣṇyābhaiḥ sadhvajairaśvanetṛbhiḥ //
cāmarairdolitai rājaṃllolacakradhvanidyutiḥ

turaṅgamairvāyuvegaiścitravarṇairmadotkaṭaiḥ //
sauvarṇapaṭṭahārādyaiḥ śikhāraśmyūrdhvacāmaraiḥ

sakaṃcukairvīrajanaiḥ khaḍgacarmadhanurdharaiḥ //
vidyādharasamaiḥ prāgānmāgadheṃdro mahābalaḥ

dhuṃkārairduṃdubhīnāṃ ca diśo nedurdhanuḥsvanaiḥ //
cacāla vasudhā sainyai rajobhiśchāditaṃ nabhaḥ

jarāsaṃdhasya tatsainyaṃ pralayābdhimivolbaṇam //
vismitā yādavāḥ sarve babhūvurvīkṣya maithila

pradyumno bhagavānvīkṣya māgadheṃdrabalārṇavam //
śaṃkhaṃ daghmau dakṣiṇākhyaṃ mā bhaiṣṭetyabhayaṃ dadat

tataḥ sāṃbo mahābāhuḥ pradyumnasya prapaśyataḥ //
akṣauhiṇīnāṃ daśabhiryuyudhe māgadhena saḥ

gajā gajairyuyudhire rathibhī rathino mṛdhe //
hayā hayaiḥ pattayaśca pattibhirmaithileśvara

babhūva tumulaṃ yuddhamad‌bhutaṃ romaharṣaṇam //
māgadhānāṃ yadūnāṃ cāsurāṇāṃ nirjarairyathā

aśvāruḍhāḥ ke'pi vīrā bhallahastā itastataḥ //
mardayaṃto gajārūḍhāḥ karikumbhagatārcayaḥ

kecicchaktīstaḍidvarṇā gṛhītvā cikṣipurbalāt //
tāḥ śaktayastvarīn bhitvā daṃśitān dharaṇīṃ gatāḥ

kecidvīrā nadantaḥ kau rathāṃgāni ca cikṣupuḥ //
cicchidurvīrapaṭalaṃ nīhāraṃ ravayo yathā

bhiṃdipālairmud‌garaiśca kuṭhārairasipaṭṭiśaiḥ //
acchūrikārṣṭibhistīkṣṇairnistriṃśairyuyudhuśca khe

tomaraiśca gadabhiśca bāṇaiśchinnāni bhūtale //
nipeturvīrakariṇāmaśvānāṃ ca śirāṃsi ca

kabaṃdhāstatra cotpetuḥ pātayanto hayānnarān //
khaḍgahastāḥ pradhāvantaḥ saṃgrāmeṣu bhayaṃkarā

vīropari gatā vīrā nipetuśchinnabāhavaḥ //
hayopari hayāḥ kecid‌bāṇaiḥ saṃchinnakaṃdharāḥ

vidyādharyaśca gaṃdharvyo vavrire hyaṃbare gatān //
vīrānpatīnsamicchaṃtyastāsāṃ cābhūtkalirmahān

kṣātradharmāparāḥ kecidyuddhadattāsavo nṛpa //
na calantaḥ padaṃ pṛṣṭhe sadā saṃgrāmaśālinaḥ

jagmuḥ paraṃ padaṃ te vai bhītvā mārtaṇḍamaṃḍalam //
nanṛtuḥ śiśumāre vai maṃḍale ca naṭā iva

evaṃ sāṃbamahāvīrairmarditaṃ māgadhaṃ balam //
dudrāva paśyatāṃ teṣāṃ kṛṣṇabhaktyā yathāśubham

kecidvai vṛkṇavarmāṇaśchinnacāpāstathāpare //
palāyamānā dhāvaṃtastyaktakhaḍgarṣṭipāṇayaḥ

palāyamānaṃ svabalaṃ vīkṣya tanmāgadheśvaraḥ //
dhanuṣṭaṃkārayanprāpto mā bhaiṣṭetyabhayaṃ dadau

svabalaṃ nodayāmāsa jarāsaṃdho dhanurjyayā //
mahāmātyaḥ prerayati hyaṃkuśena gajaṃ yathā

sāṃbastadaiva samprāpto daśabhiścāpanirgataiḥ //
bāṇairvivyādha samare māgadheṃdraṃ mahābalam

dhanurjyāmabdhikallolabhīmasaṃgharṣanādinīm //
ciccheda daśabhirbāṇaiḥ sāṃbo jāṃbavīsutaḥ

dhanuranyatsamādāya jarāsaṃdho mahābalaḥ //
dhanuḥ sāṃbasya ciccheda bāṇairdaśabhiragrataḥ

caturbhiścaturo vāhāndvābhyāṃ ketuṃ rathaṃ tribhiḥ //
ekena sārathiṃ jaghne māgadheṃdro jarāsutaḥ

sa chinnadhanvā viratho hatāśvo hatasārathiḥ //
punaranyaṃ samāsthāya rathaṃ sāṃbo mahābalaḥ

gṛhītvā cāpamatyugraṃ sajjaṃ kṛtvā vidhānataḥ //
tad‌rathaṃ cūrṇayāmāsa sāṃbo bāṇaśatairapi

rathaṃ tyaktvā jarāsaṃdho gajamāruhya vegataḥ //
babhau gaje māgadheṃdra indra airāvate yathā

citrapatravicitrāṃgaṃ kālāṃtakayamopamam //
sāṃbāya nodayamāsa mattebhaṃ kruddhamānasaḥ

gṛhītvā sarathaṃ sāṃbaṃ śuṇḍādaṇḍena nāgarāṭ //
kurvaṃścītkāravikalaścikṣepa navayojanam

tadā kolāhale jāte sāṃbasenāsu maithila //
pradyumnapārśvācca gadaḥ prāpto'bhūdvegato balam

vināśayannaṃdhakāraṃ yathārka udayācalāt //
jarāsaṃdhasyāpi gajaṃ muṣṭinā vasudevajaḥ

jaghāna śakro vajreṇa yathā proccadarībhṛtam //
gajo muṣṭiprahāreṇa vihvalo dharaṇīṃ gataḥ

jagāma pañcatāṃ rājaṃstadad‌bhutamivāvabhavat //
jarāsaṃdhaḥ samutthāya gadāmādāya vegataḥ

gadaṃ tatāḍa sahasā jagarja ghanavad‌balī //
tatprahāreṇa sa gado na cacāla raṇāṃgaṇāt

tvaraṃ gadāṃ samādāya lakṣabhāravinirmitām //
atāḍayajjarāsaṃdhaṃ siṃhanādamathākarot

tatprahāreṇa vyathito bṛhad‌rathasuto balī //
jarāsaṃdhaḥ samutthāya gṛhitvā sagadaṃ gadam

cikṣepa roṣato rājannākāśe śatayojanam //
gado'pi māgadhaṃ nītvā bhrāmayitvā mahābalaḥ

cikṣepa gagane taṃ vai yojanānāṃ sahasrakam //
ākāśātpatito rājā māgadho viṃdhyaparvate

utthāya yuyudhe tena gadenāpi mahābalaḥ //
tadaiva sāṃbaḥ saṃprāpto gṛhītvā māgadheśvaram

bhūpṛṣṭhe pothayāmāsa siṃhaḥ siṃhamivaujasā //
ekena muṣṭinā sāṃbaṃ dvitīyena gadaṃ tathā ५२//
tatāḍa māgadho rājā jagarjāśu raṇāṃgaṇe //
muṣṭiprahāravyathitau gadaḥ sāṃbaśca mūrchitau

hāhākāro mahānāsīttadaivāśu raṇāṃgaṇe //
rathenātipatākena pradyumno yādaveśvaraḥ

akṣauhiṇīyutaḥ prāpto mā bhaiṣṭetyabhayaṃ dadau //
jarāsaṃdho gadāṃ nītvā lakṣabhāravinirmitām

viveśa yadusenāyāmaraṇye'gniriva prabhuḥ //
rathāngajansavīrāṃśca turaṅgānsaiṃdhavānbahūn

pātayamāsa rājeṃdra padmānīva mahāgajaḥ //
jarāsaṃdhasya yā senā sāpi sarvā samāgatā

jaghāna niśitairbāṇairyadūnāṃ sarvato balam //
pradyumno yuyudhe yuddhe nirbhayo yādaveśvaraḥ

nipātayannarīnbāṇairdhanuṣṭaṅkārayanmuhuḥ //
tadaiva yadupuryāstu baladevaḥ samāgataḥ

prādurbabhūva tatrāpi sarveṣāṃ paśyatāṃ satām //
samākṛṣya halāgreṇa māgadheṃdraṃ mahābalam

musalenāhanatkruddho baladevo mahābalaḥ //
śatayojanaparyaṃtaṃ rathāśvagajapattayaḥ

patitā bhinnaśirasaḥ sarve vai nidhanaṃ gatāḥ //
devaduṃdubhayo nedurnaradundubhayastathā

baladevopari surāḥ puṣpavarṣaṃ pracakire //
tadā jayajayārāvo yadūnāṃ svabale mahān

pradyumnādyāstato nemuḥ kāmapālaṃ gatavyathāḥ //
itthaṃ jitvā māgadhendraṃ baladevo mahābalaḥ

prayayau dvārakāṃ rājanbhagavānbhaktavatsalaḥ //
jarāsaṃdhasuto dhīmān sahadeva upāyanam

nītvā puraḥ śaṃbarārergiridurgādvinirgataḥ //
aśvārbudaṃ rathānāṃ ca dvilakṣaṃ hastināṃ tathā

dadau ṣaṣṭisahasraṇi natvā kārṣṇiṃ prabhāvavit

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
māgadhavijayo nāma saptadaśo'dhyāyaḥ