Garga Samhita · Chapter 7.15

kekayavijayam
śrīnārada uvāca -
digjayasya miṣeṇāsau bhūbhāraṃ hārayanmuhuḥ //
pradyumno bhagavānsākṣādaṃgadeśaṃ tato yayau

aṃgeśo'ntaḥpurādhīśo gṛhīto yādavairvane //
so'pi tasmai baliṃ prādātpradyumnāya mahātmane

uḍḍīśaḍāmarādhīśo bṛhad‌bāhurmahābalaḥ //
na dadau sa baliṃ tasmai pradyumnāya madotkaṭaḥ

pradyumnapreṣito vīraḥ sāmbo jāṃbavatīsutaḥ //
ekākī prayayau dhanvī rathenādityavarcasā

chādayāmāsa bāṇaughairḍāmaraṃ nagaraṃ nṛpa //
giriṃ tuṣārapaṭalairjīmūta iva sarvataḥ

tadā tu ḍāmarādhīśo dharṣitaḥ sankṛtāṃjaliḥ //
baliṃ dadau namaskṛtya pradyumnāya mahātmane

vaṃgadeśādhipo vīro vīradhanvā madotkaṭaḥ //
āyayau saṃmukhe yoddhumakṣauhiṇyā''vṛto bali

caṃdrabhānurhareḥ putraḥ pradyumnasya prapaśyataḥ //
bibheda tad‌balaṃ bāṇaiḥ kuvākyairmitratāmiva

kariṇāṃ bāṇabhinnānāṃ śiraso mauktikāni ca //
prasphuraṃti nipetuḥ kau rātrau tārāgaṇā iva

nipetū rathino'nekā gajāśvāśca padātayaḥ //
tad‌bāṇaiśchinnaśirasaḥ kūṣmāṃḍaśakalā iva

kṣaṇamātreṇa tatsainyakṣatajānāṃ nadī hyabhūt //
manasvināṃ harṣakarī trastānāṃ bhayakāriṇī

muṇḍaiḥ kabaṃdhairdhāvad‌bhirharikeyurakuṃḍalaiḥ //
kirīṭaiḥ kaṃkaṇaiḥ śastrairmahāmārīva bhūrbabhau

kūṣmāṇḍonmādavetālā bhairavā brahmarākṣasāḥ //
śirāṃsi jagṛhurvegāddharamālārthahetave

itthaṃ nipātite sainye vīradhanvā samāgataḥ //
caṃdrabhānuṃ tatāḍāśu gadayā vajrakalpayā

tad‌gadātiprahāreṇa na cacāla hareḥ sutaḥ //
caṃdrabhānurgadāṃ nītvā taṃ tatāḍa bhujāṃtare

gadāprahāravyathito mūrchito dharaṇītale //
papāta pādapa iva prodvaman rudhiraṃ mukhāt

labdhasaṃjño muhūrtena vaṃgadeśādhipo nṛpaḥ //
prayayau śaraṇaṃ so'pi pradyumnasya mahātmanaḥ

yāte dattabalau rājannagaraṃ vīradhanvani //
brahmaputraṃ samuttīrya pradyumno'mitavikramaḥ

āśīmādhipatiṃ biṃbaṃ gṛhītvā yādaveśvaraḥ //
balimādāya yadubhiḥ kāmarūpaṃ samāyayau

kāmarupeśvaraḥ puṃḍra aiṃdrajālaviśāradaḥ //
nirgataḥ senayā sārddhaṃ yoddhuṃ pradyumnasaṃmukhe

āśīmānāṃ yadūnāṃ ca ghoraṃ yuddhaṃ babhūva ha //
bāṇaiḥ kuṭhāraiḥ parighaiḥ śūlaiḥ khaḍgarṣṭiśaktibhiḥ

puṃḍro vidyāścakārāśu paiśācoragarākṣasīḥ //
tato guhyakagaṃdharvāḥ sarvato maithileśvara

pradhāvaṃto raṇe rājanpiśācāḥ piśitāśanāḥ //
koṭiśaḥ koṭiśoṃ'gārān kṣepayaṃto muhurmuhuḥ

kṣaṇamātreṇa tatsainyaṃ vamaṃto garalaṃ mukhāt //
phūtkāramapi kurvaṃto daṃdaśūkāḥ samāgatāḥ

kharārūḍhā daṃtavakrā lalajjihvābhayaṃkarāḥ //
carvayaṃto narān yuddhe dhāvaṃto rākṣasāstataḥ

yakṣāśca siṃhavadanā turaṃgavadanā nṛpa //
chiṃdhi bhiṃdhīti garjaṃtaḥ śūlahastā itastataḥ

kṣaṇamātreṇa meghānāṃ samūhaiśchāditaṃ nabhaḥ //
aṃdhakāro hyabhūdrājan rajasā vātavegataḥ

bhojavṛṣṇyaṃdhakamadhuśūrasenadaśārhakāḥ //
bhayaṃ prāpurmahāyuddhe nyastaśastrā yadūttamāḥ

kṛṣṇadattaṃ dhanuḥ kārṣṇirādāya pratikāravit //
sattvātmikāṃ mahāvidyāṃ bāṇaiḥ prāyuṅkta maithila

bāṇaiḥ piśācānuragān sayakṣān
rakṣāṃsi gaṃdharvaghanāṃdhakārān //
bibheda divyaiḥ prabhavairyathā hi
nīhārameghān kiraṇairvivasvān

bāṇaiśca puṃḍraṃ sarathaṃ savāhanaṃ
taṃ bhrāmayitvā ghaṭikādvayaṃ khe //
nipātayāmāsa raṇe sapat‍naṃ
padmaṃ pṛthivyāmiva mārutaḥ kila /३१//
buddhastadā taṃ śaraṇaṃ sametya
pradharṣitaḥ sadya upāyanāni //
lakṣairhayānāmayutairgajānāṃ
yutāni dattvā praṇanāma kārṣṇim

vipāśāṃ sa tadottīrya sainyaiḥ śoṇanadaṃ nṛpa //
kaikayānāyayau dhanvī pradyumno yadunaṃdanaḥ

kaikayasyādhipo rājā dhṛtaketurmahābalaḥ //
vasudevasvasuḥ sākṣācchrutakīrteḥ patirmahān

pradyumnamarhayāmāsa dhṛtaketuḥ sa yādavam //
bhaktyā paramayā rājañchrīkṛṣṇasya prabhāvavit

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
kaikayavijayo nāma paṃcadaśo'dhyāyaḥ