Garga Samhita · Chapter 7.10

yādavagaṇānāṃ karūṣadeśagamanam
śrīnārada uvāca -
manutīrthe tataḥ snātvā pradyumno yadubhiḥ saha //
prayayau kauṃkaṇāndeśānduṃdubhīnnādayanmuhuḥ

kauṃkaṇastho'tha medhāvī gadāyuddhaviśāradaḥ //
ekākī mallayuddhena parīkṣannāyayau balam

pradyumnaṃ sabalaṃ prāha śṛṇu me yādaveśvara //
gadāyuddhaṃ dehi mahyaṃ mad‌balaṃ nāśaya prabho

pradyumna uvāca -
ekato hyekato vīrā balavaṃto mahītale //
mānaṃ mā kuru he malla viṣṇumāyātidurgamā

vayaṃ tu bahavo vīrāstvamekākī samāgataḥ //
adhamo'yaṃ mahāmalla dṛśyate yāhi sāṃpratam

malla uvāca -
yadā yuddhaṃ na kuruta bhavaṃto balaśālinaḥ //
matpādo'dho'tra niryāṃtu tadā yāsyāmi sāṃpratam

śrīnārada uvāca -
evaṃ vadati malle vai sarve yādavapuṃgavāḥ //
babhūvuḥ krodhasaṃyuktāḥ paśyatastasya maithila

gado gadāṃ samādāya baladevānujo balī //
tasthau so'pi gadāṃ nītvā sarveṣāṃ paśyatāṃ nṛpa

gadāṃ variṣṭhāṃ cikṣepa gadāya sa mahābalaḥ //
gadopari gadāṃ nītvā svagadāṃ prākṣipad‍gadaḥ

gadasya gadayā so'pi tāḍitaḥ patito bhuvi //
mṛdhecchāṃ na cakārāśu hyud‌vaman rudhiraṃ mukhāt

koṃkaṇastho'tha medhāvī natvā prāha hareḥ sutam //
parīkṣārthaṃ ca bhavatāmetatkāryaṃ mayā kṛtam

tvameva bhagavānsākṣātkuto'haṃ prākṛto janaḥ //
kṣamasva me'parādhaṃ bho tvāmahaṃ śaraṇaṃ gataḥ

śrīnārada uvāca -
ityuktvātha baliṃ datvā namaskṛtya hareḥ sutam //
koṃkaṇasthaḥ purīṃ prāgānmedhāvī kṣatriyottamaḥ

kuṭakādhipatiṃ mauliṃ mṛgayāyāṃ vinirgatam //
jagrāha sa mahābāhuḥ sāṃbo jāṃbavatīsutaḥ

kārṣṇistasmād‌baliṃ nītvā daṃḍakākhyaṃ vanaṃ yayau //
munīnāmāśramānpaśyansvasainyaparivāritaḥ

nirviṃdhyāṃ ca payoṣṇīṃ ca tāpīṃ snātvā hareḥ sutaḥ //
śūrpārakaṃ mahākṣetramāryāṃ dvaipāyanīṃ tataḥ

ṛṣyamūkaṃ tataḥ paśyanpravarṣaṇagiriṃ gataḥ //
parjanyo bhagavānsākṣānnityadā yatra varṣati

gokarṇākhyaṃ śivakṣetraṃ dṛṣṭvā kārṣṇiḥ svasainyakaiḥ //
trigartānkeralān deśān yayau jetuṃ mahābalaḥ

ambaṣṭhaḥ keralādhīśaḥ śrutvā vārtāṃ tu manmukhāt //
dadau tasmai baliṃ śīghraṃ pradyumnāya mahātmane

kṛṣṇāṃ veṇīṃ tadottīrya tailaṃgān viṣayān yayau //
sainyapādarajovṛṃdairaṃdhīkurvannabhaḥsthalam

tailaṃgasyādhipo rājā viśālākṣaḥ prakīrtitaḥ //
purasyopavane reme suṃdarīgaṇasaṃvṛtaḥ

mṛdaṃgādyaiśca vāditrairmadhuradhvanisaṃkulaiḥ //
parairapsarasāṃ rāgairgīyamāno dyurāḍiva

taṃ prāha suṃdarī rāmā rājñī maṃdāramālinī //
rajovyāptaṃ nabho vīkṣya śuṣyad‌biṃbādharā parā

maṃdāramālinyuvāca -
rājanna jānāsi sadā vihārā-
daharniśaṃ kāmaviśālalolaḥ //
ahaṃ na jānāmi kadāpi duḥkhaṃ
mukhālakālibhramarāstaveṣā

dvārāvatīśādhvaranāgavallī-
cayaṃ samutthāpya diśo jayārtham //
vijitya sarvānnṛpa cedipānsa
samāgato'sau yadurājarājaḥ

dhuṃkāraśabdaṃ nṛṇu duṃdubhīnāṃ
citkāraphūtkārayutaṃ dvipānām //
kodaṃḍaṭaṃkāramayaṃ parāṇāṃ
kalpāṃtasārasvatanādakāram

tvaraṃ baliṃ preṣaya śaṃbarāraye
pradhāvatīḥ paśya narendra suṃdarīḥ //
cyūtaprasūnāḥ śramavārivarṣaṇī-
rvanapraveśāsphuṭakeśamaṃḍanāḥ

pat‍nīvākyaṃ tataḥ śrutvā viśālākṣo'tiharṣitaḥ //
pradyumnasammukhe so'pi baliṃ nītvā samāyayau

tena sampūjitaḥ sākṣātpradyumno dhanvināṃ varaḥ //
snātvā paṃpāsarastīrthe mahārāṣṭraṃ tato yayau

mahārāṣṭrādhipo rājā vimalo nāma vaiṣṇavaḥ //
bhaktyā paramayā kārṣṇiṃ pūjayāmāsa sarvataḥ

tathā hi karṇāṭapatiḥ sahasraji-
tsvataḥ samānīya baliṃ mahātmane //
sampūjayāmāsa śubhārthahetave
śrīśaṃbarāriṃ jagataḥ prabhuṃ param

pradyumno bhagavānsākṣādyādavaiḥ saha maithila //
karūṣān viṣayānprāgājjetuṃ yogīva dehajān

mahāraṃgapure tatra vṛddhaśarmā mahāmatiḥ //
bhartātha śrutadevāyā vasudevasvasurnṛpa

tasya putro daṃtavaktraḥ kṛṣṇaśatruḥ prakīrtitaḥ //
śiśupāla iva kruddho yoddhuṃ cakre manaḥ svayam

mātrā pitrā vārito'pi daityo daityānanuvrataḥ //
yādavān ghātayiṣyāmi ko'yamitthaṃ cakāra ha

ādāya sa gadāṃ gurvīṃ lakṣabhāravinirmitām //
ekākī prayayau yoddhuṃ pradyumnabalasammukhe

daṃtavaktraḥ kṛṣṇavarṇaṃ kajjalādrisamaprabham //
lalajjihvaṃ ghorarūpaṃ tālavṛkṣadaśocchritam

kirīṭakuṇḍaladharaṃ hemavarṇavibhūṣitam //
kiṃkiṇījālasaṃyuktaṃ calaccaraṇanūpuram

kaṃpayantaṃ bhuvaṃ vegātpātayantaṃ girīndrumān //
ghātayaṃtaṃ svagadayā kṛtāṃtamiva durjanān

taṃ dṛṣṭvā yādavāḥ sarve bhayaṃ prāpurmṛdhāṃgaṇe //
āgate daṃtavaktre ca mahānkolāhalo hyabhūt

pradyumnaḥ preṣayāmāsa tasyopari mahad‌balam //
aṣṭādaśākṣauhiṇīnāṃ dhanuṣṭaṃkārayan muhuḥ

bāṇaiḥ paraśvadhaiḥ rājañchataghnībhīrbhṛśuṃḍibhiḥ //
taṃ teḍuryādavāḥ sarve sarvato'driṃ yathā gajāḥ

daṃtavakraḥ svagadayā karīṃdrānutkaṭānbahūn //
pātayāmāsa rājeṃdra bhinnakuṃbhasthalān mṛdhe

kāṃścitpādeṣu connīya kiṃkiṇījālanāditān //
saśṛṅkhalānsanīḍāṃstām̐llolaghaṃṭāraṇatsvanān

vātastūlamivākāśe cikṣepa śatayojanam //
śūṃḍādaṃḍeṣu kāṃścidvai gṛhītvā daityapuṃgavaḥ

bhrāmayitvā gajāndikṣu nadataḥ prākṣipad‌ruṣā //
kāṃścid‌gajānvaṃśayośca kakṣayorubhayorapi

pad‍bhyāmākramya śuśubhe daityaḥ kālāgnirudravat //
rathānsasūtānsāśvāṃśca sadhvajānsamahārathān //
cikṣepa gagane vīraḥ padmānīva prabhañjanaḥ

turagāṃśca padātīśca prākṣipad‌gagane balāt //
adhomukhā ūrdhvamukhā rājaputrā mahābalāḥ

saśatrā rat‍nakeyurasaṃyuktāstārakā iva //
ākāśātprapataṃtaste vamaṃto rudhiraṃ mukhāt

balaṃ viloḍayāmāsa gadayā daityapuṃgavaḥ //
daṃṣṭrayā pralayābdhiṃ śrīvarāha iva maithila

iti śrīgargasaṃhitāyāṃ śrīviśvajitkhaṇḍe śrīnāradabahulāśvasaṃvāde
koṃkaṇakuṭakatrigartakeralatailaṃgamahārāṣṭrakarṇāṭavijaye kārūṣadeśagamanaṃ nāma daśamo'dhyāyaḥ