Garga Samhita · Chapter 6.4

śrīnārada uvāca //
atha śrīkṛṣṇadevasya vivāhaṃ śṛṇu maithila//
sarvapāpaharaṃ puṇyaṃ caturvargaphalapradam

bhīṣmakonāma rājābhūdvidarbheṣu pratāpavān //
kuṃḍinādhipatiḥ śrīmānsarvadharmavidāṃvaraḥ

rukmiṇī tatsutā jātā śriyomātrātisundarī //
koṭicandrapratīkāśā guṇabhūṣaṇabhūṣitā

śrutvaikadā purā sā vai manmukhācchrīharerguṇān //
paripūrṇatamaṃ taṃ vai sā mene sadṛśaṃ patim

tadrūpaṃ saguṇaṃ śrutvā manmukhātprītivarddhanāt //
sadṛśīṃ śrīharistāṃ vai samudvoḍhuṃ mano dadhe /

kṛṣṇabhāvavidā rājñā sarvadharmavidā bhṛśam //
bhīṣmakeṇaiva kṛṣṇāya dātuṃ tāṃ niścayaḥ kṛtaḥ

yuvarājastato rukmī taṃ nivāryya prayatnataḥ //
kṛṣṇaśatrurmahāvīraṃ śiśupālamamanyata

tataḥ khinnamanā bhaiṣmī śrīkṛṣṇāya mahātmane //
dūtaṃ svaṃ preṣayāmāsa brāhmaṇaṃ mithileśvara

sa dvārakāṃ gato divyāṃ śrīkṛṣṇena prapūjitaḥ/
bhuktavāṃstatra cāsīno viśrāṃto maṃdiraṃ hareḥ

pṛcchate kuśalaṃ sarvaṃ śrīkṛṣṇāya mahātmane //
brāhmaṇastadanujñātastasmai sarvamavarṇayat

svastiśrīkārapaṃcāḍhye nityānaṃdamahodadhau //
śrīmaddivyaguṇaiḥ pūrṇe koṭiśo natayo mama

śamatrāsti ca tatrāstu tatastvatpatramāgatam//
nāradoktena vacasā jñātosi prakṛteḥ paraḥ

sarvaṃ jānāsi sarvajñastathā vakṣye vaco rahaḥ //
vīrabhāgaṃ tu māṃ viddhi tvaṃ gṛhāṇa mahāmate

māṃ caidyaḥ pratigṛhṇīyādyathā siṃhabaliṃ mṛgaḥ //
kathaṃ tvāmudvahe durge sthitāmiti ca tacchṛṇu

pūrvedyuḥ kuladevyāstu yātrāsti mahatī hare //
āgamiṣyāmyahaṃ yatra tatra māṃ tvaṃ gṛhāṇa bhoḥ

// śrīnārada uvāca //
rukmiṇyāstamabhiprāyaṃ śrutvā brāhmaṇabhāṣitam //
rathaḥ saṃyujyatāmāśu dārukaṃ prāha mānadaḥ

paścimāyāṃ tadā rātrau vaikuṇṭhaprabhavaṃ param //
kiṃkiṇījālasaṃyuktaṃ hemaratnakhacitprabham

sadaśvaiḥ śaibyasugrīvameghapuṣpabalāhakaiḥ //
niyojitairdārukeṇa caṃcalaiścārucāmaraiḥ

yuktaṃ mahārathe divyaṃ sahasrādityavarcasam //
āruhya sāratheḥ pṛṣṭhe dhṛtvā śrīpādapaṃkajam

svahastena dvijaṃ tasminsamāropya ramāpatiḥ //
vidarbhānprayayau rājañśrīkṛṣṇo bhagavānhariḥ

kṛṣṇaṃ caikaṃ gataṃ hartuṃ kanyāṃ tu nṛpamaṇḍalāt //
kalipraśaṃkito rāmaḥ śrutvā bhrātṛsahāyakṛt

nītvā yadubalaṃ sarvaṃ samarthabalavāhanam//
vipakṣīyānnṛpāñjetuṃ balaḥ paścādyayau tvaram

kuṇḍinopavanaṃ prātaḥ sadvijaḥ saratho hariḥ //
saṃtasthau tiṃtiṇīvṛkṣe āstīryāśvaparicchadam

dūrātsaṃdṛśyate tasmātkuṇḍinantu puramparam //
dīrghadurgasamāyuktaṃ saptayojanavartulam

durlaṃghyā durgamā yatra parikhā jalapūritā //
dhanuḥśataṃ vistṛtāsti cāturmāsyanadīvasā

paṃcāśaddhastamānena durgabhittistathordhvagā //
yatra ramyāṇi harmyāṇi sphuraddhemaśikhāni ca

hemakumbhadhvaja sphūrjjattolakāni virejire //
pārāvatā mayūrāśca yatra tatra pataṃti ca

śiśupālāya svāṃ kanyāṃ dāsyanrājā tu bhīṣmakaḥ //
cakre vivāhasaṃbhārasaṃcayaṃ ratnamaṇḍape

gītamaṃgalasaṃyukte nārībhirbhavanottame //
rarāja rukmiṇī rājansiddibhirbhūryathā bhuvi

atharvaviddvijā bhaiṣmī susnātāṃ ratnavāsasam //
cakrurmaṃtraistathā rakṣāṃ badhvā śāṃtiṃ vidhāya ca

haimānāṃ bhāralakṣaṃ ca muktānāṃ dviguṇaṃ tathā//
sahasrabhāraṃ vastrāṇāṃ dhenūnāmarbudāni ṣaṭ /

gadāyutaṃ rathānāṃ ca daśalakṣamanoharam //
daśakoṭihayānāṃ ca guḍāditilaparvatān

sahasrasvarṇapātrāṇāṃ bhūṣaṇānāṃ tathāyutam //
viprebhyaḥ pradadau rājā bhīṣmakoti mahāmanāḥ

tathā vai damaghoṣasya śiśupālāya vai dvijāḥ //
cakruḥ śāṃtiṃ parāṃ pūrvaṃ rakṣābaṃdhanarūpiṇīm

brāhmaṇairmaṃgalasnātaṃ pītakaṃcukaśobhitam //
mukuṭopari vibhrājatpuṣpaṃ maulidharaṃ śubham

hārakaṃkaṇakeyūraśikhāmaṇivibhūṣitam //
maṃgalairgītavāditrairgandhākṣatavicarcitam

ācāralājaiḥ suvaraṃ śiśupālaṃ vidhāya ca//
āropya kariṇaṃ proccaṃ damaghoṣo viniryayau

jarāsaṃdhena śālvena daṃtavakreṇa dhīmatā //
vidūrathena pauṃḍreṇa pārṣṇigrāheṇa maithila

vikarṣanmahatīṃ senāṃ damaghoṣo mahābalaḥ //
duṃdubhīnnādayandīrghānāyayau kuṇḍinaṃ puram

saṃmukhādyadudevasya śrutvodyogaṃ nṛpāḥ pare//
sahasraśaḥ samājagmuḥ śiśupālasahāyinaḥ

bhīṣmako hyagrato gatvā saṃpūjya vidhivannṛpam //
kāśmīrakaṃbalairdivyāruṇaiḥ sāmudrasaṃbhavaiḥ

maṃḍiteṣu ca sarveṣu muktādāmavilaṃbiṣu //
saugaṃdhikaiḥ puṣparasai rāṣṭreṣu śibireṣu ca

vārāṃganānṛtyalasanmṛdaṃgeṣu dhvanatsu ca //
niveśayāmāsa nṛpau vidarbhādhipatirmahān

iti śrīmadgargasahitāyāṃ śrīdvārakākhaṇḍe nāradabahulāśvasaṃvāde kuṇḍinapurayānaṃnāma caturtho'dhyāyaḥ