ગર્ગસંહિતા · અધ્યાય 6.4

શ્રીનારદ ઉવાચ ॥
અથ શ્રીકૃષ્ણદેવસ્ય વિવાહં શૃણુ મૈથિલ॥
સર્વપાપહરં પુણ્યં ચતુર્વર્ગફલપ્રદમ્

ભીષ્મકોનામ રાજાભૂદ્વિદર્ભેષુ પ્રતાપવાન્ ॥
કુંડિનાધિપતિઃ શ્રીમાન્સર્વધર્મવિદાંવરઃ

રુક્મિણી તત્સુતા જાતા શ્રિયોમાત્રાતિસુન્દરી ॥
કોટિચન્દ્રપ્રતીકાશા ગુણભૂષણભૂષિતા

શ્રુત્વૈકદા પુરા સા વૈ મન્મુખાચ્છ્રીહરેર્ગુણાન્ ॥
પરિપૂર્ણતમં તં વૈ સા મેને સદૃશં પતિમ્

તદ્રૂપં સગુણં શ્રુત્વા મન્મુખાત્પ્રીતિવર્દ્ધનાત્ ॥
સદૃશીં શ્રીહરિસ્તાં વૈ સમુદ્વોઢું મનો દધે ।

કૃષ્ણભાવવિદા રાજ્ઞા સર્વધર્મવિદા ભૃશમ્ ॥
ભીષ્મકેણૈવ કૃષ્ણાય દાતું તાં નિશ્ચયઃ કૃતઃ

યુવરાજસ્તતો રુક્મી તં નિવાર્ય્ય પ્રયત્નતઃ ॥
કૃષ્ણશત્રુર્મહાવીરં શિશુપાલમમન્યત

તતઃ ખિન્નમના ભૈષ્મી શ્રીકૃષ્ણાય મહાત્મને ॥
દૂતં સ્વં પ્રેષયામાસ બ્રાહ્મણં મિથિલેશ્વર

સ દ્વારકાં ગતો દિવ્યાં શ્રીકૃષ્ણેન પ્રપૂજિતઃ।
ભુક્તવાંસ્તત્ર ચાસીનો વિશ્રાંતો મંદિરં હરેઃ

પૃચ્છતે કુશલં સર્વં શ્રીકૃષ્ણાય મહાત્મને ॥
બ્રાહ્મણસ્તદનુજ્ઞાતસ્તસ્મૈ સર્વમવર્ણયત્

સ્વસ્તિશ્રીકારપંચાઢ્યે નિત્યાનંદમહોદધૌ ॥
શ્રીમદ્દિવ્યગુણૈઃ પૂર્ણે કોટિશો નતયો મમ

શમત્રાસ્તિ ચ તત્રાસ્તુ તતસ્ત્વત્પત્રમાગતમ્॥
નારદોક્તેન વચસા જ્ઞાતોસિ પ્રકૃતેઃ પરઃ

સર્વં જાનાસિ સર્વજ્ઞસ્તથા વક્ષ્યે વચો રહઃ ॥
વીરભાગં તુ માં વિદ્ધિ ત્વં ગૃહાણ મહામતે

માં ચૈદ્યઃ પ્રતિગૃહ્ણીયાદ્યથા સિંહબલિં મૃગઃ ॥
કથં ત્વામુદ્વહે દુર્ગે સ્થિતામિતિ ચ તચ્છૃણુ

પૂર્વેદ્યુઃ કુલદેવ્યાસ્તુ યાત્રાસ્તિ મહતી હરે ॥
આગમિષ્યામ્યહં યત્ર તત્ર માં ત્વં ગૃહાણ ભોઃ

॥ શ્રીનારદ ઉવાચ ॥
રુક્મિણ્યાસ્તમભિપ્રાયં શ્રુત્વા બ્રાહ્મણભાષિતમ્ ॥
રથઃ સંયુજ્યતામાશુ દારુકં પ્રાહ માનદઃ

પશ્ચિમાયાં તદા રાત્રૌ વૈકુણ્ઠપ્રભવં પરમ્ ॥
કિંકિણીજાલસંયુક્તં હેમરત્નખચિત્પ્રભમ્

સદશ્વૈઃ શૈબ્યસુગ્રીવમેઘપુષ્પબલાહકૈઃ ॥
નિયોજિતૈર્દારુકેણ ચંચલૈશ્ચારુચામરૈઃ

યુક્તં મહારથે દિવ્યં સહસ્રાદિત્યવર્ચસમ્ ॥
આરુહ્ય સારથેઃ પૃષ્ઠે ધૃત્વા શ્રીપાદપંકજમ્

સ્વહસ્તેન દ્વિજં તસ્મિન્સમારોપ્ય રમાપતિઃ ॥
વિદર્ભાન્પ્રયયૌ રાજઞ્શ્રીકૃષ્ણો ભગવાન્હરિઃ

કૃષ્ણં ચૈકં ગતં હર્તું કન્યાં તુ નૃપમણ્ડલાત્ ॥
કલિપ્રશંકિતો રામઃ શ્રુત્વા ભ્રાતૃસહાયકૃત્

નીત્વા યદુબલં સર્વં સમર્થબલવાહનમ્॥
વિપક્ષીયાન્નૃપાઞ્જેતું બલઃ પશ્ચાદ્યયૌ ત્વરમ્

કુણ્ડિનોપવનં પ્રાતઃ સદ્વિજઃ સરથો હરિઃ ॥
સંતસ્થૌ તિંતિણીવૃક્ષે આસ્તીર્યાશ્વપરિચ્છદમ્

દૂરાત્સંદૃશ્યતે તસ્માત્કુણ્ડિનન્તુ પુરમ્પરમ્ ॥
દીર્ઘદુર્ગસમાયુક્તં સપ્તયોજનવર્તુલમ્

દુર્લંઘ્યા દુર્ગમા યત્ર પરિખા જલપૂરિતા ॥
ધનુઃશતં વિસ્તૃતાસ્તિ ચાતુર્માસ્યનદીવસા

પંચાશદ્ધસ્તમાનેન દુર્ગભિત્તિસ્તથોર્ધ્વગા ॥
યત્ર રમ્યાણિ હર્મ્યાણિ સ્ફુરદ્ધેમશિખાનિ ચ

હેમકુમ્ભધ્વજ સ્ફૂર્જ્જત્તોલકાનિ વિરેજિરે ॥
પારાવતા મયૂરાશ્ચ યત્ર તત્ર પતંતિ ચ

શિશુપાલાય સ્વાં કન્યાં દાસ્યન્રાજા તુ ભીષ્મકઃ ॥
ચક્રે વિવાહસંભારસંચયં રત્નમણ્ડપે

ગીતમંગલસંયુક્તે નારીભિર્ભવનોત્તમે ॥
રરાજ રુક્મિણી રાજન્સિદ્દિભિર્ભૂર્યથા ભુવિ

અથર્વવિદ્દ્વિજા ભૈષ્મી સુસ્નાતાં રત્નવાસસમ્ ॥
ચક્રુર્મંત્રૈસ્તથા રક્ષાં બધ્વા શાંતિં વિધાય ચ

હૈમાનાં ભારલક્ષં ચ મુક્તાનાં દ્વિગુણં તથા॥
સહસ્રભારં વસ્ત્રાણાં ધેનૂનામર્બુદાનિ ષટ્ ।

ગદાયુતં રથાનાં ચ દશલક્ષમનોહરમ્ ॥
દશકોટિહયાનાં ચ ગુડાદિતિલપર્વતાન્

સહસ્રસ્વર્ણપાત્રાણાં ભૂષણાનાં તથાયુતમ્ ॥
વિપ્રેભ્યઃ પ્રદદૌ રાજા ભીષ્મકોતિ મહામનાઃ

તથા વૈ દમઘોષસ્ય શિશુપાલાય વૈ દ્વિજાઃ ॥
ચક્રુઃ શાંતિં પરાં પૂર્વં રક્ષાબંધનરૂપિણીમ્

બ્રાહ્મણૈર્મંગલસ્નાતં પીતકંચુકશોભિતમ્ ॥
મુકુટોપરિ વિભ્રાજત્પુષ્પં મૌલિધરં શુભમ્

હારકંકણકેયૂરશિખામણિવિભૂષિતમ્ ॥
મંગલૈર્ગીતવાદિત્રૈર્ગન્ધાક્ષતવિચર્ચિતમ્

આચારલાજૈઃ સુવરં શિશુપાલં વિધાય ચ॥
આરોપ્ય કરિણં પ્રોચ્ચં દમઘોષો વિનિર્યયૌ

જરાસંધેન શાલ્વેન દંતવક્રેણ ધીમતા ॥
વિદૂરથેન પૌંડ્રેણ પાર્ષ્ણિગ્રાહેણ મૈથિલ

વિકર્ષન્મહતીં સેનાં દમઘોષો મહાબલઃ ॥
દુંદુભીન્નાદયન્દીર્ઘાનાયયૌ કુણ્ડિનં પુરમ્

સંમુખાદ્યદુદેવસ્ય શ્રુત્વોદ્યોગં નૃપાઃ પરે॥
સહસ્રશઃ સમાજગ્મુઃ શિશુપાલસહાયિનઃ

ભીષ્મકો હ્યગ્રતો ગત્વા સંપૂજ્ય વિધિવન્નૃપમ્ ॥
કાશ્મીરકંબલૈર્દિવ્યારુણૈઃ સામુદ્રસંભવૈઃ

મંડિતેષુ ચ સર્વેષુ મુક્તાદામવિલંબિષુ ॥
સૌગંધિકૈઃ પુષ્પરસૈ રાષ્ટ્રેષુ શિબિરેષુ ચ

વારાંગનાનૃત્યલસન્મૃદંગેષુ ધ્વનત્સુ ચ ॥
નિવેશયામાસ નૃપૌ વિદર્ભાધિપતિર્મહાન્

ઇતિ શ્રીમદ્ગર્ગસહિતાયાં શ્રીદ્વારકાખણ્ડે નારદબહુલાશ્વસંવાદે કુણ્ડિનપુરયાનંનામ ચતુર્થોઽધ્યાયઃ