Garga Samhita · Chapter 2.8

śrīnāradauvāca //
ekadā sabalaḥ kṛṣṇaścārayangā manoharāḥ //
gopālaiḥ sahitaḥ sarvairyayau tālavanaṃ navam

dhenukasya bhayādgopā na gatāste vanāntaram //
kṛṣṇopi na gatastatra bala eko viveśa ha

nīlāṃbaraṃ kaṭau baddhā baladevo mahābalaḥ //
paripakvaphalārthaṃ hi tadvane vicacāra ha

bāhubhyāṃ kaṃpayaṃstālānphalasaṃghaṃ nipātayan //
garjaṃśca nirbhayaḥ sākṣādanantonantavikramaḥ

phalānāṃ patatāṃ śabdaṃ śrutvā krodhāvṛtaḥ kharaḥ //
madhyāhne svāpakṛdduṣṭo bhīmaḥ kaṃsasakho balī

āyayau saṃmukhe yoddhuṃ baladevasya dhenukaḥ //
balaṃ paścima pādābhyāṃ nihatyorasi satvaram

cakāra kharaśabdaṃ svaṃ paridhāvanmuhurmuhuḥ //
gṛhītvā dhenukaṃ śīghraṃ balaḥ paścimapādayoḥ

cikṣepa tālavṛkṣe ca ha- stenaikenalīlayā //
tena bhagnaśca tālopi tālānpārśvasthitānbahūn

pātayāmāsa rājendra tadadbhutamivābhavat //
punarutthāya daityeṃdro balaṃ jagrāha roṣataḥ

yojanaṃ nodayāmāsa gajaṃ prati gajo yathā //
gṛhītvā taṃ balaḥ sadyo bhrāmayitvātha dhenukam

bhūpṛṣṭhe pothayāmāsa mūrcchito bhagnamastakaḥ //
kṣaṇena punarutthāya krodhasaṃyuktavigrahaḥ

mūrdhni kṛtvā catuḥśṛṃgaṃ dhṛtvā rūpaṃ bhayaṃkaram //
gopānvidrāvayāmāsa śṛṃgaistīkṣṇairbhayaṃkaraiḥ

agre palāyitāngopāndudrāvāśu madotkaṭaḥ //
śrīdāmā taṃ ca daṃḍena subalo muṣṭinā tathā

stokaḥ pāśena taṃ daityaṃ saṃtatāḍa mahābalam //
kṣepaṇenārjunoṃśuśca daityaṃ lattikayā kharam

viśālarṣabha etyāśu pādena svabalena ca //
tejasvī hyarddhacandreṇa devaprastha śca peṭakaiḥ

varūthapaḥ kaṃdukena saṃtatāḍa mahākharam //
atha kṛṣṇopi taṃ nītvā hastābhyāṃ dhenukāsuram

bhrāmayitvāśu cikṣepa girigovarddha- nopari //
śrīkṛṣṇasya prahāreṇa mūrcchito ghaṭikādvayam

punarutthāya svatanuṃ vidhunvandārayanmukham //
śṛṅgābhyāṃ śrīhariṃ nītvā dhāvandaityo na bhogataḥ

cacāra tena khe yuddhamūrdhvaṃ vai lakṣayojanam //
gṛhītvā dhenukaṃ daityaṃ śrīkṛṣṇo bhagavānsvayam

cikṣepādho bhūmimadhye cūrṇitāsthiḥ sa mūrcchitaḥ //
punarutthāya śṛṅgābhyāṃ nādaṃ kṛtvātibhairavam

govardhanaṃ samutpāṭya śrīkṛṣṇe prāhiṇotkharaḥ //
giriṃ gṛhītvā śrīkṛṣṇaḥ ṇākṣipatta sya mastake

daityo giriṃ gṛhītvātha śrīkṛṣṇe prāhiṇodbalī//
kṛṣṇo govardhanaṃ nītvā pūrvasthāne samākṣipat

punardhāvanmahādaityaḥ śṛṅgābhyāṃ / dārayanbhuvam//
balaṃ paścimapādābhyāṃ tāḍayitvā jagarja ha/२३/
nanāda tena brahmāṃḍaṃ praijadbhūkhaṇḍamaṇḍalam//
hastābhyāṃ saṃgṛhītvā taṃ baladevo mahābalaḥ

bhūpṛṣṭhe pothayāmāsa mūrcchitaṃ bhagnamastakam //
punastatāḍa taṃ daityaṃ muṣṭinā hyacyutāgrajaḥ

tena muṣṭiprahāreṇa sadyo vai nidhanaṃ gataḥ //
tadaiva vavṛṣurdevāḥ puṣpairnandanasaṃbhavaiḥ

dehādvinirgataḥ so'pi śyāmasundaravigrahaḥ //
sragvī pītāṃbaro devo vanamālāvibhūṣitaḥ

lakṣapārṣadasaṃyuktaḥ sahasra dhvajaśobhitaḥ //
sahasracakradhvanibhṛddhayāyutasamanvitaḥ

lakṣacāmaraśobhāḍhyo'ruṇavarṇo'tiratnabhṛt //
divyayojanavistīrṇo manoyāyī manoharaḥ

kiṃkiṇījālasaṃyukto ghaṭāmaṃjīrasaṃyutaḥ //
hariṃ pradakṣiṇīkṛtya sabalaṃ divyarūpadhṛk

divyaṃ rathaṃ samāruhya dyotayanmaṃḍalandiśām //
jagāma daityo he rājangolokaṃ prakṛteḥ param

śrīkṛṣṇo dhenukaṃ hatvā sabalo bālakaiḥ saha //
tadyaśastu pragāyadbhirbabhau gokulagogaṇaiḥ

rājovāca //
mune muktiṃ kathaṃ prāptaḥ pūrvaṃ ko dhenukāsuraḥ //
kathaṃ kharatvamāpanna etanme brūhi tattvataḥ

śrīnārada uvāca //
vairocanerbaleḥ putro nāmnā sāhasiko balī //
nārīṇāṃ daśasāhasrai reme vai gandhamādane

vāditrāṇāṃ nūpurāṇāṃ śabdobhūttadvane mahān//
guhāyāmāsthitasyāpi śrīkṛṣṇaṃ smarato muneḥ

durvāsaso'tha tenāpi dhyānabhaṃgo babhūva ha //
nirgataḥ pādukārūḍho durvāsāḥ kṛśavigrahaḥ

dīrghaśmaśruryaṣṭi dharaḥ krodhapuṃjonaladyutiḥ //
yasya śāpādviśvamidaṃ kaṃpate sa jagāda ha

durvāsā uvāca //
uttiṣṭha gardabhākāra gardabho bhava durmate //
varṣāṇāṃ tu caturlakṣaṃ vyatīte bhārate punaḥ

mādhure maṃḍale divye puṇye tālavane vane //
baladevasya hastena muktiste bhavitā'sura

śrīnārada uvāca //
tasmādbalasya hastena śrīkṛṣṇastaṃ jaghāna ha //
prahlādāya varo datto na vadhyo me tavānvayaḥ

iti śrīmadgargasaṃhitāyāṃ vṛndāvanakhaṇḍe dhenukāsuramokṣo nāmāṣṭamo'dhyāyaḥ