Garga Samhita · Chapter 10.57

aśvamedhakhaṇḍaḥ - saptapaṃcāśattamo'dhyāyaḥ
yajñadakṣiṇā pradānam -
garga uvāca -
tataḥ kṛṣṇena bhīmena prārthayitvā dvijānnṛpān //
bhojayāmāsa yadurāḍ‌bhojanairvividhairapi

sacchaṣkulīpāyasataṇḍulābhaiḥ saṃyāvakāpūpasusūpakādyaiḥ //
satpheṇikādyaistu nimantrya viprānsaṃbhojayāmāsa viśeṣamannam

śikhariṇīghṛtapūrasuśaktikāḥ supaṭinīdadhipūpakalapsikāḥ //
suvṛtasuṃdaracandrasuhālikā baṭakamodakaparpaṭakairadāt

kecitphalāśanāstatra śuṣkaparṇāśanāstathā //
kecijjalāśanā viprāḥ kecid‌dūrvārasāśanāḥ

kecidvātāśanā rājañjanmataśca tapasvinaḥ //
bhojanānāṃ ca nāmāni te na jānaṃti vismitāḥ

bhaktaṃ ca menire kecinmālatyāḥ kusumāni ca //
modakām̐śca dvijāḥ keciduduṃbaraphalāni ca

pāyasaṃ pheṇikāṃ dṛṣṭvā candrabiṃbaṃ ca menire //
parpaṭānpheṇikā dṛṣṭvā patrāṇi kiṃśukasya vai

menire'rkaphalānīti dṛṣṭvā ca madhuśīrṣakān //
pralehikāṃ lapsikāṃ ca ṛṣayaścaṃdanadravam

dṛṣṭvā te miṣṭacūrṇaṃ vai bālukāṃ munisattamāḥ //
iti matvā dvijāḥ sarve bubhujurbhojanāni ca

kecitpibaṃti dugdhaṃ tu kecid‌drākṣārasaṃ tathā //
kecidāmrarasaṃ viprāḥ prahasaṃti luṭhaṃti vai

tataḥ kṛṣṇastu bhagavānbhīmena prahasanmudā //
cakāra hāsyaṃ viprāṇāṃ saṃsthitānāṃ tapasvinām

bhojanānāṃ ca nāmāni munayo vadata tvaram //
tānprayacchāmi yuṣmabhyaṃ bhīmena sahito'pyaham

śrīkṛṣṇabhīmayorvākyaṃ niśamya munisattamāḥ //
na kiṃcidūcurmuditāḥ prapaśyantaḥ parasparam

tailaṃgakarṇāṭakagurjjarādyā-
nanyāndvijāngauḍasanāḍhyakādīn //
saṃpūjya hemāṃbararat‍navṛndai-
rnṛpeśvaro vipravarānnanāma ha

ekalakṣaṃ hayānāṃ ca gajānāṃ ca sahasrakam //
dvisahasraṃ rathānāṃ ca gavāṃ lakṣaṃ vidhānataḥ

śatabhāraṃ suvarṇānāmīdṛśīṃ dakṣiṇāṃ nṛpa //
ugrasenastu yajñāṃte pūrvaṃ mahyaṃ dadau kila

madarddhaṃ bakadālbhyāya dadau vyāsāya vai tathā //
turagāṇāṃ sahasraṃ ca gajānāṃ śatameva ca

dviśataṃ syaṃdanānāṃ ca dhenūnāṃ ca sahasrakam //
viṃśad‌bhāraṃ suvarṇānāmīdṛśaṃ dakṣiṇāṃ punaḥ

nimaṃtritebhyo viprebhya ugraseno dadau mudā //
gajamekaṃ rathaṃ gāṃ ca svarṇabhāraṃ ca ghoṭakam

dvibhāraṃ rajataṃ caiva yādaveṃdraḥ praharṣitaḥ //
īdṛśīṃ dakṣiṇāṃ rājanbrāhmaṇe brāhmaṇe dadau

mahādhvare kṛṣṇapurī tadā babhau
mahītale khe hyamarāvatī yathā //
tadā''gatā māgadhasūtakādayo
vandījanā gāyakavārayoṣitaḥ

tadā nṛpadvāri mahotsavo'bhū-
nmṛdaṃgavīṇāmurayaṣṭiveṇubhiḥ //
sutālaśaṃkhānakaduṃdubhisvanaiḥ
saṃgītanṛttyādikavādyagītakaiḥ

jaguḥ sukaṇṭhairnanṛtuḥ sutālaiḥ
saṃgītagītākṣarasāmagītaiḥ //
kausuṃbhavastrāṇi vicālayantyaḥ
saṃgītanṛtyena parisphuraṃtyaḥ

vandījanā māgadhagāyakāśca
ye cāgatāstebhya upāgatebhyaḥ //
prādāddhiraṇyaṃ bahurat‍navṛndaṃ
tathā''gatā hyapsarasaśca tābhyaḥ

sūtebhyo māgadhebhyaśca sarvebhyo bahulaṃ dhanam //
vavarṣa ghanavadrājā hayamedhapraharṣitaḥ

tatpaścādyādaveṃdrastu hyugraseno mahīśvaraḥ //
niyutaṃ turagāṇāṃ ca sahasraṃ hastināṃ tathā

śibikānāṃ śataṃ caiva kuṇḍale kaṭakāni ca // ta
triṃśad‌bhāraṃ suvarṇānāṃ bhūpe bhūpe dadau mudā

dviguṇena yadūnsarvānnaṃdādīṃścaiva bhūpatiḥ //
yaśodādyāśca gopyaśca devakyādyā yadustriyaḥ

rukmiṇyādyā rādhikādyāḥ paṭṭarājño harerapi //
divyāṃbarairalaṃkārai rājñā sarvāśca toṣitāḥ

punardadau ca gargāya rājā grāmaśataṃ mudā //
sa sargo brāhmaṇebhyaśca pradadau hi kramādṛṣiḥ

tataḥ saṃpūjayāmāsa kṛṣṇaṃ saṃkarṣaṇānvitam //
vastrālaṃkāratilakaiḥ sragbhirnīrājanādibhiḥ

uvāca kṛṣṇaḥ prahasanmahyaṃ rājanmahādhvare //
samarthena tvayā hyatra na dattaṃ kiṃcideva hi

iti śrutvā nṛpaḥ prāha rāmeṇa saha mādhavaḥ //
yathoktāṃ dakṣiṇāṃ śīghraṃ gṛhāṇa jagadīśvara

ityuktvā pradadau rājā harṣitaḥ premavihvalaḥ //
phalaṃ sarvaṃ kṛṣṇakare rājasūyāśvamedhayoḥ

tadā jayajayārāvo dvārakāyāṃ babhūva ha //
sadyaḥ surāśca saṃtuṣṭāḥ puṣpavarṣaṃ pracakrire

sarvāśca devatāstuṣṭāḥ prāptabhāgā divaṃgatāḥ //
rakṣodaityā daṃṣṭriṇaśca khagā markā bileśayāḥ

śailā gāvo vṛkṣasaṃghā nadyastīrthāni sindhavaḥ //
saṃtuṣṭāḥ prāptabhāgā ye sarve svaṃ svaṃ gṛhaṃ gatāḥ

pūjitā dānamānābhyāṃ rājāno ye samāgatāḥ //
jagmuḥ svaṃ svaṃ gṛhaṃ sainyaiḥ kaṃpayanto mahītalam

sarve gopāśca nandādyā yaśodādyā vrajastriyaḥ //
kṛṣṇena pūjitā rājanvirahārtā vrajaṃ yayuḥ

evaṃ rājā yādaveṃdro manorathamahārṇavam //
dustaraṃ ca samuttīrya harīṇā''sīd‌gatavyathaḥ

iti śrīgargasaṃhitāyāṃ hayamedhakhaṇḍe
viśvabhojyadakṣiṇāvarṇanaṃ nāma saptapaṃcāśattamo'dhyāyaḥ

hariḥ ॐ tatsat śrīkṛṣṇārpaṇamastu //
vargaḥgarga saṃhitā