Scripture Library

Ganesha Purana · Chapter 2.41.45

2.41.45.1

adhyāya ४१ prāraṃbha :-
ka uvāca //
evaṃ praśaṃsito devyā devaśca sa vināyakaḥ /
uvāca pārvatīṃ prītyā praṇipatya mudā yutaḥ

2.41.45.2

gaṇeśa uvāca //
devānāṃ sarvalokānāṃ kartuṃ pālanamuttamam /
durāsadaṃ nihantuṃ ca hartuṃ bhūbhārameva ca

2.41.45.3

mātastvāṃ sevituṃ dharmaṃ kartuṃ karma ca vaidikam /
avatīrṇo'smi sarvajñe yadrṃvīmi karomi tat

2.41.45.4

evaṃ bruvati vighneśe surāḥ sarve tamūcire /
punaḥ stutvā ca natvā ca jagatkāraṇakāraṇam

2.41.45.5

rajāṃsi vimamedbhūmeruḍūni mihikā api /
jānīyātsa guṇāṃste yo vimametsāgare jalam

2.41.45.6

dhanyaṃ cakṣurhi devānāṃ yaddṛṣṭau caraṇau vibho /
idānīṃ no gataṃ duḥkhaṃ prāptaṃ ca svasvakaṃ padam/

2.41.45.7

durāsadaṃ harasvainaṃ bhūbhāraṃ cākhileśvara /
ka uvāca //
iti devavacaḥ śrutvā jahāsa sa vināyakaḥ

2.41.45.8

ūce sarvaṃ kariṣyāmi daśāyudhadharaḥ prabhuḥ /
evamuktvā surāndevo harṣagadgadayā girā

2.41.45.9

siṃhārūḍho yayau śīghraṃ purīṃ vārāṇasīṃ tadā /
tamanvayurdevagaṇā girijā giriśo'pi ca

2.41.45.2.41.10

jñātvā durāsado daityo vināyakamupāgatam /
devasenāyutaṃ vīro niryayau nagarādbahiḥ

2.41.45.11

dṛṣṭvā senāṃ tu daityasya sāmātyāṃ sāyudhāṃ dṛḍhām /
nānāvidhāyudhavatīṃ garjantīṃ ghanavanmuhuḥ

2.41.45.12

guhā vidārayansarvāḥ sa jagarja vināyakaḥ /
uvāca taṃ mahādaityaṃ bhrānto'syadyāpi re katham

2.41.45.13

tvayā balāddevagaṇā nirjitāśva mahībhujaḥ /
munayo dhikkṛtāḥ sarve tadā'haṃ nābhavaṃ khala

2.41.45.14

nirbhayena tvayā doṣā bahavaḥ saṃcitāḥ purā /
teṣāṃ phalamidānīṃ tvaṃ gaṇeśātprāptumarhasi

2.41.45.15

upadrutāstvayā lokāstrailokyavāsino'khilāḥ /
tadarthamavatīrṇo'hamuddhartuṃ tvāṃ bhuvo bharam

2.41.45.16

śaraṇaṃ yāhi re tyaktvā mānaṃ lajjāṃ sudustyajām /
yāsī saṅgrāmaśirasi cedidānīṃ mariṣyasi

2.41.45.17

śivaprāptavarātsarvaṃ trailokyaṃ pīḍitaṃ tvayā /
evamuktvā duṣṭabuddhiṃ gaṇeśo raṇasaṃbhramaḥ

2.41.45.18

paraśuṃ tolayāmāsa jvālāmālāsuśobhitam /
ācchādya bhāskaraṃ kṣobhātpralayānalasannibhaḥ

2.41.45.19

javena hṛdaye tasya tyaktvā śastraṃ kṛtāntavat /
paraśunā hatastasya romāpi na cacāla ha

2.41.45.2.41.20

krodhasaṃraktanayana udatiṣṭhadgrasanniva /
trailokyaṃ tamuvācātha devadevaṃ durāsadaḥ

2.41.45.21

na devā devarājo vā dikpālā vā na me paraḥ/
yātāstvaṃ tu kathaṃ yāto bālabhāvādr jādhunā

2.41.45.22

na bibhemyantakānmūḍha kimarthaṃ martumicchasi /
evamuktvā tataḥ kośānniṣkāśyāsiṃ mahojjvalam

2.41.45.23

kṣuradhāraṃ yadāghātādadrayaścūrṇatāṃ yayuḥ /
daityastenāhanaddevamaṅakuśena nyavārayat

2.41.45.24

so'siḥ paraśughātena śatadhā khaṇḍito'patat /
bhagnāsirmallayuddhāya yayau daityo mahābalaḥ

2.41.45.25

tyaktvāyudhāni devo'pi vavṛdhe tādṛśo balāt /
tato yuddhaṃ tayorāsīttumulaṃ romaharṣaṇam

2.41.45.26

bāhubhyāṃ kūrparābhyāṃ ca muṣṭibhyāṃ tau prajaghnatuḥ /
pādābhyāṃ jānujaṅaghābhyāṃ pṛṣṭhābhyāṃ ca nijaghnatuḥ

2.41.45.27

uḍḍīya petaturdehe paryāyeṇa mahāsvanau/
pārṣṇighātānprakurvantau ghātānkūrparayorapi

2.41.45.28

sakthnośca jānughātāṃstau skandhāghātānparasparam /
luluṇṭhaturdharaṇyāṃ tau dhūlidhūsaritau bhṛśam

2.41.45.29

parasparaṃ jayantau ca lapantau sādhu sādhviti /
evaṃ bahudinaṃ yuddhaṃ dṛṣṭvā devā visismire

2.41.45.2.41.30

cetasā bahu lajjantau jñātvā sāmarthyamasya ha/
tato vināyako muṣṭiṃ lalāṭe dṛḍhamāhanat

2.41.45.31

sphuṭitaṃ mukhamasyāśu dharaṇyāṃ patitasya ha /
dvimuhūrtaṃ nipatito vajrāhata ivācalaḥ

2.41.45.32

sa kathaṃcitprabuddho'bhūttyaktvā mūrchaum̐ cirāgatām /
tadātmānamaśaktaṃ sa manute sma bhṛśāturaḥ

2.41.45.33

āyayau sainyamadhye sa dinānte sa vināyakaḥ

2.41.45.34

ya idaṃ śṛṇuyādyuddhaṃ yuddhakāla upasthite /
sa jayaṃ prāpnuyānmartyo yathā devo vināyakaḥ

2.41.45.41

(१८४०)
iti śrīgaṇeśapurāṇe krīḍākhaṇḍe bālacarite ekacatvāriṃśo'dhyāyaḥ

2.41.45.1

adhyāya ४२ prāraṃbha –
gṛtsamada uvāca /
jñātvā parākramaṃ tasya vakratuṇḍasya daityarāṭ /
āyayau dhairyamālambya yoddhumastrairgajānanam

2.41.45.2

śivaṃ smṛtvā ca mantraṃ ca vahnidevatamādarāt /
abhimantrya śaraṃ tena tatyāja sa vināyake

2.41.45.3

agnijvālābhayāddevā devapṛṣṭhamathāgaman /
tato vināyako'muṃcatparjanyāstraṃ hi sarvavit

2.41.45.4

kariśuṇḍāmitā dhārāḥ prādurāsaṃstataḥ kṣaṇāt /
śānto'bhūttatkṣaṇādvahnistato daityo ruṣānvitaḥ

2.41.45.5

mārutāstraṃ śīghrajavaṃ vṛṣṭimāraṇamāsṛjat /
cakampe dharaṇī vṛkṣā girayaḥ patitā bhuvi

2.41.45.6

tadastreṇa mahāmeghāḥ kṣayaṃ nītāḥ kṣaṇārddhataḥ /
parvatāstraṃ tato deva āviścakre manobalāt

2.41.45.7

sarvatra parvatā jātāḥ kuṇṭhatāmagamacca tat /
vilīne mārutāstre tu raudramastraṃ tato'sṛjat

2.41.45.8

tasminvimucyamāne tu vakratuṇḍo'pyavāsṛjat /
brahmāstraṃ tannivṛttyarthamagātsainyaṃ hi bhasmasāt

2.41.45.9

parasparamayuddhetāmastre te bahuvāsaram /
tayoḥ saṃghaṭṭanādvahnirnyapataddharaṇītale

2.41.45.2.42.10

tena dagdhāṃnjanāṃjñātvā keśābhyāṃ vārite śubhe /
amātyānabravīddaityo jñātvotkṛṣṭaṃ vināyakam

2.41.45.11

tenābhiyudhyatāṃ sarvairbhuktvā yāmi punā raṇam /
tato'mātyāḥ sarvasainyairvināyakamayodhayan

2.41.45.12

vināyako gataścintāmekākitvāttataḥ kṣaṇāt /
ṣaṭpaṃcāśanmitā mūrtīścakārāsau svatejasā

2.41.45.13

nānālaṃkārasaṃyuktā nānāmālāvibhūṣitāḥ /
sarve divyāṃgadāṃgāste sarve śaśivibhūṣaṇāḥ

2.41.45.14

keciccaturbhujāḥ kecitṣaḍbhujā daśahastakāḥ /
siṃhārūḍhā barhigatāḥ kecinmūṣakavāhanāḥ

2.41.45.15

sarve ca yuyudhustatra dārayanto'risainikān/
keṣāṃcittroṭitāḥ pādāḥ keṣāṃcinmastakā api

2.41.45.16

keṣāṃcidbāhavo bhinnā jānujaṃghodarāṇi ca /
huṃkāreṇaiva garjantaḥ kecicca śaraṇaṃ yayuḥ

2.41.45.17

kecitpalāyanaparā yayurjīvanahetave /
kecitprahāraṃ kurvanto mamruḥ saṃmukhameva ca

2.41.45.18

te tu svargaṃ gatā bhejurbhogānapsaraso'pi ca /
vājinaśca rathā nāgā vāmya uṣṭrānyanekaśaḥ

2.41.45.19

nānāśastrāhatāḥ petu khaṇḍadehā gatāsavaḥ /
asṛgnadyaḥ prādurāsankeśaśaivalaśobhitāḥ

2.41.45.2.42.20

ācchūrikāsimatsyebhanakraiḥ kheṭakakacchapaiḥ /
ruṇḍābjaiśca vasāphenairmedakardamasaṃcayai

2.41.45.21

cāpaśastrairasthibakaiścarmapeśīsudarduraiḥ/
bhallakādyaiḥ śuśubhire manasvihṛdayapriyāḥ

2.41.45.22

bhuktvāgatya dadarśātha sarvaṃ tadraṇamaṇḍalam /
sarvasminnihate sainye tato daityo'tiduḥkhitaḥ

2.41.45.23

sasmāra manasā vākyaṃ yaduktaṃ śūlapāṇinā/
varadānasya samaye jayaste śaktisaṃbhavāt

2.41.45.24

ayameva bhavetkiṃ nu bālakaḥ śaktisaṃbhavaḥ /
yadutkaṭaṃ balaṃ dṛṣṭamasmiṃstrailokyasārabhṛt

2.41.45.25

kālo'pi nainaṃ vijayettatra cānyasya kā kathā /
evaṃ manasi kṛtvā sa ekākitvāpapāla ca

2.41.45.26

vakratuṇḍo gataścintāṃ na hantavyo ripuḥ palan /
devebhyo na mṛtiścāsya yathā'yaṃ śaṃkaro'bravīt

2.41.45.27

tasmādyogātsamāsthāsye vairāṭaṃ rūpamuttamam /
tato vairāṭarūpeṇa sa dadhāra kareṇa tam

2.41.45.28

ekapādena tasthau sa kāśīṃ tāṃ rakṣituṃ balāt /
ekaṃ pādaṃ tu daityasya dadhāra mastake tataḥ

2.41.45.29

uvāca daitya re daitya varācchaivānna te mṛtiḥ/
ato'sminnagare tiṣṭha parvateva suniścalaḥ

2.41.45.2.42.30

dvārabhūtaḥ purasyāsya yataḥ pūrvaṃ dṛśistava /
duṣṭānāṃ pīḍako nityaṃ nityaṃ me sānnidhistava

2.41.45.31

daityo'pi parayā bhaktyā tameva varamarthayat /
daitya uvāca /
evameva sadā tiṣṭha sthāpya pādaṃ mayi sthiram

2.41.45.32

muniruvāca /
tatheti tamuvācātha sthitaḥ kāśyāṃ vināyakaḥ /
evaṃ durāsadaṃ jitvā cakāra pṛthivīṃ śivām

2.41.45.33

tasminkṛtvā puṣpavṛṣṭiṃ praṇamya saṃprapūjya ca /
svasvasthānaṃ gatā devā munayaḥ svāśramānapi

2.41.45.34

anye ye ye tamarcanti pūrṇakāmā bhavanti te /
evaṃ vināyakasyātha kāśyāṃ ṣaṭpaṃcamūrtayaḥ

2.41.45.35

tuṇḍanākhye pure cāpi ekapādavināyakaḥ /
saṃhṛtya ca virāṭrūpaṃ sarvakāmapradaḥ sthitaḥ

2.41.45.36

ya idaṃ varamākhyānaṃ śṛṇayādbhaktimānnaraḥ /
sarvāṃnkāmānavāpnoti gāṇeśaṃ padameti ca/
sarvatra jayamāpnoti puṣṭimārogyameva ca

2.41.45.42

(१८७६)
iti śrīgaṇeśapurāṇe krīḍākhaṃḍe bālacarite durāsadajayo nāma dvicatvāriṃśo'dhyāyaḥ

2.41.45.1

adhyāya ४३ prāraṃbha –
gṛtsamada uvāca /
vijite tu gaṇeśena daitye tasmindurāsade /
dikpālā munayaścaiva śaśī sūryo guruḥ kaviḥ

2.41.45.2

praśaśaṃturdevadevaṃ durāsadaripuṃ vibhum /
śrutismṛtikṛto mārgaḥ sthāpito nihito'suraḥ

2.41.45.3

sthāpanā ca kṛtā'smākamaśakttānāṃ durāsade /
tvameva sṛjase viśvaṃ tvameva phaladāyakaḥ

2.41.45.4

samaḥ sarveṣu bhūteṣu karmabhirna ca lipyase /
tvadāśrayā caturvarṇā jantavaśca tvadāśrayāḥ

2.41.45.5

gaveṣayaṃśca nānārthāstattatkarmaṇi yojayana /
gaveṣaṇe ḍhuṇḍhirayaṃ dhāturukto manīṣibhiḥ

2.41.45.6

sa āste ḍhuṇḍhirityeva saṃjñā rājottarā'stu ca/
tava yaddarśanaṃ pūjā dhyānaṃ smaraṇameva ca

2.41.45.7

dharmārthakāmamokṣāṇāṃ sādhanaṃ putrapautradam /
ityuktvā pupujuste'muṃ mandāraiśca śamīdalaiḥ

2.41.45.8

dūrvāṃkurairharidbhiśca śvetaiśca kusumairapi /
nānāpakvānnanaivedyaiḥ phalairbahuvidhairapi

2.41.45.9

ratnāṃnā nicayaivaprabhojanastamatoṣayan /
evaṃ te pūjitāḥ sarve saptāvaraṇarūpiṇaḥ

2.41.45.2.43.10

sthitā vārāṇasīṃ trātuṃ ṣaṭpaṃcāśadvināyakāḥ /
ekaḥ paṃcamukhastatra viśveśadvāri tiṣṭhati

2.41.45.11

anye ca bhinnanāmāno vyāpya vārāṇasīṃ sthitāḥ /
sthite viśveśvare tatra sarve tatraiva saṃsthitāḥ

2.41.45.12

ācandraṃ svādhikāreṣu brahmādyā munayo'khilāḥ/
akurvansarvakarmāṇi sarve lokā yathā purā

2.41.45.13

iti te sarvamākhyātaṃ kīrte pṛṣṭaṃ hi yattvayā /
ḍhuṇḍhirājasyāvatāro dharmakāmasukhapradaḥ

2.41.45.14

divodāsabahirbhāvaṃ kathayiṣye'dhunā tava

2.41.45.43

(१८९०)
iti śrīgaṇeśapurāṇe krīḍākhaṃḍe bālacarite ḍhuṇḍhirājākhyānaṃ nāma tricatvāriṃśo'dhyāyaḥ

2.41.45.1

adhyāya ४४ prāraṃbha :-
kīrtiruvāca /
ḍhuṇḍhirājāvatāro'yaṃ khyātaste śaktisaṃbhavaḥ /
durāsadavadhārthāya trilokīpālanāya ca

2.41.45.2

ekapādaḥ sthitastuṇḍanagare caikapādataḥ /
sthito daityaṃ samākrāntya vārāṇasyāmiti śrutam

2.41.45.3

ubhābhyāmapi pādābhyāmubhayatra sthitiḥ katham /
evaṃ me saṃśayaṃ brahmannuda tvaṃ sarvavidyataḥ

2.41.45.4

muniruvāca /
kimasādhyaṃ viśvarūpe viśvakartari viśvape/
viśvavyāpini viśveśe ḍhuṇḍhirāje ca śāsati

2.41.45.5

viśvāntaryāmiṇi pare viśvasaṃhārakāriṇi /
saptapātālacaraṇe svargavyā piśiroruhe

2.41.45.6

sarvataḥ pāṇicaraṇe sarvataḥ śrotracakṣuṣi /
manasaśca śrutīnāṃ ca brahmādīnāṃ ca yoginām

2.41.45.7

agamye tattvato vāyupṛthivījalarūpiṇi /
yasya romāṃcarandhreṣu brahmāṇḍānāṃ hi koṭayaḥ

2.41.45.8

bhramanti pavanodbhūtāḥ pataṃgā iva vyomani /
saṃśayo vā vitarko vā tasminmātarna vidyate

2.41.45.9

anekarūpiṇi vibhau prabhuḥ kartuṃ carācaram /
yadicchayā bhavedrājñi sudhā viṣasvarūpiṇī

2.41.45.2.44.10

amṛtaṃ viṣarūpaṃ ca tatra kiṃ kiṃ na saṃbhavet /
avatārasya devasya vicitrā gatirucyate

2.41.45.11

kiyanto hyavatārā vai kadā kutreti niścitum /
na śakyate suraiḥ sarvaiḥ saśeṣairapi sarvadā

2.41.45.12

atastyaktvā tu saṃdehaṃ kathāṃ śuṇu mayeritām /
yāṃ śrutvā sarvadharmajñe mucyate pāpasaṃcayāt

2.41.45.13

sūryavaṃśodbhavo rājā divodāso'bhavatpurā /
vadānyaśca mahāmānī mānyo bhūmaṇḍale'khile

2.41.45.14

vaktā bṛhaspatisamaḥ sarvajñaḥ sarvadā śivaḥ /
vedaśāstrapurāṇānāṃ jñānī vijñajanapriyaḥ

2.41.45.15

kāminīmohanatanurjitendriyatayā sthitaḥ /
upakāraparo nityaṃ paradrohaparāṃgmukhaḥ

2.41.45.16

nispṛhaḥ paravitteṣu sthūlalakṣyaḥ parākramī /
tapasā tasya tuṣṭena brahmaṇā rājyamuttamam

2.41.45.17

kāśyāṃ vṛṣṭivihīnāyāṃ dattaṃ lokopakāriṇā /
sarvadevabahiṣkārātso'pi jagrāha buddhimān

2.41.45.18

svayamevābhavatso'tha ravirindro hutāśanaḥ /
maruccandraśca dharmeṇa pālayāmāsa tāṃ purīm

2.41.45.19

tapasā tasya saṃjātā vṛṣṭirlokā itastataḥ /
avimuktaṃ samāyātāḥ praśaśaṃsurnṛpaṃ ca tam

2.41.45.2.44.20

tasya patnī suśīlā sā nāmnā nāma pativratā /
dharmaśīlā dānaparā pativākyaparāyaṇā

2.41.45.21

ācāraṃ vyavahāraṃ vā prāyaścittamasau nṛpaḥ /
paṇḍitaiḥ kārayāmāsa rājadaṇḍaṃ na cādade

2.41.45.22

śivena marutaḥ sarve mandāragirimanvayuḥ/
nāpamṛtyurna śoko vā naiva duḥkhaṃ hi kasyacit

2.41.45.23

utpātāstrividhā nāsaṃstasminrājya praśāsati /
hāhākāraḥ śamaṃ yāto nāvṛṣṭivihito mahāna

2.41.45.24

paśupakṣimanuṣyāṇāṃ sasyāni ca bahūnyapi /
yadā yattaṃ prāṇimātraṃ jātāni vṛṣṭiyogataḥ

2.41.45.25

svāhāsvadhāvaṣaṭkārāḥ sarva āsanyathā purā /
te ca devāḥ sukhaṃ prāptā ye prārthayannṛpaṃ purā

2.41.45.26

yaṃ tuṣṭuvuḥ surāḥ sarve brahmavākyapraṇoditāḥ /
so'pi nānāstutiṃ cakre devānāṃ darśanādbhṛśam

2.41.45.44

( १९१६ )
iti śrīgaṇeśapurāṇe krīḍākhaṃḍe bālacarite catuścatvāriṃśo'dhyāyaḥ

2.41.45.1

adhyāya ४५ prāraṃbha –
kīrtiruvāca /
kathaṃ mune sarvadevāḥ prayātā mandaraṃ girima /
śivena ca kathaṃ tyaktā ramyā vārāṇasī purī

2.41.45.2

etanme śaṃsa devarṣe saṃśayo'tra mahānmune /
muniruvāca /
dvādaśābdamanāvaṣṭau naṣṭe sthāvarajaṃgame

2.41.45.3

svāhāsvadhāvaṣaṭkāravihīne ca dharātale /
brahmavākyapraṇunnaistu devaiḥ saṃprāthirto haraḥ

2.41.45.4

mahādeva jagannātha karuṇālaya śaṃkara/
ādhāsya mandaragiriṃ marīcistu tapasyati

2.41.45.5

abdānāmayutaṃ deva varaṃ dātuṃ prayāhi tam /
muniruvāca /
evaṃ saṃprārthito devairmaheśaḥ karuṇālayaḥ

2.41.45.6

sarvaiḥ suragaṇaiḥ sārddhamagnicandrāryamādibhiḥ/
varaṃ dātuṃ sa saṃprāpta marīciṃ taṃ mahāmunim

2.41.45.7

asthimātrāvaśiṣṭaṃ ca dadarśa sa sadāśivaḥ /
tasminkṣaṇe nāgataścetsa tu prāṇānsamutsṛjet

2.41.45.8

tadutkaṭena tapasā prīto'sau girijāpatiḥ /
nijaṃ svarūpaṃ dattvā ca vimānena nijaṃ padam

2.41.45.9

prāpayāmāsa sahasā gaṇairvāditranisvanaiḥ /
sarvairdevagaṇaiḥ śambhustasthau girivare śubhe

2.41.45.2.45.10

divodāsasya nāpaśyatkiṃcidrandhraṃ sadāśivaḥ /
devānsaṃpreṣayāmāsa draṣṭuṃ tadrandhramādṛtaḥ

2.41.45.11

yo yo devo yāti kāśīṃ tasya randhraṃ na paśyati /
svanāmnā parisaṃsthāpya liṃgaṃ tatraiva tasthivān

2.41.45.12

divodāsasya rājye tu sarve varṇāḥ svadharmiṇaḥ /
āśramasthā dvijāḥ sarve yathoktācārasaṃyutāḥ

2.41.45.13

guruśuśruṣavaḥ śiṣyāḥ striya āsanpativratāḥ /
dharmaśīlā dānaparā vratopavāsatatparāḥ

2.41.45.14

yatayaśca triṣavaṇā vratino homamauninaḥ /
snānaṃ sandhyāṃ japaṃ homaṃ svādhyāyaṃ devatārcanam

2.41.45.15

ātithyaṃ vaiśvadevaṃ ca svayameva prakurvate /
gṛhasthāḥ sarva evāṣṭau karmāṇi bhaktito'naghāḥ

2.41.45.16

ato vivardhate dharmo vṛṣṭiścānuttamā'bhavat /
svarge devā mumudire pitaraśca svadhābhujaḥ

2.41.45.17

na vandhyā na ca vā'puṣpā vidhavā vā mṛtaprajā /
nāvṛṣṭirnātivṛṣṭiśca svacakraṃ na paraṃ tayā

2.41.45.18

śukāśca śalabhā nāsanmūṣakā vā kadācana /
evaṃ ca sarvasasyānāṃ niṣpattiḥ samapadyata

2.41.45.19

viśveśvaraṃ mādhavaṃ ca ḍhuṇḍhiṃ bhairavameva ca/
daṇḍapāṇiṃ guhaṃ gaṃgāmadṛṣṭvā vā nimajjya vā

2.41.45.2.45.20

maṇikarṇīṃ bhavānīṃ vā yo bhuṃkte daṇḍya eva saḥ /
iti ḍiṇḍīravaṃ nityamakaronnṛpasattamaḥ

2.41.45.21

na pāpaleśastatrāsīdevaṃ nṛpavare sthite /
vinā randhaṃ na tadrājyaṃ jighrakṣati sadāśivaḥ

2.41.45.22

vārāṇasīviyogena paritaptastato'bhavat /
preṣayāmāsa vighnāya tato'ṣṭāvapi bhairavān

2.41.45.23

uvāca tānkārayantu rājye'syāṇītu kilbiṣam /
ādāsye tata etasmātkāśīrājyaṃ na saṃśayaḥ

2.41.45.24

jagmuste tvarayā bhadre ājñāṃ prāpya sadāśivāt /
dṛṣṭvā vārāṇasīṃ te tu viśrāntāḥ snānakarmaṇā

2.41.45.25

adṛṣṭvā tasya duritaṃ kāśīvāsaṃ pracakrire/
śivaścintāparaścāsīdanāgacchatsu teṣu tat

2.41.45.26

tato'preṣayadādityānrandhaṃ draṣṭuṃ nṛpasya ha /
te'pi tatpuṇyamālokya sthitāḥ kāśyāṃ mudānvitā

2.41.45.27

na kāryaṃ ca harasyāpi na tyājyeyaṃ purīti ca/
tataścatuḥṣaṣṭimitā apreṣayata yoginīḥ

2.41.45.28

aṇumātramadṛṣṭvaino divodāsasya tā api/
sthitā vārāṇasīṃ prāpyaṃ yajantyaḥ śivamavyayam

2.41.45.29

tataḥ saṃpreṣayāmāsa durgāṃ duḥkhavināśinīm /
adṛṣṭvā tadaghaṃ sā'pi tasthau grāmādbahiḥ kila

2.41.45.2.45.30

dhyānenātoṣayaddevaṃ sarvakāmaiśca mānavān /
dikpālānatha śambhuśca preṣayāmāsa satvaram

2.41.45.31

gatā vārāṇasīṃ te tu nekṣeraṃstadaghaṃ laghu /
svasvanāmnā pratiṣṭhāpya liṃgāni nyavasanmudā

2.41.45.32

ṛṣayaḥ preṣitaḥ paścādutsukena śivena ha /
gatāste tvarayā hraṣṭāḥ śivenāpi praṇoditāḥ

2.41.45.33

gatvā tīrthavidhiṃ kṛtvā sthitvā vārāṇasīmanu /
āśīrvādāya gacchantaḥ paśyantastasya ceṣṭitam

2.41.45.34

bhaktyā tānpūjayāmāsa sarvānsa dhanavastrakaiḥ /
nānvagṛhṇaṃstaddhanaṃ te naino'pi dadṛśurlaghu

2.41.45.35

svasvanāmnā paristhāpya tepuste paramaṃ tapaḥ /
tataḥ sarve'marāstena preṣitāḥ kāryasiddhaye

2.41.45.36

te'pi no dadṛśustasya duṣkarmaṃ dharmacāriṇaḥ /
nāyāti ko'pi kāśyāstu yo yaḥ saṃpreṣyate mayā

2.41.45.37

tataścintāparo rudro niścayaṃ nādhyagacchata /
manasā cintayāmāsa kadā drakṣye ca tāṃ purīm

2.41.45.38

divodāsasya rājye ca yadā pāpaṃ bhaviṣyati /
tadaiva prāpyā kāśī ca nānyathā ca mayā kvacit

2.41.45.39

vinā ḍhuṇḍhiṃ mādhavaṃ ca sarve devā nirarthakāḥ/
nāyānti ca sthitāstatra kāśyāṃ dhyānaparāyaṇāḥ

2.41.45.45

( १९५५ )
iti śrīgaṇeśapurāṇe krīḍākhaṃḍe bālacarite divodāsopākhyāne paṃcacatvāriṃśo'dhyāyaḥ

Original text: gaṇeśapurāṇam · Sanskrit Wikisource contributors · Sanskrit Wikisource · CC BY-SA 4.0