Ganesha Purana · Chapter 2.136.140

adhyāya १३६ prāraṃbha :-
ka uvāca /
ekasmindivase devo jagāda munisattamam /
parāśaraṃ mahābhāgyaṃ paraduḥkhaprapīḍitaḥ

gajānana uvāca/
sindūreṇa tu duṣṭena pīḍitaṃ sakalaṃ jagat /
svāhāsvadhāvaṣaṭkārairvarjitaṃ vedaghoṣataḥ

sthānabhraṣṭā devagaṇā bhraṣṭā ṛṣigaṇāstathā /
gajānanasvarūpeṇa kariṣye duṣṭanāśanam

sādhūnāṃ pālanaṃ caiva bhūbhāraharaṇaṃ tathā /
sthāpanaṃ sarvadevānāmānandaṃ jagato'pi ca

nidhehi mastake tāta pāṇiṃ me'bhayadaṃ śubham /
anugrahaprasādātte haniṣye duṣṭadānavān

muniruvāca /
āścaryaṃ paramaṃ bāla bālabhāvātprabhāṣase /
bālakaḥ kautukāviṣṭo yācate candramaṇḍalam

asādhyaṃ tridaśaiḥ sarvaiḥ karma kartuṃ tathecchasi /
yasya śvāsena girayaḥ patanti śataśo bhuvi

pādāghātena yasyāśu kampate bhuvanatrayam/
kathaṃ tvaṃ yudhyase tena bisatantuśarīravān

caritvā navavarṣāṇi pūrṇāni tava sāṃpratam /
mamānugrahamātreṇa tvaṃ cecchakto bhaviṣyasi

tadā'yaṃ nihito hasto mastake'bhayadāyakaḥ /
ka uvāca /
tato harṣayuto devo namaskṛtya muniṃ tadā

jananīmapi durgāṃ ca śrīhariṃ harameva ca/
yayau yoddhuṃ mūṣakaṃ tamāruhya sa gajānanaḥ

aṅkuśaṃ paraśuṃ pāśaṃ kamalaṃ ca caturbhujaiḥ/
dadhāno garjanenāśu kampayanbhuvanatrayam

prajvalaṃstejasā svena pralayānalasannibhaḥ /
kṣaṇena prāpa sindūranagaraṃ sa gajānanaḥ

ghūsṛṇeśvarasānnidhyātsiddhasindūravāḍakam /
tatrasthaḥ praśaśāsāsau sindūro bhuvanatrayam

taduttare sthito devo jagarja garjayandiśaḥ /
cukṣubhuḥ sāgarāḥ sapta viśīrṇā girayo'pi ca

śrutvā ninādaṃ tasyāśu sarvadaityāścakampire /
mumūrcchurbhīravaḥ sarve kecinmṛtyumupāyayuḥ

sindūro'pi mumūrcchāśu kṣaṇena prakṛtiṃ yayau /
uvāca sevakānsarvānko'yaṃ garjati dṛśyatām

mūrchā prāptā mayā kasmādyacchabdena puraḥ katham /
sthāsyāmi tatparaḥ sthātuṃ kasya śaktirbhaviṣyati

tataste sevakā jagmustadā bālasamīpataḥ /
tadrūpaṃ te nirīkṣyaiva siṃhasya kariṇo yathā

bibhuścaiva cakampuśca keciddhairyāttamabruvan /
kasya tvaṃ kuta āyātaḥ kimarthaṃ tava nāma kim

sindūro viśvasaṃhārarasikaḥ krodhasaṃyutaḥ/
śrutvā te kranditaṃ sarvaṃ kampitaṃ ca sasinduram

bālo'pi balavānbhāsi catuḥpaṃcādviko'pi ca /
dṛśyase sarvasaṃhārakāraṇāya kṣamaḥ kṣaṇāt

evamākarṇya tadvākyaṃ provāca sa ca tānvibhuḥ /
ahaṃ śivasutaḥ khyātaḥ parāśaragṛhe vasan

dṛṣṭasaṃhārarasiko bhaktapālanatatparaḥ/
nānāvatārakuśalo brahmādīnāmagocaraḥ

gajānaneti me nāma yuddhaṃ kartuṃ samāgataḥ /
svāminaṃ vo'tha gacchantu tasmai sarvaṃ bruvantu ca

tasminhate mānasaṃ me toṣameṣyati durjaye /
ka uvāca/
tataste niryayuḥ śīghraṃ sindūraṃ prābruvanvacaḥ

dūtā ūcuḥ /
vayaṃ śīghrataraṃ yātāḥ puruṣa bhavadājñayā /
kṛtāntasadṛśaṃ taṃ tu dṛṣṭvā sarve ca kampitā

tato'bhavatpratāpena tadagre prābruvāma ca /
tatastena samākhyātaṃ nijaṃ sarvaṃ samāsataḥ

gajānananeti nāmāsya śivaputratvameva ca /
duṣṭadaityavināśāya sādhūnāṃ pālanāya ca

sāṃpratam tu tvayā sārddhaṃ yuddhāya samupāgataḥ /
sa caturvārṣiko bālo valgate bahuvistaram

idānīṃ svasvabhāvena jahi śatruṃ nijaṃ laghuṃ /
tava tu śvāsamātreṇa dūre gacchedayaṃ śiśuḥ

yasya te darśanātsvāmiṃścakaṃpaḥ śivakādayaḥ /
tasya te gaṇanā kāsti bālakasyālpamedhasaḥ

ka uvāca /
evaṃ dūtavacaḥ śrutvā siṃdūraścintayāturaḥ/
babhūva mlānatuṇḍaśca krodhāruṇavilocanaḥ

udvamannayanādvahniṃ pralayānalasannibham /
uvāca dūtānkrodhena harṣeṇa ca samanvitaḥ

sa uvāca /
āścaryaṃ paramaṃ dūtā bhavadvacasi me'bhavata /
siṃhena saha yoddhuṃ vai maśakaḥ kathameṣyati

caturvarṣeṇa bālena yoddhavyaṃ kiṃ mayā saha /
yūyaṃ tataḥ kathaṃ bhītā na jāne tatra kāraṇam

mayi kruddhe jagannaśyettatra kā gaṇanā'sya ha /
jagarja garjayanvyoma diśo'pi vidiśo'pi ca

dhṛtvā śastrāṇi cātrāṇi niryayau yuddhalālasaḥ/
tata ūcuramātyāstaṃ namaskṛtyāsurādhipam

satsu baleṣvamātyeṣu kathaṃ grāsi svayaṃ raṇam /
vayaṃ taṃ hi haniṣyāmaḥ pratāpāttava daityapa

samayārthaṃ mahatsainyaṃ pālyate so'yamāgataḥ /
prāṇāṃstyakṣyāmahe sarve tava hetormahāprabho

anujānīhi yāsyāmo hantuṃ bālaṃ ripuṃ tava /
sindūra uvāca /
yāmi sarve prapaśyantu pauruṣaṃ mama sainikā

ityuktvā prayayo śīghraṃ bālaṃ hantuṃ sumutsukaḥ /
sa prāpa kṣaṇamātreṇa yatra bālaḥ sthito'bhavat ४२ (६२१६)
iti śrīgaṇeśapurāṇe krīḍākhaṇḍe bā० sindūranirgamo nāma ṣaṭtriṃśottaraśatatamo'dhyāyaḥ

adhyāya १३७ prāraṃbha :-
ka uvāca /
taṃ dṛṣṭavā bālakaṃ prāha sindūro madagarvitaḥ /
lajjā me jāyate manda yudhyato bālakena ha

yāhi śīghraṃ gṛhaṃ bāla piba mātuḥ stanaṃ mudā /
vṛthā maccharapātena sadyo mṛtyumupaiṣyasi

palāyante hi mām̐ dṛṣṭvā keśādyāstri divaukasaḥ/
mṛte tvayi tava snehātpitarau te mariṣyataḥ

ato gaccha na me svāsyaṃ darśayasva kiśoraka/
yasya me talaghātena brahmāṇḍaṃ śatadhā bhavet

deva uvāca /
satyamuktaṃ tvayā duṣṭa na cetasi vicāritam /
na jñātaṃ mama sāmarthyaṃ rūpaṃ vā vividhaṃ tvayā

yasya me krodhadṛṣṭyaiva bhraṣṭāḥ syuḥ suranāyakāḥ /
svecchayā'haṃ sṛje bhāvaistribhireva harāmi ca

viśvaṃ carācaraṃ nānārūpavāṃstu yuge yuge/
bhūmi bhāraṃ mahāghoraṃ harāmi duṣṭanāśanāt

na laghurlaghutāmeti parākramayuto'pi ceta /
aṇumātro dahedvahniḥ sakalaṃ nagaraṃ mahat

jijīviṣuścedgaccha tvaṃ natvā māṃ nijamandiram/
mānino naiva nighnanti nataṃ ca śaraṇāgatam

no cenmacchastrapātena svargalokaṃ gamiṣyasi/
hate tvayi sukhaṃ yāsye tvayā yatpīḍitaṃ jagat

brahmaṇo varadānena mā garvaṃ kuru daityarāṭ/
viparītaṃ bhavetsarvaṃ viparītaṃ yathā purā

stambhe'vatīrṇa nyahanaddhiraṇyakaśipuṃ vibhuḥ /
sugrīveṇa hato bandhū rāmamāśritya kālataḥ

viparītā matirjātā tavāpi kālayogataḥ/
atisthūlo laghutaro bhāsase mama sāṃpratam

dhṛtvā dhairyaṃ ca lajjāṃ ca yuddhaṃ kuru mayā saha/
ka uvāca /
evamuktvā dadhārāśu virāḍrūpaṃ gajānanaḥ

brahmāṇḍādūrdhvamagamanmastakaścaraṇau tathā/
pātālāni ca saptāni bhittvā yātau śrutī diśaḥ

paśyati sma yadā daityo bālaṃ taṃ viśvarūpiṇam /
sahasraśirasaṃ devaṃ sahasrākṣaṃ divo bhuvam

sahasrapādaṃ vyāpyāśu sthitaṃ vyāpya diśo daśa /
divyāmbaraṃ divyagandhaṃ divyālaṃkārabhūṣitam

asaṃkhyasūryasadṛśamasaṃkhyarūpiṇaṃ vibhum /
evaṃ dṛṣṭvā virāḍrūpaṃ cakampe daityamānasam

dhṛtvā dhairyaṃ punardaityo yayau devasya sannidhau/
jagarja garjayanvyoma diśo'pi vidiśo'pi ca

udyamya khaḍgaṃ sahasā devaṃ hantumiyeṣa saḥ /
yayau tatpurataḥ krodhātpataṃgo jvalanaṃ yathā

deva uvāca /
nāyaṃ mūḍho vijānīte svarūpaṃ mama durlabham /
ahameva vimokṣyāmītyuktvā kaṇṭhe dadhāra tam

mamarda sinduraṃ taṃ sa karābhyāṃ balavattaram /
tatastadasṛjāṃgāni vililimpāruṇena sa jaḥ

tataḥ sindūravadanasindūrapriya eva ca/
abhavajjagatīkhyāto bhaktakāmaprapūrakaḥ

sindūre nihate devā mudā puṣpāṇyavākiran /
avādyañjayavādyāni nanṛtuścāpsarogaṇāḥ

āyayustatra munayo vasiṣṭhapramukhāḥ surāḥ /
brahmādyāḥ sakalāḥ śakrapurogā vastupāṇayaḥ

jayaśabdairnamaḥ śabdaiḥ pūrayanto diśo daśa /
tataḥ sarve bhūmipālā yayustatra mudānvitāḥ

ṣoḍaśairupacāraistamānarcuḥ parameśvaram /
gajānanaṃ caturbāhuṃ sarvābharaṇabhūṣitam

divyāmbaraṃ divyagandhamākhuvāhanamīśvaram /
prārthayāmāsurindrādyāḥ stotuṃ tvāṃ na hi śaknumaḥ

yatra kuṇṭhāścaturvedā brahmādyāśca munīśvarāḥ /
tvaṃ kartā kāraṇaṃ kāryaṃ rakṣakaḥ poṣako'pi ca

saṃhartā mohanaścāsya viśvasya jñānadaḥ kvacit /
saritaḥ sāgarā vṛkṣāḥ parvatāḥ paśavo'khilāḥ

vāyurākāśa pṛthivī vahnirvāri tvameva ca/
brahmā viṣṇuḥ śivaḥ śakro maruto munayo'pi ca

gandharvāścāraṇāḥ siddhā yakṣarākṣasapannagā/
apsaraḥkinnarā deva tvameva sa carācaram

vayaṃ dhanyāyato dṛṣṭaḥ pratyakṣaṃ mokṣasādhanaḥ /
sindūre tu hate deva sukhaṃ prāptāḥ surottamāḥ

rājāno munayo lokāḥ svasvakārye mudāratāḥ /
bhaviṣyanti svadhāsvāhāvaṣaṭkārāśritāḥ kriyāḥ

nānāvatāraiḥ kuruṣe pālanaṃ tvaṃ viśeṣataḥ/
duṣṭānāṃ nāśanaṃ sadyo bhaktānāṃ kāmapūrakaḥ

ka uvāca /
evamuktvā surāstaṃ tu vyadadhuḥ sarva eva te /
prāsādaṃ ramyaśikharaṃ sthāpayitvā gajānanam

yasya darśanamātreṇa mucyate pātakājjanaḥ /
kulāni tārayetsapta smaraṇādasya mānavaḥ

pūjayitvā praṇamyainaṃ paritṛptiṃ yayuḥ surāḥ /
tatastaṃ munayaḥ sarve pupūjuḥ paramādarāt

sindūraheti nāmāsya cakruḥ sindūranāśanāt //
atisaṃtuṣṭamanaso natvā jagmuḥ svamāśramam

tataḥ sarve munivarā natvā devaṃ sabhaktitaḥ /
pupūjuḥ paramātmānaṃ nānādravyairanekaśaḥ

rājasadanamiti te kṣetraṃ khyātimupaiṣyati /
vareṇyastaṃ vilokyaiva nijaputramabudhyata

yato rājñāṃ padānyāśu hatvā daityaṃ sudāruṇam /
dattāni bhavatā nātha sindūraṃ lokakaṇṭakam

daityavimardana iti nāma khyātimupaiṣyati /
pupūja tanayaṃ snehāttadā dṛṣṭaparākramam

mumoca snehajaṃ cāśru na śaśāka prabhāṣitum /
atigadgadakaṇṭhatvādruroda bhṛśaduḥkhitaḥ

vareṇya uvāca /
mūḍhabhāvena saṃtyakto vighnabhītena pāpinā /
yaṃ tvāṃ pūjayituṃ yātā brahma śakrapurogamāḥ

anantakoṭibrahmāṇḍanāyakaṃ tvāṃ na vidmahe /
kāmadhenuṃ nidhiṃkalpavṛkṣaṃ mūḍho yathā tyajet

māyayā mohitaste'hamatyajaṃ tvāṃ tathā gṛhāt /
ka uvāca /
iti tacchucamākarṇya kṛpayā parameśvaraḥ

āliliṃga vareṇyaṃ taṃ caturbāhubhirādarāt /
uvāca parayā bhaktyā vareṇyanṛpatiṃ vibhuḥ

deva uvāca /
purākalpe mahāraṇye tapastaptaṃ sudāruṇam /
ubhābhyāṃ pakvaparṇāni bhakṣayitvā vaṭasya ha

divyavarṣasahasreṇa prasanno'haṃ tadā'bhavam /
bhavadbhyāṃ hi vṛtaḥ putro na mokṣo mūḍhabhāvataḥ

so'haṃ putratvamāpanno bhūbhāraharaṇāya ca /
sindūrasya vadhaṃ kartuṃ sādhūnāṃ pālanaṃ tathā

anyathā na śarīraṃ me nirākārasya sākṣiṇaḥ /
vacanaṃ tu kṛtaṃ satyaṃ trailokyasyāpi toṣaṇam

yāsye'dhunā nijaṃ dhāma na tvaṃ śoke manaḥ kṛthāḥ /
vareṇya uvāca /
saṃsāre bahuduḥkhāni dṛṣṭāni duḥsahāni ca

idānīṃ mokṣamārgaṃ me kṛpayā diśa duḥkhahan /
sākṣātkāre kathaṃ bandhastava syāddviradānana

yenopadeśena muktiṃ yāsyāmi tadvadasva me /
yogaṃ taṃ yena saṃtyakṣe kāmaṃ krodhaṃ mṛterbhayam

ka uvāca /
evamākarṇya tadvākyaṃ kṛpayā sa gajānanaḥ /
upaveśya svāsane taṃ hastaṃ śirasi cādadhat

gaṇeśagītāṃ tasmai sa upadeṣṭuṃ pracakrame /
nirasya sarvasaṃdehānviśvarūpaṃ pradarśya ca

gītāsāraṃ sa yuddhvaivaḥ gaṇeśasyopadeśataḥ /
sthāpya rājyamamātyeṣu tapase vanamāyayau

ativairāgyasaṃyukto dadhyau taṃ ca gajānanam /
āvartayatsadā gītāmananyaviṣayakṛtī

yathā jalaṃ jale kṣiptaṃ jalameva hi jāyate /
tathā taddhyānataḥ so'pi tanmayatvamupāyayau

muniruvāca /
caturānana deveśa kṛpayā parayā vada /
gītāṃ tāṃ tu gaṇeśasya sarvājñānavināśanīm ६१ ( ६२७७ )
iti śrīgaṇeśapurāṇe krīḍākhaṇḍe vareṇyopadeśo nāma saptatriṃśadadhikaśatatamo'dhyāyaḥ

adhyāya १३८ prāraṃbha :-
ka uvāca /
evameva purā pṛṣṭaḥ śaunakena mahātmanā /
sa sūtaḥ kathayāmāsa gītāṃ vyāsamukhācchrutām

sūta uvāca /
aṣṭādaśapurāṇoktamamṛtaṃ prāśitaṃ mayā /
tato'tirasavatpātumicchāmyamṛtamuttamam

yenāmṛtamayo bhūtvā pumānbrahmā mṛtaṃ yataḥ /
yogāmṛtaṃ mahābhāga tanme karuṇayā vada

vyāsa uvāca /
atha gītāṃ pravakṣyāmi yogamārgaprakāśinīm /
niyuktā pṛcchate sūta rājñe gajamukhena yā

vareṇya uvāca /
vighneśvara mahābāho sarvavidyāviśārada /
sarvaśāstrārthatatvajña yogaṃ me vaktumarhasi

gajānana uvāca /
samyagvyavasitā rājanmatiste'nugrahānmama /
śṛṇu gītāṃ pravakṣyāmi yogāmṛtamayīṃ nṛpa

na yogaṃ yogamityāhuryogo yogo na ca śriyaḥ /
na yogo viṣayairyogo na ca mātrādibhistathā

yogo yaḥ pitṛmātrāderna sa yogo narādhipa/
yo yogo bandhuputrāderyaścāṣṭa bhūtibhiḥ saha

na sa yogaḥ striyā yogo jagadudbhūtarūpayā/
rājyayogaśca no yogo na yogo gajavājibhiḥ

yogo nendrapadasyāpi yogo yogārthinaḥ priyaḥ /
yogo yaḥ satyalokasya na sa yogo mato mama

śaivasya yogo no yogo vaiṣṇavasya padasya ca /
na yogo bhūpa sūryatvaṃ candratvaṃ na kuberatā

nānilatvaṃ nānalatvaṃ nāmaratvaṃ na kālatā /
vāruṇyaṃ na nairṛtyaṃ yogo na sārvabhīmatā

yogaṃ nānāvidhaṃ bhūpa yujjanti jñāninastu tam /
bhavanti vitṛṣā loke jitāhārā viretasaḥ

pānayantyakhilāllokānvaśīkṛtajagattrayāḥ /
karuṇāpūrṇahṛdayā bodhayanti ca kāṃścana

jīvanmuktā hṛde magnāḥ paramānandarūpiṇi /
nimīlyākṣīṇi paśyantaḥ paraṃ brahma hṛdi sthitam

dhyāyantaḥ paramaṃ brahma citte yogavaśīkṛtam/
bhūtāni svātmanā tulyaṃ sarvāṇi gaṇayanti te

yena kenacidācchinnā yena kena cidāhatāḥ /
yena kena cidākṛṣṭā yena kenācidāśitāḥ

karuṇāpūrṇahṛdayā bhramanti dharaṇītale /
anugrahāya bhūtānāṃ jitakrodhā jitendriyāḥ

dehamātrabhṛto bhūpa samaloṣṭhāśmakāṃcanā /
etādṛśā mahābhāgāḥ syuścakṣurgocarāḥ priya

tamidānīmahaṃ vakṣye śṛṇu yogamanuttamam /
śrutvā yaṃ mucyate jantuḥ pāpebhyo bhavasāgarāt

śive viṣṇau ca śaktau ca sūrye mayi narādhipa /
yā'bhedabuddhiryogaḥ sa samyagyogo mato mama

ahameva jagadyasmātsṛjāmi pālayāmi ca /
kṛtvā nānāvidhaṃ veṣaṃ saṃharāmi svalīlayā

ahameva mahāviṣṇurahameva sadāśivaḥ /
ahameva mahāśaktirahamevāryamā priya

ahameko nṛṇāṃ nātho jātaḥ paṃcavidhaḥ purā /
ajñānānmāṃ na jānanti jagatkāraṇakāraṇam

matto'gnirāpo dharaṇī matta ākāśamārutau /
brahmā viṣṇuśca rudraśca lokapālā diśo daśa

vasavo manavo gāvo munayaḥ paśavo'pi ca /
saritaḥ sāgarā yakṣā vṛkṣāḥ pakṣigaṇā api

tathaikaviṃśatisvargā nāgāḥ saptavanāni ca /
manuṣyāḥ parvatāḥ sādhyāḥ siddhā rakṣogaṇāstathā

ahaṃ sākṣī jagaccakṣuraliptaḥ sarvakarmabhiḥ /
avikāro'prameyo'hamavyakto viśvago'vyayaḥ

ahameva paraṃ brahmāvyayānandātmakaṃ nṛpa /
mohayatyakhilānmāyā śreṣṭhānmana narānamūn

sarvadā ṣaḍravikāreṣu tāni yaṃ yojayedbhṛśam/
hitvājāpaṭalaṃ janturanekairjanmabhiḥ śanaiḥ

virajya vindati brahma viṣayeṣu subodhataḥ /
acchedyaṃ śastrasaṅaghātairadāhyamanalena ca

akledyaṃ pa ca vanairaśoṣyaṃ mārutena ca /
avadhyaṃ vadhyamāne'pi śarīre'sminnarādhipa

yāmimāṃ puṣpitāṃ vācaṃ praśaṃsanti śrutīritām /
trayīvādaratā mūḍhāstato'nyanmanvato'pi na

kurvanti satataṃ karma janmamṛtyuphalapradam /
svargaiśvaryaratā dhvastacetanā bhogabuddhayaḥ

saṃpādayanti te bhūyaḥ svātmanā nijabandhanam /
saṃsāracakraṃ yuṃjanti jaḍāḥ karmaparā narāḥ

yasya yadvihitaṃ karma tatkartavyaṃ madarpaṇam /
tato'sya karmabījānāmucchinnāḥ syurmahāṃkurāḥ

cittaśuddhiśca mahatī vijñānasādhakā bhavet /
vijñāne na hi vijñātaṃ paraṃ brahma munīśvaraiḥ

tasmātkarmāṇi kurvīta buddhiyukto narādhipa /
na tvakarmā bhavetko'pi svadharmatyāgavāṃstathā

jahāti yadi karmāṇi tataḥ siddhiṃ na vindati /
ādau jñāne nādhikāraḥ karmaṇyeva sa yujyate

karmaṇā śuddhahṛdayo'bhedabuddhimupaiṣyati /
sa ca yoga: samākhyāto'mṛtatvāya hi kalpate

yogamanyaṃ pravakṣyāmi śṛṇu bhūpa tamuttamam /
paśau putre tathā mitre śatrau bandhau suhṛjjane

bahirdṛṣṭyā ca samayā hṛtsthayā lokayetpumān /
sukhe duḥkhe tathāmarṣe harṣe bhītau samo bhavet

rogāptau caiva bhogāptau jaye vā vijaye'pi ca /
śriyo'yoge ca yoge ca lābhālābhe mṛtāvapi

samo māṃ vastujāteṣu paśyannantarbahisthitam/
sūrye some jale vahnau śive śaktau tathā'nile

dvije hṛde mahānadyāṃ tīrthe kṣetre'ghanāśini/
viṣṇau ca sarvadeveṣu tathā yakṣorageṣu ca

gandharveṣu manuṣyeṣu tathā tiryagbhaveṣu ca/
satataṃ māṃ hi yaḥ paśyetso'yaṃ yogaviducyate

saṃparīhṛtya svārthebhya indriyāṇi vivekataḥ /
sarvatra samatābuddhiḥ sa yogo bhūpa me mataḥ

ātmanātmavivekena yā buddhirdaivayogataḥ /
svadharmāsaktacittasya tadyogo yoga ucyate

dharmādharmau jahātīha tathā tyukta ubhāvapi /
ato yogāya yuñjīta yogo vaidheṣu kauśalam

dharmādharmaphale tyaktvā manīṣī vijitendriyaḥ/
janmabandhavinirmuktaḥ sthānaṃ saṃyātyanāmayam

yadā hyajñānakāluṣyaṃ jantorbuddhiḥ kramiṣyati /
tadā'sau yāti vairāgyaṃ vedavākyādiṣu kramāta

trayīvipratipannasya sthāṇutvaṃ yāsyate yadā/
parātmanyacalā buddhistadā sa yogamāpnuyāt

mānasānakhilānkāmānyadā dhīmāṃstyajetpriya /
svātmani svena saṃtuṣṭaḥ sthirabuddhistadocyate

vitṛṣṇaḥ sarvasaukhyeṣu nodvigno duḥkhasaṃgame /
gatasādhvasaruḍrāgaḥ sthirabuddhistadocyate

yathā'yaṃ kamaṭho'ṅagāni saṃkocayati sarvataḥ /
viṣayebhyastathā khāni saṃkarṣedyogatatparaḥ

vyāvartante'sya viṣayāstyaktāhārasya varṣmiṇaḥ/
vinā rāgaṃ ca rāgo'pi dṛṣṭvā brahma vinaśyati

vipaścidyatate bhūpa sthitimāsthāya yoginaḥ /
manthayitvendriyāṇyasya haranti balato manaḥ

yuktastāni vaśe kṛtvā sarvadā matparo bhaveta /
saṃyatānīndriyāṇīha yasya sa kṛtadhīmataḥ

cintayānasya viṣayānsaṃgasteṣūpajāyate/
kāmaḥ saṃvardhate tasmāttataḥ krodho'bhivarddhate

krodhādajñānasaṃbhūtirvibhramastu tataḥ smṛteḥ /
bhraṃśātsmṛtermaterdhvaṃsastaddhvaṃsātso'pi naśyati

vinā dveṣaṃ ca rāgaṃ ca gocarānyasta khaiścaret /
svādhīnahṛdayo vaśyaiḥ saṃtoṣaṃ sa samṛcchati

trividhasyāpi duḥkhasya saṃtoṣe kṣepaṇaṃ bhavet /
prajñayā saṃsthitaścāyaṃ prasannahṛdayo bhavet

vinā prasādaṃ na matirvinā matyā na bhāvanā /
vinā tāṃ na śamo bhūpa vinā tena kutaḥ sukham

indriyāśvānvicarato viṣayānanuvartate/
yanmanastanmatiṃ hanyādaśva nāvaṃ marudyathā

yā rātriḥ sarvabhūtānāṃ tasyāṃ nidrāti naiva saḥ /
na svapantīha te yatra sā rātristasya bhūmipa

saritāṃ patimāyānti vanāni sarvato yathā /
āyānti taṃ tathā kāmāḥ sa nā śāntiṃ sadā labhet

atastānīha saṃruddhya sarvataḥ khāni mānavaḥ /
svasvārthebhyaḥ pradhāvanti buddhirasya sthirā tadā

mamatā'haṃkṛtī tyaktvā sarvānkāmāṃśca yastyajet /
nityaṃ jñānarato bhūyājjñānānmuktiṃ prayāsyati

enāṃ brahmadhiyaṃ bhūpa yo vijānāti daivataḥ /
turīyāvasthāṃ prāpyāpi śīlānmuktiṃ sa ṛcchati६९ (६३४६)
ॐtatsaditi śrīmad gaṇeśagītāsūpaniṣadarthagarbhāsu yogāmṛtārthaṃ śāstre śrīmadādi śrīmanmahāgāṇeśvare mahāpurāṇe uttarakhaṃḍe bālacarite śrīgajānanavareṇyasaṃvāde 'sāṃkhyayogasārārthaṃ' yogonāma prathamodhyāya //१//

adhyāya १३९ prāraṃbha :-
vareṇya uvāca /
jñānaniṣṭhā karmaniṣṭhā dvayaṃ proktaṃ tvayā vibho /
avadhārya vadaikaṃ me niśreyasakaraṃ nu kim

gajānana uvāca /
asmiṃścarācare sthityau purokte dve mayā priya /
sāṃkhyānāṃ buddhiyogena vaidhayogena karmaṇām

anārabhbheṇa vaidhānāṃ niṣkriyaḥ puruṣo bhavet /
na siddhiṃ yāti saṃtyāgātkevalātkarmaṇān nṛpa

kadācidakriyaḥ ko'pi kṣaṇaṃ naivāvatiṣṭhate /
asvatantraḥ prakṛtijairguṇaiḥ karma ca kāryate

karmakārīndriyagrāmaṃ niyamyāste smaranpumān /
tadgocarānmandacitto dhigācāraḥ sa bhaṇyate

tadgrāmaṃ saṃniyamyādau manasā karma cārabhet /
indriyaiḥ karmayogaṃ yo vitṛṣṇaḥ sa paro nṛpa

akarmaṇaḥ śreṣṭhatamaṃ karmānīcchākṛtaṃ tu yat /
varṣmaṇaḥ sthitirapyasyākarmaṇo naiva setsyati

asamarpya nibadhyante karma tena janā mayi /
kurvīta satataṃ karmāṃnāśo'saṃgo madarpaṇam

madarthaṃ yāni karmāṇi tāni badhnanti na kvacit /
savāsanamidaṃ karma badhnāti dehinaṃ balāt

varṇānsṛṣṭvā'vadaṃ cāhaṃ sayajñāṃstānpurā priya /
yajñena ṛdhyatāmeṣa kāmadaḥ kalpavṛkṣavat

surāṃścānena prīṇadhvaṃ surāste prīṇayantu naḥ /
labhadhvaṃ paramaṃ sthānanyonyaprīṇanātsthiram

iṣṭā devāḥ pradāsyanti bhogāniṣṭānsutarpitāḥ/
tairdattāṃstānnara
stebhyo'dattvā bhuṃkte sa taskaraḥ

hutāvaśiṣṭa bhoktāro muktāḥ syuḥ sarvapātakaiḥ /
adantyeno mahāpāpā ātmahetoḥ pacanti ye

ūrjā bhavanti bhūtāni devādannasya saṃbhavaḥ /
yajñāṃcca devasaṃbhūtistadutpattiśca vaidhataḥ

brahmaṇo vaidhamutpannaṃ matto brahmasamudbhavaḥ /
ato yajñe ca viśvasminsthitaṃ māṃ viddhi bhūmipa

saṃsṛtīnāṃ mahācakraṃ krāmitavyaṃ vicakṣaṇaiḥ /
sa mudā prāṇiti bhūpendriyakrīḍo'dhamo jana:

antarātmani yaḥ prīta ātmārāmo'khilapriyaḥ /
ātmatṛpto naro yaḥ syāttasyārtho naiva vidyate

kāryākāryakṛtīnāṃ sa naivāpnoti śubhāśubhe/
kiṃcidasya na sādhyaṃ syātsarvajantuṣu sarvadā

ato'saktanayā bhūpa kartavyaṃ karma jantubhiḥ /
sakto'gatimavāpnoti māmavāpnoti tādṛśaḥ

paramāṃ siddhimāpannāḥ purā rājarṣayo dvijāḥ /
saṃgrahāya hi lokānāṃ tādṛśaṃ karma cārabhet

śreyānyatkurute karma tatkarotyakhilo janaḥ /
manute yatpramāṇaṃ sa tadevānusaratyasau

viṣṭape me na sādhyo'sti kaścidartho narādhipa /
anālabdhaśca labdhavyaḥ kurve karma tathāpyaham

na kurve'haṃ yadā karma svatantro'lasabhāvitaḥ/
kariṣyanti mama dhyānaṃ sarve varṇā mahāmate

bhaviṣyanti tato lokā ucchinnāḥ saṃpradāyinaḥ /
hantā syāmasya lokasya vidhātā saṃkarasya ca

kāmino hi sadā kāmairajñānātkarmakāriṇaḥ /
lokānāṃ saṃgrahāyaitadviddhānkuryādasaktadhīḥ

vibhinnatvamatiṃ jahyādajñānāṃ karmacāriṇām /
yogayuktaḥ sarvakarmāṇyarpayenmayi karmakṛta

avidyāguṇasācivyātkurvakarmāṇyatandritaḥ /
ahaṃkārānmandabuddhirahaṃ karteti yo'bravīt

yastu vettyātmanastattvaṃ vibhāgād guṇakarmaṇoḥ /
karaṇaṃ viṣaye vṛttamiti matvā na sajjate

kuvanti saphalaṃ karma guṇaistribhirvimohitāḥ /
aviśvajñāsvātmadruho viśvavinnaiva laṅaghayeta

nityaṃ naimittikaṃ tasmānmayi karmārpayedbudhaḥ /
tyaktvā'haṃmamatābuddhiṃ parāṃ gatimavāpnuyāt

anīrṣyanto ye mayoktamidaṃ śubham /
anutiṣṭhanti ye sarve muktāste'khilakarmabhiḥ

ye caiva nānutiṣṭhanti aśubhā hatacetasaḥ /
īrṣyamāṇānmahāmūḍhānnaṣṭāṃstānviddhi me ripūn

tulyaṃ prakṛtyā kurute karma yajjñānavānapi /
anuyāti ca tāmeva grahastatra mudhā mataḥ

kāmaścaiva tathā krodhaḥ khānāmartheṣu jāyate/
naitayorvaśyatāṃ yāyādasya vidhvaṃsakau yataḥ

śasto'guṇo nijo dharmaḥ sāṃgadānyasya dharmataḥ /
nije tasminmṛtiḥ śreyaḥ paratra bhayadaḥ paraḥ

vareṇya uvāca /
pumānyatkurute pāpaṃ sa hi kena niyujyate /
akāṃkṣannapi heramba preritaḥ prabalādiva

śrīgajānana uvāca /
kāmakrodhau mahāpāpau guṇadvayasamudbhavau /
nayantau vaśyatāṃ lokānviddhyetau dveṣiṇau varau

āvṛṇoti yathā māyā jagadvāṣpo jalaṃ yathā /
varṣāmegho yathā bhānuṃ tadvatkāmo'khilāṃśca ruṭ

pratipattimato jñāna chāditaṃ satataṃ dviṣā /
icchātmakena tarasā duṣpūreṇa ca śuṣmiṇā

āśritya buddhimanasī indriyāṇi sa tiṣṭhati /
tairevācchāditaprajño jñāninaṃ mohayatyasau

tasmānniyamya tānyādau samanāṃsi naro jayet /
jñānavijñānayoḥ śāntikaraṃ pāpaṃ manobhavam

aṃtastāni parāṇyāhustebhyaśca paramaṃ manaḥ /
tato'pi hi parā buddhirātmā buddheḥ paro mataḥ

buddhvaivamātmanātmānaṃ saṃstabhyātmānamātmanā /
hatvā śatruṃ kāmarūpaṃ paraṃ padamavāpnuyāt ४३ ( ६३८९)
ॐtatsaditi śrīmadgaṇeśagītāsūpaniṣadarthagarbhāsu yogāmṛtārtha śāstre śrīmadādi śrīmanmahāgāṇeśvare mahāpurāṇe uttarakhaṇḍe bālacarite śrīgajānanavareṇyasaṃvāde 'karmayogo' nāma dvitīyodhyāyaḥ //१

adhyāya १४० prāraṃbha :-
śrīgajānana uvāca /
purā sargādisamaye traiguṇyaṃ tritanūraham /
nirmāya cainamavadaṃ viṣṇave yogamuttamam

aryamṇe so'bravītso'pi manave nijasūnave /
tataḥ paramparāyātaṃ vidurenaṃ maharṣayaḥ

kālena bahunā cāyaṃ naṣṭaḥ syāccarame yuge/
aśraddheyo hyaviśvāsyo vigītavyaśca bhūmipa

enaṃ purābhavaṃ yogaṃ śrutavānasi manmukhāt /
guhayādguhayatamaṃ vedaharasyaṃ paramaṃ śubham

vareṇya uvāca /
sāṃprataṃ cāvatīrṇo'si garbhatastvaṃ gajānana /
proktavānkathamenaṃ tvaṃ viṣṇave yogamuttamama

śrīgajānana uvāca/
anekāni ca te janmānyatītāni mamāpi ca/
saṃsmare tāni sarvāṇi na smṛtistava vartate

matta eva mahābāho jātā viṣṇvādayaḥ surāḥ /
mayyeva ca layaṃ yānti pralayeṣu yuge yuge

ahameva paro brahmā mahārudro'hameva ca /
ahameva jagatsarvaṃ sthāvaraṃ jaṃgamaṃ ca yat

ajo'vyayo'haṃ bhūtātmā'nādirīśvara eva ca /
āsthāya triguṇāṃ māyāṃ bhavāmi bahuyoniṣu

adharmopacayo dharmāpacayo hi yadā bhavet /
sādhūnsaṃrakṣituṃ duṣṭāṃstadāttuṃ saṃbhavāmyaham

ucchidyādharmānicayaṃ dharmasaṃsthāpayāmyaham /
hanmi duṣṭāṃśca daityāṃśca nānālīlākaro mudā

varṇāśramānmunīnsādhūnpālaye bahurūpadhṛk /
evaṃ yo vetti saṃbhūtīmmama divyāṃ yuge yuge

tattatkarma ca vīryaṃ ca mama rūpaṃ samāsataḥ /
tyaktvāhaṃ mamatābuddhiṃ na punarbhūḥ sa jāyate

nirīhā nirbhayāroṣā matparā madyapāśrayāḥ /
vijñāna tapasā śuddhā aneke māmupāgatāḥ

yena yena hi bhāvena saṃsevante narottamāḥ /
tathā tathā phalaṃ tebhyaḥ prayacchāmyavyayaḥ sphuṭam

janāḥ syuritare rājanmama mārgānuyāyinaḥ /
tathaiva vyavahāraṃ te sveṣu cānyeṣu kurvate

kurvanti devatāprītiṃ vāñchantaḥ karmaṇāṃ phalam /
prāpnuvantīha te loke śīghraṃ siddhiṃ hi karmajām

catvāro hi mayā varṇā rajaḥsattvatamoṃśataḥ /
karmāṃśataśca saṃsṛṣṭā mṛtyuloke mayā nṛpa

kartāramapi māṃ teṣāmakartāraṃ vidurbudhāḥ /
anādimīśvaraṃ nityamaliptaṃ karmajairguṇaiḥ

nirīhaṃ yo'bhijānāti karma badhnāti naiva tam/
cakruḥ karmāṇi buddhvaivaṃ pūrvaṃ pūrvaṃ mumukṣavaḥ

vāsanāsahitādādyātsaṃsārakāraṇāddṛḍhāt /
ajñānabandhanājjanturbuddhvāyaṃ mucyate'khilāt

tadakarmaṃ ca karmāpi kathayāmyadhunā tava/
yatradā maunaṃ gatā mohādṛṣayo buddhiśālinaḥ

tattvaṃ mumukṣuṇā jñeyaṃ karmākarmavikarmaṇām /
trividhānīha karmāṇi suninnaiṣāṃ gatipriya

kriyāyāmakriyājñānamakriyāyāṃ kriyāmatiḥ /
yasya syātsa hi martye'smiṃlloke mukto'khilārthadṛk

karmāṃkuraviyogena yaḥ karmāṇyārabhennaraḥ /
tattvadarśananirdagdhakriyamāhurbudhā budham

phalatṛṣṇāvihāyasyātsadā tṛpto visādhanaḥ/
udyukto'pi kriyāṃ kartuṃ kiṃcinnaiva karoti saḥ

nirīho nigṛhītātmā parityaktaparigrahaḥ /
kevalaṃ vai gṛhaṃ karmācarannāyāti pātakam

advandvo'matsaro bhūtvā siddhausiddhyauḥ samaśca yaḥ /
yathāprāptyīha saṃtuṣṭaḥ kurvankarma na badhyate

akhilairviṣayairmukto jñānavijñānavānapi /
yajñārthaṃ
tasya sakalaṃ kṛtaṃ karma vilīyate

ahamagnirhavirhotā hutaṃ yanmayi cārpitam /
brahmāptavyaṃ ca tenātha brahmaṇyeva yato rataḥ

yoginaḥ kecidapare diṣṭaṃ yajñaṃ vadanti ca /
brahmāgnireva yajño vai iti kecana menire

saṃyamāgnau paraṃ bhūpa indriyāṇyupajuhvati /
khāgniṣvanye tadviṣayāñśabdādīnupajuhvati

prāṇānāmindriyāṇāṃ ca pare karmāṇi kṛtatsnaśaḥ/
nijātmarasirūpe'gnau jñānadīpte prajuhvati

dravyeṇa tapasā vāpi svādhyāye nāpi kecana /
tīvravratena yatino jñānenāpi yajanti mām

prāṇe'pānaṃ tathā prāṇamapāne prakṣipanti ye /
ruddhvā gatīṃścobhayoste prāṇāyāmaparāyaṇāḥ

jitvā prāṇānprāṇagatīrupajuhvati teṣu ca /
evaṃ nānā yajñaratā yajñadhvaṃsitapātakāḥ

nityaṃ brahma prayāntyete yajñāśeṣāmṛtāśinaḥ /
ayajñakāriṇo loko nāyamanyaḥ kuto bhavet

kāyikāditridhābhūtānyajñānvede pratiṣṭhitān /
jñātvā tānakhilānbhūpa mokṣase'khilabandhanāt

sarveṣāṃ bhūpa yajñānāṃ jñānayajñaḥ paro mataḥ /
akhilaṃ līyate karma jñāne mokṣasya sādhane

tajjñeyaṃ puruṣavyāghrapraśnena natitaḥ satām /
śuśrūṣayā vadiṣyanti santastattvaviśāradāḥ

nānāsaṃgānjanaḥ kurvannaikaṃ sādhusamāgamam /
karoti tena saṃsāre bandhanaṃ samupaiti saḥ

satsaṃgādguṇasaṃbhūtirāpadāṃ laya eva ca /
svahitaṃ prāpyate sarvairiha loke paratra ca

itaratsulabhaṃ rājansatsaṃgo'tīvadurlabhaḥ /
yajjñātvā na punarbandhameti jñeyaṃ tato yataḥ

tataḥ sarvāṇi bhūtāni svātmanyevābhipaśyati /
atipāparato jantustatastasmātpramucyate

vividhānyapi karmāṇi jñānāgnirdahati kṣaṇāt /
prasiddho'gniryathā sarvaṃ bhasmatāṃ nayati kṣaṇāt

na jñānaṃ samatāmeti pavitramitarannṛpa /
ātmanyevāvagacchanti yogātkālena yoginaḥ

bhaktimānindriyajayī tatparo jñānamāpnuyāt /
labdhvā tatparamaṃ mokṣaṃ svalpakālena yātyasau

bhaktihīno 'śraddadhānaḥ sarvatrasaṃśayī tu yaḥ/
tasya śaṃ nāpi vijñātamiha loke na cāpare

ātmajñānarataṃ jñānanāśitākhilasaṃśayama /
yogāstākhilakarmāṇaṃ badhnanti bhūpa tāni na

jñānakhaḍgaprahāreṇa saṃbhūtāmajñatāṃ balāt/
chittvā'ntasaṃśayaṃ tasmādyogayukto bhavennaraḥ २.१४०.५० (६४३९)
oṃ tatsaditi śrīmadgaṇeśagītāsūpaniṣadarthagarbhāsu yogāmṛtārthaṃ śāstre śrīmadādi śrīmanmahāgāṇeśvare mahāpurāṇe uttarakhaṃḍe bālacarite śrīgajānanavareṇyasaṃvāde brahmārpaṇayogo nāma tṛtīyodhyāyaḥ //३