Ganesha Purana · Chapter 1.46.50

vyāsa uvāca /
kathaṃ nāmnāṃ sahasraṃ tad gaṇeśa upadiṣṭavān/
śivadaṃ tanmamācakṣva lokānugrahatatpara

brahmovāca /
devaḥ pūrvaṃ purārātiḥ puratrayajayodyame /
anarcanādgaṇeśasya jāto vighnākulaḥ kila

manasā sa vinirdhārya tatastadvighnakāraṇaṃ /
mahāgaṇapatiṃ bhaktyā samabhyarcya yathāvidhī

vighnapraśamanopāyamapṛcchattaṃ parājitaḥ /
saṃtuṣṭaḥ pūjayā śaṃbhormaṃhāgaṇapatiḥ svayam

sarvavighnapraśamanaṃ sarvakāmaphalapradaṃ /
tatastamai svasya nāmnāṃ sahassramidamabravīt

asya śrīmadgaṇeśadivyasahasranāmāmṛtastotramālāmahāmaṃtrasya śrīmahāgaṇapatirṛṣiḥ /
śrīsvānaṃdeśo brahmaṇaspatirdevatā /
nānāvidhāni cchaṃdāṃsi /
humiti bījaṃ /
tuṃgamitīṃ śaktiḥ /
svāhāśaktiriti kīlakaṃ /
sakalavighnavināśanadvārā śrībrahmaṇaspati- prītyarthaṃ jape viniyoga १ /
atha nyāsāḥ /
gaṇeśvaro gaṇakrīḍa ityaṃguṣṭhābhyāṃ namaḥ /
kumāragururīśāneti tarjanībhyāṃ namaḥ /
brahmāṃ ḍakuṃbhaścidvyometi madhyamābhyāṃ namaḥ /
raktoraktāṃbaradhara ityanāmikābhyāṃ namaḥ sarvasadgurusaṃsevya iti kaniṣṭhikābhyāṃ namaḥ /
luptavighnaḥ subhavanāmiti karatalakarapṛṣṭhābhyāṃ namaḥ /
atha hṛdayādinyāsāḥ /
chaṃdaścchaṃdodbhava iti hṛdayāya namaḥ /
niṣkalo nirmala iti śirase svāhā /
sṛṣṭisthitilayakrīḍa iti śikhāyai vaṣaṭ /
jñānaṃ vijñānamānaṃdaṃ iti kavacāya hum /
aṣṭāṃgayogaphala bhṛditi netratrayāya vauṣaṭ /
anaṃtaśaktisahitaṃ ityastrāya phaṭ /
iti digbaṃdhaḥ /
atha dhyānam /
raktāṃbhodhisthapotollasadaruṇasarojādhiruḍhaṃ trinetraṃ /
pāśaṃ caivāṃkuśāḍhyaṃ paraśumabhayadaṃ bāhubhirdhārayaṃtaṃ /
śaktyā yuktaṃ gajāsyaṃ puthutarajaṭharaṃ siddhibuddhīsametaṃ /
raktaṃ caṃdrārdhamauliṃ sakalabhayaharaṃ vighnarājaṃ namāmi

śrīsiddhibuddhisahitāya salakṣalābhāya śrosvānaṃdeśāya brahmaṇaspataye sāṃgāya saparivārāya saśaktikāya sāyudhāya savāhanāya sāvaraṇāya namaḥ /
iti nāmamaṃtreṇa mānasaiḥ pañcopacāraiḥ saṃpūjya paṭhet /
/ śrīmahāgaṇapatiruvāca /
gaṇeśvaro gaṇakrīḍo gaṇanātho gaṇādhipaḥ /
ekadaṃṣṭro vakratuṃḍo gajavaktro mahodaraḥ

laṃbodaro dhūmravarṇo vikaṭo vighnanāyakaḥ /
sumukho durmukho buddho vighnarājo gajānanaḥ

bhīmaḥ pramoda āmodaḥ surānaṃdo mahotkaṭaḥ /
heraṃbaḥ śaṃbaraḥ śaṃbhurlaṃbakarṇo mahābalaḥ

naṃdano laṃpaṭo bhīmameghanādo gaṇaṃjayaḥ /
vināyako virūpākṣo vīraśūravarapradaḥ

mahāgatirbuddhipriyaḥ kṣipraprasādanaḥ /
rudrapriyo gaṇādhyakṣa umāputro'ghanāśanaḥ

kumāragururīśānaputro mūṣakavāhanaḥ /
siddhipriyaḥ siddhipatiḥ siddhiḥ siddhivināyakaḥ

avighnastuṃbaruḥ siṃhavāhano mohinīpriyaḥ /
kaṭaṃkaṭo rājaputraḥ śākalaḥ saṃmito'mitaḥ / /७//
kūṣmāṃḍasāmasaṃbhūtirdurjayo dhurjayo jaya /
bhūpatirbhuvanapatirbhūtānāṃ patiravyayaḥ

viśvakartā viśvamukho viśvavaṃdyo vinirguṇaḥ /
kaviḥ kavīnāmṛṣabho brahmaṇyo brahmaṇaspatiḥ

jyeṣṭharājo nidhipatirnidhipriyapatipriyaḥ /
hiraṇmayapurāṃtaḥsthaḥ sūryamaṃḍalamadhyagaḥ

karāhatidhvastasiṃdhusalilaḥ pūṣadaṃtabhit /
umāṃkakelikutukī muktidaḥ kulapālanaḥ

kirīṭikuṃḍalihārivanamālimanomayaḥ /
vaimukhyahatadaityaśrīḥ pādāhatyejitakṣitiḥ // १२/ /
sadyojātaḥ svarṇamuṃjamekhalī durnimittahṛt /
duḥsvapnaduṣṭaśamano guṇī nādapratipṭhitaḥ // १३ / /
surūpaḥ sarvanetrādhivāso vibhrājinūpuraḥ/
pītāṃbaraḥ khaṃḍaradaḥ khaṃḍavaiśākhasaṃsthitaḥ

citrāṃgaḥ śyāmadaśano bhālacaṃdro havirbhujaḥ /
yogādhipastārakasthapuruṣo gajakarṇakaḥ

gaṇādhirājo vijayaḥ sthiro gajapatirdhvajī /
devadevaḥ smaraprāṇadīpako vāyukīlakaḥ // १ ६/ /
vipaścidvaradonnādo nādabhinnamahācalaḥ /
varāhavadano mṛtyuṃjayo vyāghrājināṃbaraḥ // १ ७//
icchāśaktibhavo devatrātā daityavimardanaḥ /
śaṃbhuvaktrodbhavaḥ śaṃbhukopajaḥ śaṃbhuhāsyabhūḥ // १ ८//
śaṃbhutejāḥ śivāśokahārī gaurīsukhāvahaḥ /
umāṃgamalajo gaurītejobhūḥ svardhunībhavaḥ // १ ९//
mattakāyo mahānādo girivarṣmā śubhānanaḥ /
sarvātmā sarvadevātmā brahmamūrddhā kakupśrutiḥ //१.४६.२ ० //
brahmāṃḍakuṃbhaścidvyomabhālaḥ sanyaśiroruhaḥ /
jagajjanmalayonmeṣanimeṣo'gnyarkasomadṛk

girīṃdrakarado dharmādharmoṣṭhaḥ sāmabṛṃhita/
graharkṣadaśano vāṇījihvo vāsavanāsikaḥ

bhrūmadhyasaṃsthitakaro brahmavidyāmadodakaḥ /
kulācalāṃsaḥ somārkaghaṃṭo rudraśirodharaḥ

nadīnadabhujaḥ sarpāṃgulīkastārakānakhaḥ /
vyomanābhiḥ śrīrhṛdayo merupṛṣṭho'rṇavodaraḥ / /२४//
kukṣisthayakṣagaṃdharvaṃrakṣaḥkinnaramānuṣaḥ /
pṛthvīkaṭiḥ sṛṣṭiliṃgaḥ śailorurdrasrajānukaḥ

pātālajaṃgho sunipātkālāṃguṣṭhasrayītanuḥ /
jyotirmaṃḍalalāṃgūlo hadayālānaniścalaḥ

hṛtpadmakarṇikāśālī viyatkelisarovaraḥ /
sadbhaktadhyānanigaḍaḥ pūjāvārīnivāritaḥ

pratāpī kāśyapo yaṃtā gaṇako viṣṭapī balī /
yaśasvī dhārmiko jetā prathamaḥ prathameśvaraḥ

ciṃtāmaṇidvīpapatiḥ kalpadrumavanālayaḥ /
ratnamaṃḍapamadhyastho ratnasiṃhāsanāśrayaḥ //२ ९ //
tīvrāśiroddhṛtapado jvālinīmaulilālitaḥ /
naṃdānaṃditapīṭhaśrīrbhogadābhūṣitāsanaḥ // १.४६.३० / /
sakāmadāyinīpīṭhaḥ sphuradugrāsanāśrayaḥ /
tejovatīśiroratnaṃ satyānityāvataṃsitaḥ

savighnāśinīpīṭhaḥ sarvaśaktyaṃbujālayaḥ /
lipipadmāsanādhāro vahnidhāmatrayālayaḥ

unnataprapado gūḍhagulphaḥ saṃvṛtapārṣṇikaḥ /
pīnajaṃghaḥ śliṣṭajānuḥ sthūloruḥ pronnamatkaṭiḥ // ३३ / /
nimnanābhiḥ sthūlakukṣi pīnavakṣā bṛhadbhujaḥ /
pīnaskaṃdhaḥ kaṃbukaṭho laboṣṭho laṃbanāsikaḥ // ३४/ /
bhagnavāmaradastuṃgāsavyadaṃto mahāhanuḥ /
hrasvanetratrayaḥ śūrpakarṇo nibiḍamastakaḥ

stabakākārakuṃbhāgro ratnamaulirniraṃkuśaḥ /
sarpahārakaṭīsūtraḥ sarpayajñopavītavān

sarpakoṭīrakaṭakaḥ sarpagraiveyakāṃgadaḥ /
sarpakakṣodarābaṃdhaḥ sarparājottaracchadaḥ // ३७/ /
rakto raktāṃbaradharo raktamālyavibhūṣaṇaḥ /
raktekṣaṇo raktakaro raktatālvoṣṭhapallavaḥ //३ ८//
śvetaḥ śvetāṃbaradharaḥ śvetamālyavibhūṣaṇaḥ /
śvetātapatraruciraḥ śvetacāmaravījitaḥ

sarvāvayavasaṃpūrṇaḥ sarvalakṣaṇalakṣitaḥ /
sarvābharaṇaśobhāḍhyaḥ sarvaśobhāsamanvitaḥ

sarvamaṃgalamāṃgalyaḥ sarvakāraṇakāraṇaṃ /
sarvadaikakaraḥ śārṅgī bījapūrī gadādharaḥ //४ १ //
śubhrāṃgo lokasāraṃgaḥ sutaṃtustaṃtuvarddhanaḥ /
kirīṭī kuṃḍalī hārī vanamālī śubhāṃgadaḥ

ikṣucāpadharaḥ śūlī cakrapāṇiḥ sarojabhṛt /
pāśī dhṛtotpalaḥ śālīmaṃjarībhṛtsvadaṃtabhṛt

kalpavallīdharo viśvābhayadaikakaro vaśī /
akṣamālādharo jñānamudrāvānmudgarāyudhaḥ

pūrṇapātro kaṃbudharo vidhṛtākṣaḥ sumodakaḥ //
karasthāmraphalaścūtakalikābhṛtkuṭhāravān

puṣkarathasvarṇaghaṭapūrṇaratnāṃbuvarṣakaḥ /
bhāratīsuṃdarīnātho bināyakaratipriyaḥ

mahālakṣmīpriyatamaḥ siddhalakṣmīmanorama /
ramārameśapūrvāṃgo dakṣiṇomāmaheśvara

mahivarāhavāmāṃgo ratikaṃdarpapaścimaḥ /
āmodamodajananaḥ sapramodapra modanaḥ /

samedhitasamṛddhaśrīrṛddhisiddhipravardhanaḥ /
daṃtasaumukhyasumukhakāṃtikaṃdalitāśrayaḥ

madanāvatyāśritāṃghri kṛtasaumukhyadurmukhaḥ /
vighnasaṃpallavodvignasevonnidramadadravaḥ //१.४६.५ ० / /
vighnakṛnnimnacaraṇadrāviṇīśaktisaṃvṛtaḥ /
tīvrāprasannavadano jvālinīpālitaikadṛk //५ १ //
mohinīṃ mohano bhogadāyinīkīrtimaṃḍitaḥ /
kāminīkāṃtayuktaśrīstejinyadhiṣṭhitaikadṛk

vasudhārāmadonnādo mahāśaṃkhanidhipriyaḥ /
namadvasumatīmauliprahvaḥ padmanidhiprabhuḥ //५ ३ //
sarvasadgurūsaṃsevyaḥ śociṣkeśahṛdāśrayaḥ /
īśānamūrddhā deveṃdraśikhaḥ pavananaṃdanaḥ

pratyugnanayanādityo divyāstrāṇāṃ prayogavit /
airāvatādisarvāśāvāraṇovāraṇāpriyaḥ

vajrādyastraparīvāragaṇacaṃḍasamāśrayaḥ /
jayājayaparikaro vijayāvijayāvahaḥ //५ ६ //
ajayārcitapādābjo nityānityāvalaṃbitaḥ /
vilāsinīkṛtollāsaśauṃḍīsauṃdaryaṃmaṃḍitaḥ

anaṃtānaṃtasukhadaḥ sumaṃgalasumaṃgalaḥ /
jñānāśrayaḥ kriyādhāraḥ icchāśaktiniṣevitaḥ

subhagāsaṃśrītapado lalitālalitāśrayaḥ /
kāminīpālanaḥ kāmakāminīkelilālitaḥ

sarasvatyāśrayo gaurīnaṃdanaḥ śrīniketanaḥ /
guruguptaprado vācāsiddho vāgīśvarīpatiḥ / /१.४६.६ ० //
nalinīkāmuko rāmāvāmājyeṣṭhāmanoramaḥ /
raudrīmudritapādābjo huṃbījastuṃgaśaktikaḥ / / ६१ //
viśvādijananatrāṇasvāhāśaktisukīlakaḥ /
amṛtābdhikṛtāvāso madāghūrṇitalocanaḥ //६ २ //
ucchiṣṭocchipṭagaṇapagaṇeśo gaṇanāyakaḥ /
sārvakālikasaṃsiddhirnityasevyo digaṃbaraḥ

anāpāyo'naṃtaśaktiraprameyo'jaro'maraḥ /
anāvilo'pratihatiracyuto'mṛtamakṣaraṃ

apratarkyo'kṣayo' jayyo'nādhāro'nāmayo'malaḥ /
ameyasiddhiradvaitamaghoro'pramitānanaḥ

anākāro'bdhibhūmyagnibalaghno'vyaktalakṣaṇaḥ /
ādhārapīṭha ādhāra ādhārādheyavarjitaḥ

ākhuketana āśāpūraka ākhumahārathaḥ /
ikṣusāgaramadhyastha ikṣubhakṣaṇalālasaḥ

ikṣucāpātirekaśrīrikṣucāpaniṣevitaḥ /
iṃdragopasamānaśrīriṃdranīlasamadyutiḥ

iṃdīvaradalaśyāma iṃdumaṃḍalamaṃḍitaḥ /
idhmapriya iḍābhāga iḍādharmeṃdirāpradaḥ

ikṣvākuvighnavidhvaṃsī itikartavyatepsitaḥ /
īśānamaulirīśāna īśānapriya ītihā

īṣaṇātrayakalpāṃta ihāmutravivarjitaḥ /
upeṃdra uḍubhṛnmīṃlirumadūrakapatipriyaḥ

unnatānana uttuṃga udāra udāratridaśāgraṇīḥ /
ūrjasvānūṣmalamada ūhāpohadurāsadaḥ

ṛgyajuḥsāmanayana ṛddhisiddhisamarpakaḥ /
ṛjucittaikasulabha ṛṇatrayavimocanaḥ

luptavighnaḥ subhaktānāṃ luptaśaktiḥ suradviṣām /
luptaśrīrvimukhārcānāṃ lūtāvisphoṭanāśanaḥ

ekārapīṭhamadhyastha ekapādakṛtāsanaḥ /
ejitākhiladaityaśrīredhitākhilasaṃśrayaḥ

aiśvaryanidhiraiśvaryamaihikāmuṣmikapradaḥ /
airāvatasamonmeṣa airāvatanibhānanaḥ

oṃkāravācya oṃkāra ojasvānoṣadhīpatiḥ /
audāryanidhirauddhatyadhurya aunnatyaniḥsvanaḥ

aṃkuśaḥ suranāgānāmaṃkuśākārasaṃsthitaḥ /
aḥ samastavisargāṇāṃ padeṣu parikīrtitaḥ

kamaṃḍaludharaḥ kalpaḥ kapardī kalabhānanaḥ /
karmasākṣī karmakarttā karmākarmaphalapradaḥ

kadaṃbagolakākārakūṣmāṃḍagaṇanāyakaḥ /
kārūṇyadehaḥ kapilaḥ kathakaḥ kaṭisūtrabhṛt

kharvaḥ kharvapriyaḥ khaḍgī khāṃtarasthaḥ khanirmalaḥ /
khalvāṭaśṛṃganilayaḥ khaṭvāṃgī khadurāsadaḥ

guṇāḍhyo gahano gastho gadyapadyasudhārṇavaḥ /
gadyagānapriyo garjagīto gīrvāṇapūrvajaḥ

guhyācārarato guhyo guhyāgamanirūpitaḥ /
guhyāśayo guḍābdhistho gurugamyo gurorguruḥ

ghaṃṭāghargharikāmālī ghaṭakuṃbho ghaṭodaraḥ /
ṅakāravācyo ṅākāro ṅakārākāraśuṃḍabhṛt

caṃḍaścaṃḍeśvaraścaṃḍacaṃḍeśaścaṃḍavikramaḥ /
carācarapitā ciṃtāmaṇiścarvaṇalālasaḥ

chaṃdaścchaṃdodbhavaścchaṃdo durlakṣyaścchaṃdavigrahaḥ /
jagadyonirjagatsākṣī jagadīśo jaganmayaḥ

japo japaparo jāpyo jihvāsiṃhāsanaprabhuḥ /
jhalajhjhallollasaddāno jhaṃkāribhramarākulaḥ /

ṭaṃkārasphārasaṃrāvaṣṭaṃkāramaṇinūpuraḥ /
ṭhadvayapallavāṃtaḥstha sarvamaṃtreṣu siddhidaḥ

ḍiṃḍimuṃḍo ḍākinīśo ḍāmaro ḍiṃḍimāpriyaḥ /
ḍhakkāninādamudito ḍhauko ḍhauṃḍhavināyakaḥ

tatvānāṃ prakṛtistatvaṃ tatvaṃpadanirūpitaḥ /
tārakāṃtarasaṃsthānastārakastārakāṃtakaḥ

sthāṇuḥ sthāṇupriyaḥ sthātā sthāvaraṃjaṃgamaṃjagat/ /
dakṣayajñapramathano dātā dānaṃ damo dayā / /९ १ //
dayāvāndivyavibhavo daṃḍabhṛddaṃḍanāyakaḥ /
daṃtaprabhinnabhramaro daityavāraṇadāraṇaḥ

daṃṣṭrālagnadvipaghaṭo devārthāttagajākṛtiḥ /
dhanaṃ dhanapaterbaṃdhurdhanado dharaṇīdharaḥ / /९ ३ //
dhyānaikaprakaṭo dhyeyo dhyānaṃ dhyānaparāyaṇaḥ /
dhvaniprakṛticītkārabrahmāṃḍāvalimekhalaḥ

naṃdyo nadaḥpriyo nādo nādamadhye pratiṣṭhitaḥ /
niṣkalo nirmalo nityo nityānityo nirāmayaḥ

paraṃvyoma paraṃdhāma paramātmā paraṃpadaṃ /
parātparaḥ paśupatiḥ paśupāśavimocanaḥ

pūrṇānaṃdaḥ parānaṃdaḥ purāṇapuruṣottamaḥ /
padmaprasannanayanaḥ praṇatājñānanāśanaḥ

pramāṇapratyayātīta praṇatārtivināśanaḥ /
phaṇihastaḥ phaṇipatiphūtkāraphāṇitapriyaḥ

bāṇārcitāṃghriyugalo bālakelīkutūhalī /
brahma brahmārcitapado brahmacārī bṛhaspatiḥ

bṛhattaro brahmaparo brahmaṇyabrahmavitpriyaḥ /
bhrūkṣepadattalakṣmīko bhargo bhadro bhayāpahaḥ

bhagavānbha-- ktisulabho bhūtido bhūtibhūṣaṇaḥ /
bhavyo bhūtālayo bhogadātā bhrūmadhyagocaraḥ

maṃtro maṃtrapatirmaṃtrī madamatto manomayaḥ /
mekhalāhīśvaro maṃdagatirmaṃdanibhekṣaṇaḥ

mahābalo mahāvīryo mahāprāṇo mahāmanāḥ /
yajño yajñapatiryajñagoptā yajñaphalapradaḥ // १०३ / /
yaśaskaro yogagamyo yājñiko yācakapriya /
raso rasapriyo rasyo raṃjako rāvaṇārcitaḥ // १ ०४//
rājyarakṣākaro ratnagarbho rājyasukhapradaḥ /
lakṣyo lakṣyapatirlakṣyalayastho laḍḍukapriyaḥ

lānapriyo lāsyaparo lābhakṛllokaviśrutaḥ /
vareṇyo vahnivadano vaṃdyo vedāṃtagocaraḥ // १० ६//
vikartā viśvataścakṣurvidhātā viśvatomukhaḥ /
vāmadevo vajrinetā vajrivajranivāraṇaḥ // १० ७//
vivasvadbaṃdhano viśvādhāro viśveśvaro vibhuḥ /
śabdabrahmamayaprāpyaḥ śaṃbhuśaktigaṇeśvaraḥ

śāstā śikhāgranilayaḥ śaraṇyaḥ śaṃbareśvaraḥ /
ṣaḍṛtukusumasragvī ṣaḍādhāraḥ ṣaḍakṣaraḥ // १ ०९//
saṃsāravaidya sarvajña sarvabheṣajabheṣajaṃ /
sṛṣṭisthitilayakrīḍaḥ surakuṃjarabhedakaḥ

siṃdūritamahākuṃbhaḥ sadasadvyaktidāyakaḥ /
sākṣī samudramathanaḥ svayaṃvedyaḥ svadakṣiṇaḥ

svataṃtraḥ satyasaṃkalpaḥ sāmagānarataḥ sukhī /
haṃso hastipiśācīśo havanaṃ havyakavyabhuk

havyaṃ hatapriyo hṛṣṭo hṛllekhāmaṃtramadhyagaḥ /
kṣetrādhipaḥ kṣamābharttā kṣamāparapararāyaṇaḥ / / ११३//
kṣiprakṣemakaraḥ kṣemanaṃdaḥ kṣoṇīsuradrumaḥ /
dharmapradro'rthadaḥ kāmadātā saubhāgyavardhanaḥ

vidyāprado vibhavado bhuktimuktiphalapradaḥ /
abhirūpyakaro vīraśrīprado vijayapradaḥ

sarvaṃvaśyakaro garbhadoṣahā putrapautradaḥ /
medhādaḥ kīrtidaḥ śokahārī daurbhāgyanāśanaḥ

prativādimukhastaṃbho ruṣṭacittaprasādanaḥ /
parābhicāraśamano duḥkhahā baṃdhamokṣadaḥ

lavastruṭiḥ kalā kāṣṭhā nimeṣastatparakṣaṇaḥ /
ghaṭī muhūrtaṃ praharo divānaktamaharniśaṃ

pakṣo māso'yanaṃ varṣaṃ yugaḥ kalpo mahālayaḥ /
rāśistārā tithiryogo vāraḥ karaṇamaṃśakaṃ

lagnaṃ horā kālacakraṃ meru saptarṣayo dhruvaḥ /
rāhurmadaḥ kavirjīvo budho bhaumaḥ śaśī raviḥ

kālaḥ sṛṣṭiḥ sthitirviśvaṃ sthāvaraṃ jaṃgamaṃ jagat /
bhūrāpo'gnirmarudvyomāhaṃkṛtiḥ prakṛtiḥ pumān

brahmā viṣṇuḥ śivo rudra iṃdraḥ śaktiḥ sadāśivaḥ /
tridaśā pitaraḥ siddhā yakṣā rakṣāṃsi kinnarā

sādhyā vidyādhara bhūtā manuṣyāḥ paśavaḥ khagāḥ /
samudrāḥ saritaḥ śailā bhūtaṃ bhavyaṃ bhavodbhavaṃ

sāṃkhyaṃ pātaṃjalaṃ yogaḥ purāṇāni śrutiḥ smṛtiḥ /
vedāṃgāni sadācāro mīmāṃsānyāyavistaraḥ

āyurvedo dhanurvedo gāṃdharva kāvyanāṭakaṃ /
vaikhānasaṃ bhāgavataṃ mānuṣaṃ pāṃcarātrikaṃ

śaivaṃ pāśupataṃ kālamukhaṃ bhairavaśāsanam /
śāktaṃ vaināyakaṃ sauraṃ jainamārhatasaṃhitā

sadasadvyaktamavyaktaṃ sacetanamacetana /
baṃdho mokṣaḥ sukhaṃ bhogayogaḥ satyamaṇurmahān

svastihuṃphaṭsvadhāsvāhāśrauṣaḍvauṣaḍvaṣaṇnamaḥ /
jñānaṃ vijñānamānaṃdo bodhaḥ saṃvitsamo'sama

eka ekākṣarādhāra ekākṣaraparāyaṇaḥ /
ekāgradhīrekavīra ekānekasvarūpadhṛk

dvirūpo dvibhujo dvyakṣo dvirado dvīparakṣakaḥ /
dvaimāturo dvivadano dvaṃdvahīno dvayātigaḥ

tridhāmā trikarastretā trivargaphaladāyakaḥ /
triguṇātmā trilokādistriśaktīśastrilocanaḥ

caturbāhuścaturdaṃtaścaturātmā caturmukhaḥ /
caturmakhamayopāyaścaturvarṇāśramāśrayaḥ

caturvidhavacovṛttiparivṛttipravartakaḥ /
caturthīpūjanaprītiścaturthītithisaṃbhavaḥ

paṃcākṣarātmā paṃcātmā paṃcāsyapaṃcapaṃcakṛt /
paṃcādhāraḥ paṃcavarṇaḥ paṃcākṣaraparāyaṇaḥ

paṃcatālapaṃcakaraḥ paṃcapraṇavamātṛkaḥ/
paṃcabrahmamayasphūrtiḥ paṃcāvaraṇavāritaḥ

paṃcabhakṣapriyaḥ paṃcabāṇaḥ paṃcaśivātmakaḥ /
ṣaṭkoṇapīṭhaḥ ṣaṭcakradhāmā ṣaḍgraṃthibhedakaḥ

ṣaḍaṃgadhvāṃgavidhvaṃsī ṣaḍaṃgulamahāhṛdaḥ /
ṣaṇmukhaḥ ṣaṇmukhabhrātā ṣaṭśaktiparivāritaḥ

ṣaḍvairivargavidhvaṃsī ṣaḍūrmibhayabhaṃjanaḥ/
ṣaṭtarkadūraḥ ṣaṭkarmāḥ ṣaḍguṇaḥ ṣaḍrasāśrayaḥ

saptapātālacaraṇaḥ saptadvīporumaḍalaḥ /
saptasvarlokamukuṭaḥ saptasaptivarapradaḥ // १३ ९//
saptāṃgarājyasukhadaḥ saptarṣigaṇavaṃditaḥ /
saptacchadonidhīḥ saptahotā saptasvarāśrayaḥ

saptābdhikelikāsāraḥ saptamātṛniṣevitaḥ /
saptacchaṃdomodamadaḥ saptacchaṃdomakhaprabhuḥ

aṣṭamūrtidhyeyamūrtiraṣṭaprakṛtikāraṇaṃ /
aṣṭāṃgayogaphalabhṛdaṣṭapatrāṃbujāsanaḥ

aṣṭaśaktisamānaśrīraṣṭaiśvarya pradāyakaḥ /
aṣṭapīṭhopapīṭhaśrīraṣṭamātṛsamāvṛtaḥ

aṣṭabhairavavasevyo'ṣṭavasuvaṃdyo'ṣṭamūrtibhṛt /
aṣṭacakrasphuranmūrtiraṣṭa dravyahaviḥpriyaḥ / / १४४//
navanāgāsanādhyāsī navanidhyanuśāsitā /
navadvārapurāvṛtto navadvāraniketanaḥ

navanārāyaṇastutyo navadurgāniṣevitaḥ /
navanāthamahānātho navanāgavibhūṣaṇaḥ

navaratnavici go navaśaktiśirodhṛtaḥ /
daśātmako daśabhujo daśadikpativaṃditaḥ

daśādhyāyo daśaprāṇo daśeṃdriyaniyāmakaḥ /
daśākṣaramahāmaṃtro daśāśāvyāpivigrahaḥ

ekādaśādibhīrudraiḥ stutaścaikādaśākṣaraḥ /
dvādaśoddaṃḍadordaṃḍadvādaśāsraniketanaḥ

trayodaśabhidābhinna viśvedevādhidaivataṃ /
caturdaśeṃdravaradaścaturdaśamanuprabhuḥ

caturdaśādividyāḍhyaścaturdaśajagatpatiḥ /
sāmapaṃcadaśaḥ paṃcadaśī śītāṃśunirmalaḥ

ṣoḍaśādhāranilayaḥ ṣoḍaśasvaramātṛkaḥ /
ṣoḍaśāṃtapadāvāsaḥ ṣoḍaśeṃdukalātmakaḥ

kalāsaptadaśīsaptadaśaḥ saptadaśākṣaraḥ /
aṣṭādaśadvīpapatiraṣṭādaśapurāṇakṛt // १५३ / /
aṣṭādaśauṣadhisṛṣṭiraṣṭādaśavidhismṛtaḥ /
aṣṭādaśalipikṛtiraṣṭādaśavijātikṛt

ekaviṃśatyumānekaviṃśatyaṃgulipallavaḥ /
caturviṃśatitatvātmā paṃcaviṃśākhya pūruṣaḥ

saptaviṃśatitāreśaḥ saptaviṃśatiyogakṛt /
dvātriṃśadbhairavādhīśaścatustriṃśanmahāhṛdaḥ

ṣaṭtriṃśattatvasaṃbhūtiraṣṭatriṃśatkalātanuḥ /
namadekonapaṃcāśanmarudvarganirargalaḥ // १ ५७//
paṃcāśadakṣaraśreṇī paṃcāśadrudravigrahaḥ /
paṃcāśadviṣṇuśaktīśaḥ paṃcāśanmātṛkālayaḥ

dvipaṃcāśadvapuḥśreṇī triṣaṣṭyakṣarasaṃśrayaḥ /
catuḥṣaṣṭyarṇaṃnirṇetā catuḥṣaṣṭikalānidhiḥ

catuḥṣaṣṭimahāsiddhayoginīvṛṃdavaṃditaḥ /
aṣṭaṣaṣṭimahātīrthakṣetrabhairavabhāvanaḥ

caturnavatimaṃtrātmā ṣaṇṇavatyadhikaprabhuḥ /
śatānaṃdaḥ śatadhṛtiḥ śatapatrāyatekṣaṇaḥ

śatānīkaḥ śatamakhaḥ śatadhāravarāyudhaḥ /
sahasrapatranilayaḥ sahasraphaṇibhūṣaṇaḥ

sahasraśīrṣā puruṣaḥ sahasrākṣaḥ sahasrapāt /
sahasranāmasaṃstutyaḥ sahasrākṣabalāpahaḥ

daśasahasraphaṇibhṛtphaṇirājakṛtāsanaḥ /
aṣṭāśītisahasraughamaharṣistotrapāṭhitaḥ

lakṣādhārapriyādhāro lakṣādhāramanomayaḥ /
caturlakṣajapaprītiścaturlakṣaprakāśakaḥ

caturaśītilakṣāṇāṃ jīvānāṃ dehasaṃsthitiḥ /
koṭisūryapratīkāśaḥ koṭicaṃdrāṃśunirmalaḥ / / १ ६६//
saptakoṭimahāmaṃtramaṃtritāvayavadyutiḥ /
śivodbhavādyaṣṭakoṭivināyakadhuraṃdharaḥ / / १६७//
trayastriṃśatkoṭisuraśreṇīpraṇatapādukaḥ /
anaṃtadevatāsevyo hyanaṃtaśubhadāyakaḥ

anaṃtānāmānaṃtaśrīranaṃtānaṃtasaukhyavaḥ /
anaṃtaśaktisahito hyanaṃtamunisaṃstutaḥ /
anaṃtamunisaṃstuta oṃ nama iti // १६ ९//
iti vaināyakaṃ nāmnāṃ sahasramidamīritaṃ /
idaṃ brāhme muhūrte vai yaḥ paṭhetpratyahaṃ naraḥ // १.४६.१७ ०//
karasthaṃ tasya sakalamaihikāmuṣmikaṃ sukhaṃ /
āyurārogyamaiśvaryaṃ dhairyaṃ śauryaṃ balaṃ yaśaḥ

medhā prajñā dhṛtiḥ kāṃtiḥ saubhāgyamatirūpatā /
satyaṃ dayā kṣamā śāṃtirdākṣiṇyaṃ dharmaśīlatā /. १७२//
jagatsaṃvananaṃ viśvasaṃvādo vedapāṭavaṃ /
sabhāpāṃḍityamaudāryaṃ gāṃbhīryaṃ brahmavarcasaṃ

ojastejaḥkulaṃ śīlaṃ pratāpo vīryamāryatā /
jñānaṃ vijñānamāstikyaṃ dhairyaṃ viśvāsatā tathā

dhanadhānyādivṛddhiśca sakṛdasya japādbhavet /
vaśyaṃ caturvidhaṃ viśvaṃ japādasya prajāyate

rājño rājakalatrasya rājaputrasya maṃtriṇaḥ /
japate yasya vaśyārthaṃ sa dāsastasya jāyate // १ ७६//
dharmārthakāmamokṣāṇāmanāyāsena sādhanaṃ /
śākinīḍākinīrakṣoyakṣagrahabhayāpahaṃ

sāmrājyasukhadaṃ sarvasapatnamadamardanaṃ /
samastakalahṛdhvaṃsī dagdhaṃ bījaprarohaṇam

duḥsvapnanāśanaṃ kruddhasvāmicitta prasādhanam /
ṣaṭkarmāṣṭamahāsiddhitrikālajñānakāraṇaṃ

parakṛtyapraśamanaṃ paracakravimardanaṃ /
saṃgrāmo sarveṣāmedamekaṃ jayāvahaṃ

sarvavaṃdhyatvadoṣadhnaṃ garbharakṣaikakāraṇaṃ /
paṭhyate pratyahaṃ yatra stotraṃ gaṇapateridaṃ

deśe tatra na durbhikṣarmātayo duritāni ca /
na tadgehaṃ jahāti śrīryatrāyaṃ japyate stavaḥ / / १८२/ /
kṣayaḥ kuṣṭhaḥ pramehāṃśau bhagaṃdaraviṣūcike /
gulma plīhā na valmīkamatisāraṃ mahaudaraṃ

kāsaṃ śvāsa gudāvartaṃ śūla śophaṃ jalodaraṃ /
śirorogaṃ vamiṃ hikkāṃ gaṃḍamālāmarocakaṃ

vātapittakaphadvaṃdvatridoṣajanitajvaraṃ /
āgaṃtuṃ viṣamaṃ śītamuṣṇaṃ caikāhikādikaṃ

ityādyuktamanuktaṃ vā roga doṣādisaṃbhavaṃ /
sarvaṃ praśamayatyāśu stotrasyāsya sakṛjjapaḥ

prāpyate'sya japātsiddhiḥ strīśūdrapatitairapi /
sahasranāmamaṃtro'yaṃ japtavyastu śubhāptaye / / १ ८७//
mahāgaṇapate stotraṃ sakāmaḥ prajapannidaṃ /
icchayā sakalān bhogānupabhujyeha pārthivān

manorathaphalairdivyairvyomayānairmanoramaiḥ /
caṃdreṃdrabhāskaropeṃdrabrahmaśarvādisadmasu // १ ८९/ /
kāmarūpaḥ kāmagatiḥ kāmadaḥ kāmadeśvaraḥ /
bhuktvā yathepsitānbhogānabhīṣṭaiḥ saha baṃdhubhiḥ

gaṇeśānucaro bhūtvā mahāgaṇapate priyaḥ /
naṃdīśvarādisānaṃdairnaṃditaḥ sakalairgaṇaiḥ //

śivābhyāṃ kṛpayā putranirviśeṣeṇa lālitaḥ /
śivabhaktaḥ pūrṇakāmo gaṇeśvaravarātpunaḥ

jātismaro dharmaparaḥ sārvabhaumo'bhijāyate /
niṣkāmastu japannityaṃ bhaktyā vighneśatatparaḥ / / १९३ //
yogasiddhiṃ parāṃ prāpya jñānavairāgyasaṃsthiti /
niraṃtaroditānaṃde paramānaṃdasaṃjñite // १ ९४//
viśvottīrṇe pare pūrṇe punarāvṛttivarjite //
līno vaināyake dhāmni ramate nityanirvate

idaṃ prajaptaṃ paṭhitaṃ pāṭhitaṃ śrāvitaṃ śrutaṃ /
vyāhṛtaṃ carcitaṃ dhyātaṃ vimṛṣṭamabhinaṃditaṃ

ihāmutra aviśleṣaṃ sarvaiśvaryapradāyakaṃ /
svacchadacāriṇā'pyeṣa yena saṃdhāryate stavaḥ /
sa rakṣyate śivodbhūtairgaṇairapyaṣṭakoṭibhiḥ

likhitaṃ pustake stotraṃ maṃtrabhūtaṃ prapūjayet /
tatra sarvottamā lakṣmī sannidhatte niraṃtaraṃ

dānairaśeṣairakhilairvataiśca /
tīrthairaśeṣairakhilairmakhaśca /
na tatphalaṃ viṃdati yadgaṇeśasahasranāmnā smaraṇena sadyaḥ १९९
etannāmnāṃ sahasraṃ paṭhati dinamaṇau pratyahaṃ projjihāne /
sāyaṃ madhyaṃdine vā triṣavaṇamathavā saṃtataṃ vā jano yaḥ /
sa syādaiśvaryadhuryaḥ prabhavati vacasāṃ kītimuccaistanoti/
dāridryaṃ haṃti viśvaṃ vaśayati suciraṃ vardhate putrapautraiḥ //१.४६.२ ० ०//
akiṃcano'pyekacitto niyato niyatāśanaḥ /
prajapaṃścaturo māsān gaṇeśārcanatatparaḥ

daridratāṃ samunmūlya saptajanmānugāmapi /
labhate mahatīṃ lakṣmīmityājñā pārameśvarī / /२० २//
āyuṣyaṃ vītarogaṃ kulamativimalaṃ saṃpadaḥ śreṇidānāḥ /
kīrtiḥ puṇyāvadātā bhaṇatirabhinavā kāṃtiravyādhibhavyā //
putrāḥ saṃtaḥ kalatraṃ guṇavadabhimataṃ yadyadanyacca tattanityaṃ yaḥ stotrametat paṭhati gaṇapatestasya haste samastaṃ //२०३ / /
gaṇaṃjayo gaṇapatiharaiṃbo dharaṇīdharaḥ /
mahāgaṇapatirbuddhipriyaḥ kṣipraprasādanaḥ

amoghasiddhiramitamaṃtraściṃtāmaṇirnidhiḥ /
sumaṃgalo bījamāśāpūrako varadaḥ kaviḥ

kāśyapo naṃdano vācāsiddho ḍhuṃḍhirvināyakaḥ /
modakairebhiratraikaviṃśatyā nāmabhiḥ pumān

yaḥ stauti madgatamanā madārādhanatatparaḥ /
stuto nāmnāṃ sahasreṇa tenāhaṃ nātra saṃśayaḥ

namo namaḥ sukharapūjitāṃghraye /
namo namo nirupamamaṃgalātmane //
namo namo vipulasādhakasiddhaye /
namo namaḥ karikalabhānanāya te

kiṃkiṇīgaṇaracitacaraṇaḥ /
prakaṭitagurumitacārukaraṇaḥ //
madajalalaharīkalitakapolaḥ /
śamayatu duritaṃ gaṇapatirnṛpa nāmnā

iti śrīmadādi śrīmanmahāgāṇeśvare mahāpurāṇe upāsanākhaṃḍe īśvaramahāgaṇapatisaṃvāde śrīmadgaṇeśadivyasahasranāmāmṛtastotra kathanaṃnāma saṃpūrṇam //
śrīmadgaṇeśārpaṇamastu //
iti śrīmadgaṇeśasahasranāmamālāmaṃtrātmakastotraṃ samāptam //
śrīsvānaṃdeśārpaṇamastu //
ṣaṭcatvāriṃśo'dhyāyaḥ / ४६
adhyāya ४७ prāraṃbha :-
vyāsa uvāca /
nāmnāṃ sahasre saṃprāpte prasanne ca gajānane/
tataḥ kimakarod brahmana harastat kathayasva me

brahmovāca /
gaṇeśavaradānena nāmnāṃ caivopadeśataḥ /
prahaṣṭaḥ śaṃkaro nṛtyaṃ jagarja ca mahāsvanaḥ

āhūya svagaṇāndevān yuddhāvasaramādiśat /
te ca harṣeṇa mahatā yayurdevāḥ śivāntikama

brahmā kubero'tha purandaro'gni, rvāyuśca somo varuṇo'ryamā ca /
gaṃdharva yakṣā grahakinnarāśca, sarve namaskṛtya śivaṃ stuvantaḥ

devā ūcuḥ/
mahādeva jagannātha jagadānandadāyaka /
tvayā hataṃ mahādaityaṃ kadā drakṣyāmahe vayam

sthānabhraṣṭā vayaṃ tena kṛtā viśvavighātinā /
brahmovāca /
evaṃ devavacaḥ śrutvā pinākī niryayau mudā

gaṇeśaṃ manasā dhyāyanyuddhāya kṛtaniścayaḥ /
vegena bhavanaṃ prāpya devagaṃdharvasaṃyutaḥ

tāvacca daityaṃ cāraistu vṛttāntaḥ sannirūpitaḥ /
āgataḥ surasainyena yuddhāya girijāpatiḥ

tasya sainyānyana hṛyanta śastrairastraiśca kaṃcukaiḥ /
sa ca daityo mahānādo yuddhabhūṣaṇa bhūṣitaḥ

vīrānānandayāmāsa vāsaḥ sragbhūṣaṇairdhanaiḥ /
anekayānasaṃstheṣu yoddhṛṣu tripuraṃ svayam

āruroha mahādaityo nādayānvidiśo diśaḥ /
tato yuddhaṃ samabhavatsenayorubhayormahat

śastrairnānāvidhairbāṇairmarmabhedibhirāyasaiḥ /
asṛṅ nadī pravāho'bhūn mārgarodhanakārakaḥ

śastrāhatā babhuryodhāḥ puṣpitāḥ kiṃśukā iva /
kecicca dṛḍhavaireṇa jīvagrāhaṃ mamārayan

kecitkaceṣu dhṛtvaiva śirāṃsi cicchidurbalāt /
dhāvatāṃ rathivīrāṇāmaśvānāṃ kariṇāmapi

aṅghripātabhavo reṇu vyaniśe rodasī kṣaṇāt /
aṃdhakāre ghoratare na prājñāyata kiṃcana

cakrurevaṃ tadā yuddhaṃ vīrā nānāvidhā bhṛśam /
jīvitāśāṃ parityajya martavye kṛtaniścayāḥ

adṛśyanta mṛtā devā gate rajasi vāyunā /
vidrute surasainye ca harṣite ...

āyayau samaraślāghī vajrahastaḥ purandaraḥ /
śatakoṭiṃ nirīkṣyaiva dudruvurdaityadānavāḥ

sa vajrapātairasurāṃścūrṇayāmāsa vajrabhṛt /
tatyajurjīvitaṃ te tu caṇḍavajraprahārataḥ

kecicca bhagnacaraṇāḥ kecidbhagna śirodharāḥ /
kecidvidīrṇajaṭharāśchinnaskandha bhujāḥ pare

chinnāśvānāṃ ca vīrāṇāṃ vājināṃ rathināṃ tathā /
keṣāṃcidukho bhinnā jaṃghāsu ca hatāḥ pare

chinnagulphāḥ pare peturmiṣātpeturathāpare /
nihatānāmasṛkpātairjajñire nimnagā bahu

utsāhavardhanāsteṣāṃ vīrāṇāṃ jayakāṃkṣiṇām /
tataḥ śanairgarjamāno dadarśa tripurāsuraḥ

nihataṃ bahudhā sainyaṃ śakraṃ yoddhumathāyayau /
babhrāṇa śakraṃ dṛṣṭvaiva kimarthaṃ martumicchasi

apaihi yuddhājjīvaṃstvaṃ na puṣṭaṃ hanmi vāsava /
kā te śaktirmayā yuddhaṃ kartuṃ tava śacīpate

ajaḥ siṃhena kiṃ yuddhaṃ kariṣyati vadasva me /
ehi yuddhasva śaktiścennoced gaccha yathāsukham

evamukte sthite śakre vavṛṣe sāyakānbahūn /
sajyaṃ kṛtvā dhanurdaityo devasenāmatāḍayat

ekasmānmaṃtritād bāṇādasaṃkhyātā yayuḥ śarāḥ /
mṛdganto devagaṃdharvān rodasī samapūrayan

andhakāraṃ punarabhūd bāṇajālairnirantaram /
tad bāṇairapi te devā vyaṃgā: peturdharātale

balahā nyapatat bhūmau prahāreṇāvapīḍitaḥ /
sarveṣu devavaryeṣu mūrchiteṣu maheśvaraḥ

ślāghantaṃ bahugarjantaṃ yudhyantaṃ nābhyarocayat /
manasā'pūjayacchambhustasya daityasya pauruṣam

etasminnaṃtare tatra nārado dṛṣṭumāyayau /
pūjitaḥ prāvadacchambhuṃ śṛṇuṣva nīlalohita

nārada uvāca /
tvayā cintā na kartavyā tripurasya vadhaṃ prati /
vakṣye tasya vadhopāyaṃ taṃ kuruśva maheśvara

tena pūrvaṃ tapo'kāri duṣkaraṃ brahmaṇo'pi hi /
ārādhito gaṇapatiḥ sa tasmai sarvavāṃchitam

yadyattena vṛtaṃ devo dattavānavicāritam /
puratrayaṃ kāmagamamekabāṇāśritaṃ mahat

marudgativihīnaṃ tadabhedyaṃ sarvanirjaraiḥ /
sa eva muktavān guhyaṃ śareṇakena yastava

puratrayaṃ bhetsyate te tasmān mṛtyumavāpsyasi /
evamuktvā gate tasminnārade munisattame

mūrchitānvibudhān śarvaḥ sāvadhānamathā karot /
sasmārebhamukhaṃ vākyaṃ smārito nāradena tu

mahāprayatnamārebhe daityarājavadhāya saḥ /
tejasā sarvanāśāya śakto devo nijecchayā

rathaṃ kurūpaṃ śaśisūryacakraṃ, yantāramindīvarajaṃ cakāra /
dhanurgirīndraṃ śaramacyutaṃ sa dhuryāśvine yāvayujadgirīśaḥ

ācamya devaṃ manasā vicintya, tenopadiṣṭaṃ ca jajāpanāmnām /
sahasramekākṣaramantrayuktamamaṃtrayattena pinākabhugram

amantrayanmahābāṇaṃ viṣṇurupaṃ yadā śivaḥ /
cakampe dhāraṇī śeṣo vanāni girayo'pi ca

babhramuḥ khagaṇāḥ sarve cukūjuśca mahāravān /
śabdenājagavasyāpi bibhrāntāḥ suramānuṣāḥ

amuṃcattaṃ yadā bāṇaṃ tadā dagdhaṃ nabhastalam /
bhūmaṃḍalaṃ sapātālaṃ jvālāmālābhiraṃjasā

dṛṣṭvā papāla daityendraḥ sasainyaḥ purasaṃśrayaḥ /
javenāgāccharaḥ so'pya dahaddaityaṃ puratrayam

daityadehagataṃ tejo bhargaṃ dehe layaṃ yayau /
paśyatāṃ sarvasainyānāṃ daityadānavarakṣasām

tato'ntarikṣe vāgāsīn mukto daityaḥ śivāhataḥ/
tataste tuṣṭuvurdevā munayo'pi trilocanam

jagurgandharvanicayāścāraṇāḥ śrutitatparāḥ /
nanṛtuścāpsaraḥsaṃghāḥ kinnarā vādyavādakāḥ

mumucuḥ puṣpavarṣāṇi nāradādyāḥ surarṣayaḥ /
yayuḥ śivājñayā devāḥ svaṃ svaṃ sthānaṃ nirādhayaḥ

namaskṛtya maheśānaṃ tripurāsuraghātinam /
munayo'pi nirudvegāḥ svasvānuṣṭhānatatparā:

āsaṃstasminhate daitya vedavedāṃgaśālinaḥ /
agnihotrāṇi yajñāṃśca dānāni ca vratāni ca

cakruḥ sarvajanā bhūmau punarutsāhasaṃyutāḥ /
śailādi gaṇapaskandraiḥ sarvaiḥ pāriṣadairapi

kṛtāvanāmastrayakṣyo'pi vibhajya taṃ mahāratham/
jayaśabdaistūryaśabdairdevaduṃdubhiniḥsvanaiḥ

alaṃkṛtaṃ śailarājaṃ kailāsaṃ mudito yayau/
tripurāririti spaṣṭa tato nāmāsya paprathe

evaṃ mahāgaṇapatermantrasāmarthyamidamīritam /
sahasranāmnāmapi ca prabhāvo'yaṃ nirūpitaḥ

na vijñāto madanyena kasyāpi na niveditaḥ /
paṭhanācchravaṇādasya sarvakāmaphalaṃ labhet

( २०२१ )
iti śrīgaṇeśapurāṇa upāsanākhaṃḍe śivavijayonāma saptacatvāriṃśattamo'dhyāyaḥ

adhyāya ४८ prāraṃbha :-
vyāsa uvāca /
śrutaṃ mayā mahākhyānaṃ tripurasya vadhāśrayam/
tathāpi śrotumicchāmi kva sthitā jagadambikā

kathamāvirbabhūvaiṣā tithau dagdhaḥ kva daityarāṭ /
etatsarvaṃ savistāraṃ kathayasva pitāmaha

brahmovāca /
bāhule paurṇamāsyāṃ sa sāyaṃ dagdho mahāsuraḥ /
divāyuddhaṃ mahāghoraṃ prāgeva varṇitaṃ hi tat

yato'rcita: suraiḥ sarvairjayaśālī surārihā /
atastasyāṃ dīpadānaṃ kurvanti bhuvi mānavāḥ

tasyāṃ snānaṃ ca dānaṃ ca japahomādikaṃ ca yat /
bahulaṃ jāyate yasmāttasmātsā bāhulī smṛtā

tasyāṃ ye tu na kurvanti tripurārimahotsavam /
na labhaṃte jayaṃ kvāpi dagdhapuṇyā bhavanti te

atastasyāṃ paurṇamāsyāṃ prātararcanti ye śivam /
niśi yattaiḥ kṛtaṃ pāpaṃ vilayaṃ pratipadyate

ājanmataḥ kṛtaṃ pāpaṃ madhyāhnārcanatastathā /
saptajanmārjitaṃ pāpaṃ pradoṣārcanato mune

āvirbhāvaṃ śivāyāstvaṃ kathyamānaṃ mayā śṛṇu /
tasya mṛtyuṃ śivājjñātvā bhayādantarhitā śivā

āvirāsījjaganmātā himācalaguhāmukhāt /
dadarśa parvataṃ ghoraṃ siṃhavyāghramṛgākulam

apaśyantī śivaṃ sā tu virahākulamānasā /
vilalāpa bhṛśaṃ bhītā hā tāta hā śiveti ca

kathaṃ mām na vijānīṣe sarvajñaḥ sansadāśiva /
vana ekākinīṃ ghore kraṃdaṃtīṃ kurarīmiva

kadā me darśanaṃ te syāt kiṃ māṃ vismatavānasi /
śaktā na jīvitaṃ dhartuṃ soḍhuṃ vā virahaṃ hara

tāvattvamapi kutrāsi na me śokaṃ śṛṇoṣi kim /
tvāṃ vinā śaraṇaṃ kaṃ vā yāmi kiṃ vā karomyaham

yojayasva punarmāṃ tvaṃ śivena ca śivena ca /
idānīṃ punarutpannāṃ jānīha jaṭharāttava

varaṃ tameha śīghraṃ me gaveṣaya sadāśivay /
no ceddehaparityāgaṃ bhṛgorasmāt karomyaham

ka uvāca /
evaṃ rudantyāstasyāstu śrutvā tāṃ giramuttamām /
nyavedayaddhimavate kaścidāgatya dhīvaraḥ

dhīvara uvāca /
kācinnitambinī bālā sarvābharaṇabhūṣitā /
tāṭaṃke bibhratī śrutyormaṃḍale iva bhāsyataḥ

nānāratnalasaddīpti mukuṭaṃ mastake bhṛśam /
lalāṭe tu catuṣkoṇaṃ muktāṣoḍaśa śobhitam

puṣpaṃ kāṃcanaratnāḍhyaṃ muktādāmavilambitam /
sīmantāntargataṃ cāru nāsike svarṇamauktikam

aṃgade cāruṇī bāhvorhastayorvalayāni ca /
lasatkāṃcanaratnāḍhayaṃ pratyekamaṃgulīyakam

muktāphalamayīṃ mālāṃ lasatkaṃcuka saṃśritām /
hemaratnamayīṃ kāṃcīṃ kaṭī kṣaumāvṛte śubhām

gulphayoḥ śṛṃkhale haime siṃcaccāru sunūpare/
pādāṃgulīṣvapi pṛthak ttattadbhūṣaṇamuttamam

evaṃ sarvānavadyāṃgīṃ rūdatīṃ vihvalā bhṛśam /
druṣṭā pṛṣṭā na māṃ vakti gṛhṇāti sā tavābhidhām

brahmovāca/
itthaṃ niśamya himavāṃstvaritastāṃ sutāṃ yayo/
sāntvayanhetugarbhābhirvāgbhistāmavadatsudhīḥ

himavānuvāca/ kimarthaṃ śocase subhru sṛṣṭisthityantahetuke /
sarvalakṣaṇa saṃpūrṇe sarvaśaktiyute'naghe

akartumanyathākartuṃ kartumīśe maheśvari /
avāptasarvakāme ca sarvaprāṇyantaraṃ gate

na viyuktā śivena tvaṃ sarvāntaryāmiṇī śubhe /
athāpi yojayiṣye tvāṃ śivena śivakāriṇā

uttiṣṭheti gṛhītvā tāmāyayau nijamandiram /
nananda pārvatī tatra dṛṣṭvā menāṃ sutānvitām

niśvāsaparamā'pyāsīcchivaṃ draṣṭuṃ samutsukā/
uvāca pitaraṃ natvā sādhūpāyaṃ vadasva me

vrataṃ dānaṃ tapo vāpi duṣkaraṃ śivalabdhaye /
kariṣye tamahaṃ tāta pūrvavattapa uttamam

brahmovāca /
avadajjanakastāṃ tu vicārya manasā sakṛt /
kāryasiddhikaraṃ śīghramupāyaṃ śṛṇu taṃ mune

himavānuvāca /
śṛṇu pārvati vakṣyāmi sādhūpāyaṃ śivāptaye /
upāstiṃ vighnarājasya dharmārthakāmamokṣadām

anuṣṭhitāṃ mahendrādyairdevaiśca nāradādibhiḥ /
prāptāśca siddhayastāstāḥ śakrādi padalakṣaṇāḥ

brahmaṇaḥ sṛṣṭisāmarthyaṃ dattaṃ tena mahātmanā /
viṣṇoścāvanasāmarthyaṃ dattaṃ sarveśveraṇa ha

śivasyāpi ca tenaiva sāmarthyaṃ saṃhṛtau dṛḍham /
śeṣasyāpi ca tenaiva sarvavighnahareṇa ca

dharādharaṇasāmarthyaṃ dattaṃ sarveśvareṇa ha /
yasya svarūpaṃ na vidurbrahmādyā munayo'pi ca

vācāmagocaro yo'sau manaso'thāpyagocaraḥ /
gajānana svarūpeṇa paridṛṣyo'yamīśvaraḥ

atastenaiva rupeṇa sarvāraṃbheṣu pūjyate /
tamupāsasva sarveśaṃ mayā proktena vartmanā

( २०६० )
iti śrī gaṇeśapurāṇa upāsanākhaṃḍe ambāvirbhāvo nāmāṣṭacatvāriṃśattamo'dhyāyaḥ

adhyāya ४९ prāraṃbha :-
pārvatyuvāca /
dayānidhe girīndra tvaṃ pitarme vada satvaram /
upāsanāṃ gaṇeśasya sarveśasya jagadguro

yayā śivaṃ samabhyetya śivaṃ prāpsyāmi śāśvatam /
martyaloke'pi lokānāmupakāro bhaviṣyati

himavānuvāca /
tavasnehavaśāddevī rahasyaṃ paramaṃ śubham /
lokānāṃ copakārāya vakṣye śṛṇvekacetasā

pratyūṣakāla utthāya naiṛtīṃ diśamāvrajet /
ācchādya dharaṇīṃ pūrvaṃ tṛṇakāṣṭhadalairapi

urvarāṃ varjayettiṣṭhannutsarpaṃ ca buddhimān /
tyaktvā mūtrapurīṣe tu yathoktaṃ śaucamācaret

dantajihvā viśuddhiṃ ca kṛtvā snātuṃ tato vrajet /
nadīṃ taḍāgaṃ vāpīṃ vā saraḥ kūpamathāpi vā

kṛtvā pūrvaṃ malasnānaṃ mantrasnānaṃ tataścaret /
mṛdā vā candanenāpi tilakaṃ kuṃkumena vā

kuryāddhaute vāsasī vā paridhāya śubhāsane /
upaviśyaikacittastu sarvaṃ nityaṃ samāpya ca

mṛttikāṃ sundarāṃ snigdhāṃ kṣudrapāṣāṇavarjitām /
suviśuddhāmavalmīkāṃ jalasiktāṃ vimardayet

kṛtvā cārutarāṃ mūrtiṃ gaṇeśasya śubhāṃ svayam /
sarvāvayavasaṃpūrṇāṃ caturbhujavirājitām

paraśvādi svāyudhāni dadhatīṃ sundarāṃ ghanām /
sthāpya pīṭhe tataḥ pāṇī prakṣālya melayetsudhīḥ

pūjādravyāṇi sarvāṇī jalādīni prayatnataḥ /
aṣṭagaṃdhānakṣatāṃśca raktapuṣpāṇi guggulum

tripaṃcasaptabhiḥ patrairyutān dūrvāṃkurān śubhān /
aṣṭottaraśataṃ nīlā'n śvetānānīya sundarāna

ghṛtadīpaṃ tailadīpaṃ naivedyaṃ vividhaṃ śubham /
modakāpūpa laḍḍūkān pāyasaṃ śarkarāyutam

sūkṣmaṃ ca taṃdulānna ca vyaṃjanāni bahūni ca /
sacandrapūgacūrṇāḍhyaṃ khādyakhādirasaṃyutam

elālavaṃgasaṃmiśraṃ tāmbūlaṃ kesarānvitam /
jambvāmrapanasādīni drākṣārambhā balāni ca

tattadṛtubhava nīśe nārikelāni cānayet /
bahuprakāramārtikyaṃ kāṃcanīṃ dakṣiṇāṃ tathā

evaṃ saṃbhṛtasaṃbhāra ekāntasthalamāsthitaḥ /
cailājine kuśamaye āsane ca kṛtāsanaḥ

bhūtaśuddhiṃ prakurvīta prāṇānāṃ sthāpanaṃ tathā /
digbaṃdha pūrvaṃ devāṃśca gaṇeśādīnnametpurā

antarbahirmātṛkāśca nyasedāgama mārgataḥ /
sannidhāmādikā mudrā darśayedguru mārgataḥ /
mantranyāsaṃ tataḥ kṛtvā ṣaḍaṃganyāsameva ca

pūjādravyāṇi saṃśodhya tato dhyāyed gajānanam /
ekadantaṃ śūrpakarṇaṃ gajavaktraṃ caturbhujam

pāśāṃkuśadharaṃ devaṃ modakān bibhrataṃ karaiḥ /
raktapuṣpamayīṃ mālāṃ kaṃṭhe haste parāṃ śubhām

bhaktānāṃ varadaṃ siddhi buddhi buddhibhyāṃ sevitaṃ sadā /
siddhibuddhipradaṃ nṛṇām dharmārthakāmamokṣadam /
brahmarudraharīndrādyaiḥ saṃstutaṃ paramarṣabhiḥ

āgaccha jagadādhāra surāsuravarārcita /
anāthanātha sarvajña gīrvāṇa paripūjita

svarṇasiṃhāsane divyaṃ nānāratnasamanvitam /
samarpitaṃ mayā deva tatra tvaṃ samupāviśa

devadeveśa sarveśa sarvatīrthāhṛtaṃ jalam/
pādyaṃ gṛhāṇa gaṇapa gandhapuṣpākṣatairyutam

pravālamuktāphala putra ratna tāṃbūla jāṃbūnadamaṣṭagaṃdham /
puṣpākṣatāyuktamamoghaśakte, dattaṃ mayā'rghyaṃ saphalī kuruṣva

gaṃgādisarvatīrthebhyaḥ prārthitaṃ toyamuttamama /
karpūrailā lavaṃgādi vāsitaṃ svīkuru prabho

campakāśoka bakula mālatī mogarādibhiḥ /
vāsitaṃ snigdhatā hetu tailaṃ cāru pragṛhyatām

kāmadhenu samudbhūtaṃ sarveṣāṃ jīvanaṃ param/
pāvanaṃ yajñahetuste payaḥ snānārthamarpitam

dhenudugdhasamudbhūtaṃ śuddhaṃ sarvajana: priyam /
mayā''nītaṃ dadhivaraṃ snānārthaṃ pratigṛhyatāmū

navanīta samutpannaṃ sarvasaṃtoṣakāraṇam /
yajñāṃgaṃ devatāhāro ghṛtaṃ snātuṃ samarpitam

puṣpasāraghasaṃbhūtaṃ sarvatejovivardhanam /
sarvapuṣṭikaraṃ deva madhusnānārthamarpitam

ikṣusārasamudbhūtāṃ śarkarāṃ sumanoharām /
malāpahāriṇīṃ snātuṃ gṛhāṇa tvaṃ mayā'rpitām

sarvamādhuryatāhetuḥ svāduḥ sarvapriyaṃkaraḥ /
puṣṭikṛt snātumānīt ikṣusārabhavo guḍaḥ

kāṃsye kāṃsyena pihito dadhimadhvājyapūrita; /
madhuparko mayā''nītaḥ pūjārthaṃ pratigṛhyatām

sarvatīrthāhṛtaṃ toyaṃ mayā prārthanayā vibho /
suvāsitaṃ gṛhāṇedaṃ samyaksnātuṃ sureśvara

raktavastrayugaṃ deva lokalajjānivāraṇam /
anarghyamatisūkṣmaṃ ca gṛhāṇedaṃ mayārpitam

rājataṃ brahmasūtraṃ ca kāṃcanaṃ ratnasaṃyuktam/
bhaktyopapāditaṃ deva gṛhāṇa parameśvara

aneka ratnayuktāni bhūṣaṇāni bahūni ca /
tattadaṃge kāṃcanāni yojayāmi tavājñayā

aṣṭagandhā samāyuktaṃ raktacandanamuttamam /
dvādaśāṃgeṣu te deva lepayāmi kṛpāṃ kuru

raktacandanasaṃmiśrāstaṃdulāṃstilakopari /
śobhāya saṃpradāsyāmi gṛhāṇa jagadīśvara

pāṭalaṃ karṇikāraṃ ca baṃdhūkaṃ raktapaṃkajam /
mogaraṃ mālatīpuṣpaṃ gṛhyatāṃ parameśvara

nānā paṃkaja puṣpaiśca grathitāṃ pallavairapi /
bilvapatrayutāṃ mālāṃ gṛhāṇa sumanoharām

daśāṃgaṃ guggulaṃ dhūpaṃ sarvaṃ sauṃgaṃdhya kārakam /
sarvapāpakṣayakaraṃ tvaṃ gṛhāṇa mayā'rpitam

sarvajña sarvalokeṣa tamonāśanamuttamam /
gṛhāṇa maṃgalaṃ dīpa devadeva namo'stu te

nānā pakvānnasaṃyuktaṃ pāyasaṃ śarkarānvitam /
nānā vyaṃjanaśobhāḍhayaṃ śālyodanamanuttamam

dadhidugdhaghṛtairyuktaṃ lavaṃgailā samanvitam /
marīcicūrṇasahitaṃ kvathikā vaṭakānvitam

rājikādhānyasaṃyuktaṃ methīpiṣṭaṃ satakrakam /
hiṃgujīrakakūṣmāṃḍa marīci māṣa piṣṭakaiḥ

saṃpāditaiḥ supakvaiśca bharjitairvaṭakairyutam /
modakāpūpa laḍḍūka śaṣkulī maṃḍakādibhiḥ

parpaṭairapi saṃyuktaṃ naivedyamamṛtānvitam/
haridrā hiṃgulavaṇasahitaṃ sūpamuttamam

sasāmudraṃ gṛhāṇedaṃ bhojanaṃ kuru sādaram /
sutṛptikārakaṃ toyaṃ sugandhaṃ ca pibecchayā

tvayi tṛpte jagattṛptaṃ nityatṛpte mahātvani /
uttarāpośanārthaṃ te dadmi toyaṃ suvāsitam

mukhapāṇiviśuddhyarthaṃ punastoyaṃ dadāmi te /
dāḍimaṃ madhuraṃ nimbu jambvāmrapanasādikam

drākṣāraṃbhā phalaṃ pakvaṃ karkandhūḥ khārjuraṃ phalam /
nārikelaṃ ca nāriṃgamāṃjiraṃ jambiraṃ tathā

urvārukaṃ ca deveśa phalānyetāni gṛhyatām /
mukhapāṇiviśuddhyarthaṃ punastoyaṃ dadāmi te

gṛhāṇa candanaṃ cāru karāṃgodvartanaṃ śubham /
nānā parimala dravyairnirmitaṃ cūrṇamuttamam

sugandhi nāmakaṃ puṇya gandhi cāru pragṛhyatām /
cāru śālurasaṃbhūtaṃ vaṃśasārasamudbhavam

sīmantabhūṣaṇaṃ cūrṇaṃ lākṣāraṃjitamastu te /
sacandrapūga cūrṇāḍhyaṃ khādyakhādirasaṃyutam

elālavaṃgasaṃmiśraṃ tāmbūlaṃ kesarānvitam /
nyūnātirikta pūjāyāḥ saṃpūrṇaphalahetave

dakṣiṇāṃ kāṃcanīṃ deva sthāpayāmi tavāgrataḥ /
sitapītaistathā raktairjalajaiḥ kusumaiḥ śubhaiḥ

grathitāṃ sundarāṃ mālāṃ gṛhāṇa parameśvara /
haritāḥ śvetavarṇā vā paṃcatripatrasaṃyutāḥ

dūrvāṃkurā mayā dattā ekaviṃśatisaṃmitāḥ /
ekaviṃśatisaṃkhyākāḥ kuryāddeva pradakṣiṇāḥ

pade pade te deveśa naśyantu pātakāni me /
auduṃbare rājate vā kāṃsye kāṃcanasaṃbhave

pāge prakalpitān dīpāngṛhāṇa cakṣurarpakān /
paṃcārārti paṃcadīpairdīpitāṃ parameśvara

cārucandranibhaṃ dīpa gṛhāṇa vīcivāraṇam /
yathā'sya nekṣyate bhasma tathā pāpaṃ vināśaya

stotrairnānāvidhaiḥ sūktaiḥ sahasranāmabhistataḥ /
upaviśya stuvītainaṃ kṛtvā sthirataraṃ manaḥ

dīnādhīśa dayānidhe suragaṇaiḥ saṃsevyamāna dvija/
brahmeśāna mahendra śeṣa girijā gaṃdharva siddhaiḥ stuta /
sarvāriṣṭa nivāraṇaikanipuṇaḥ trailokyānāthaṃ prabho/
bhaktiṃ me saphalāṃ kuruṣva sakalāṃ kṣāntvā'parādhānmama

iti mūrtiṃ samabhyarcya daṃḍavatpraṇipatya ca /
japenmantraṃ tato devi sarvasiddhipradāyakam

( २१२९ )
iti śrīgaṇeśapurāṇa upāsanākhaṃḍe gaṇeśa pārthivapūjā nirūpaṇaṃ nāmaikonapaṃcāśattamo'dhyāyaḥ

adhyāya ५० prāraṃbha :-
pārvatyuvāca /
ahaṃ mantre na jānāmi girīndra me vada svayam /
anugrahaṃ gaṇeśasya yāmi yāmi śivaṃ śivam

himāvānuvāca /
mantrā nānāvidhā devi nānāsiddhipradāyakāḥ /
asaṃkhyātā gaṇeśasya kāṃścitteṣu vadāmi te

kṛtvā padmāsanaṃ samyaṅniyamya khāni sarvaśaḥ /
kṛtanyāsavidhiḥ paścājjapaṃ kuryānnijecchayā

ekākṣarasyamantrasya lakṣaṃ lakṣārdhameva ca /
ṣaḍakṣarasya mantrasya niyataṃ cāyutaṃ tathā

tathā paṃcākṣarasyāpi daśāṣṭākṣarayorapi /
aṣṭāviṃśadvarṇamantro japtavyo'yuta saṃkhyayā

evaṃ nānāvidhānmaṃtrāṃjjapanti sveṣṭasiddhaye /
tvaṃ tu pārvati me vākyaṃ śṛṇuṣvaikāgramānasā

ekākṣaraṃ ṣaḍarṇaṃ ca gṛhāṇa mantramuttamama /
nabhaḥ śuklacaturthyāṃ tvamārambhaṃ kuru suvrate

anuṣṭhānaṃ māsamātraṃ kuru kāryaṃ bhaviṣyati /
śivaṃ prāpsyasi suvyaktamanyadyaccāpi vāṃchitam

pārthivī pūjitā mūrtiḥ striyā vā puruṣeṇa vā /
ekā dadāti sā kāmyaṃ dhanaputrapaśūnapi

asādhyaṃ sādhayenmartyo mūrtidvayaprapūjanāt /
trimūrti pūjanādrājyaṃ ratnāni sarvasampadaḥ

caturmūrtiḥ pūjayedyo dharmārthaṃ kāma mokṣabhāk /
sārvabhaumo bhavedrājā paṃcamūrti prapūjanāt

ṣaṇmūrtipūjayā sṛṣṭi sthiti pralayakṛd bhavet /
saptāṣṭa nava mūrtīnāṃ pūjayā sarvavidbhavet

bhūtaṃ bhavyaṃ bhaviṣyaṃ ca vetti devaprasādataḥ /
trayastriṃśatkoṭi devā vahnīndra śivaviṣṇavaḥ

sanakādyā munigaṇāḥ sevante daśapūjanāt /
ekādaśārcanādeva daśarudrādhipo bhavet

dvādaśāditya rājyaṃ ca labhecca dvādaśārcanāt /
atisaṃkaṭavelāsu kuryād vṛddhyā prapūjanam

aṣṭottaraśataṃ yāvattāvattattadavāpnuyāt /
mahāmuktimavāpnoti lakṣapūjanato'nvaham

kārāgṛhānmuktikāmaḥ kārayenmūrtipaṃcakam /
triḥsapta rātrānmucyeta gaṇeśānugrahānmune

saptamūrtī: prakurvīta pratyahaṃ paṃcavatsaram /
mahāpāpātpramucyeta gaṇeśe bhaktimānnaraḥ

ājanma maraṇādekāṃ pūjayetpārthivī naraḥ /
gaṇeśa: sa tu vijñeyo darśanādvighnanāśanaḥ

tameva sarvakāmeṣa pūjayenna gaṇādhipama /
tasyaiva pūjayā prīto na devaḥsyāttathā svayama

sarvarogaprapīḍāsu mūrtīnāṃ trayamuttamam /
navāhaṃ pūjayedyastu sarvapīḍāṃ vyapohati

sauvarṇī rājatī tāmrī rītikāṃsyasamudbhavā /
mauktikī ca pravālī ca sarvametatprayacchati

evaṃ kṛte vrate devi sarvānkāmānavāpsyasi /
yāvadbhādrapade māsi caturthī parilabhyate

tasyāṃ mahotsavaḥ kāryo yathāvibhavamādarāt /
rātrau jāgaraṇaṃ kāryaṃ tatkathāvādyagāyanaiḥ

prabhāte vimale snātvā pūrvavatpūjayedvibhum /
gaṇeśaṃ varadaṃ devaṃ tato homaṃ samārabhet

kuṃḍe sāṃgaṃ sthaṃḍile vā hūyājjapa daśāṃśataḥ /
pūrṇāhutiṃ tataḥ kuryād balidānapuraḥsaram

ācāryaṃ pūjayet paścād gobhvāsodhanādibhiḥ /
brāhmaṇāṃ stoṣayet paścāddhomaśeṣaṃ samāpayet

tarpayettaddaśāṃśena taddaśāṃśena bhojayet /
brāhmaṇānvedaviduṣaḥ sapatnīkāṃśca kāṃścana

tebhyo bhūṣaṇavāsāṃsi dadyācchaktyā ca dakṣiṇām /
dadyāt strīṇāmalaṃkārān yoṣidbhyaśca sakuṃcukān

tuṣṭaye gaṇanāthasya siddhibuddhiyutasya ha /
vittaśāṭhyaṃ na kurvīta yathāvibhavamācaret

tataḥ suhṛjjanayutaḥ svayaṃ bhuṃjīta sādaram /
aparasmindine mūrtiṃ nṛyāne sthāpayenmudā

chatradhvajapatākābhiścāmarairupaśobhitām /
kiśorairdaṇḍayuddhena yudhyadbhiśca puraḥsaram

mahājalāśayaṃ gatvā visṛjya ninayejjale/
vādyagītadhvaniyuto nijamandiramāvrajet

( २१६२)
iti śrī gaṇeśapurāṇa upāsanākhaṃḍe himavadgirijā saṃvāde caturthīvratakathanaṃ nāma paṃcāśattamo'dhyāyaḥ