Ganesha Purana · Chapter 1.11

// athaikādaśo'dhyāyaḥ //
bhṛguruvāca //
jagādabhūyaścaturānanastamevaṃ kṛta praśna vivakṣayātha /
krameṇa sarvaṃ kathayāmitehaṃ gaṇeśa mantrānbahudhā vicārya

brahmovāca //
anantā hi mune mantrā gaṇeśasya mahātmanaḥ /
upāsanaṃ vadiṣyāmi śīghraṃ siddhikarasya te

saptakoṭi mahāmantrā gaṇeśasyāgamesthitāḥ /
tadrahasyaṃ śivovedakiñcikiñcidahaṃ mune

ṣaḍakṣaraikākṣarayoḥ śreṣṭhatvaṃ teṣu vidyate /
yayoḥ smaraṇamātreṇa sarvasiddhiḥkare bhavet

jīvanmuktābhavantyeva yadupāsanayā mune /
ta eva dhanyāste pūjyāstenamasyāḥ surairapi

yadupāsanayādāsyaṃ yeṣāṃ kurvanti siddhayaḥ /
icchāvihārāḥ sarvajñā nānārūpā bhavanti te

ye kurvanti gaṇeśasya bhaktiṃ bhāvasamanvitāḥ /
na yeṣāṃ bhaktileśopi teṣāṃ janma nirarthakam

nālokayen mukhaṃ teṣāṃ vimukhā ye gajānane /
teṣāṃ darśanamātreṇa vighnānisyuḥ pade pade

vighnānyupaśamaṃ yānti tadupāsaka darśanāt /
namasyanti ca bhūtāni sthāvarāṇi carāṇi ca

atastehaṃ pravakṣyāmi mantramekākṣaraṃ śubham /
tadanuṣṭhāna mātreṇa vāñchitaṃ samavāpsyasi

anuṣṭhānaṃ pravakṣyāmi yathoktaṃ śambhunā mama /
snānaṃ kṛtvā dhautavastre paridhāya śucirnaraḥ

cailājinakuśaiḥkṛtvā svāsanaṃ sādhakaḥ sudhīḥ /
tasmin sthitvā bhūtasuddhiṃ prāṇānāṃ sthāpanaṃ tathā

antarbahirmātṛkāṇāṃ nyāsaṃ kṛtvātvatandritaḥ /
prāṇāyāmaṃ tataḥ kṛtvā mūlamantraṃ japan hṛdi

mantra sandhyāmupāsīta āgamoktāṃ yathāvidhi /
āpādamastakaṃ devaṃ dhyātvāniścalacetasā

mānasairupacāraistaṃ pūjayetsusamāhitaḥ /
tato japedyathāśakti puraścaraṇamārgataḥ

anukūlobhavedyāvadvaraṃ dātuṃ gajānanaḥ /
svarūpaṃ darśayedyāvattāvajjapaparo bhavet

bhṛguruvāca //
evamuktvā muniṃ brahmā vilokya śubhavāsaram /
ekākṣaraṃ mantrarājamekārṇaṃ gaṇapasya ca

aśikṣayattadā sarvaṃ sambhrāntaṃ munisattamam /
brahmovāca //
sūryakoṭipratīkāśaṃ varaṃ dātuṃ samāgamat

yadādrakṣyasitaṃ devaṃ tadācittaṃ sthirī kuru /
mamaiva hṛdaye nityaṃ sthiro bhava gajānana

yācasveti varaṃ tasmāt sa te dāsyatya saṃśayam /
hṛdisthite tatra deve divyaṃ jñānamavāpsyasi

bhūtaṃ bhāvi bhavadghaiva jñāsyasi tvamaśeṣataḥ /
hitvā bhrāntiṃ dṛḍhāṃ vatsa nānāgranthān kariṣyati

vyāsa uvāca //
gatā bhrāntirmamapitarupadeśe kṛte tvayā /
anuṣṭhānaṃ kariṣyāmi pitāmaha tavājñayā

brahmovāca //
ekānte nirjane deśe vyagratā hetu varjite /
anuṣṭhānaṃ kuruvibho gajānanamanusmaran

nāstike nindake krūre nācāre ca khale śaṭhe /
na vaktavyo mantrarājastādṛśe śaraṇāgate

dṛḍhabhaktau śraddadhāne vinīte vedavādini /
sākāṃkṣeniranukrośe śāstrajñe ca prakāśaya

prāpayatyeva narakān daśapūrvān daśāparān /
mantrarājastu vaktāramaprakāśyeprakāśitaḥ

yojayedbhaktipūrvaṃ tu sa labhedīpsitaṃ phalam /
putrapautrasamāyukto dhanadhānyasamanvitaḥ

ekadanta prabhāvena labdhvājñānaṃ sunirmalam /
iha bhuktvākhilān bhogānante mokṣamavāpnuyāt

/
/ iti śrīgaṇeśapurāṇe upāsanākhaṇḍe mantrakathanaṃ nāmaikādaśo'dhyāyaḥ