Scripture Library

Devi Bhagavata Purana · Chapter 9.7

9.7.1

gaṅ‌gādīnāṃ śāpoddhāravarṇanam
śrīnārāyaṇa uvāca
ityuktvā jagatāṃ nātho virarāma ca nārada /
atīva rurudurdevyaḥ samāliṅ‌gya parasparam

9.7.2

tāśca sarvāḥ samālokya krameṇocustadeśvaram /
kampitāḥ sāśrunetrāśca śokena ca bhayena ca

9.7.3

sarasvatyuvāca
viśāpaṃ dehi he nātha duṣṭamājanmaśocanam /
satsvāminā parityaktāḥ kuto jīvanti tāḥ striyaḥ

9.7.4

dehatyāgaṃ kariṣyāmi yogena bhārate dhruvam /
atyunnato hi niyataṃ pātumarhati niścitam

9.7.5

gaṅ‌govāca
ahaṃ kenāparādhena tvayā tyaktā jagatpate /
dehatyāgaṃ kariṣyāmi nirdoṣāyā vadhaṃ labha

9.7.6

nirdoṣakāminītyāgaṃ karoti yo naro bhuvi /
sa yāti narakaṃ ghoraṃ kintu sarveśvaro'pi vā

9.7.7

padmovāca
nātha sattvasvarūpastvaṃ kopaḥ kathamaho tava /
prasādaṃ kuru bhārye dve sadīśasya kṣamā varā

9.7.8

bhārate bhāratīśāpādyāsyāmi kalayā hyaham /
kiyatkālaṃ sthitistatra kadā drakṣyāmi te padam

9.7.9

dāsyanti pāpinaḥ pāpaṃ sadyaḥ snānāvagāhanāt /
kena tena vimuktāhamāgamiṣyāmi te padam

9.7.10

kalayā tulasīrūpaṃ dharmadhvajasutā satī /
bhuktvā kadā labhiṣyāmi tvatpādāmbujamacyuta

9.7.11

vṛkṣarūpā bhaviṣyāmi tvadadhiṣṭhātṛdevatā /
samuddhariṣyasi kadā tanme brūhi kṛpānidhe

9.7.12

gaṅ‌gā sarasvatīśāpādyadi yāsyati bhārate /
śāpena muktā pāpācca kadā tvāṃ ca labhiṣyati

9.7.13

gaṅ‌gāśāpena vā vāṇī yadi yāsyati bhāratam /
kadā śāpādvinirmucya labhiṣyati padaṃ tava

9.7.14

tāṃ vāṇīṃ brahmasadanaṃ gaṅ‌gāṃ vā śivamandiram /
gantuṃ vadasi he nātha tatkṣamasva ca te vacaḥ

9.7.15

ityuktvā kamalā kāntapādaṃ dhṛtvā nanāma sā /
svakeśairveṣṭanaṃ kṛtvā ruroda ca punaḥ punaḥ

9.7.16

(uvāca padmanābhastāṃ padmāṃ kṛtvā svavakṣasi /
īṣaddhāsyaprasannāsyo bhaktānugrahakātaraḥ //) //
śrībhagavānuvāca
tvadvākyamācariṣyāmi svavākyaṃ ca sureśvari /
samatāṃ ca kariṣyāmi śṛṇu tvaṃ kamalekṣaṇe

9.7.17

bhāratī yātu kalayā sarid‌rūpā ca bhārate /
ardhā sā brahmasadanaṃ svayaṃ tiṣṭhatu mad‌gṛhe

9.7.18

bhagīrathena sā nītā gaṅ‌gā yāsyati bhārate /
pūtaṃ kartuṃ tribhuvanaṃ svayaṃ tiṣṭhatu mad‌gṛhe

9.7.19

tatraiva candramauleśca mauliṃ prāpsyati durlabham /
tataḥ svabhāvataḥ pūtāpyatipūtā bhaviṣyati

9.7.20

kalāṃśāṃśena gaccha tvaṃ bhārate vāmalocane /
padmāvatī sarid‌rūpā tulasīvṛkṣarūpiṇī

9.7.21

kaleḥ pañcasahasre ca gate varṣe tu mokṣaṇam /
yuṣmākaṃ saritāṃ caiva mad‌gehe cāgamiṣyatha

9.7.22

sampadā hetubhūtā ca vipattiḥ sarvadehinām /
vinā vipattermahimā keṣāṃ padmabhave bhavet

9.7.23

manmantropāsakānāṃ ca satāṃ snānāvagāhanāt /
yuṣmākaṃ mokṣaṇaṃ pāpāddarśanātsparśanāttathā

9.7.24

pṛthivyāṃ yāni tīrthāni santyasaṃkhyāni sundari /
bhaviṣyanti ca pūtāni mad‍bhaktasparśadarśanāt

9.7.25

manmantropāsakā bhaktā vibhramanti ca bhārate /
pūtaṃ kartuṃ tārituṃ ca supavitrāṃ vasundharām

9.7.26

mad‍bhaktā yatra tiṣṭhanti pādaṃ prakṣālayanti ca /
tatsthānaṃ ca mahātīrthaṃ supavitraṃ bhaved‌dhruvam

9.7.27

strīghno goghnaḥ kṛtaghnaśca brahmaghno gurutalpagaḥ /
jīvanmukto bhavetpūto mad‍bhaktasparśadarśanāt

9.7.28

ekādaśīvihīnaśca sandhyāhīno'tha nāstikaḥ /
naraghātī bhavetpūto mad‍bhaktasparśadarśanāt

9.7.29

asijīvī masījīvī dhāvako grāmayācakaḥ /
vṛṣavāho bhavetpūto mad‍bhaktasparśadarśanāt

9.7.30

viśvāsaghātī mitraghno mithyāsākṣyasya dāyakaḥ /
sthāpyāhārī bhavetpūto mad‍bhaktasparśadarśanāt

9.7.31

atyugravāndūṣakaśca jārakaḥ puṃścalīpatiḥ /
pūtaśca vṛṣalīputro mad‍bhaktasparśadarśanāt

9.7.32

śūdrāṇāṃ sūpakāraśca devalo grāmayājakaḥ /
adīkṣito bhavetpūto mad‍bhaktasparśadarśanāt

9.7.33

pitaraṃ mātaraṃ bhāryāṃ bhrātaraṃ tanayaṃ sutām /
guroḥ kulaṃ ca bhaginīṃ cakṣurhīnaṃ ca bāndhavam

9.7.34

śvaśrūṃ ca śvaśuraṃ caiva yo na puṣṇāti sundari /
sa mahāpātakī pūto mad‍bhaktasparśadarśanāt

9.7.35

aśvatthanāśakaścaiva mad‍bhaktanindakastathā /
śūdrānnabhojī vipraśca pūto mad‍bhaktadarśanāt

9.7.36

devadravyāpahārī ca vipradravyāpahārakaḥ /
lākṣāloharasānāṃ ca vikretā duhitustathā

9.7.37

mahāpātakinaścaiva śūdrāṇāṃ śavadāhakaḥ /
bhaveyurete pūtāśca mad‍bhaktasparśadarśanāt

9.7.38

mahālakṣmīruvāca
bhaktānāṃ lakṣaṇaṃ brūhi bhaktānugrahakātara /
yeṣāṃ tu darśanasparśātsadyaḥ pūtā narādhamāḥ

9.7.39

haribhaktivihīnāśca mahāhaṅ‌kārasaṃyutaḥ /
svapraśaṃsāratā dhūrtāḥ śaṭhāśca sādhunindakāḥ

9.7.40

punanti sarvatīrthāni yeṣāṃ snānāvagāhanāt /
yeṣāṃ ca pādarajasā pūtā pādodakānmahī

9.7.41

yeṣāṃ saṃdarśanaṃ sparśaṃ ye vā vāñchanti bhārate /
sarveṣāṃ paramo lābho vaiṣṇavānāṃ samāgamaḥ

9.7.42

na hyammayāni tīrthāni na devā mṛcchilāmayāḥ /
te punantyapi kālena viṣṇubhaktāḥ kṣaṇādaho

9.7.43

sūta uvāva
mahālakṣmīvacaḥ śrutvā lakṣmīkāntaśca sasmitaḥ /
nigūḍhatattvaṃ kathitumapi śreṣṭhopacakrame

9.7.44

śrībhagavānuvāca
bhaktānāṃ lakṣaṇaṃ lakṣmi gūḍhaṃ śrutipurāṇayoḥ /
puṇyasvarūpaṃ pāpaghnaṃ sukhadaṃ bhuktimuktidam

9.7.45

sārabhūtaṃ gopanīyaṃ na vaktavyaṃ khaleṣu ca /
tvāṃ pavitrāṃ prāṇatulyāṃ kathayāmi niśāmaya

9.7.46

guruvaktrādviṣṇumantro yasya karṇe patiṣyati /
vadanti vedāstaṃ cāpi pavitraṃ ca narottamam

9.7.47

puruṣāṇāṃ śataṃ pūrvaṃ tathā tajjanmamātrataḥ /
svargasthaṃ narakasthaṃ vā muktimāpnoti tatkṣaṇāt

9.7.48

yaiḥ kaiścidyatra vā janma labdhaṃ yeṣu ca jantuṣu /
jīvanmuktāstu te pūtā yānti kāle hareḥ padam

9.7.49

mad‍bhaktiyukto martyaśca sa mukto mad‌guṇānvitaḥ /
mad‌guṇādhīnavṛttiryaḥ kathāviṣṭaśca santatam

9.7.50

mad‌guṇaśrutimātreṇa sānandaḥ pulakānvitaḥ /
sagad‌gadaḥ sāśrunetraḥ svātmavismṛta eva ca

9.7.51

na vāñchati sukhaṃ muktiṃ sālokyādicatuṣṭayam /
brahmatvamamaratvaṃ vā tadvāñchā mama sevane

9.7.52

indratvaṃ ca manutvaṃ ca brahmatvaṃ ca sudurlabham /
svargarājyādibhogaṃ ca svapne'pi ca na vāñchati

9.7.53

bhramanti bhārate bhaktāstādṛgjanma sudurlabham /
mad‌guṇaśravaṇāḥ śrāvyagānairnityaṃ mudānvitāḥ

9.7.54

te yānti ca mahīṃ pūtvā naraṃ tīrthaṃ mamālayam /
ityevaṃ kathitaṃ sarvaṃ padme kuru yathocitam /
tadājñayā tāstaccakrurharistasthau sukhāsane

9.7.7

iti śrīmaddevībhāgavate mahāpūrāṇe'ṣṭādaśasāhasryāṃ sahitāyāṃ navamaskandhe
gaṅ‌gādīnāṃ śāpoddhāravarṇanaṃ nāma saptamo'dhyāyaḥ

Original text: devībhāgavatapurāṇam · Sanskrit Wikisource contributors · Sanskrit Wikisource · CC BY-SA 4.0