Devi Bhagavata Purana · Chapter 9.6

lakṣmīgaṅ‌gāsarasvatīnāṃ bhūloke'vataraṇavarṇanam
śrīnārāyaṇa uvāca
sarasvatī tu vaikuṇṭhe svayaṃ nārāyaṇāntike /
gaṅ‌gāśāpena kalahātkalayā bhārate sarit

puṇyadā puṇyarūpā ca puṇyatīrthasvarūpiṇī /
puṇyavad‌bhirniṣevyā ca sthitiḥ puṇyavatāṃ mune

tapasvināṃ taporūpā tapasaḥ phalarūpiṇī /
kṛtapāpedhmadāhāya jvaladagnisvarūpiṇī

jñānātsarasvatītoye mṛtā ye mānavā bhuvi /
teṣāṃ sthitiśca vaikuṇṭhe suciraṃ harisaṃsadi

bhārate kṛtapāpaśca snātvā tatra ca līlayā /
mucyate sarvapāpebhyo viṣṇuloke vasecciram

cāturmāsyāṃ paurṇamāsyāmakṣayāyāṃ dinakṣaye /
vyatīpāte ca grahaṇe'nyasminpuṇyadine'pi ca

anuṣaṅ‌geṇa yaḥ snāto hetunā śraddhayāpi vā /
sārūpyaṃ labhate nūnaṃ vaikuṇṭhe sa harerapi

sarasvatīmanuṃ tatra māsamekaṃ ca yo japet /
mahāmūrkhaḥ kavīndraśca sa bhavennātra saṃśayaḥ

nityaṃ sarasvatītoye yaḥ snāyānmuṇḍayannaraḥ /
na garbhavāsaṃ kurute punareva sa mānavaḥ

ityevaṃ kathitaṃ kiñcid‍bhāratīguṇakīrtanam /
sukhadaṃ kāmadaṃ sāraṃ bhūyaḥ kiṃ śrotumicchasi

sūta uvāca
nārāyaṇavacaḥ śrutvā nārado munisattamaḥ /
punaḥ papraccha sandehamimaṃ śaunaka satvaram

nārada uvāca
kathaṃ sarasvatī devī gaṅ‌gāśāpena bhārate /
kalayā kalahenaiva babhūva puṇyadā sarit

śravaṇe śrutisārāṇāṃ vardhate kautukaṃ mama /
kathāmṛtena me tṛptiḥ kena śreyasi tṛpyate

kathaṃ śaśāpa sā gaṅ‌gā pūjitāṃ tāṃ sarasvatīm /
sā tu sattvasvarūpā yā puṇyadā śubhadā sadā

tejasvinordvayorvādakāraṇaṃ śrutisundaram /
sudurlabhaṃ purāṇeṣu tanme vyākhyātumarhasi

śrīnārāyaṇa uvāca
śṛṇu nārada vakṣyāmi kathāmetāṃ purātanīm /
yasyāḥ śravaṇamātreṇa sarvapāpātpramucyate

lakṣmīḥ sarasvatī gaṅ‌gā tisro bhāryā harerapi /
premṇā samāstāstiṣṭhanti satataṃ harisannidhau

cakāra saikadā gaṅ‌gā viṣṇormukhanirīkṣaṇam /
sasmitā ca sakāmā ca sakaṭākṣaṃ punaḥ punaḥ

vibhurjahāsa tadvaktraṃ nirīkṣya ca kṣaṇaṃ tadā /
kṣamāṃ cakāra tad‌ dṛṣṭvā lakṣmīrnaiva sarasvatī

bodhayāmāsa padmā tāṃ sattvarūpā ca sasmitā /
krodhāviṣṭā ca sā vāṇī na ca śāntā babhūva ha

uvāca vāṇī bhartāraṃ raktāsyā raktalocanā /
kupitā kāmavegena śaśvatprasphuritādharā

sarasvatyuvāca
sarvatra samatābuddhiḥ sad‍bhartuḥ kāminīṃ prati /
dharmiṣṭhasya variṣṭhasya viparītā khalasya ca

jñātaṃ saubhāgyamadhikaṃ gaṅ‌gāyāṃ te gadādhara /
kamalāyāṃ ca tattulyaṃ na ca kiñcinmayi prabho

gaṅ‌gāyāḥ padmayā sārdhaṃ prītiścāsti susammatā /
kṣamāṃ cakāra tenedaṃ viparītaṃ haripriyā

kiṃ jīvanena me'traiva durbhagāyāśca sāmpratam /
niṣkalaṃ jīvanaṃ tasyā yā patyuḥ premavañcitā

tvāṃ sarve sattvarūpaṃ ca ye vadanti manīṣiṇaḥ /
te ca mūrkhā na vedajñā na jānanti matiṃ tava

sarasvatīvacaḥ śrutvā dṛṣṭvā tāṃ kopasaṃyutām /
manasā ca samālocya sa jagāma bahiḥ sabhām

gate nārāyaṇe gaṅ‌gāmuvāca nirbhayaṃ ruṣā /
vāgadhiṣṭhātṛdevī sā vākyaṃ śravaṇaduṣkaram

he nirlajje he sakāme svāmigarvaṃ karoṣi kim /
adhikaṃ svāmisaubhāgyaṃ vijñāpayitumicchasi

mānacūrṇaṃ kariṣyāmi tavādya harisannidhau /
kiṃ kariṣyati te kānto mamaivaṃ kāntavallabhe

ityevamuktvā gaṅ‌gāyāḥ keśaṃ grahītumudyatā /
vārayāmāsa tāṃ padmā madhyadeśaṃ samāśritā

śaśāpa vāṇī tāṃ padmāṃ mahābalavatī satī /
vṛkṣarūpā sarid‌rūpā bhaviṣyasi na saṃśayaḥ

viparītaṃ tato dṛṣṭvā kiñcinno vaktumarhasi /
santiṣṭhati sabhāmadhye yathā vṛkṣo yathā sarit

śāpaṃ śrutvā tu sā devī na śaśāpa cukopa ha /
tatraiva duḥkhitā tasthau vāṇīṃ dhṛtvā kareṇa ca

asantuṣṭāṃ tu tāṃ dṛṣṭvā kopaprasphuritādharām /
uvāca gaṅ‌gā tāṃ devīṃ padmāṃ cāraktalocanām

gaṅ‌govāca
tvamutsṛja mahogrāṃ ca padme kiṃ me kariṣyati /
duḥśīlā mukharā naṣṭā nityaṃ vācālarūpiṇī

vāgadhiṣṭhātrī devīyaṃ satataṃ kalahapriyā /
yāvatī yogyatā cāsyā yāvatī śaktireva ca

tathā karotu vādaṃ ca mayā sārdhaṃ ca durmukhī /
svabalaṃ yanmama balaṃ vijñāpayitumicchati

jānantu sarve hyubhayoḥ prabhāvaṃ vikramaṃ sati /
ityevamuktvā sā devī vāṇyai śāpaṃ dadāviti

sariktyarūpā bhavatu sā yā tvāṃ ca śaśāpa ha /
adhomartyaṃ sā prayātu santi yatraiva pāpinaḥ

kalau teṣāṃ ca pāpāni grahīṣyati na saṃśayaḥ /
ityevaṃ vacanaṃ śrutvā tāṃ śaśāpa sarasvatī

tvameva yāsyasi mahīṃ pāpipāpaṃ labhiṣyasi /
etasminnantare tatra bhagavānājagāma ha

caturbhujaścaturbhiśca pārṣadaiśca caturbhujaiḥ /
sarasvatīṃ kare dhṛtvā vāsayāmāsa vakṣasi

bodhayāmāsa sarvajñaḥ sarvajñānaṃ purātanam /
śrutvā rahasyaṃ tāsāṃ ca śāpasya kalahasya ca

uvāca duḥkhitāstāśca vācaṃ sāmayikīṃ vibhuḥ /
śrībhagavānuvāca
lakṣmi tvaṃ kalayā gaccha dharmadhvajagṛhaṃ śubhe

ayonisambhavā bhūmau tasya kanyā bhaviṣyasi /
tatraiva daivadoṣeṇa vṛkṣatvaṃ ca labhiṣyasi

madaṃśasyāsurasyaiva śaṅ‌khacūḍasya kāminī /
bhūtvā paścācca matpat‍nī bhaviṣyasi na saṃśayaḥ

trailokyapāvanī nāmnā tulasīti ca bhārate /
kalayā ca sarid‍bhāvaṃ śīghraṃ gaccha varānane

bhārataṃ bhāratīśāpānnāmnā padmāvatī bhava /
gaṅ‌ge yāsyasi paścāttvamaṃśena viśvapāvanī

bhārataṃ bhāratīśāpātpāpadāhāya pāpinām /
bhagīrathasya tapasā tena nītā sukalpite

nāmnā bhāgīrathī pūtā bhaviṣyasi mahītale /
madaṃśasya samudrasya jāyā jāyermamājñayā

matkalāṃśasya bhūpasya śantanośca sureśvari /
gaṅ‌gāśāpena kalayā bhārataṃ gaccha bhārati

kalahasya phalaṃ bhuṃkṣva sapat‍nībhyāṃ sahācyute /
svayaṃ ca brahmasadane brahmaṇaḥ kāminī bhava

gaṅ‌gā yātu śivasthānamatra padmaiva tiṣṭhatu /
śāntā ca krodharahitā mad‍bhaktā sattvarūpiṇī

mahāsādhvī mahābhāgā suśīlā dharmacāriṇī /
yadaṃśakalayā sarvā dharmiṣṭhāśca pativratāḥ

śāntarūpāḥ suśīlāśca prativiśveṣu pūjitāḥ /
tisro bhāryāstriśīlāśca trayo bhṛtyāśca bāndhavāḥ

dhruvaṃ vedaviruddhāśca na hyete maṅ‌galapradāḥ /
strīpuṃvacca gṛhe yeṣāṃ gṛhiṇāṃ strīvaśaḥ pumān

niṣphalaṃ ca janma teṣāmaśubhaṃ ca pade pade /
mukhe duṣṭā yoniduṣṭā yasya strī kalahapriyā

araṇyaṃ tena gantavyaṃ mahāraṇyaṃ gṛhādvaram /
jalānāṃ ca sthalānāṃ ca phalānāṃ prāptireva ca

satataṃ sulabhā tatra na teṣāṃ gṛha eva ca /
varamagnau sthitirhiṃsrajantūnāṃ sannidhau sukham

tato'pi duḥkhaṃ puṃsāṃ ca duṣṭastrīsannidhau dhruvam /
vyādhijvālā viṣajvālā varaṃ puṃsāṃ varānane

duṣṭastrīṇāṃ mukhajvālā maraṇādatiricyate /
puṃsāṃ ca strījitāṃ caiva bhasmāntaṃ śaucamadhruvam

yadahni kurute karma na tasya phalabhāgbhavet /
nindito'tra paratraiva sarvatra narakaṃ vrajet

yaśaḥkīrtivihīno yo jīvannapi mṛto hi saḥ /
bahvīnāṃ ca sapat‍nīnāṃ naikatra śreyase sthitiḥ

ekabhāryaḥ sukhī naiva bahubhāryaḥ kadācana /
gaccha gaṅ‌ge śivasthānaṃ brahmasthānaṃ sarasvati

atra tiṣṭhatu mad‌gehe suśīlā kamalālayā /
susādhyā yasya pat‍nī ca suśīlā ca pativratā

iha svarge sukhaṃ tasya dharmo mokṣaḥ paratra ca /
pativratā yasya pat‍nī sa ca muktaḥ śuciḥ sukhī /
jīvanmṛto'śucirduḥkhī duḥśīlāpatireva ca

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ navamaskandhe
lakṣmīgaṅ‌gāsarasvatīnāṃ bhūloke'vataraṇavarṇanaṃ nāma ṣaṣṭho'dhyāyaḥ