Devi Bhagavata Purana · Chapter 9.49

surabhyupākhyānavarṇanam
nārada uvāca
kā vā sā surabhirdevī golokādāgatā ca yā /
tajjanmacaritaṃ brahmañchrotumicchāmi yat‍nataḥ

śrīnārāyaṇāya uvāca
gavāmadhiṣṭhātṛdevī gavāmādyā gavāṃ prasūḥ /
gavāṃ pradhānā surabhirgoloke sā samud‍bhavā

sarvādisṛṣṭeścaritaṃ kathayāmi niśāmaya /
babhūva tena tajjanma purā vṛndāvane vane

ekadā rādhikānātho rādhayā saha kautukī /
gopāṅ‌ganāparivṛtaḥ puṇyaṃ vṛndāvanaṃ yayau

sahasā tatra rahasi vijahāra sa kautukāt /
babhūva kṣīrapānecchā tasya svecchāmayasya ca

sasṛje surabhiṃ devīṃ līlayā vāmapārśvataḥ /
vatsayuktāṃ dugdhavatīṃ vatso nāma manorathaḥ

dṛṣṭvā savatsāṃ śrīdāmā navabhāṇḍe dudoha ca /
kṣīraṃ sudhātiriktaṃ ca janmamṛtyujarāharam

tadutthaṃ ca payaḥ svādu papau gopīpatiḥ svayam /
saro babhūva payasāṃ bhāṇḍavisraṃsanena ca

dīrghaṃ ca vistṛtaṃ caiva paritaḥ śatayojanam /
goloke'yaṃ prasiddhaśca so'pi kṣīrasarovaraḥ

gopikānāṃ ca rādhāyāḥ krīḍāvāpī babhūva sā /
rat‍nendraracitā pūrṇaṃ bhūtā cāpīśvarecchayā

babhūva kāmadhenūnāṃ sahasā lakṣakoṭayaḥ /
yāvantastatra gopāśca surabhyā lomakūpataḥ

tāsāṃ putrāśca bahavaḥ sambabhūvurasaṃkhyakāḥ /
kathitā ca gavāṃ sṛṣṭistayā ca pūritaṃ jagat

pūjāṃ cakāra bhagavān surabhyāśca purā mune /
tato babhūva tatpūjā triṣu lokeṣu durlabhā

dīpānvitāparadine śrīkṛṣṇasyājñayā hareḥ /
babhūva surabhiḥ pūjyā dharmavaktrādidaṃ śrutam

dhyānaṃ stotraṃ mūlamantraṃ yadyatyūjāvidhikramam /
vedoktaṃ ca mahābhāga nibodha kathayāmi te

ॐ surabhyai nama iti mantrastasyāḥ ṣaḍakṣaraḥ /
siddho lakṣajapenaiva bhaktānāṃ kalpapādapaḥ

dhyānaṃ yajurvedagītaṃ tasyāḥ pūjā ca sarvataḥ /
ṛddhidā vṛddhidā caiva muktidā sarvakāmadā

lakṣmīsvarūpāṃ paramāṃ rādhāsahacarīṃ parām /
gavāmadhiṣṭhātṛdevīṃ gavāmādyāṃ gavāṃ prasūm

pavitrarūpāṃ pūtāṃ ca bhaktānāṃ sarvakāmadām /
yayā pūtaṃ sarvaviśvaṃ tāṃ devīṃ surabhiṃ bhaje

ghaṭe vā dhenuśirasi bandhastambhe gavāmapi /
śālagrāme jalāgnau vā surabhiṃ pūjayed‌ dvijaḥ

dīpānvitāparadine pūrvāhne bhaktisaṃyutaḥ /
yaḥ pūjayecca surabhiṃ sa ca pūjyo bhaved‍bhuvi

ekadā triṣu lokeṣu vārāhe viṣṇumāyayā /
kṣīraṃ jahāra surabhiścintitāśca surādayaḥ

te gatvā brahmaloke ca brahmāṇaṃ tuṣṭuvustadā /
tadājñayā ca surabhiṃ tuṣṭāva pākaśāsanaḥ

purandara uvāca
namo devyai mahādevyai surabhyai ca namo namaḥ /
gavāṃ bījasvarūpāyai namaste jagadambike

namo rādhāpriyāyai ca padmāṃśāyai namo namaḥ /
namaḥ kṛṣṇapriyāyai ca gavāṃ mātre namo namaḥ

kalpavṛkṣasvarūpāyai sarveṣāṃ satataṃ pare /
kṣīradāyai dhanadāyai buddhidāyai namo namaḥ

śubhāyai ca subhadrāyai gopradāyai namo namaḥ /
yaśodāyai kīrtidāyai dharmadāyai namo namaḥ

stotraśravaṇamātreṇa tuṣṭā hṛṣṭā jagatprasūḥ /
āvirbabhūva tatraiva brahmaloke sanātanī

mahendrāya varaṃ dattvā vāñchitaṃ cāpi durlabham /
jagāma sā ca golokaṃ yayurdevādayo gṛham

babhūva viśvaṃ sahasā dugdhapūrṇaṃ ca nārada /
dugdhaṃ ghṛtaṃ tato yajñastataḥ prītiḥ surasya ca

idaṃ stotraṃ mahāpuṇyaṃ bhaktiyuktaśca yaḥ paṭhet /
sa gomān dhanavāṃścaiva kīrtimānputravāṃstathā

sa snātaḥ sarvatīrtheṣu sarvayajñeṣu dīkṣitaḥ /
iha loke sukhaṃ bhuktvā yātyante kṛṣṇamandire

suciraṃ nivasettatra karoti kṛṣṇasevanam /
na punarbhavanaṃ tatra brahmaputro bhavettataḥ

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ navamaskandhe
surabhyupākhyānavarṇanaṃ nāmekonapañcāśattamo'dhyāyaḥ