Devi Bhagavata Purana · Chapter 9.25

tulasīpūjāvidhivarṇanam
nārada uvāca
tulasī ca yadā pūjyā kṛtā nārāyaṇapriyā /
asyāḥ pūjāvidhānaṃ ca stotraṃ ca vada sāmpratam

kena pūjā kṛtā kena stutā prathamato mune /
tatra pūjyā sā babhūva kena vā vada māmaho

sūta uvāca
nāradasya vacaḥ śrutvā prahasya munipuṅ‌gavaḥ /
kathāṃ kathitumārebhe puṇyāṃ pāpaharāṃ parām

śrīnārāyaṇa uvāca
hariḥ saṃpūjya tulasīṃ reme ca ramayā saha /
ramāsamānasaubhāgyāṃ cakāra gauraveṇa ca

sehe ca lakṣmīrgaṅ‌gā ca tasyāśca navasaṅ‌gamam /
saubhāgyagauravaṃ kopātte na sehe sarasvatī

sā tāṃ jaghāna kalahe māninī harisannidhau /
vrīḍayā cāpamānena sāntardhānaṃ cakāra ha

sarvasiddheśvarī devī jñānināṃ siddhiyoginī /
jagāmādarśanaṃ kopātsarvatra ca hareraho

harirna dṛṣṭvā tulasīṃ bodhayitvā sarasvatīm /
tadanujñāṃ gahītvā ca jagāma tulasīvanam

tatra gatvā ca susnāto hariḥ sa tulasīṃ satīm /
pūjayāmāsa tāṃ dhyātvā stotraṃ bhaktyā cakāra ha

lakṣmīmāyākāmavāṇībījapūrvaṃ daśākṣaram /
vṛndāvanīti ṅe'ntaṃ ca vahnijāyāntameva ca

anena kalpataruṇā mantrarājena nārada /
pūjayedyo vidhānena sarvasiddhiṃ labhed‌ dhruvam

ghṛtadīpena dhūpena sindūracandanena ca /
naivedyena ca puṣpeṇa copacāreṇa nārada

haristotreṇa tuṣṭā sā cāvirbhūtā mahīruhāt /
prasannā caraṇāmbhoje jagāma śaraṇaṃ śubhā

varaṃ tasyai dadau viṣṇuḥ sarvapūjyā bhaveriti /
ahaṃ tvāṃ dhārayiṣyāmi surūpāṃ mūrdhni vakṣasi

sarve tvāṃ dhārayiṣyanti svamūrdhni ca surādayaḥ /
ityuktvā tāṃ gṛhītvā ca prayayau svālayaṃ vibhuḥ

nārada uvāca
kiṃ dhyānaṃ stavanaṃ kiṃ vā kiṃ vā pūjāvidhānakam /
tulasyāśca mahābhāga tanme vyākhyātumarhasi

śrīnārāyaṇa uvāca
antarhitāyāṃ tasyāṃ ca harirvṛndāvane tadā /
tasyāścakre stutiṃ gatvā tulasīṃ virahāturaḥ

śrībhagavānuvāca
vṛndarūpāśca vṛkṣāśca yadaikatra bhavanti ca /
vidurbudhāstena vṛndāṃ matpriyāṃ tāṃ bhajāmyaham

purā babhūva yā devī tvādau vṛndāvane vane /
tena vṛndāvanī khyātā saubhāgyā tāṃ bhajāmyaham

asaṃkhyeṣu ca viśveṣu pūjitā yā nirantaram /
tena viśvapūjitā''khyāṃ pūjitāṃ ca bhajāmyaham

asaṃkhyāni ca viśvāni pavitrāṇi tvayā sadā /
tāṃ viśvapāvanīṃ devīṃ viraheṇa smarāmyaham

devā na tuṣṭāḥ puṣpāṇāṃ samūhena yayā vinā /
tāṃ puṣpasārāṃ śuddhāṃ ca draṣṭumicchāmi śokataḥ

viśve yatprāptimātreṇa bhaktānando bhaved‌ dhruvam /
nandinī tena vikhyātā sā prītā bhavatādiha

yasyā devyāstulā nāsti viśveṣu nikhileṣu ca /
tulasī tena vikhyātā tāṃ yāmi śaraṇaṃ priyām

kṛṣṇajīvanarūpā sā śaśvatpriyatamā satī /
tena kṛṣṇajīvanī sā sā me rakṣatu jīvanam

ityevaṃ stavanaṃ kṛtvā tasthau tatra ramāpatiḥ /
dadarśa tulasīṃ sākṣātpādapadmanatāṃ satīm

rudatīmavamānena māninīṃ mānapūjitām /
priyāṃ dṛṣṭvā priyaḥ śīghraṃ vāsayāmāsa vakṣasi

bhāratyājñāṃ gahītvā ca svālayaṃ ca yayau hariḥ /
bhāratyā saha tatprītiṃ kārayāmāsa satvaram

varaṃ viṣṇurdadau tasyai sarvapūjyā bhaveriti /
śirodhāryā ca sarveṣāṃ vandyā mānyā mameti ca

viṣṇorvareṇa sā devī parituṣṭā babhūva ca /
sarasvatī tāmākṛṣya vāsayāmāsa sannidhau

lakṣmīrgaṅ‌gā sasmitā ca tāṃ samākṛṣya nārada /
gṛhaṃ praveśayāmāsa vinayena satīṃ tadā

vṛndā vṛndāvanī viśvapūjitā viśvapāvanī /
puṣpasārā nandanī ca tulasī kṛṣṇajīvanī

etannāmāṣṭakañcaiva stotraṃ nāmārthasaṃyutam /
yaḥ paṭhettāṃ ca saṃpūjya so'śvamedhaphalaṃ labhet

kārtikyāṃ pūrṇimāyāṃ ca tulasyā janma maṅ‌galam /
tatra tasyāśca pūjā ca vihitā hariṇā purā

tasyāṃ yaḥ pūjayettāṃ ca bhaktyā vai viśvapāvanīm /
sarvapāpādvinirmukto viṣṇulokaṃ sa gacchati

kārtike tulasīpatraṃ yo dadāti ca viṣṇuve /
gavāmayutadānasya phalaṃ prāpnoti niścitam

aputro labhate putraṃ priyāhīno labhetpriyām /
bandhuhīno labhed‌ bandhūn stotraśravaṇamātrataḥ

rogī pramucyate rogād‌ baddho mucyeta bandhanāt /
bhayānmucyeta bhītastu pāpānmucyeta pātakī

ityevaṃ kathitaṃ stotraṃ dhyānaṃ pūjāvidhiṃ śṛṇu /
tvameva vede jānāsi kaṇvaśākhoktameva ca

tada‌vṛkṣe pūjayettāṃ ca bhaktyā cāvāhanaṃ vinā /
tāṃ dhyātvā copacāreṇa dhyānaṃ pātakanāśanam

tulasīṃ puṣpasārāṃ ca satīṃ pūtāṃ manoharām /
kṛtapāpedhmadāhāya jvaladagniśikhopamām

puṣpeṣu tulanā yasyā nāsti vedeṣu bhāṣitam /
pavitrarūpā sarvāsu tulasī sā ca kīrtitā

śirodhāryā ca sarveṣāmīpsitā viśvapāvanī /
jīvanmuktāṃ muktidāṃ ca bhaje tāṃ haribhaktidām

iti dhyātvā ca saṃpūjya stutvā ca praṇametsudhīḥ /
uktaṃ tulasyupākhyānaṃ kiṃ bhūyaḥ śrotumicchasi

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
navamaskandhe tulasīpūjāvidhivarṇanaṃ nāma pañcaviśo'dhyāyaḥ