Devi Bhagavata Purana · Chapter 9.15

nārāyaṇanāradasaṃvāde śaktiprādurbhāvaḥ
nārada uvāca
nārāyaṇapriyā sādhvī kathaṃ sā ca babhūva ha /
tulasī kutra sambhūtā kā vā sā pūrvajanmani

kasya vā sā kule jātā kasya kanyā kule satī /
kena vā tapasā sā ca samprāptā prakṛteḥ param

nirvikāraṃ nirīhaṃ ca sarvaviśvasvarūpakam /
nārāyaṇaṃ paraṃ brahma parameśvaramīśvaram

sarvārādhyaṃ ca sarveśaṃ sarvajñaṃ sarvakāraṇam /
sarvādhāraṃ sarvarūpaṃ sarveṣāṃ paripālakam

kathametādṛśī devī vṛkṣatvaṃ samavāpa ha /
kathaṃ sāpyasuragrastā sambabhūva tapasvinī

susnigdhaṃ me mano lolaṃ prerayanmāṃ muhurmuhuḥ /
chettumarhasi sandehaṃ sarvaṃ sandehabhañjana

śrīnārāyaṇa uvāca
manuśca dakṣasāvarṇiḥ puṇyavān vaiṣṇavaḥ śuciḥ /
yaśasvī kīrtimāṃścaiva viṣṇoraṃśasamud‍bhavaḥ

tatputro brahmasāvarṇirdharmiṣṭho vaiṣṇavaḥ śuciḥ /
tatputro dharmasāvarṇirvaiṣṇavaśca jitendriyaḥ

tatputro rudrasāvarṇirbhaktimānvijitendriyaḥ /
tatputro devasāvarṇirviṣṇuvrataparāyaṇaḥ

tatputra indrasāvarṇirmahāviṣṇuparāyaṇaḥ /
vṛṣadhvajaśca tatputro vṛṣadhvajaparāyaṇaḥ

(vṛkṣadhvaja pāṭhabheda)
yasyāśrame svayaṃ śambhurāsīddevayugatrayam /
putrādapi paraḥ sneho nṛpe tasmiñchivasya ca

na ca nārāyaṇaṃ mene na lakṣmīṃ na sarasvatīm /
pūjāṃ ca sarvadevānāṃ dūrībhūtā cakāra saḥ

bhādre māsi mahālakṣmīpūjāṃ matto babhañja ha /
tathā māghīyapañcamyāṃ vismṛtā sarvadaivataiḥ

pāpaḥ sarasvatīpūjāṃ dūrībhūtā cakāra saḥ /
yajñaṃ ca viṣṇupūjāṃ ca nindantaṃ taṃ divākaraḥ

cukopa devo bhūpendraṃ śaśāpa śivakāraṇāt /
bhraṣṭaśrīstvañca bhaveti taṃ śaśāpa divākaraḥ

śūlaṃ gṛhītvā taṃ sūryamadhāvacchaṅ‌karaḥ svayam /
pitrā sārdhaṃ dineśaśca brahmāṇaṃ śaraṇaṃ yayau

śivastriśūlahastaśca brahmalokaṃ yayau krudhā /
brahmā sūryaṃ puraskṛtya vaikuṇṭhaṃ ca yayau bhiyā

brahmakaśyapamārtaṇḍāḥ santrastāḥ śuṣkatālukāḥ /
nārāyaṇaṃ ca sarveśaṃ te yayuḥ śaraṇaṃ bhiyā

mūrchā praṇemuste gatvā tuṣṭuvuśca punaḥ punaḥ /
sarvaṃ nivedanaṃ cakrurbhayasya kāraṇaṃ harau

nārāyaṇaśca kṛpayā tebhyaśca hyabhayaṃ dadau /
sthirā bhavata he bhītā bhayaṃ kiñca mayi sthite

smaranti ye yatra tatra māṃ vipattau bhayānvitāḥ /
tāṃstatra gatvā rakṣāmi cakrahastastvarānvitaḥ

pātāhaṃ jagatāṃ devāḥ kartā ca satataṃ sadā /
sraṣṭā ca brahmarūpeṇa saṃhartā śivarūpataḥ

śivo'haṃ tvamahaṃ cāpi sūryo'haṃ triguṇātmakaḥ /
vidhāya nānārūpaṃ ca karomi sṛṣṭipālanam

yūyaṃ gacchata bhadraṃ vo bhaviṣyati bhayaṃ kutaḥ /
adyaprabhṛti madvareṇa bhayaṃ vo nāsti śaṅ‌karāt

sarveśo vai sa bhagavācchaṅ‌karaśca satāṃ patiḥ /
bhaktādhīnaśca bhaktānāṃ bhaktātmā bhaktavatsalaḥ

sudarśanaḥ śivaścaiva mama prāṇādhikaḥ priyaḥ /
brahmāṇḍeṣu na tejasvī he brahmannanayoḥ paraḥ

śaktaḥ sraṣṭuṃ mahādevaḥ sūryakoṭiṃ ca līlayā /
koṭiṃ ca brahmaṇāmevaṃ nāsādhyaṃ śūlinaḥ prabhoḥ

bāhyajñānaṃ naiva kiñciddhyāyate māṃ divāniśam /
manmantrānmad‌guṇānbhaktyā pañcavaktreṇa gāyati

ahamevaṃ cintayāmi tatkalyāṇaṃ divāniśam /
ye yathā māṃ prapadyante tāṃstathaiva bhajāmyaham

śivasvarūpo bhagavāñchivādhiṣṭhātṛdevatā /
śivaṃ bhavati tasmācca śivaṃ tena vidurbudhāḥ

etasminnantare tatra jagāma śaṅ‌karaḥ sthitaḥ /
śūlahasto vṛṣārūḍho raktapaṅ‌kajalocanaḥ

avaruhya vṛṣāttūrṇaṃ bhaktinamrātmakandharaḥ /
nanāma bhaktyā taṃ śāntaṃ lakṣmīkāntaṃ parātparam

rat‍nasiṃhāsanasthaṃ ca rat‍nālaṅ‌kārabhūṣitam /
kirīṭinaṃ kuṇḍalinaṃ cakriṇaṃ vanamālinam

navīnanīradaśyāmaṃ sundaraṃ ca caturbhujam /
caturbhujaiḥ sevitaṃ ca śvetacāmaravāyunā

candanokṣitasarvāṅ‌gaṃ bhūṣitaṃ pītavāsasam /
lakṣmīpradattatāmbūlaṃ bhuktavantaṃ ca nārada

vidyādharīnṛtyagītaṃ paśyantaṃ sasmitaṃ sadā /
īśvaraṃ paramātmānaṃ bhaktānugrahavigraham

taṃ nanāma mahādevo brahmaṇā namitaśca saḥ /
nanāma sūryo bhaktyā ca santrastaścandraśekharam

kaśyapaśca mahābhaktyā tuṣṭāva ca nanāma ca /
śivaḥ saṃstūya sarveśaṃ samuvāsa sukhāsane

sukhāsane sukhāsīnaṃ viśrāntaṃ candraśekharam /
śvetacāmaravātena sevitaṃ viṣṇupārṣadaiḥ

pīyūṣatulyamadhuraṃ vacanaṃ sumanoharam /
viṣṇuruvāca
āgato'si kathaṃ cātra vada kopasya kāraṇam

mahādeva uvāca
vṛṣadhvajaṃ ca mad‍bhaktaṃ mama prāṇādhikaṃ priyam /
sūryaḥ śaśāpa iti me prakopasya tu kāraṇam

putravatsalaśokena sūryaṃ hantuṃ samudyataḥ /
sa brahmāṇaṃ prapannaśca sūryaśca sa vidhistvayi

tvayi ye śaraṇāpannā dhyānena vacasāpi vā /
nirāpado viśaṅ‌kāste jarā mṛtyuśca tairjitaḥ

pratyakṣaṃ śaraṇāpannāstatphalaṃ kiṃ vadāmi bhoḥ /
harismṛtiścābhayadā sarvamaṅ‌galadā sadā

kiṃ me bhaktasya bhavitā tanme brūhi jagatprabho /
śrīhatasyāsya mūḍhasya sūryaśāpena hetunā

viṣṇuruvāca
kālo'tiyāto daivena yugānāmekaviṃśatiḥ /
vaikuṇṭhaṃ ghaṭikārdhena śīghraṃ gaccha tvamālayam

vṛṣadhvajo mṛtaḥ kālāddurnivāryātsudāruṇāt /
rathadhvajaśca tatputro mṛtaḥ so'pi śriyā hataḥ

tatputrau ca mahābhāgau dharmadhvajakuśadhvajau /
hṛtaśriyau sūryaśāpātsmṛtau paramavaiṣṇavau

rājyabhraṣṭau śriyā bhraṣṭau kamalātapasā ratau /
tayośca bhāryayorlakṣmīḥ kalayā ca bhaviṣyati

sampadyuktau tadā tau ca nṛpaśreṣṭhau bhaviṣyataḥ /
mṛtaste sevakaḥ śambho gaccha yūyaṃ ca gacchata

ityuktvā ca salakṣmīkaḥ sabhāto'bhyantaraṃgataḥ /
devā jagmuḥ samprahṛṣṭāḥ svāśramaṃ parayā mudā /
śivaśca tapase śīghraṃ paripūrṇatamo yayau

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ navamaskandhe
nārāyaṇanāradasaṃvāde śaktiprādurbhāvo nāma pañcadaśo'dhyāyaḥ