Devi Bhagavata Purana · Chapter 9.16

mahālakṣamyā vedavatīrūpeṇa rājagṛhe janmavarṇanam
śrīnārāyaṇa uvāca
lakṣmīṃ tau ca samārādhya cogreṇa tapasā mune /
varamiṣṭaṃ ca pratyekaṃ samprāpaturabhīpsitam

mahālakṣmīvareṇaiva tau pṛthvīśau babhūvatuḥ /
puṇyavantau putravantau dharmadhvajakuśadhvajau

kuśadhvajasya pat‍nī ca devī mālāvatī satī /
sā suṣāva ca kālena kamalāṃśāṃ sutāṃ satīm

sā ca bhūyiṣṭhakālena jñānayuktā babhūva ha /
kṛtvā vedadhvaniṃ spaṣṭamuttasthau sūtikāgṛhāt

vedadhvaniṃ sā cakāra jātamātreṇa kanyakā /
tasmāttāṃ ca vedavatīṃ pravadanti manīṣiṇaḥ

jātamātreṇa susnātā jagāma tapase vanam /
sarvairniṣiddhā yat‍nena nārāyaṇaparāyaṇā

ekamanvantaraṃ caiva puṣkare ca tapasvinī /
atyugrāṃ ca tapasyāṃ ca līlayā hi cakāra sā

tathāpi puṣṭā na kliṣṭā navayauvanasaṃyutā /
suśrāva sā ca sahasā suvācamaśarīriṇīm

janmāntare ca te bhartā bhaviṣyati hariḥ svayam /
brahmādibhirdurārādhyaṃ patiṃ lapsyasi sundari

iti śrutvā ca sā hṛṣṭā cakāra ha punastapaḥ /
atīva nirjanasthāne parvate gandhamādane

tatraiva suciraṃ taptvā viśvasya samuvāsa sā /
dadarśa puratastatra rāvaṇaṃ durnivāraṇam

dṛṣṭvā sātithibhaktyā ca pādyaṃ tasmai dadau kila /
susvādubhūtaṃ ca phalaṃ jalaṃ cāpi suśītalam

tacca bhuktvā sa pāpiṣṭhaścovāsa tatsamīpataḥ /
cakāra praśnamiti tāṃ kā tvaṃ kalyāṇi vartase

tāṃ dṛṣṭvā sa varārohāṃ pīnaśroṇipayodharām /
śaratpadmotsavāsyāṃ ca sasmitāṃ sudatīṃ satīm

mūrcchāmavāpa kṛpaṇaḥ kāmabāṇaprapīḍitaḥ /
sa kareṇa samākṛṣya śṛṅ‌gāraṃ kartumudyataḥ

satī cukopa dṛṣṭvā taṃ stambhitaṃ ca cakāra ha /
sa jaḍo hastapādaiśca kiñcidvaktuṃ na ca kṣamaḥ

tuṣṭāva manasā devīṃ prayayau padmalocanām /
sā tuṣṭā tasya stavanaṃ sukṛtaṃ ca cakāra ha

sā śaśāpa madarthe tvaṃ vinaṃkṣyasi sabāndhavaḥ /
spṛṣṭāhaṃ ca tvayā kāmād‌ balaṃ cāpyavalokaya

ityuktvā sā ca yogena dehatyāgaṃ cakāra ha /
gaṅ‌gāyāṃ tāṃ ca saṃnyasya svagṛhaṃ rāvaṇo yayau

aho kimad‍bhutaṃ dṛṣṭaṃ kiṃ kṛtaṃ vānayādhunā /
iti sañcintya sañcintya vilalāpa punaḥ punaḥ

sā ca kālāntare sādhvī babhūva janakātmajā /
sītādevīti vikhyātā yadarthe rāvaṇo hataḥ

mahātapasvinī sā ca tapasā pūrvajanmataḥ /
lebhe rāmaṃ ca bhartāraṃ paripūrṇatamaṃ harim

samprāpa tapasā''rādhya durārādhyaṃ jagatpatim /
sā ramā suciraṃ reme rāmeṇa saha sundarī

jātismarā na smarati tapasaśca klamaṃ purā /
sukhena tajjahau sarvaṃ duḥkhaṃ cāpi sukhaṃ phale

nānāprakāravibhavaṃ cakāra suciraṃ satī /
samprāpya sukumāraṃ tamatīva navayauvanā

guṇinaṃ rasikaṃ śāntaṃ kāntaṃ devamanuttamam /
strīṇāṃ manojñaṃ ruciraṃ tathā lebhe yathepsitam

pituḥ satyapālanārthaṃ satyasandho raghūdvahaḥ /
jagāma kānanaṃ paścātkālena ca balīyasā

tasthau samudranikaṭe sītayā lakṣmaṇena ca /
dadarśa tatra vahniṃ ca viprarūpadharaṃ hariḥ

rāmaṃ ca duḥkhitaṃ dṛṣṭvā sa ca duḥkhī babhūva ha /
uvāca kiñcitsatyeṣṭaṃ satyaṃ satyaparāyaṇaḥ

dvija uvāca
bhagavacchrūyatāṃ rāma kālo'yaṃ yadupasthitaḥ /
sītāharaṇakālo'yaṃ tavaiva samupasthitaḥ

daivaṃ ca durnivāryaṃ ca na ca daivātparo balī /
jagatprasūṃ mayi nyasya chāyāṃ rakṣāntike'dhunā

dāsyāmi sītāṃ tubhyaṃ ca parīkṣāsamaye punaḥ /
devaiḥ prasthāpito'haṃ ca na ca vipro hutāśanaḥ

rāmastadvacanaṃ śrutvā na prakāśya ca lakṣmaṇam /
svīkāraṃ vacasaścakre hṛdayena vidūyatā

vahniryogena sītāyā māyāsītāṃ cakāra ha /
tattulyaguṇasarvāṅ‌gāṃ dadau rāmāya nārada

sītāṃ gṛhītvā sa yayau gopyaṃ vaktuṃ niṣidhya ca /
lakṣmaṇo naiva bubudhe gopyamanyasya kā kathā

etasminnantare rāmo dadarśa kānakaṃ mṛgam /
sītā taṃ prerayāmāsa tadarthe yat‍napūrvakam

saṃnyasya lakṣmaṇaṃ rāmo jānakyā rakṣaṇe vane /
svayaṃ jagāma tūrṇaṃ taṃ vivyādha sāyakena ca

lakṣmaṇeti ca śabdaṃ sa kṛtvā ca māyayā mṛgaḥ /
prāṇāṃstatyāja sahasā puro dṛṣṭvā hariṃ smaran

mṛgadehaṃ parityajya divyarūpaṃ vidhāya ca /
rat‍nanirmāṇayānena vaikuṇṭhaṃ sa jagāma ha

vaikuṇṭhalokadvāryāsītkiṅ‌karo dvārapālayoḥ /
punarjagāma taddvāramādeśād‌ dvārapālayoḥ

atha śabdaṃ ca sā śrutvā lakṣmaṇeti ca viklavam /
taṃ hi sā prerayāmāsa lakṣmaṇaṃ rāmasannidhau

gate ca lakṣmaṇe rāmaṃ rāvaṇo durnivāraṇaḥ /
sītāṃ gṛhītvā prayayau laṅ‌kāmeva svalīlayā

viṣasāda ca rāmaśca vane dṛṣṭvā ca lakṣmaṇam /
tūrṇaṃ ca svāśramaṃ gatvā sītāṃ naiva dadarśa saḥ

mūrcchāṃ samprāpa suciraṃ vilalāpa bhṛśaṃ punaḥ /
punaḥ punaśca babhrāma tadanveṣaṇapūrvakam

kālena prāpya tadvārtāṃ godāvarīnadītaṭe /
sahāyānvānarātkṛtvā babandha sāgaraṃ hariḥ

laṅ‌kāṃ gatvā raghuśreṣṭho jaghāna sāyakena ca /
kālena prāpya taṃ hatvā rāvaṇaṃ bāndhavaiḥ saha

tāṃ ca vahniparīkṣāṃ ca kārayāmāsa satvaram /
hutāśastatra kāle tu vāstavīṃ jānakīṃ dadau

uvāca chāyā vahniṃ ca rāmaṃ ca vinayānvitā /
kariṣyāmīti kimahaṃ tadupāyaṃ vadasva me

śrīrāmāgnī ūcatuḥ
tvaṃ gaccha tapase devi puṣkaraṃ ca supuṇyadam /
kṛtvā tapasyā tatraiva svargalakṣmīrbhaviṣyasi

sā ca tadvacanaṃ śrutvā pratapya puṣkare tapaḥ /
divyaṃ trilakṣavarṣaṃ ca svargalakṣmīrbabhūva ha

sā ca kālena tapasā yajñakuṇḍasamud‍bhavā /
kāminī pāṇḍavānāṃ ca draupadī drupadātmajā

kṛte yuge vedavatī kuśadhvajasutā śubhā /
tretāyāṃ rāmapat‍nī ca sīteti janakātmajā

tacchāyā draupadī devī dvāpare drupadātmajā /
trihāyaṇī ca sā proktā vidyamānā yugatraye

nārada uvāca
priyāḥ pañca kathaṃ tasyā babhūvurmunipuṅ‌gava /
iti maccittasaṃdehaṃ bhañja saṃdehabhañjana

śrīnārāyaṇa uvāca
laṅ‌kāyāṃ vāstavī sītā rāmaṃ samprāpa nārada /
rūpayauvanasampannā chāyā ca bahucintayā

rāmāgnyorājñayā taptumupāste śaṅ‌karaṃ param /
kāmāturā pativyagrā prārthayantī punaḥ punaḥ

patiṃ dehi patiṃ dehi patiṃ dehi trilocana /
patiṃ dehi patiṃ dehi pañcavāraṃ cakāra sā

śivastatprārthanāṃ śrutvā prahasya rasikeśvaraḥ /
priye tava priyāḥ pañca bhaviṣyanti varaṃ dadau

tena sā pāṇḍavānāṃ ca babhūva kāminī priyā /
iti te kathitaṃ sarvaṃ prastāvaṃ vāstavaṃ śṛṇu

atha samprāpya laṅ‌kāyāṃ sītāṃ rāmo manoharām /
vibhīṣaṇāya tāṃ laṅ‌kāṃ dattvāyodhyāṃ yayau punaḥ

ekādaśasahasrābdaṃ kṛtvā rājyaṃ ca bhārate /
jagāma sarvairlokaiśca sārdhaṃ vaikuṇṭhameva ca

kamalāṃśā vedavatī kamalāyāṃ viveśa sā /
kathitaṃ puṇyamākhyānaṃ puṇyadaṃ pāpanāśanam

satataṃ mūrtimantaśca vedāścatvāra eva ca /
santi yasyāśca jihvāgre sā ca vedavatī śrutā

dharmadhvajasutākhyānaṃ nibodha kathayāmi te

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ navamaskandhe
mahālakṣamyā vedavatīrūpeṇa rājagṛhe janmavarṇanaṃ nāma ṣoḍaśo'dhyāyaḥ