Devi Bhagavata Purana · Chapter 8.8

bhuvanakośavarṇane ilāvṛtabhadrāśvavarṣavarṇanam
śrīnārāyaṇa uvāca
teṣu varṣeṣu deveśāḥ pūrvoktaiḥ stavanaiḥ sadā /
pūjayanti mahādevīṃ japadhyānasamādhibhiḥ

sarvartukusumaśreṇī śobhitā vanarājayaḥ /
phalānāṃ pallavānāṃ ca yatra śobhā nirantaram

teṣu kānanavarṣeṣu varṣaparvatasānuṣu /
giridroṇīṣu sarvāsu nirmalodakarāśiṣu

vikacotpalamālāsu haṃsasārasasañcayaiḥ /
vimiśriteṣu teṣveva pakṣibhiḥ kūjiteṣu ca

jalakrīḍādibhiścitravinodaiḥ krīḍayanti ca /
sundarīlalitabhrūṇāṃ vilāsāyataneṣu ca

tatratyā viharantyatra svairaṃ yuvatibhiḥ saha /
navasvapi ca varṣeṣu bhagavānādipūruṣaḥ

(nārāyaṇākhyo lokānāmanugraharasaikadṛk /)
devīmārādhayantāste sa ca sarvaiśca pūjyate /
ātmavyūhenejyayāsau sannidhatte samāhitaḥ

ilāvṛte tu bhagavān padmajākṣisamud‍bhavaḥ /
eka eva bhavo devo nityaṃ vasati sāṅganaḥ

tatkṣetre nāparaḥ kaścitpraveśaṃ vitanoti ca /
bhavānyāḥ śāpatastatra pumāntastrī bhavati sphuṭam

bhavānīnāthakaiḥ svīṇāmasaṃkhyairgaṇakoṭibhiḥ /
saṃrudhyamāno deveśo devaṃ saṅkarṣaṇaṃ bhajan

ātmanā dhyānayogena sarvabhūtahitecchayā /
tāṃ tāmasīṃ turīyāṃ ca mūrtiṃ prakṛtimātmanaḥ

upadhāvate caikāgramanasā bhagavānajaḥ /
śrībhagavānuvāca
ॐnamo bhagavate mahāpuruṣāya
sarvaguṇasaṃkhyānāyānantāyāvyaktāya nama iti

bhaje bhajanyāraṇapādapaṅkajaṃ
bhagasya kṛtsnasya paraṃ parāyaṇam /
bhakteṣvalaṃ bhāvitabhūtabhāvanaṃ
bhavāpahaṃ tvā bhava bhāvamīśvaram

na yasya māyāguṇakarmavṛttibhi-
rnirīkṣito hyaṇvapi dṛṣṭirajyate /
īśe yathā no stratamanyuraṃhasā
kastaṃ na manyeta jigīṣurātmanaḥ

asaddṛśo yaḥ pratibhāti māyayā
kṣībeva madhvāsavatāgralocanaḥ /
na nāgavadhvo'rhaṇa īśire hriyā
yatpādayoḥ sparśanadharṣitendriyāḥ

yamāhurasya sthitijanmasaṃyamaṃ
tribhirvihīnaṃ yamanantamṝṣayaḥ /
na veda siddhārthamiva kyacitsthitaṃ
bhūmaṇḍalaṃ mūrdhasahasradhāmasu

yasyādya āsīd guṇavigraho mahān
vijñānadhiṣṇyo bhagavānajaḥ kila /
yatsavato'haṃ trivṛtā svatejasā
vaikārikaṃ tāmasamaindriyaṃ sṛje

ete vayaṃ yasya vaśe mahātmanaḥ
sthitāḥ śakuntā iva sūtrayantritāḥ /
mahānahaṃvaikṛtatāmasendriyāḥ
sṛjāma sarve yadanugrahādidam

yannirmitāṃ karhyapi karmaparvaṇīṃ
māyāṃ jano'yaṃ gurusargamohitaḥ /
na veda nistāraṇayogamañjasā
tasmai namaste vilayodayātmane

śrīnārāyaṇa uvāca
evaṃ sa bhagavān rudro devaṃ saṅkarṣaṇaṃ prabhum /
ilāvṛtamupāsīta devīgaṇasamāhitaḥ

tathaiva dharmaputro'sau nāmnā bhadraśravā iti /
tatkulasyāpi patayaḥ puruṣā bhadrasevakāḥ

bhadrāśvavarṣe tāṃ mūrtiṃ vāsudevasya viśrutām /
hayamūrtibhidā tāṃ tu hayagrīvapadāṅ‌kitām

parameṇa samādhyanyavārakeṇa niyantritām /
evameva ca tāṃ mūrtiṃ gṛṇanta upayānti ca

bhadraśravasa ūcuḥ
ॐ namo bhagavate dharmāyātmaviśodhanāya nama iti /
aho vicitraṃ bhagavadviceṣṭitaṃ
ghnantaṃ jano'yaṃ hi miṣanna paśyati /
dhyāyanna sadyarhi vikarma sevituṃ
nirhṛtya putraṃ pitaraṃ jijīvuṣuḥ

vadanti viśvaṃ kavayaḥ sma naśvaraṃ
paśyanti cādhyātmavido vipaścitaḥ /
tathāpi muhyanti tavāja māyayā
suvismitaṃ kṛtyamajaṃ nato'smi tam

viśvod‍bhavasthānanirodhakarma te
hyakarturaṅgīkṛtamapyapāvṛtaḥ /
yuktaṃ na citraṃ tvayi kāryakāraṇe
sarvātmani vyatirikte ca vastutaḥ

vedān yugānte tamasā tiraskṛtān
rasātalādyo nṛturaṅgavigrahaḥ /
pratyādade vai kavaye'bhiyācate
tasmai namaste vitathehitāya te

evaṃ stuvanti deveśaṃ hayaśīrṣaṃ hariṃ ca te /
bhadraśravasanāmāno varṇayanti ca tad‍guṇān

eṣāṃ caritametaddhi yaḥ paṭhecchrāvayecca yaḥ /
pāpakaṃcukamutsṛjya devīlokaṃ vrajecca saḥ

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāmaṣṭamaskandhe
bhuvanakośavarṇane ilāvṛtabhadrāśvavarṣavarṇanaṃ nāmāṣṭamo'dhyāyaḥ