Devi Bhagavata Purana · Chapter 7.5

aśvibhyāṃ cyavanadvārā somapānāya pratijñāvarṇanam
vyāsa uvāca -
tayostad‌bhāṣitaṃ śrutvā vepamānā nṛpātmajā /
dhairyamālambya tau tatra babhāṣe mitabhāṣiṇī

devau vāṃ raviputrau ca sarvajñau surasammatau /
satīṃ māṃ dharmaśīlāṃ ca naivaṃ vaditumarhathaḥ

pitrā dattā suraśreṣṭhau munaye yogadharmiṇe /
kathaṃ gacchāmi taṃ mārgaṃ puṃścalīgaṇasevitam

draṣṭāyaṃ sarvalokasya karmasākṣī divākaraḥ /
kaśyapāccaiva sambhūto naivaṃ bhāṣitumarhathaḥ

kulakanyā patiṃ tyaktvā kathamanyaṃ bhajennaram /
asāre'sminhi saṃsāre jānantau dharmanirṇayam

yathecchaṃ gacchataṃ devau śāpaṃ dāsyāmi vānaghau /
sukanyāhaṃ ca śaryāteḥ patibhaktiparāyaṇā

vyāsa uvāca -
ityākarṇya vacastasyā nāsatyau vismitau bhṛśam /
tāvabrūtāṃ punastvenāṃ śaṅkamānau bhayaṃ muneḥ

rājaputri prasannau te dharmeṇa varavarṇini /
varaṃ varaya suśroṇi dāsyāvaḥ śreyase tava

jānīhi pramade nūnaṃ āvāṃ devabhiṣagvarau /
yuvānaṃ rūpasampannaṃ prakuryāvaḥ patiṃ tava

tatastrayāṇāmasmākaṃ patimekatamaṃ vṛṇu /
samānarūpadehānāṃ madhye cāturyapaṇḍite

sā taryovacanaṃ śrutvā vismitā svapatiṃ tadā /
gatvovāca tayorvākyaṃ tābhyāmuktaṃ yadad‌bhutam

sukanyovāca -
svāmin sūryasutau devau samprāptau cyavanāśrame /
dṛṣṭau mayā divyadehau nāsatyau bhṛgunandana

vīkṣya māṃ cārusarvāṅ‍gīṃ jātau kāmāturāvubhau /
kathitaṃ vacanaṃ svāmin patiṃ te navayauvanam

divyadehaṃ kariṣyāvaścakṣuṣmantaṃ muniṃ kila /
etena samayenādya taṃ śṛṇu tvaṃ mayoditam

samāvayavarūpaṃ ca kariṣyāvaḥ patiṃ tava /
tatra trayāṇāmasmākaṃ patimekatamaṃ vṛṇu

tacchrutvāhamihāyātā praṣṭuṃ tvāṃ kāryamad‌bhutam /
kiṃ kartavyamataḥ sādho brūhyasminkāryasaṅkaṭe

devamāyāpi durjñeyā na jāne kapaṭaṃ tayoḥ /
yadājñāpaya sarvajña tatkaromi tavepsitam

cyavana uvāca -
gaccha kānte'dya nāsatyau vacanānmama suvrate /
ānayasva samīpaṃ me śīghraṃ devabhiṣagvarau

kriyatāmāśu tadvākyaṃ nātra kāryā vicāraṇā
vyāsa uvāca -
evaṃ sā samanujñātā tatra gatvā vaco'bravīt

kriyatāmāśu nāsatyau samayena surottamau /
tacchrutvā cāśvinau vākyaṃ tasyāstau tatra cāgatau

ūcatū rājaputrīṃ tāṃ patistava viśatvapaḥ /
rūpārthaṃ cyavanastūrṇaṃ tato'mbhaḥ praviveśa ha

aśvināvapi paścāttatpraviṣṭau sara uttamam /
tataste niḥsṛtāstasmātsarasastatkṣaṇāttrayaḥ /
tulyarūpā divya dehā yuvānaḥ sadṛśāḥ kila /
divyakuṇḍalabhūṣāḍhyāḥ samānāvayavāstathā

te'bruvansahitāḥ sarve vṛṇīṣva varavarṇini /
asmākamīpsitaṃ bhadre patiṃ tvamamalānane

yasminvāpyadhikā prītistaṃ vṛṇuṣva varānane /
vyāsa uvāca -
sā dṛṣṭvā tulyarūpāṃstānsamānavayasastathā

ekasvarāṃstulyaveṣāṃstrīnvai devasutopamān /
sā tu saṃśayamāpannā vīkṣya tānsadṛśākṛtīn

ajānantī patiṃ samyagvyākulā samacintayat /
kiṃ karomi trayastulyāḥ kaṃ vṛṇomi na vedmyaham

patiṃ devasutā hyete saṃśaye patitāsmyaham /
indrajālamidaṃ samyagdevābhyāmiha kalpitam

kartavyaṃ kiṃ mayā cātra maraṇaṃ samupāgatam /
na mayā patimutsṛjya varaṇīyaḥ kathañcana

devastvādhunikaḥ kaścidityeṣā mama dhāraṇā /
iti sañcintya manasā parāṃ viśveśvarīṃ śivām

dadhyau bhagavatīṃ devīṃ tuṣṭāva ca kṛśodarī /
sukanyovāca -
śaraṇaṃ tvāṃ jaganmātaḥ prāptāsmi bhṛśaduḥkhitā

rakṣa me'dya satīdharmaṃ namāmi caraṇau tava /
namaḥ padmod‌bhave devi namaḥ śaṅkaravallabhe

viṣṇupriye namo lakṣmi vedamātaḥ sarasvati /
idaṃ jagattvayā sṛṣṭaṃ sarvaṃ sthāvarajaṅgamam

pāsi tvamidamavyagrā tathātsi lokaśāntaye /
brahmaviṣṇumaheśānāṃ jananī tvaṃ susammatā

buddhidāsi tvamajñānāṃ jñānināṃ mokṣadā sadā /
ājñā tvaṃ prakṛtiḥ pūrṇā puruṣapriyadarśanā

bhuktimuktipradāsi tvaṃ prāṇināṃ viśadātmanām /
ajñānāṃ duḥkhadā kāmaṃ sattvānāṃ sukhasādhanā

siddhidā yogināmamba jayadā kīrtidā punaḥ /
śaraṇaṃ tvāṃ prapannāsmi vismayaṃ paramaṃ gatā

patiṃ darśaya me mātarmagnāsmi śokasāgare /
devābhyāṃ caritaṃ kūṭaṃ kaṃ vṛṇomi vimohitā

patiṃ darśaya sarvajñe viditvā me satīvratam /
vyāsa uvāca -
evaṃ stutā tadā devā tathā tripurasundarī

hṛdaye'syāstadā jñānaṃ dadāvāśu sukhodayam /
niścitya manasā tulyavayorūpadharānsatī

prasamīkṣya tu tān sarvānvavre bālā svakaṃ patim /
vṛte'tha cyavane devau santuṣṭau tau babhūvatuḥ

satīdharmaṃ samālokya samprītau dadaturvaram /
bhagavatyāḥ prasādena prasannau tau surauttamau

munimāmantrya tarasā gamanāyodyatāvubhau /
labdhvā tu cyavano rūpaṃ netre bhāryāṃ ca yauvanam

hṛṣṭo'bravīnmahātejāstau nāsatyāvidaṃ vacaḥ /
upakāraḥ kṛto'yaṃ me yuvābhyāṃ surasattamau

kiṃ bravīmi sukhaṃ prāptaṃ saṃsāre'sminnanuttame /
prāpya bhāryāṃ sukeśāntāṃ duḥkhaṃ me'bhavadanvaham

andhasya cātivṛddhasya bhogahīnasya kānane /
yuvābhyāṃ nayane datte yauvanaṃ rūpamad‌bhutam

sampāditaṃ tataṃ kiñcidupakartumahaṃ bruve /
upakāriṇi mitre yo nopakuryātkathañcana

taṃ dhigastu naraṃ devau bhavecca ṛṇavānbhuvi /
tasmādvāṃ vāñchitaṃ kiñciddātumicchāmi sāmpratam

ātmano ṛṇamokṣāya deveśau nūtanasya ca /
prārthitaṃ vāṃ pradāsyāmi yadalabhyaṃ surāsuraiḥ

bruvāthāṃ vāṃ manoddiṣṭaṃ prīto'smi sukṛtena vām /
śrutvā tau tu munervākyamabhimantrya parasparam

tamūcaturmuniśreṣṭhaṃ sukanyāsahitaṃ sthitam /
mune pituḥ prasādena sarvaṃ no manasepsitam

utkaṇṭhā somapānasya vartate nau suraiḥ saha /
bhiṣajāviti devena niṣiddhau camasagrahe

śakreṇa vitate yajñe brahmaṇaḥ kanakācale /
tasmāttvamapi dharmajña yadi śakto'si tāpasa

kāryametaddhi kartavyaṃ vāñchitaṃ nau susammatam /
etadvijñāya vā brahmankuru vāṃ somapāyinau

pipāsāsti suduṣprāpapā tvattaḥ samupayāsyati /
cyavanastu tayoḥ prāha tacchrutvā vacanaṃ mṛdu

yadahaṃ rūpasampanno vayasā ca samanvitaḥ /
kṛto bhavad‌bhyāṃ vṛddhaḥ sanbhāryāṃ ca prāptavāniti

tasmādyuvāṃ kariṣyāmi prītyāhaṃ somapāyinau /
miṣato devarājasya satyametad‌bravīmyaham

rājñastu vitate yajñe śaryāteramitadyuteḥ /
ityākarṇya vaco hṛṣṭau tau divaṃ pratijagmatuḥ

cyavanastāṃ gṛhītvā tu jagāmāśramamaṇḍalam

iti śrīmaddevībhāgavate mahāpurāṇe'ṣṭādaśasāhasryāṃ
saṃhitāyāṃ saptamaskandhe aśvibhyāṃ cyavanadvārā
somapānāya pratijñāvarṇanaṃ nāma pañcamo'dhyāyaḥ