Devi Bhagavata Purana · Chapter 7.4

aśvinīkumārayoḥ sukanyāṃ prati bodhavacanavarṇanam
vyāsa uvāca -
gate rājani sā bālā patisevāparāyaṇā /
babhūva ca tathāgnīnāṃ sevane dharmatatparā

phalānyādāya svādūni mūlāni vividhāni ca /
dadau sā munaye bālā patisevāparāyaṇā

patiṃ taptodakenāśu snāpayitvā mṛgatvacā /
pariveṣṭya śubhāyāṃ tu bṛsyāṃ sthāpitavatyapi

tilān yavakuśānagre parikalpya kamaṇḍalum /
tamuvāca nityakarma kuruṣva munisattama

tamutthāpya kare kṛtvā samāpte nityakarmaṇi /
bṛsyāṃ vā saṃstare bālā bhartāraṃ saṃnyaveśayat

paścādānīya pakvāni phalāni ca nṛpātmajā /
bhojayāmāsa cyavanaṃ nīvārānnaṃ susaṃskṛtam

bhuktavantaṃ patiṃ tṛptaṃ dattvācamanamādarāt /
paścācca pūgaṃ patrāṇi dadau cādarasaṃyutā

gṛhītamukhavāsaṃ taṃ saṃveśya ca śubhāsane /
gṛhītvā''jñāṃ śarīrasya cakāra sādhanaṃ tataḥ

phalāhāraṃ svayaṃ kṛtvā punargatvā ca sannidhau /
provāca praṇayopetā kimājñāpayase prabho

pādasaṃvāhanaṃ te'dya karomi yadi manyase /
evaṃ sevāparā nityaṃ babhūva patitatparā

sāyaṃ homāvasāne sā phalānyāhṛtya sundarī /
arpayāmāsa munaye svādūni ca mṛdūni ca

tataḥ śeṣāṇi bubhuje premayuktā tadājñayā /
susparśāstaraṇaṃ kṛtvā śāyayāmāsa taṃ mudā

supte sukhaṃ priye kāntā padasaṃvāhanaṃ tadā /
cakāra pṛcchatī dharmaṃ kulastrīṇāṃ kṛśodarī

pādasaṃvāhanaṃ kṛtvā niśi bhaktiparāyaṇā /
nidritaṃ ca muniṃ jñātvā suṣvāpa caraṇāntike

śucau pratiṣṭhitaṃ vīkṣya tālavṛntena bhāminī /
kurvāṇā śītalaṃ vāyuṃ siṣeve svapatiṃ tadā

hemante kāṣṭhasambhāraṃ kṛtvāgnijvalanaṃ puraḥ /
sthāpayitvā tathāpṛcchatsukhaṃ te'stīti cāsakṛt

brāhme muhūrte cotthāya jalaṃ pātraṃ ca mṛttikām /
samarpayitvā śaucārthaṃ samutthāpya patiṃ priyā

sthānāddūre ca saṃsthāpya dūraṃ gatvā sthirābhavat /
kṛtaśaucaṃ patiṃ jñātvā gatvā jagrāha taṃ punaḥ

ānīyāśramamavyagrā copaveśyāsane śubhe /
mṛjjalābhyāṃ ca prakṣālya pādāvasya yathāvidhi

dattvā''camanapātraṃ tu dantadhāvanamāharat /
samarpya dantakāṣṭhaṃ ca yathoktaṃ nṛpanandinī

cakāroṣṇaṃ jalaṃ śuddhaṃ samānītaṃ supāvanam /
snānārthaṃ jalamāhṛtya papraccha praṇayānvitā

kimājñāpayase brahman kṛtaṃ vai dantadhāvanam /
uṣṇodakaṃ susampannaṃ kuru snānaṃ samantrakam

vartate homakālo'yaṃ sandhyā pūrvā pravartate /
vidhivad‌havanaṃ kṛtvā devatāpūjanaṃ kuru

evaṃ kanyā patiṃ labdhvā tapasvinamaninditā /
nityaṃ paryacaratprītyā tapasā niyamena ca

agnīnāmatithīnāṃ ca śuśrūṣāṃ kurvatī sadā /
ārādhayāmāsa mudā cyavanaṃ sā śubhānanā

kasmiṃścidatha kāle tu ravijāvaśvināvubhau /
cyavanasyāśramābhyāśe krīḍamānau samagatau

jale snātvā tu tāṃ kanyāṃ nivṛttāṃ svāśramaṃ prati /
gacchantīṃ cārusarvāṅ‌gīṃ raviputrāvapaśyatām

tāṃ dṛṣṭvā devakanyābhāṃ gatvā cāntikamādarāt /
ūcatuḥ samabhidrutya nāsatyāvatimohitau

kṣaṇaṃ tiṣṭha varārohe praṣṭuṃ tvāṃ gajagāmini /
āvāṃ devasutau prāptau brūhi satyaṃ śucismite

putrī kasya patiḥ kaste kathamudyānamāgatā /
ekākinī taḍāge'smin snānārthaṃ cārulocane

dvitīyā śrīrivābhāsi kāntyā kamalalocane /
icchāmastu vayaṃ jñātuṃ tattvamākhyāhi śobhane

komalau caraṇau kānte sthitau bhūmāvanāvṛtau /
hṛdāye kurutaḥ pīḍāṃ calantau calalocane

vimānārhāsi tanvaṅ‌gi kathaṃ padbhyāṃ vrajasyadaḥ /
anāvṛtātra vipine kimarthaṃ gamanaṃ tava

dāsīśatasamāyuktā kathaṃ ca tvaṃ vinirgatā /
rājaputryapsarā vāsi vada satyaṃ varānane

dhanyā mātā yato jātā dhanyo'sau janakastava /
vaktuṃ tvāṃ naiva śaktau ca bharturbhāgyaṃ tavānaghe

devalikādhikā bhūmiriyaṃ caiva sulocane /
pracalaṃścaraṇaste'dya sampāvayati bhūtalam

saubhāgyāśca mṛgāḥ kāmaṃ ye tvāṃ paśyanti vai vane /
ye cānye pakṣiṇaḥ sarve bhūriyaṃ cātipāvanā

stutyālaṃ tava cātyarthaṃ satyaṃ brūhi sulocane /
pitā kaste patiḥ kvāsau draṣṭumicchāsti sādaram

vyāsa uvāca -
tayoriti vacaḥ śrutvā rājakanyātisundarī /
tāvuvāca trapākrāntā devaputrī nṛpātmajā

śaryātitanayāṃ māṃ vāṃ vittaṃ bhāryāṃ muneriha /
cyavanasya satīṃ kāntāṃ pitrā dattāṃ yadṛcchayā

patirandho'sti me devau vṛddhaścātīva tāpasaḥ /
tasya sevāmahorātraṃ karomi prītimānasā

kau yuvāṃ kimihāyātau patistiṣṭhati cāśrame /
tatrāgatya prakurutamāśramaṃ cādya pāvanam

tadākarṇya vaco dasrāvūcatustāṃ narādhipa /
kathaṃ tvamapi kalyāṇi pitā dattā tapasvine

bhrājase'sminvanoddeśe vidyutsaudāminī yathā /
na deveṣvapi tulyā hi tava dṛṣṭāsti bhāmini

tvaṃ divyāmbarayogyāsi śobhase nājinairvṛtā /
sarvābharaṇasaṃyuktā nīlālakavarūthinī

aho vidherduṣkalitaṃ viceṣṭitaṃ
yadatra rambhoru vane viṣīdasi /
viśālanetre'ndhamimaṃ patiṃ priye
muniṃ samāsādya jarāturaṃ bhṛśam

vṛthā vratastena bhṛśaṃ na śobhase
navaṃ vayaḥ prāpya sunṛtyapaṇḍite /
manobhavenāśu śarāḥ susandhitāḥ
patanti kasminpatirīdṛśastava

tvamandhabhāryā navayauvanānvitā
kṛtāsi dhātrā nanu mandabuddhinā /
na cainamarhasyasitāyatekṣaṇe
patiṃ tvamanyaṃ kuru cārulocane

vṛthaiva te jīvitamambujekṣaṇe
patiṃ ca samprāpya muniṃ gatekṣaṇam /
vane nivāsaṃ ca tathājināmbara-
pradhāraṇaṃ yogyataraṃ na manmahe

ato'navadyāṅgyubhayostvamekaṃ
varaṃ kuruṣāvahitā sulocane /
kiṃ yauvanaṃ mānini saṅkaroṣi
vṛthā muniṃ sundari sevamānā

kiṃ sevase bhāgyavivarjitaṃ taṃ
samujjhitaṃ poṣaṇarakṣaṇābhyām /
tyaktvā muniṃ sarvasukhāpavarjitaṃ
bhajānavadyāṅgyubhayostvamekam

tvaṃ nandane caitrarathe vane ca
kuruṣva kānte prathitaṃ vihāram /
andhena vṛddhena kathaṃ hi kālaṃ
vineṣyase mānini mānahīnam

bhūpātmajā tvaṃ śubhalakṣaṇā ca
jānāsi saṃsāravihārabhāvam /
bhāgyena hīnā vijane vane'tra
kālaṃ kathaṃ vāhayase vṛthā ca

tasmād‌bhajasva pikabhāṣiṇi cāruvaktre
evaṃ dvayostava sukhāya viśālanetre /
devālayuṣe ca kṛśodari bhuṅkṣva bhogān
tyaktvā muniṃ jaraṭhamāśu nṛpendraputri

kiṃ te sukhaṃ cātra vane sukeśi
vṛddhena sārdhaṃ vijane mṛgākṣi /
sevā tathāndhasya navaṃ vayaśca
kiṃ te mataṃ bhūpatiputri duḥkham

śaśimukhi tvamatīva sukomalā
phalajalāharaṇaṃ tava nocitam

iti śrīmaddevībhāgavate mahāpurāṇe'ṣṭādaśasāhasryāṃ
saṃhitāyāṃ saptamaskandhe aśvinīkumārayoḥ sukanyāṃ
prati bodhavacanavarṇanaṃ nāma caturtho'dhyāyaḥ